Page ix

INTRODUCTION

The following selection of Ancient Petitions relating to Nor

Page x

thumberland has been compiled from the Special Collection of Ancient Petitions in the Public Record Office, London. This class of record, while based on a genuine archive group of Parliamentary Petitions, originally preserved in chronological order, has been considerably augmented by similiar petitions from other archive groups. Successive archivists have also disturbed the chronological order by the introduction between 1824 and 1853 of an alphabetical arrangement by petitioners' names, a process repeated with each new accession of material. The final major re-arrangement came in 1890, when to facilitate the work of Maitland on the Parliament Roll of 1305 Memoranda de Parliamento the basic series of Parliamentary Petitions was re-arranged, and of the 9,563 petitions surviving, 1,746 were transferred to other classes including Chancery Warrants, Parliamentary Proceedings and Ancient Correspondence. In the interests of uniformity, mixed files of petition, warrant and inquisition were arbitrarily separated into their constituent classes and numerous requests ranging in date from the reigns of Henry III to that of Elizabeth I were absorbed from Chancery Miscellanea into Ancient Petitions. Only the petitions added from the Exchequer (King's Remembrancer) were kept separate by the prefix E. to their numeration, and here in some cases the original files were bound in their original order instead of being broken up. By 1924 the class numbered 17,682 items, of which a reasonable proportion had been assigned their approximate date.

Page 1

SECTION I

LICENCES

Page 3

2

A.P. 4420

De Relef demaunde pur treys feez enters des heyres syre Rauf de Gaugy, Robert de Clifford, heyr Rauf de Gaugy, il ne tent fors les treys parties del fee e les heyres syre Adam de Gissemen tenent fee e demy e la quarte partie de vn fee, Gilbert de Midelton' tent la meyte de vn fee, e checun tent enchef du Rey: Dunt Robert prie vostre remedie pur deu, ke il pusse fere pur taunt com affert a les treys parties de vn fee.

Endorsed: videantur rotuli de scaccario super feodis baronie de Gaugi et si illi uel alii teneant feoda illa et si de Rege sine medio: et adiornentur tenentes in scaccario in quindenam Pasche et interim habeant pacem.

Page 4

After 25 April 1279.

3

A.P. 10936

Par ceo ke nostre seygnur le Roi ad grante a son pople ke il vult ke la grant Chartre lur soit tenu en tuz [poi]ns, si pri la communnaute de Norhumbr' a nostre seygnur le Roi ke il voile desaforester lur boys et lur terres en Norhumbr' ke sunt tenuz en forest encontre les poins de la grant Chartre. Et de sicum le Roi nad boys ne soile dedens cel Cunte ou il aite foreste et desicum le Roi prent poi de preu de cele foreste et les pouers gens du paiis a ki les boys sunt et les terres vnt grans ennoies et grant damages par acheson de cele foreste et le Roi poi amende de lur grant damage, si priraient cele gens a nostre seygnur le Roi pur deu ke il lur voile les auandist forestes desaforester et pur deu lur si li plest ren prendre pur ceo fere et pur le amur de deu le face.

Page 5

Endorsed: extendatur valor per aliquos ex parte Regis

c. 1280.

Page 6

6

A.P. 15387

Wyllam de Felton' prie au Rey ki il puse auer la tere ke il ast achate de Rychard de Brafferton' en la vile de Matfen fesaunt meme la seruice au Rey k' le auaunt dite Rychard fist pur memes la tere kar il est feffe de la tere de meme celuy Rychard.

No endorsement Before 1293.

Page 7

7

A.P. 9633A

A nostre seignur le Rey pri Rauf' fiz Willam ke par la ou il granta a Jon le fiz William de Craystock de feffer le auandit Rauf' de la purpartie del maner de Morpathe o les apurtenans e ou le awoueson del eglise, e meme cely Rauf' a refeffer le auant dit Jon de la purpartie o le auoueson auantdites a terme de sa vye, e fyne ne se poet leuer sur purpartie par bref de la Chauncelerie mes del maner entere, kyl voil mand' au Chaunceler par sa lettre ky ly grante bref a les Justices de leuer la fyne del maner entere si cum le auant dit Rauf' eyt seysine del maner entere ke en autre maner ne se poet la fyn leuer.

No endorsement 1298.

8

Page 8

A.P. 10896

A nostre seignur le Rey prie le Euesque de Durem quil voile comaunder si luy plest quil eyt la chartre du graunt quil aid fet la son merci de la vouesone del Eglise de Morphat a la sustenaunce de ses Chapeleins Chauntauntz en la Eglise Dauclaund.

Endorsed: le Rey ad graunte cete peticion

c. 1299.

9

A.P. 10962

En Remembraunce seignour Rey pur deu del pount de Corbrigge qe vous voylez doner au pount acun Meryme del boys qe fut a sire Johan de Baylolf en le Hayning en la Baronie de Biwelle qe graunt auuncie e gran pru serreit au pays si le pount fut redresse.

le Roi ad done as freres pur lor graunt busoigne a ore e ne ad mie consail de plus ore doner en cel boys, taunt qil eit autre chose ordenee.

Endorsed: Coram Rege

Page 9

c. 1298/9.

Page 10

11

Page 11

A.P. 11606

A nostre seingniur le Rois si luy plest pri le soen bachelor Thomas Grey qe ile woyle graunter a Johan de Ewyr ses teris qe sount sese en la meine le Roy sicum mon seingniur me premist eide de marier vne de mes feylis: vous pri sire pur lamur de dieu de vostre grace qi ile poet auoir ses teris deliuyrs hors de la meine des eschetours.

A nostre seingniur le Roys pri le son bacheler Thomas Grey qile luy lesser le maner le Duffelde qe fust en la meine sire William de Ermyn pur le estent rendaunt taunqe a le age de lenffaunt purceo sire qe lenffaunt ade espuse ma feile.

No endorsement c. 1325.

12

A.P. 8310

A nostre seignur le Roi et a son conseil prient ses poures gentz de Corbrigg' qil leur pleisse granter vn pontage en eide' de reparailler leur pont qe est en point de perir sur defaute de eide.

No endorsement ? 1327.

Page 12

13

A.P. 7820

Endorsed: soit fait a terme de .vij. auns

? 1348.

14

A.P. 12539

Ista billa concessa est per Regem

A nostre tresexcellent et tresredoute seignur le Roy supplie humblement vostre poure oratour Piers Angrym qe come vn Nichol Ellerker iadis burgeys de la ville de Noef Chastell sur Tyne par licence de vostre tresnoble aiel qe dieu assoille, founda vne chaunterie de la value de .vj. marcz par an en la eglise de seint Nicholas de mesme la ville, a doner a vn chapellein pur luy pur son temps et pur ses heirs en temps auenir pur chaunter pur lours almes, et vn Johan darrein heir del dit Nichol dona mesme la chaunterie au dit Piers, liquel Johan murrust sanz heir de soun corps ou nul autre heir de soun linage; sique dehors la donacioun del dite chaunterie appartent pleynement a vostre tresexcellente seignurye. Et depuis

Page 13

par vostre treshaute roialtee est la dite chaunterie conferme au dit Piers: Et pur ceo qe le dit Piers auoit edefie vne chambre en vostre wast de la longure de .xx. pees ioust la cimiterie del dite eglise pur entrees del dite chaunterie as grantz coustages du dit suppliant de ses biens propres: Pur quei pleise a vostre tresdigne hautesce granter au dit suppliant qil puisse paisiblement enioier la dite chambre a terme de sa vie et en outre perpetuelment appartener a la dite chaunterie pur dieu et en oeure de charitee.

c. 1388.

Page 14

SECTION II

EMERGENCY ADMINISTRATION

Page 16

15

A.P. 3214

Por ceo qe cheskun homme est tenu a garder soen serment lealment en tous poinz pri le viscont de Northumbreland al consail le Rei qe eus lui maundent coment il doit ouerer en droit del Prior de Tynemue, Monsire Edmund Frere le Rei, sire Gilbert de Umframuill' e sire Water de Huntercumb, qui claiment de auer Wayfs en leur terres, par quel garant il ne set.

Derechef le Rei manda as baillifs de Nofchastel sor Tyne si com il fist aillors en la terre, qe eus faissent prendre ses droite prises de vins en leur vile, les ques prises solaint en tous tens estre aportenant a soen Chastel en meme la vile, e nemi as baillifs de la vile ne a leur franchise. E por cel mandement ne sofrent mie les baillifs qe le viscont preigne prise de vins ne por le chastel garnir ne a sa sustenance demeigne. E de ceo pri le viscont amendement.

Derechef la prisone le Rei est si charge e si replenie des prowrs e de autres prisons pris en tens le Rei Henri qe apaine saueroit le viscont ou emprisoner dis prisons, si eus feusent ore pris, e ceo serroit grant peril. E bien le sachent tote gent, qe si ces prisons feusent hastiuement deliures, le Rei gaignerait grant deners. E si ceo non, grant partie de eus morront en la prisone e le Rei serra malement perdant.

Page 17

Derechef le Chastel le Rei auerait mult grant mester de hastiue amendement e de grant, qe pur la grant brekke del Mur, qi chaist passe a ia pres de deus aunz, qe pur la nouele porte amender, e les autres mesones del chastel: Dunt il serrait certainement mult al pru le Rei si lui pleust qil comandast a mon sire Johan de Vescy ou a autre de ki il sastast, qe eus veissent lamendement qe le chastel demaunde bosignablement, e le faissent sauer au Rei. E si ceo non, le Rei iporra auer damage.

Derechef porceo qe viscontes ont iurez de maintenir le franchises le Rei en tuz poinz a leur poer Ws fet a sauer le viscont qe vn pescur qe maint en la franchise le Prior de Durreaume, Rogger de Staurier par noun, e ses deus fiuz meffesurs en leu de Tyne apendant al chastel le Rei plusur fiez e a costome nutanter pescherent les ewes le Rei en tems defendu a grant damage le Rei e du payis, les ques meffesurs plusur fiez repairerent en la vile de Nofchastel, par quai le viscont manda al mair e as baillifs de la vile qe eus les cors de ces meffesurs faissent attacher de fere amende au Rei de si grante trespas. E porceo qe le mair a les baillifs rien ne ent firent, comanda le viscont a ses serianz iures qe par leur defaute atachasent cele gent: E les serianz alerent en la vile e trouerent vn de meffesurs, cest a sauer Rogger de Staurier, e celui por soen trespas pristrent e menerent uers le chastel le Rei e a ceo soruindrent vne gent de la vile, cest asauer Alain Orre, Alisandre le Furbeur e plusurs autres e a force e a poer rescustrent le meffesur hors des mains les serianz e le menerent deuant le mair e les baillifs. E quant le viscont ceo sauoit, il en sa propre persone ala al mair e as baillifs e lur mustra le trespas e lur amonesta depar le Rei qe cel trespas faissent amender e reseisir le Rei de celui qe par ses ministres fu pris e par lur defaute: E lur fu dit depar le Rei qe ne fu pas a eus de fere rescuse de nul meffesur qi par le viscont feust pris. E eus de ceo nule force firent, ne le meffesur ne rendirent mes le lesserent aler quitement, sanz amendes fere de soen primer trespas e del despit qe eus memes auant fet au Rei. E de ceo pri le viscont qe sil semble al consail le Rei qe cel trespas demand amendes, qe soit amende en due forme, e il est auis a qeuxe gent qe le trespas est bien grant.

No endorsement ? 1275.

Page 18

16

A.P. 10900A

Le vescunte de Norhumbr' se playnt a nostre seingur le rey del Mayre du Newchastel su tyne e de bayales e dela comune de la vyle, ke la ou le vescunte fu charge des chateus a feluns en le ayre de Justices ausy ben a leuer de la vyle du chastel cume ayllurs du cunte, e le vescunte souentefayz les amonesta ke il paassent au roy ceo ke il ly deuaynt e il ren ne volaynt fere, le vescunte sur ceo comanda a serganz le roy ke il les alassant destreyndre pur la dette le roy ausy ben pur la sumunse del eschekere cume pur autre dettes le roy, e hor de la vyle du Newchastel ben a cinc cenz hommes e a cheual e a pe a force e armes cuntre la pes e hors de lur franchyse e la rescusse fyrent, e les sergans le roy e les frans hommes batyrent e naffrerent e vylaynement treterent e lur armes les roberent, e lur burses e saytures o le auer le roy emporterent e pur mort les lesserent en la place gisant, e ceo fu fet en la presence le vescunte e le coroner e deuurz chevalers e frans hommes du cunte e de ceo prye le vescunte a Nostre seingur le roy e son cunsayl ke il voyl fere atayndre ce fet par bon pays, et mettre tel amendement cum sa volunte est, e come ili apent: issi ke sez bailiz pussent autre feiz fere son comaundement saunz mort e mahayn.

E estre ceo le vescunte a muz de autres purprestures e trespas a mustrer a Nostre seingur le roy, ke ceus du Neuchastel vnt fet cuntre ly e sa corone a son grant damage e desheriteson.

No endorsement 1279.

Page 19

17

A.P. 13455

A tres noble prince e lur trescher Seygnur Sire Edward' par la grace de Dieu Roys Dengleterre Seygnur Dirlaund' e Ducs Daquitayne les soens si ly pleat Maire e Baillifs e la Communaute de Neuchastel sur Tyne saluz, reuerences e honurs com a lur cher seygnur. Pur ceo cher sire qe nous entendimes par les freres du Carme de Noefchastel sur Tyne qe vous volyez estre acerte par nous si meisme les freres peussent demourer en le lyu la ou il demorent a honestete e esement de eus e saunz damage e saunz greuaunce de la vile, sire nous vous fesoms a sauer qe ilokes ne purront il demorer a honestete ne a esement de eux, ne saunz graunt damage ne greuaunce de la vile: Pur ceo qe le mur de la vile passera dreyt ioynuant le front du quer de lur eglise, issi qe lur lumer partaunt serra estope, e ensement couent il qe vne tur seyt sete la ou lur eglise esta, si la vile deyt estre byen aferme. De autre part sire nous vous fesoms asauer qe il ny ad nul lyu en tote la vile qe seyt si couenable, si ese, ne si honeste pur les freres auantditz a demorer, ne a meyndre damage ne greuaunce de vous ne de la vile, qe ne seyt le lyu des freres de sak' dunt vous estes patron, e ou il ny ad qe vn frere demorant. E pur cea sire si le vous plest, nous voillez de ceste chose vostre volunte commaunder, e qe ent deyt estre fet endroyt des freres du Carme auauntdites. Done a Neuchastel sur Tyne le vendresdi procheyn apres la feste de la Purificacion nostre dame, lan de vostre regne vingt e vtisme.

Page 20

Endorsed: Rex concedit quantum in ipso est, et scribatur Episcopo supplicando quod concedere velit assentire.

4 February 1300.

18

A.P. 8014

Ces sont les choses que touchent lestat du Chastel de Baumburgh' pur le Roy cuntre Thomas Legger.

Au Roi e a son conseil Moustre Johan Counte de Warrene gardein du Chastel de Baumburgh' que Thomas Legger vous ad deserite de la seyngurie de trois bondes de la vile de Bendhale apurtenaunz au chastel de Baumburgh' la ou yl meyme est vostre dreynge e nul estat de seyngurie ne ad en meyme la vile, dount mut de vos genz a moy vindrent pley[ndre] graunz de chose quil aueit fet encuntre la franchise de vostre chastel, dount ioe ly fesoy aresoner deuaunt moy de coe quil aueit purprise desus vostre seysine e vostre seyngurie en vostre deseritesoun, a la quele chose yl ne voleit respoundre ne a le ley sey justicer, e par vnt ioe ly ay comaunde a la garde mon Conestable taunt que vous en voillez vn des voz envoyer oue le Conestable du Chastel par vostre commissiun de oyr e de terminer la grant duresce que yl ad fet a vos ligge genz a vostre

Page 21

deseritesoun, pur ceo que ieo meymes ne fuy my ore de leyser pur vostre guere a ceste chose attendre. Ceste chose voillez comaunder pur sauuer lestat de la franchise de vostre chastel en lestat quil ad este puys le tens dount yl ne ad memoire. E par genz de meyme la fraunchise voillez comaunder que la chose seit enquise e noun pas par foreins, e issy que hostif remedy seit comaunde pur les poueres que pleindre se vollent, e issi que totes gentz seiunt garniz que pleindre se voillent deuenir deuaunt eus au certein iour.

No endorsement 1303.

Page 22

19

A.P. 8008

A counsail nostre seygnur le Roy moustrent les Baillifs leuesk' de Dureme de le fraunchise de Norham, as quels nostre seygnur le Roy ad maunde par ses deus brefs de Reseysire Ailmere de Hawden e Marye qe fust la femme Williame de Maleuile des teres e des tenemenz qe eux tindrent en la dite fraunchise al comencement de la Gere descoce, qe memes cealuy Almere e Marye tyndrent certein tenemenz de le dite Euesk' en la dite fraunchise par homage e fealte: E eaux encountre lour homage e lour fealte vindrent en la dite fraunchise, la quele fraunchise fust tere de pees, e les teres le dite Euesk' e ses tenaunz arderent, destruierent, preirent e octirent les genz: Par quay le dit Euesk' les fist demaunder en sa court de Norham de counte en counte, e eaux sei absenterent taunt ke par la ley furent vtlaygez, e le dit Euesk' apres la vtelagerye pronuncie fist seysire lour teres e lour tenemenz e hors de sa seysine enfefra monsieur Johan le fiz marmeduk', Monsieur Huge de Paunton', e altres de ses ministres pur lour seruice par sa chartre de les teres auauntdites e des altres en meme la manere forfetes, issint qe les dites baillifs celes genz issint feffez par la chartre le Euesk' ne osent disseysire ne engettre saunz leuesk' qe est oltre mere en la proteccioune nostre seygnur le Roy ou saunz especial mandement de lui, e de ceo prient respite de la grace le Roy taunk' a la venue leuesk'.

No endorsement

Page 23

1304.

20

A.P.E. 509

A nostre seignur le Roy et a son conseil moustre Robert de Wodehouse, nadgaires Eschetour de dela Trente, qe come le dit nostre seignur le Roy luy manda par son bref qe par la reson des ordenances feist reprendre en sa meyn le manoir de Heton' et vn toft et treis acres de terre en Norham el Contee de Northumbr', qe furent a Juliane de Grey et qe par lenemyte et la rebellete Johan fiuz et heir la dite Juliane sicome eschete a la meyn le Roy deuyndrent, et les quelx Manoir toft et terre nostre seignur le Roy auoit auantdone a Waltier de Wodeham et a ses heires por touz iours, par la reson de queu bref le dit Eschaitour manda a Johan de Aleinceles, son southeschetour el dit Contee, quil feist reprendre les ditz tenementz en la meyn le Roy issint quil poeit respoundre des issues, par quay il ala au dit Manoir et feseit illoeqes demonstrer son garant et demorra lieinz vne nuyt por tenir seisine de par le Roy, Mais il ne troua nul homme des tenauntz ne del pays qui luy voleyt estre responant nattendant por la seisine meyntenir par la reson qe les ditz tenementz estre et sont en la Fraunchise Leuesqe de Duresme, la queu chose il monstra as baillifs le dit Euesqe de la Fraunchise de Norham et puis al Euesqe meismes et de ceo luy pria eyde, Mais ly ne ses baillifs ne luy voloient de se nient de plus estre responantz

Page 24

nentendantz ne luy suffrir administrer les choses depar le Roy, Issint quil ne poeit les ditz manoir ne terres estendre ne nule issues al oeps le Roy prendre: Mais le dit Euesqe les est entree sur celle seisine, et pria le dit Eschetour par ses lettres qil luy suffrisist tenir le dit Manoir oue les aportenances, a respondre au Roy des issues, si ensi ne feust, quil peut recouerir de nostre seignur le Roy les forfaitures de sa Euesche auantdite, la queu chose le dit Eschetour luy granta a sa requeste. Et puys parmy luy et hors de sa seisine, sire Thomas de Grey les est entree et les issues emprent, en preiudice du dit nostre seignur le Roy: car il cleime droit en meismes les tenementz par descente deritage. Et ceste destourbance moustra le dit southeschaitour au visconte de Northumbr' en plein Contee et pria eyde dostier celz qensi furent entrez sur le seisine le Roy a quay il ne poieit attendre, dont le dit Robert prie eyde et remedye. Et il leust auant priez, mais il ne poieit vnqes auant ore faire le dit southeschaitour venir acompter, par quay il quidroiet qe le dit southeschaitour sey eust chargee des issues de meisme la terre.

Peticio Roberti de Wodehous'

No endorsement 1312.

Page 25

21

A.P. 10882

A nostre seignur le Roi moustre son lige vadlet Thomas de Fetherstanhalgh' qe come a son commandement lauantdit Thomas emprist a faire et reparailler le Pele de Stauworth selonc les endentures faites entre nostre dit seignur le Roi et lauantdit Thomas a prendre Centz liures pur la fesaunce, pleise a nostre seignur le Roi a entendre qe selonc ce qe louereigne est comence il ne le puisse perfournir, sil ne mette ses biens et chateux demene, et issi par sa fole empris il serra destrut sil neit eide de la bone grace le Roi, qar merim et pere et tote autre chose au dit ouereigne appendante est outre desmesour a carier.

Ensement pleise a nostre seignur le Roi entendre qe le dit pele nest mie vitaille ne herberge, par qei pleise a lui commander de cestes choses sa volunte.

Ensement prie le dit Thomas qe come il neit la garde du dit pele forsqe iusqes a la feste seint Piere proschein auenir qe nostre seignur le Roi comande outre coment le dit pele serra garde de pees ou de guerre et par qi.

Ensement prie le dit Thomas qil lui pleise granter sa proteccion pur Aleyn Cape surueour des ouereignes des touz les ouerours du dit peel, issint qil soit quites de touz maneres des pledz tant come il demoert issint en le seruice nostre seignur le Roi en la Marche Descoce, le quel Aleyn ne poet estre de le dit ouereigne, sil ne soit, a grant damage du Roi et arerisement du dit ouereigne qi busoigne de molt bon esploit et auisement.

No endorsement 1314 x 1316.

Page 26

22

A.P. 10871

A nostre seignur le Roi et a son conseil moustrent les gentz de la garde de Baumburgh' en le Conte de Northumbreland, qe par la ou il vnt parle oue le Conte de Morref' lieutenant Robert de Brus por auoir vne soeffrance de guerre auxi come auant ceux houres vnt fait, qi les ad grante iesqes as mes de la Pasch' por deux Centz seissant et dys liures, et sire vostre conestable du chastiel de Baumburgh ne voet cele suffrance de guerre soeffrer si homme ne lui doigne taunt de leur, qil ne poont en nule manere acendre de qei, dont il vous priont sire remedie sil vous plest por vostre poure poeple. Ensement vous moustrent et prient les dites gentz qe par la ou il sont venuz a vostre dit chastel por socours auoir et leur petitz biens qe leur sont remis [sauuer] et le dit chastiel defend' vostre dit conestable enprent por chesqone pees de Wast en le dit chastel .xij. den' ore come autrefoitz [nul conestable] ad fait qe vnqes mes ne feust veu, et quant il vnt porpaie il detient leur vitails dont il deuerent viure […] , dont il priont remedi. Ensement vous moustront les dites gentz qe les porters et les autres du dit chastel [demandent] fines et extorseons al entrer et al issu du dit chastel et a les demorantz leins par nuyt et par iour qil ne s […]

Page 27

qil vnt receu et por ceo vous priont il remedie. Ensement vous moustront les dites gentz qe par la ou […] leur places profitablement et vnt paie por les places, il les oste par poer et le baille as a [ Ensement les dites] gentz vous moustrent qil sont enemys dune part et par le dit conestable dautre parte qil [serront anientis si vous] ne mettez hastiuement remedie. Et Auxint sire vn Jack' le Irys et ses compaignons […] chastel et pernent vitails et autre biens santz rien paier, dont il prient remedie et […] uirre qil ne rendra le chastel anuly pur nul mandement le Roy.

Endorsed: Assentu est par le Conseil qe le brief de oir e terminer seit grante a certeins genz nent suspecinous de oir e terminer le trespas le dit Conestable e les pleintes.

c. 1315.

23

A.P.E. 389

A nostre seingnur le Roy e a son consail prient Dauid de Langton' e Thomas de Heton' qe com Roger Puruays, Robert le fiz Richard e Robert de Bolton' furont pris en les Piles de Bolton' e de Wytingam encountre le Roy par les garnisons du Chastell' de Bam

Page 28

burg', Alnewyk' e Werkword', le quel Roger Puruais est apert Traytur le Roy e ad leue tryfez encontre le Roy en sa terre demen e vne de greniour mefesores de la Marche: Par qay il prient a nostre seignur le Roy e a son Consayle qe il voluent commander qe le dist Roger sayt penduz e traynez e qe le Roy voil commander sa volunte endrayst desautres.

No endorsement c. 1318.

24

A.P. 2888

Page 29

A nostre seingnur le Roi prie le seon Bacheler si luz Plest Johan de Lilleborne qe il veile comander qe hastiue remedie soit mys sur les defautes aluy et ason consail mestres de son Chastel de Donstanborgh car ces bones gentz y demorauns sount en graunt peril et ne voilent demorer si amendementz ny sont mys.

Item prie qe il puce eistre seruy de ces gages qe ly sount adirere pur ly et ces gentz de six simayngnes et qe il veille auoir regard qe les vitailes queles il prent pur ces gages luy sount mis a autel pris com ceux ne demergent en la ville de Neoph Chastel les preingnent, et si les fest il carier sur ces costages et sur son peril tauntqe a Chastel de Donstanborgh auaundist.

Item prie qe com il estoit seissi a terme de sa vie de quarante marchez de rent assisse en la ville de Hynkele en le counte de Leicestre de don le counte de Lancastre tauntcom il vesqutt' et hore apres la mort le dit count vynt le Escheteyr et ad seissi celle rente en les meynes nostre seingnur le Roi, qe il veil comander qil se hosce et qe il puce icyer sa dite rente.

Item prie qe com ly, ces gentz et ces teres soient nettement destruit par les enemys Descoce qe il veille hordiner pur son estat en quelle manere qil pleise a sa seignerie.

Item prie qe il puce auer protexions pur luy et ces gentz queles sount en le seruice nostre seingnur le Roy en sa companie, cest asauer William de Clyue parson' de Angraham, Robert de Cadoll', et Roger de Weston'.

Endorsed: Fiat

1322 x 1326.

Page 30

25

A.P. 8644

A nostre seignur le Roi et son conseil moustrunt ses pours chapelleins William de Tyndale, Adam de Langcestre, Adam de Leuyington' et Andr' de Chollerton' chanouns de la Meson de Jedeworth' qe come eux et lour Abbe par la reson qils furint neez en Engilterre Robert de Bruys et son pouer les enchaca hors de la terre Descoce apres la Batayl de Striuelyne et si sount ils en fait puis demore a la foi nostre seignur le Roi en Engelterre et vesquirint des esglese et possessiouns en Engilterre qe fureint apurtenantz a la dite Abbay de Jedeworth des quex esglise et possessiouns pristerount lour sustenaunz tanqe la mort le dite Abbe qe mourust ore au .iiij. aunz passes, et apres la mort le dite Abbe furent les dits esglese et possessiouns seises en la mayn nostre seignur le Roi, cest a sauoir la esglese de Artureth' la quel ils auoint en propres vses, la esglese de Albotley la quel ils auoint en lour donison et le Manere de la Leye en Tyndale ou les apurtenantz, et la terre de Thorquene en Redesdale, les queux esglese le Roi ad done et presente par la ou bien lui fuist par le conseil et procurment sire Hugh le Despenser, le Manere del Leye et les terres auaunditz demourount vnquor en la seisine le Roi, par quai ils demourent et sunt vncore par la morte le dite Abbe en pouerte, anguisse et tout anientis: Dount ils priount a nostre seignur le Roi ordeigner grant remedie qils pusint de les auaundit esgliese terris et possessiouns auoire lour sustenaunce.

Endorsed: coram Rege

Il semble au conseil sil pleise a nostre seignur le Roi qe le Roi deueit ordiner' pur eux couenable sustenaunce des terres et possessions qe appent de lour Meson. Cancelled

Seient les tenementz contenues en la peticion baillez a William de Vston' a trouer a les chanons leur sustenaunce a la mountaunce

Page 31

de .xx. mars, et de ceo qe purra plus leuer de meisme les tenementz respoigne au Roi.

Irrotulatur

coram Rege

c. 1323.

26

A.P. 6471

Au consail nostre seignur le Roi moustre Roger Maduyt ore viscount' de Northumbr' qe le Chastel de Noef Chastel sur Tyne est si

Page 32

deschaetz et si lesse a noun chaleir qil nad en tout le Chastel vne soule meson entiere ou len puisse auoir recept', ne nulle porte qe puisse estre close, de quei le consail nostre seignur le Roi se voille auiser de ordeyner remedie desicom tout le pais est ore com de guerre. Auxi moustre le dit Roger qil ne poet aler en le pais pur faire loffice de viscount, si ceo ne soit afforcement oue gentz darmes: Par quei il prie qe le consail voille ordeyner qil puisse auoir gentz darmes des issues de sa ballie pur mayntenir le dit office.

Endorsed: Coram Rege

Eit bref de mettre .xx. li' des issues de sa baillie en le reparaillement du dit Chastel, par vewe et tesmoignance etc.

1332 x 1334.

27

Page 33

A.P. 5229

Endorsed: Il semble au conseil qe le Roi doit faire liuerer les dits biens as ditz Meir et Burgeys pur sauuer eux de damages et qe si riens des ditz biens soit despendu en la seruice le Roi qe sur de ceo soit fait as ditz Meir et Burgeys.

1333-4.

28

A.P. 10439

A nostre seignur le Roi et son conseil pri Johan de Denton' qe come il estoit eslu Mairs de la ville de Nouel Chastael sur Tyne par les Eysnes et les meutz vauuz de la dite ville le Lundy proschein apres la fest de seint Michel dirrain passe a durrir par vn an et mesme le iour par ascuns Jeuenes gent' de mesme la ville voluntriuement feust eslu vn Richard' de Acton' Maire de mesme la ville, et sur queux elleccions grantz debatz et perilz surdent de iour en autre, qe plesse a nostre dit seignur le Roi et son conseil comander as ditz Johan et Richard' qe lun ne lautre ne se medlent del office auantdit et qe la sauegarde de la dite ville soit baille a Gilbert Haukyn, Piers Grapere, Robert de Haliwell et William de Acton' baillifs de mesme la ville iureez a respoundre as touz perilz, et a comander a dit Richard de Acton' deliuerer les cliefs des totes les portz de la dite ville as ditz Gilbert, Piers, Robert et William, issint qe les ditz Gilbert, Piers, Robert et William puissent respoundre de

Page 34

la sauegarde et de touz les profitz prouenantz de la dite ville saunz desturbance de nully sur payne de forfacture de vie et de membre tanque nostre seignur le Roi et soun conseil eient des choses susditz ordeiner lour voluntez.

No endorsement October 1341.

29

A.P. 6453

A nostre tresexcellent et tresredoute seignur le Roi et son conseil Moustront ses lieges Mair et Baillifs et Comunalte de la ville de Noef Chastell' sur Tyne qe com la dite ville est assis bien pres la marche descoce et enbosoygne pur sauf' garde du dite ville reparacion dez mures et fosses, stuffure et plusours autres garnismentz de guerre, come est troue par enquest pris deuant le sieur de Percy qe ore est, par vertu de Comission nostre seignur le Roi a lui direct denquer sur les defautes de dite ville et retourne en la Chauncellarie, et pur ce qe tresgrande perde et damage serroyt au dit nostre seignur le Roy et a tout son roialme si mesaueigne au dite ville qe dieu defende, les ditz Mair et Bailifs et comunalte as diuerses parlementes ont moustre les defautes et meschiefs suisditz ent priant remedie: Par qay les ditz Mair', Baillifs et Comunalte vnquore si supplient a

Page 35

dit nostre seignur le Roy et son conseil des defautes suisditz hastif' remedie ordeiner, eiant regard' qe pluis qe la tierce partie de dite ville est degaste et deshabite par pestilence, issint qe les gentes en la dite ville demurantz ne sont de corps ne des chateux suffisant pur defendre vne quarter du dite ville, en cas qil estoit assaille par enemys.

Endorsed: xiiij

? 1373.

30

A.P. 6428

A nostre tresredoute seignur le Roi et a son sage consaile mous

Page 36

trount ses lieges meire et pouere communalte de la ville de Nuf Chastell' sur Tyne qe come la dite ville quest vn key de les parties de North Engleterre est deuenu denz poy de temps la disme partie [w]astee par cause de diuersez pestilence des gentz illoeqes inhabitauntz et la dite communalte grauement est en pouree par le taxe et taillage sour eux souent south le […] mes fosse et le graunt pount de Tyne ne point destre a grant meschief, en cas qe les enemys descoce par terre ou les enemys de France par meer […] eunt la dite ville par nuit ou par iour sicome leuesqe de Hereford, le Count del Marche, le Count de Northumbrelaund, Richard le Scrop' Chaunceller nostre dit seignur le Roi et plusours autres seignurs illoeqes reparauntz aiount bone et verray conissance des meschiefs susditz, issint qe si ne seit qe le dit pount soit hastiment reparaille et redresse de les defautes et remedie ne soit ordeigne de toutez les autres defautes des mures, bretages et fosse auaunditz qil est grant doute de mesme la ville et pount en temps auenir, qe pleise a nostre dit seignur le Roi et a son sage consaile graunter vne some dargent pur faire vn toure sour le dit pount et mures du dit pount vers la chastell, le quel chastell' en est assise dens la ville siqe ascuns meschiefs aueignent au dite ville qe dieu defend, qe par cel toure sur le dit pount et mures du dit chastell' porrount estre bien garde en saluacion de la ville susdit, la quel toure et mures les seignurs suisdit illoeqes venauntz et veiauntz la meschief et peril du dite ville, semblerent le soueraigne reouerere de mesme la ville les dites choses estre faitz, et sur ceste matere vne bille fuist pursuy en parlement tenuz en le terme de seint Michel lan nostre dit seignur le Roi primer a quele temps vn certein somme fuist graunte et nulle execucion de ceo eut fait par taunt qil nauoient rien de cele graunt a cele temps, sur qoi les ditz Meire et communalte priount ore pur lamour de dieu et en oeure de charite vn certein somme pur faire les di[tes pount et] mures en se manere suisdit, eiaunt regard a ceo qils ount redresse portes, fosses et mures par tout leur pouere si graunt meschief a leur [dite ville] deit oster; si qe ils ne purront sance soueraigne aide nostre dit seignur le pluis faire et outre cels costages ils sount dettes chescun an pur le ferme du dite ville .C. li' .xiij. s. .iiij. d. sance autres diuerses costages.

No endorsement 1378-80.

Page 37

31

A.P. 15260

Pleise a Chaunceller nostre seignur le Roi de graunter Commissioun a duc' de lancastre, Count de Northumbr', sire de Neuyle et a mounsz Richard' Scrop' ioyntement denquere et certifier qad suthtrete les biens et dettes dones ordeignes et quylles al reparacioun del ville pont' fossez et portz de Neof Chastell' sur Tyne si bien en temps le Roi qore est come en temps .E. aiel monsz le Roi qore est et a quel oeps les biens et dettes auantditz sont mys et tournes, et qe la dite Commissioun soit si large denquere de touz maners circumstances et qeconqes persones touchantz la ville susdite.

No endorsement

32

Page 38

A.P. 1524

Pleise au nostre seignur le Roi et au son Consaile comander Laurence de Acton, qest retournee lun Burgeis de Noef Chastel sur Tyne en ycest parlement, destre deuant vous en presence le noble seignur de Percy Gardeyn del Marche a declarer lestat du dit ville en saluacoun du ycelle a meyndre costages nostre seignur le Roi et en eide du tout le Roialme.

Endorsed: Le Roi se auisera.

c. 1397.

Page 39

SECTION III

MISCARRIAGE OF JUSTICE

Page 45

34

A.P. 13226

Norhumbr'

A nostre seignur le Roy e a soen Counseil mustre le Priour de Hextildesham qe la ou nostre seignur le Roy en le dreyn Eyr de Cumbr' deuaunt sire Hugh' de Cressyngham e ses compaignouns porta soen bref' vers le dist Priour quil luy rendesit lauoueson del eglise de Auedeston' qe est en Tyndal' en le Counte de Norhumbr' sicome piert par la chartre nostre seignur le Roy de ceo fete a Nichole de Vee [p]unt seignur de Aluedeston', E mesqe le dist Priour dist en responant qe la dit vile de Aluedeston' ne feut mie en le Counte de Cumbr', les dites Justices nelesserent mie quil ne firent le dit Priour ilok' respoundre e se mist en enqueste del Counte de Cumbr' auauntdit qe ne poeynt des tenements en autre Counte auer conissaunce e passa encountre le Priour issint ke nostre seignur le Roy recouera la dite auouesoun, par quey le dist Priour prie a nostre seignur le Roy si luy pleys quil voile auer regarde de ceo qe les ditz Justices firent […] tiel ple tindrent saunz garaunt e fere ceste chose redresce e qe le Priour peuse soen dreit moustrer de la dite auoueson e trier la par les gentz de meisme le Counte ou la dite vile est, solom ceo qe il verra par soen counseil qe reson demaunde ke le Priour ne [l]eyt steringe de la dite auoueson par tiel Jugement fet saunz garaunt' pur dieu si luy plest e pur les almes ses auncestres.

Endorsed: Habeat breue de faciendo venire recordum. coram Rege

1293-6.

35

A.P.E. 548

Page 46

A nostre seignur le Rey e a soen cunseil mustre le Priour de Heytildeham qe par la ou nostre seignur le Rey en le dreyn eir de Justices en le Counte de Cumberland deuaunt sire Hugh' de Cressingham e ses compaignouns porta soen bref' de droyt vers le auaundit Priour del auoweysoun del Eglise de Aldenesten' meisme cele Priour respoundi par vey de excepcioun e dist qil ne deuoit iloek' respoundre de cela auoweysoun, kar il dist qe meisme cele Eglise fust de deynz le Counte de Northumberland, e noun pas de deynz le Counte de Cumberland. Mes les Justices cele excepcioun ne voleyent alower, mes fesoient le Priour auaundit respoundre outre, e si passa vne enqueste en fourme de grant assise countre le Priour, par quey nostre seignur le Rey recouera cele auoweysoun: Dount par peticioun qe lauaundit Priour myst autre fiez a parlement, fust comaunde qe le Record de cel plee venut par bref' deuaunt le Rey, le quel Record est ore pendaunt deuaunt sire Roger le Brabanzoun e ses compaignouns. E pur ceo qe rien nest troue ne touche

Page 47

en cel Record del excepcioun auaundite, pri lauaundit Priour qe nostre seignur le Rey voille comaunder qil soit enquys le quele Leglise auaundite soit de deynz le Counte de Northumberlaund ou de deynz le Counte de Cumberlaund, e solum ceo qe serra troue […] fere ent' sa volente.

Endorsed: Coram toto consilio Quod non est factum alias, Rex non Wlt modo super hoc facere nouitatem, quia recordum Justiciariorum non annullatur per Inquisicionem uel peticionem.

c. 1296.

36

A.P. 15643

A nostre seignur le Roy et a son conseil mustre Williame le fiz William le Coroner qe par la ou yl fut emplede par le Quo Waranto en le Eyre de Norhumbr' derein deuaunt sire Huwe de Cressingham et ses compaignons de .lij. acres de terre oue les apurtenaunces en Bamburgh': Et par defaute de conseil Williame allegea noun tenure et dist vn estre tenaunt de .v. acres qe riens ne tint et purceo furent le .xlv. acres prises en la mayn le Rey et estendues a .iiij. lyures et .x. s. par an: Et lauauntdit William siwi la grace nostre seignur le Roy issi quil de sa grace et par son conseil du parlement lui rendi la dite terre en la manere qil la tint deuant: Et adunqe fu la dite estente maunde a Leschequer: Et puis nostre seignur le Roy empleda par bref' de droit le dit William de mesme la terre deuaunt sire Roger Brabazon et ses compaignons, les queux Iustices

Page 48

pristrent vne enqueste en [fourme de graunt] assise le quel nostre seigneur le Roy ou le dit Williame plus de droit out en la dite terre: Et troue feust par cele enqueste qe le dit Williame plus de droit out en sa tenaunce qe le Roy en sa demaunde: Et de ceste chose vouche le dit Williame [le] record et le proces des auauntditz Iustices sire Roger et ses compaignons les queux record et proces sunt deuaunt le Chauncellier nostre seignur le Roy: Et de ceste chose prie lauauntdit Williame a nostre seignur le Roy et a son conseil pur dieu endroit de les .iiij. lyures et .x. s. auauntdites qe remedie lui soit fet et Leschequer descharge.

No endorsement 1302.

Page 51

39

A.P.E. 547/E. 492

A Nostre seignur le Roy e a son conseil mustre Johan de Hastinges que com il seit vn des H[eirs] le Roy Alisaundre iadis Roy de Escoce e purpartie de terres partables deyue auer des queus le dit Roy morust seisi de Tyndale e de Penrith' que sunt del Realme de Engelterre e dedenz le Realme de Engleterre e il en suyuint son droit en este entens que les dites terres furent en la seysine nostre seignur le Roy e puis taunt que par la guerre fu desturbee, dunt il prie a nostre seignur le Roy ke se voille conseiller e luy voille des terres auaunt dites droit fere solum la ley de la terre.

Terre non sunt in manu Regis Ideo faciat quod sibi viderit expedire.

Overleaf:

A nostre seygnur le Roy e a son conseil mustre Johan de Hasting' que com sire Gilbert de Clare Jadis Cunte de Gloucestre e de Hertford' fist une fyn oue nostre seygnur le Roy de dys mile mers dunt sire Edmund frere le Roy, le Cunte de Nicole e Johan de Hasting' furent plegges pur mesme la dette, E cele dette est relesse al principal prie Johan de Hasting' que aussi seit relesse a luy com a celuy que nest que plegge.

Scrutentur Rotuli de Cancellaria si finis relaxetur remittatur executoribus testamenti dicti Comitis.

A.P.E. 492

A nostre seignur le Roy e a son conseil mustre Johan de Hastinges que com il seit vn des Heirs le Cunte de Cestre le Roy Henri pere nostre seignur le Roy […] st lyuere akunes terres Henri de Hast

Page 52

inges sun Ael e a Ades sa femme a tenir en tenaunce Jekes a ca […] fust a luy sa purpartie en la value de C[un]tee auauntdite, Puis meme cely Rey Henri susdit de sa volunte demeine saunz agard reprist grant partie des terres auaunt dites lyueres en tenaunce issi que celes que deme[oren]t ne amountent nient a la value de sa purpartie, Dunt le dit Johan de Hastinges prie a nostre seignur le Roy e a son conseil que il luy voille fere sa purpartie ou que il ly voille fere certein estat de totes les terres que furent liueres ses Auncestres en tenaunce solum la chartre le Roy Henri de ceo fist pur sa purpartie ou des autres terres a la vaillance de sa purpartie.

Endorsed: Ostendat Cartam et quantitatem tenementorum et certificet Regem qua racione deuenerunt in manum Regis deleted

Coram Rege

Et certificet Regem que tenementa […] sunt in manu Regis que continentur in carta.

1303.

Page 54

41

A.P. 1936

A nostre seyngur le Roy e a son conseial moustre William le Clerk' de Shotestan' e Thomas le fiz Warin de meme la vile qe com nostre seyngur le Roi enpleda lur auncestres de lur tenementz en Banburgh' cet est asauer de .x. acres de tere oue les aportenaunces en la ville auauntdite en Lan de son Regne .xxx.^me e dit que les teres furent donez pur garder la Porte de son Chastel de Banburgh', e les tenaunz vindrunt e disent que nauil. E sur ceo fu ioint vne Enqueste a pendaunt le ple e avaunt que lenqueste poeit passer vint le Eschetour nostre seyngnur le Roy decea Trente par sa autorite demeine e ad pris les teres en la meyan le Roy, e en tele manere les ad il engete, dunt les ditz William e Thomas priont grace e remedie ou par brief denqueste ou en autre manere sicom le Roy e son conseil voudrunt ordiner.

Endorsed: R' per aliam peticionem in consimili casu videlicet quod habeant breue in Cancellaria Escaetori, quod certificet Regi et consilio causam quare dicta tenementa capta fuerunt in manu Regis et qualiter et quo modo et retornetur breue coram Rege.

Irrotulatur

1302/7.

Page 55

42

A.P. 13005

A nostre seygnur le Roi et a son conseyl prient Margarete et Dyonise filles Robert de Redwar qe sont dedenz age, cest a sauer de si tendre age qe eles ne seuent descrescion intre ben et mal, par Thomas de Fennewik lur procheyn parent qe seust pur eles, qe par la ou vn Williame de Heddon' ensemblement od Isabele femme le auant dit Robert de Redwyr par mauueyse cuuyn et compasment entre eaux fait, tuerunt et murdrerent lauant dit Robert par qei Willame de Tyndale, Corouner du pays, ceo cy troue par enqueste de son office, prise et seysi toutz les chateus qe lauandit Robert auoyt, bien a la mountanz de .lx. et .x. liuerez, en la mayn nostre seygnur le Roy ausi com forfetz et ne sufre point les auantdites Margarete et Dionise nulle part auoir, si come aueir deussent, par qei le dit Thomas de Fenwik' qe seust pur eles prie Remedie ysoit fait.

NORHUMBR'

Endorsed: Mandetur coronatori quod faciat venire Inquisicionem coram eo captam.

1305.

Page 56

43

A.P. 8483

A nostre seignur le Roy et a sun counsaille a sun drayn parlement prierent Margarete et Dionese feilles Robert de Redwar qe sunt peures et de tendre age, qe come Isabele femme lauantdit Robert et Williame de Heddon' vssent felounessement tue le dit Robert, par quoi Williame de Tyndale Corouner del Counte de Norhumbreland toutz les biens et les chateuls qe furent al dit Robert le iour quil fust tue par enchesun de la felonie la dit Isabel seisi en la mayn le Roy, si qe les dites Margarete et Dionise la partie qe a eles apent de ditz biens ne purrent auer, quil vousist auer comaunde qeles peussent auer en lur partie de ditz biens; Le quel nostre seignur maunda adunqe pur eles al dit Corouner vn bref dunt le transcrit est cosu a ceste petition qe il fuist acerter le Roy de la tenour de lenqueste prise par luy de la dite morte, si qe le Roy de ceo aserte peust faire resun a les dites soers. Le quel Corouner ad returne en chauncelerie le dit bref et la tenour de la dite enqueste, dunt le transcrist est ausint cosu a ceste peticion, par quai les auantdites Margarete et Dionise prient nostre seignur le Roy auantdit quil pur dieu et pur lalme sa cumpaigne voille comander qe eles pussent auer lur partie de dit biens desicome eles sunt saunz chescune manere de ayde et de sustenance.

No endorsement 1305.

Page 59

45

A.P. 13920

Au nostre seignur le Roy mustre Johan de Swineburn', qe la ou Alexandre, Jadis Roy de Escoce, luy granta par sa chartre dix Marc' tut sa vie annualment a prendre de les fermes de Tyndale et ses resnables estouers en touz les boys le dit Alexandre de Werk en Tyndalle a le maner le dit Johan de Halghton', de quoy rente et estouers le dit Johan fu seysi continualment tut le temps le dit Alexandre et en le temps le Roy Johan et apres quant le dit maner

Page 60

de Werk fust eu en la mayn nostre seignur le Roy par la forfeture le dit Johan Roy de escoce, tantz qe au temps qe le dit Maner de Werk deuint en la mayn sir Antoyn Eswesk' de Durrem', par qi le dit Johan fu oste ausi bene des estouers cum de la rente les quex il luy ad detenu dixe aunz et par queu le dit Johan ad souent sewy vers le dit eswesk' qi nul drayt ne luy fit ne fere luy volayt pur sa franchis reale, dunt il pri remedi.

Endorsed with instruction to Geoffrey de Hertepol and Robert de Barton to hold an enquiry etc.

1306/7.

46

A.P. 10861B

Page 61

A nostre seignur le Roy e a son consail moustre William le fiz Alexander de Ros qe la ou Gilberd de Grendon' graunta a meismes cely Alexandre quatre mars par an pur luy e pur ces heires a prendre de son Maner de Grendon' pur la suete la quele le dit Gilberd deuoyt pur luy e pur ses gentz de Grendon' a le Molyn le dit Alexandre de Hautwysil, des queux quatre mars Alexandre fust seisie parmye la mayne Gilbert tout son temps, et de Hughe fiz Gilberd tant qil aliena le Maner de Grendon' a Alexandre Roy Descoce. E le quel Alexandre paia la rente tut son temps. E Johan de Baillof' tout son temps, tant qe le dit Maner de Grendon' deuynt en la seisine sire Antoyne Euesque de Durem quy le rente detynt e vers quy le dit William de Ros ad souent suy e droit ne poeit auer pur sa fraunchise reale, dunt il pry remedy.

Endorsed: Fiat breue de Cancellaria Roberto de Barton' balliuo Regis de Tyndale quod inquiratur de seysyna petentis et quale ius habet in dicto redditu et per quem fuit seysitus et qualiter et per quem disseisitus et qualiter, et Inquisicionem distincte et aperte inde factam retornet sub sigillo iuratorum coram consilio domini Regis ad medium Quadragesime, et scire faciat parti querenti quod tunc sit ibi cum cartis et Munimentis suis ostensurus si quid pro se habeat uel dicere sciat si videret sibi expedire.

Irrotulatur

1306/7.

47

Page 62

A.P. 2601

A nostre seygnur le Roy et a sun consayl mustre Roger de Horseley conestable du Chastell Bamburgh qe la ou vn William le Corouner tent certeyn tenemens en fee et en heritage en chef' du Roy, en les quels tenemens nostre seygnur le Roi ad engistment e herbage en temps ouert apurtenauntz a sun dit Chastel, la vynt le dit William et leua vn fosse en meysmes les tenemens en preiudis' de nostre seygnur le Roy et en desturbaunce del engistment e herbage auauntditz, et pur ceo qe le dit conestable fesayt abatre freyschement le dit fosse, la vyent le dit William et enpledde les sutbalifs le dit conestable, cest a sauoyr Hugh de Bedenhale et Robert Blays, deuaunt le viescount' de Northumbr' par pleynt de freyssoret, par quay le dit conestable prie remedy pur le Roy, e bref au viescount de surseer de tiel manere de ple, pur ceo qe la chose tuche au Roy.

Endorsed: Mandetur vicecomiti quod si sibi constare poterit quod negocium istud tangit ius Regis tunc ita circumspecte et prouide procedat quod preiudicium non eueniat domino Regi.

1314-16.

Page 63

49

Page 64

A.P. 12949

A nostre seignur le Roy et a son consail moustre Loys Euesqe de Duresme qe la ou il suit aucons foitz en le parlement al euerwyk a nostre seignur le Roy par peticion en la forme qe ensuit: A nostre seignur le Roy e a son consail moustre Loys Euesqe de Duresme qe la ou Johan de Bailliol nadgares Roy Descoce dona a sire Antoyne adonk' Euesqe de Duresme predecessor Leuesqe qui ore est cinkaunt liurees de terre ensemblement o lauoeison de leglise de Simonburn' dedenz la fraunchise de Werk' en Tyndale et dunt le dit Antoine fu seisi du Manoir de Grendon' et des autres terres ioignauntes et de lauoeison auauntdite et les tint tauntqe sire Edward' piere nostre seignur le Roy qui ore est porta vn scire facias vers le dit sire Antoine en le parlement de Cardoil del Manoir de Werk' en Tyndale et de lauoeison auaunt dite la ou vnk' brief original ne fu porte deuaunt deuers lui: Et le dit Antoine adounk' esteaunt a la Court de Rome pur les bosoignes de seglise et fu demaunde en le dit parlement et point ne vint, par qual le dit seignur Edward' prist en sa main la dite auoeison et le dit Manoir de Werk' dedenz quel Manoir les dites cinkaunt' liureez de terre sunt, si com piert par Recorde et processe qui demoerent a Lescheker a Londres, dount le dit Loys prie a nostre seignur le Roy qil vueille auoir regarde a la chartre Johan de Bailliol' et al confermement sun piere faet al dit Antoine dunt les transescritz sunt attachez a ceste petition, par quai si le dit Antoine eust este en Engleterre ou si brief original eust este porte deuers luy solonc la lay de la terre qil poait auoir apparu en Court, il eust son droit defendu, qe par la defaute qe le dit Antoine fist en le dit parlement de Cardoil qil ne soit de son droit et du droit de seglise forsclos, eins qe remedie luy soit faet eaunt regard qe son dit predecessor par sa defaute ne poait le droit de seglise perdre forsqe pur son temps. Et apres par respons faet a la dite peticion fu maunde al Tresorer et as Chamberleins de maunder le record et la processe en parlement, les queux record et processe furunt maundez et demoerent en la garde sire William de Ayermynne, par quai le dit Euesqe prie deci comme lui et ses predecessors taunt ont suy, qe droit luy soit faet et qil ne seit mes delaie.

No endorsement 1319-22.

Page 65

50

A.P. 10861A

A nostre seignur le Roi et a son conseil moustre William fiz et heir sire Alisaundre de Ros de Yolton' Chiualer, qe come sire William iadis Roi Descoce dona par sa chartre a sire Robert de Ros le Manoir de Hautwysel en Tyndale oue les aportenances, ensemblement oue les Molyns de mesme le Manoir, as queux le seignur de Grendon' et ses tenantz soleint de dreit de tout temps moudre au treszisme quartier, faire les Estaunkes des ditz Molins, et autres custoumes et seruices, come autres gentz du pais vncore fount en temps de pees, Le quel Manoir oue ses aportenances et les Molyns oue la seute et fesure des Estaunks et customes et seruices sire William de Ros fiz et heir le dit sire Robert apres dona et graunta par sa chartre a sire Alisandre de Ros son fiz et a ses heirs, le quel sire Alisaundre feust seisi de mesme le Manoir et des ditz Molins oue chescune manere de seutes, fesure des Estaunks, custumes et seruices du dit seignur de Grendon et de ses tenaunz, le quel Manoir de Grendon' le Roi Alisaundre iadis Roi Descoce apres purchacea del seignur de Grendon', qe tout son temps fesoit ses genz illoqes faire as ditz Molyns les seutes, fesure des Estaunks, custumes et seruices, apres qi mort le dit Manoir de Grendon' feust seisi en la meyne nostre seignur le

Page 66

Roi piere nostre seignur le Roi qore est, qi dieu gard, oue les autres terres de Tyndale, en queu temps le dit Alisaundre de Ros feust ausint seisi de mesmes les seutes, fesures de Estaunks, Custumes et seruices, le quel Manoir de Grendon' oue les autres terres de Tyndale puis deuint en la meyne sire Johan de Baillof iadis Roi Descoce qi detint au dit sire Alisaundre de Ros en sa vie, et puis au dit William son fiz les auantditz seutz, fesure des Estaunks, Custumes et seruices, contre reson, apres qi forfeture le dit Monoir de Grendon' oue les autres terres de Tyndale deuint en la meyne sire Anteyn iadis Euesqe de Durem', qi auxint en son temps les detynt au dit William tout son temps countre dieu et reson et vnqes puis rien ne poait auoir pur la guere Descoce. Par qoi le dit William prie a nostre seignur le Roi et a son conseil qe desicome le dit Manoir de Grendon' est ore et ad este graunt (?)pece en la meyn nostre seignur le Roi, qe remedie ent lui soit fait a reson, issi qil ne soit ensi desherite atort.

Ell'

Endorsed: Quia Rex pater obiit seisitus de Manerio etc. et secta illa per longum tempus antea facta non fuit, ideo plenius deliberandum est.

Irrotulatur

Coram Rege: Herlaston'

1311 x 1327.

51

Endorsed: Habeat breue in cancellaria de venire faciendo coram Rege corpus et indictamentum.

1319-23.

Page 68

52

A.P. 15474

A nostre seignur le Roi et a son conseu' moustre Alisaundre de Rihill' marchaunt pris a Baumburgh' et detenu en prisoun a Noef Chastel sur Tyne par Mestre Johan de Potenhale enfurmeitant luy estre a la foi des enemys nostre seignur le Roi, par la ou le dit Alisaundre ad tut dis este a la foi nostre seignur le Roi Dengleterre mes tant soulement en temps de pees pris entre les deux Roialmes Dengleterre et Descoce repeiraunt oue ses marchandies en Escoce, en Flaundres, en Gascoyne et en autres diuers terres come poet estre tesmoigne par Richard de Emeldon' Meir de Noef' Chastel sur Tyne et autres bones de la ville: prie pur dieu sa deliuerance.

Endorsed: Veignient les Maire et les [? baillifs] de la ville deuant le Chaunceller et soient en[quires] qil feust burgeis de la ville ou noun et si troue soit qil feust burgeis de la ville et noun pas aerdant as [enemys] E[coses soit] de le prisone deliuere.

Pre-19 July 1333.

53

Page 69

A.P. 6784

Endorsed: Eyt bref' au visconte de deliuerer le corps le dit Alisandre [nien]tcontrefesant le mandement de priue seal ou quecemqe autre mandement fait en contrair.

1334.

54

Page 70

A.P. 105

A nostre seignur le Roi et a son conseil moustre Richard Euesqe de Duresme qe come Leuesqe Antoin predecessour le dit Euesqe purchacea de Johan de Baillol' Roi Descoce .L. li' de terre en Tyndale oue lauowisoun de la eglise de Simundburn', et puis le Roi E. ael nostre dit seignur le Roi qore est meisme le doun ratifia et conferma, et puis le dit Euesqe Antoin meisme la Eglise par Bulles de la Court de Rome apropria et [les] tient [apro]prie pur grant temps tanqe le dit Roi. E. le ael, esteaunt le dit Euesqe Antoin a la Court de Rome, lui ousta saunz resoun et presenta a meisme la Eglise son clerk et puis en cea les predecessours le dit Euesqe ont suy de parlement en autre dauoir droit et remede tanqe en temps le Roie qore est qe par gard […] du parlement a la suyt Loys son predecessour fust mande a certains Justices denquere de son droit, ou lenquest fut pris et le droit le dit Euesqe troue et lenquest retourne en Chauncellerie, et meqes le dit Euesque Loys apres suist dauoir execucion de son droit solonc verdit de lenquest auantdit, respondu fust a sa peticion qe nostre seignur le Roi auoit done le Manoir de Werk en Tyndale oue lauowisone auantdit a monsz Johan Darcy, par quei dist lui fuist quil suyt deuers le dit mosz Johan par brief a la commune ley, par quei le dit Euesqe Loys suyt vers le dit monsz Johan par brief de droit et pendaunt cele suyt morust', et puis la eglise se voida en temps le dit Euesqe qore est, dounc Leuesqe la dite eglise entra come son droit et la tient, nient countre

Page 71

esteant la suyt qe mosz Johan Darcy suyt deuers lui par brief de quare impedit, et puis nostre seignur le Roi ad porte brief deuers lui de quare impedit de la eglise auantdite la quel suyt est vnqore pendaunt dauant Justices de Bank', par quei le dit Euesqe prie au dit nostre seignur le Roi qe pleise auer regard' a son droit qest trie et troue et la continuel suyt fait par ses prodecessous qe lui pleise comander brief a ses Justices qil puist pleder son droit del auowisoun et respounder au dit nostre seignur le Roi en le droit, nient contre esteaunt les presentement qe le dit nostre seignur le Roi et ses progenitours ont vsurpez sur lui et sur ses predecessours, depuis qil nad autre suyt deuers nostre dit seignur le Roi qe par peticion.

Endorsed: Nature de ley ne soeffre mie qe droit soit trie par bref de possession de quare impedit, par quoi sil voille qe son droit soie trie, sue deuers le Roi qil assigne certeines gentz denquere de son droit, et de lui faire outre droit.

1335/6.

55

A.P. 2167

Page 72

Endorsed: Viegne en Chancellerie et monstre ce qil ad du purchace, et vewe lenquest retourne en Chancellerie et appelle le conseil madame et la lui soit fait droit.

c. 1336.

56

A.P. 1567

A nostre seignur le Roi et a son conseil prie le soen homme lige Alisaundre de Baumburgh' qe come par vne enquest prise par vn brief de diem clausum extremum de la [ Robert] de Baumburgh' et returne en la Chauncellerie troue soit qe touz les terres des queux le dit Robert moroust seisis soient tenuz de nostre seignur le Roi en chief et qe [le dit] Robert nauoit estat en yceles terres mes a terme de sa vie, la reuercion regardant au dit Alisaundre come a frer et heir Thomas de Baumburgh' issint qe lettre lui feust graunte de south le seal le Clerk des Roules de la Chauncellerie a sire William de Kyldesby adonqes Clerk du priue seal nostre dit

Page 73

seignur le Roi pur presenter le dit Alisaundre a nostre dit seignur le Roi pur son homage faire pur les terres auantditz solonc la lay de la terre: sur quoi viendrent les vnes malleuoillauntz du dit Alisaundre et fierent a nostre dit seignur le Roi entendaunt par lour suggestioun nient veritable qe touz les terres des queux le dit Robert morust seisi furent del droit nostre dit seignur le Roi come sa eschete, pur ceo qe vn Rauf le Porter auncestre le dit Robert de ces terres enfust seisi et a les enemies Descoce aherdaunt encontre la foi nostre dit seignur le Roi Dengleterre, par quele suggestion le dit Alisaundre feust delaie de son homage faire et vnqore est, sur quels suggestioun nostre dit seignur le Roi dona les ditz terres et tenementz a William de Hadham a terme de sa vie et puis commission fust maunde as certeins gentz denquere de la suggestion, [la] quele commisioun fust besile et issint lenquest par les maluoillauntz le dit Alisaundre delaie en desheritison le dit Alisaundre et encontre la lay de la terre. […] pur dieu et pur les almes ses auncestres graunter vne commissioun a monsieur Johan de Stryuelyn, monsieur Johan de Fenwyk, Roger de Blaykeston, et a Thomas de Seton ou as autres queux nostre dit seignur le Roi plerra, denquere de la suggestion susdite et des touz autres pointz par queux les ditz terres pount estre eschete a nostre dit seignur le Roi et qe le dit Alisaundre, si la suggestion par solempne enqueste soit troue fauce, puisse estre deliures solonc ley de la terre et de la tresnoble grace nostre dit seignur le Roi saunz plus estre tarie ou sanz estre desherite contre reson par tiels maluoises suggestions.

Endorsed: Soit commissioun faite a monsieur Johan de Stryuelyn e autres nomez en la peticioun, qe eux trois ou deux de eux enquergent des pointz contenuz deinz meisme la peticioun, e lenquest ent retourne en la Chauncellerie, outre soit fait droit a la partie.

April-July 1344.

Page 74

57

A.P. 2249

A nostre seignur le Roi et a son conseil moustre son bachiler Johan le fitz Johan de Euer que come il ad porte vne assise de mort dauncestre de la mort' le dit Johan son piere deuant les Justices nostre Seignur le Roi assignez a prendre les assises en le Countee de Northumbr' del Manoir de Caluerden Darrayns oue les appurtenances vers Johan de Eseby par clere droit qil ad come piert par yne fyn leuee en la court nostre Seignur le Roi pier a nostre seignur le Roi qore est, ou allegge est deuant les ditz Justices que meisme le Manoir est seisi en la main le Roi par cause de certein

Page 75

dette due a lui dun Robert Darrayns ore […] viscount du Countie susdit du temps qil estoit viscount, par cause de quelle allegeance ils ount sursis de la prenance du dite assise a grant damage du dit Johan et desheriteson aperte, sur quei il prie a nostre Seignur le Roi [et] a son bon conseil que leur pleise granter brief as Justices du Countie auantdit que par tiele leggeance qils ne sursesent mye de la prise du dite assise einz qils aillent auant a la discucion de son droit solonc lei et reson.

Endorsed: Eit brief en la Chauncellerie a les Justices as assises prendre en dit Countee assigne qils aillent auant a lassise prendre nient contrestant lallegeance auantdite, issint qils naillent point au iuggement rendre le Roi nient counseille.

c. 1354.

58

A.P. 12281

A nostre seignur le Roi pri son lige Bachiler Johan de Eure qe come il aed arrame vne assise de mort dauncestre deuers William de Kellawe et Isabelle sa femme de la seisine Johan de Eure son pier du Manoir de Kaluerton' Darreyns od les appurtenauntz deuaunt monsieur William Basset et ses compaignons Justices assignez a les assises prendre en le Counte de Northumberlond', en quele assise les auauntditz William et Isabelle ount alegge qe mesme le Manoir fust en la seisine Robert Darreyns Chiualer pier la dite Isabelle qi heir ele est et ent morust seisi, apres qi mort le dit manoir

Page 76

fust seisi en la mayne nostre dit seignur le Roi et vncqore est seisi par cause de dette qe le dit sire Robert deuoit au Roi, par quel alleggeaunce les Justices ount sursys daler a la prise de la dite assise: qil plese comaunder ses lettres soutz la targe au Chaunceller qil face bref a mesmes les Justices qils aillent a la dite assise prendre et a rendre iugement sur le verdit de mesme lassise solom la lei de la terre nient countreesteant la leggeaunce auaundite, eaunt regarde qe le dit Johan aed longement suwy pur son droit et est en point destre desherite par tiels delaies.

No endorsement c. 1354.

59

A.P. 2250

A nostre seignur le Roi et son conseil pri son bachiler Johan le fitz Johan de Eure que come autrefoitz il suy vne assise de mordauncestre de la morte Johan son pier del Manoir de Caluerton' Darreyns vers mons' Robert Darreyns tenant de mesme le Manoir deuant les Justices a les assises prendre el Contee de Northumbreland' assignes, quel bref abatist par la morte le dit Robert, et puis il suyst autre assise vers autre qestoit a donqes tenant, en quele assise fust taunt auant alee que lassise fust pris et passa pur le dit Johan, mes pur ceo que le dit mons' Robert Darreyns estoit tenuz a nostre dit seignur le Roi en certeines dettes a ceo qestoit dit le dit Johan ne poayt auoir son iugement sur le dit verdit, et ore derechief

Page 77

le dit Johan ad suy le tierce bref dassise deuers William de Kellawe et Isabele sa femme, fille et heir le dit mons' Robert, les queux ont alegge que par cause de la dette susdite le dit Manoir est seisi en la meine nostre dit seignur le Roi, par que les Justices ont sursis de prendre lassise, et coment que le dit Johan eyt suy pur auoir bref daler a la prise de la dite assise ia par deux aunz et plus, nient meins ceo lui est contredit, qil plese comander brief a les ditz Justices daler auant a la dite assise prendre et apres verdit au iugement solonc la coustume du roialme et la leie cea en arere vse.

Endorsed: Eit bref as Justices assignez a les assises prendre daler a la prise de meisme lassise issint qils naylent a iuggement rendre saunz counseler le Roi.

? c. 1356.

60

A.P. 2248

A nostre seignur le Roi et a soun counseille prie Johan le fitz Johan de Eure Chiualer que come autrefoith' il suys brief dassise de mort dauncestre de la mort Johan soun pier deuant les Justices a les assise prendre en le Countee de Northumbreland' assignes deuers William de Kellawe et Isabelle sa femme de Manoir de kaluerton' Darreyns et enpledaunt les auantditz William et Isabelle alleggerount que la dit Manoir estoit seisie en la mayn nostre seignur le Roi par cause de dette en quele mons' Robert Darreyns, de qi le dit Manoir descendi a la dite Isabelle, estoit tenuz a nostre dit seignur le Roi. Et sur cea les Justices sursesent de prendre la dite assise le Roi nient counseillee, et coment que le dit Johan fitz Johan

Page 78

par peticioun en parlement suyst apres et auoit brief a les Justices dalere a lassise prendre, par force de quele brief la dite assise est pris par les meutz vaueetz du Countee par quele est trouee le droit le dit Johan, nepurquant les Justices ne voillount aler au iuggement rendre sur cel verdit, qil pleise comaunder brief a ses Justises qils aillent au iuggement ent rendre sur le dit verdit solome lai et resoun et custome du roialme issint qe le dit Johan ne soit desheritee parmy tiels delays.

Endorsed: Soite maunde brief a les Justices assignez qe vewe le record et processe deuant eux sur ceo faitz, sils trouessent ensi estre procede comme la peticioun suppose, adonqes aillent auant a iugement rendre et facent outre droit et resoun selonc le vsage du Roialme, nient contreesteant lalegeaunce dont ceste peticioun fait mencioun.

1357.

61

Page 79

A.P. 10314

A nostre seignur le Roi et a son bone counceil moustre Johanne qe fuit la femme Richard de Galway de Neof Chastel sur Tyne qe come nostre dit seignur ad done par ses lettres patentes a sir Thomas de Grey chiualer vn mies oue les apurtenaunces en la dit vile de Neof Chastel quel fust seisi en la maigne nostre dit seignur le Roi par cause qe le dit Richard fust outlaige pur felony, et le quel Mies fust done a dit Richard et Johanne et a les heirs de lour deux corps engendres, le quel Richarde ore est morte. Plese a nostre dit seignur et a soun bone counceil pur dieu et en eoure de Charite, qe depuisqe le dit Richarde rienes ne poaist forfaire forsqe pur terme de sa vie, de grantere restitucoun a dit Johanne, ou bref a viscount de garner le dit Thomas et les terres tenant sils ne sachent rienz dire pur quai la dite Johanne ne doit auer restitucioun ou de moustrer qe sa suggestioun ne soit pas veroi, issint qe la dit Johanne ne soit desherite ne ses heirs encountre ley et resone.

Endorsed: Soit enquis le matere compris deinz ceste bille et lenquest ent retourne en la Chauncellerie outre soit fait droit.

c. 1362.

Page 80

62

A.P. 14845

A lour treshonoure seignour Chauncellere nostre seignour le Roy Dengleterre mostrent si ly plest ses poeures Chapeleynes Priour et Couent' de Hexham qe come les ditz Priour et Couent teynent en pure et perpetuel almoigne le Manoir de Aynewyk' owe les appurtenauncez deince la Fraunchys de Hexham marchaunt owe la ville de Corbrigge qest deince le Counte de Northumbr' et deince la seignourie le seignour du Percy, sur qoy divers debates et descencons sount muez parentre les Priour et Couent' dunpart et les gencz de Corbrigge daustrepart sur vn parcelle du soile qest appelle Trepenoke qest parcelle de dit Manoir de Aynewyk' deince la Fraunchys auandit, qel plese a lour dit honoure seignour en oeure de charite grauntere as ditz Priour et Couent vn comissioun de perambulacoun direct' a monsz William de Aldburgh' Herry de Barton' clerk' Roger de Fulthorp' Elys de Thoresby Johan de Mitford' et Johan de Halydene sys synk' qatre trois ou deux du eux Entendant de certayne qe ceo est nostre entir Volunte et desire tesmoigne par nostre Commune seale.

No endorsement 1373.

Page 81

63

A.P. 6800

A nostre seignur le Roi et a son conseil prie le soen lige Johan de Rodom qe come il feut pris par le seignur de Percy en le Abbey de Alnewyk' et mene tank' a Nouel Chastel sur Tyne et illoeqes enprisoune en le Chastel del seint Michel en vn an tank' en cea: et vncore est enprisoune et il ne set par quel encheson: qe le Roi pur dieu et pur le alme son pier voille comander sa deliuerauns en ascune manere, qil est prest et totes iours serra a respondre a nostre seignur le Roi et qi qe rien vodera dire ail lui.

Endorsed: Eyt bref a sire Henri de Percy de certefier le Roi en Chauncellerie sur la cause de la prise.

? 1375.

Page 82

64

A.P. 3203

Plese a nostre seignur le Roi et a son conseil depuisqe le Priour del Hospital seint Johan en Angleterre et son conseile et ascuns depar le Maiour et communes de la ville de Noefchastel [furent] examinez auant la chaundelure darrein passe deuant ledit conseil de Roi sour la matire dune especiale assize pursui deuerz leditz Maior [et communes et moustre fust en] Conseil par examinacion des ditz parties et daltres gentz indeferentz qe lasuite de dit Priour fust compasse par sotilete en desheriteson de la corone [et en damage lesditz Maiour] et communes par alliance parentre ledit Priour et genz de pais sibien le viscont de pais et ses Ministres comes par Jurreours enpaneles en la dite assise, sibien [ pur ceo qe] le dit Priour est vncle au dit viscont come par grandz douns et fees a terme de vie et alterment donez par le dit Priour Nomement en tant come ledit […] despeciale assise de son franc tenement en Fenham et ad my en vewe e en

Page 83

pleinte la greindre parcel en value de ladite ville de Noefchastel tenuz [a ferme de la corone par] lesditz Maiour et communes auant temps de memore et iusqez encea, come plus plein appiert par plusours chartres nostre seignur le Roi et de ses progenitours et par vne enque[ste prise par les plus] vaillantz gentz du pais ou les tenementz sont a lasute le Priour de Tynemuth' clamant le ditz tenementz ore mys en vewe come parcelle de son Manoir de E[lswyk ]ane passes, ou trove fust par ledit enqueste qe lesditz tenementz furunt et sont parcelle de ladite ville de Noefchastell' et tenuz a ferme de la corone de temps [qe memore ne court] que les auantdites chartres et enqueste exemplifiez sont prestz a moustrer a dit conseil. Par queles causes ledit conseil de Roi auant la Chandelure darrein passe ordein […] del dite especial assise nauereient brief de procedendo en la dite assise par lesditz gentz enpaneles en mesme lassise a cause auantdite et a cause qe brief de Decies tantum […] iurrours araiez en ladite assise auant ceo qe les Justices indeferentz auoient enquis par les plus vaillantz gentz de pais si les tenementz mys en vewe furont et sont parcelle [de la dite] ville de Noefchastell' et tenuz a ferme de la corone 'et si ledit aray dassise et iureours soient procurez par ledit Priour et son conseil en desceite ou damage de Roi et de la [corone]' deleted la dite enqueste estoit returne deuant le dit Conseil issint qe le Roi ne la Corone ne serreient deceuz nendamages, et qe le conseil purrent faire droit as ditz parties et q […] quele matire feust fait par auys del Chanceller et par Thomas de Middelton' clerc del Chancellerie al dit Chandelure, et leditz Maiour et communes pursueront aldit Chanceller […] tanqe al .ix. iour deuant Pasque darrein pur liuere del dit Commissioun auoir. Et ledit Chanceller la liuere eut de iour en autre promist as dits Maiour et communes et […] comanda aler a lostel et returner a temps de parlement et ils auererent liuere de ladite Commissioun volentiers. Comander voillez en oeure de charite et en […] droit de Roi et del Corone et des Maiour et communes auantditz, et qe le chanceller face liuere as ditz Maiour et communes la commissioun auantdite enseale solonc lordin[ance du] conseil, et qe comande soit par brief as Justices del dite especial assise qils ne pernent nulle assise des ditz tenementz auant qe les Justices en ladite [Commissioun] ordinez par le dit conseil ount enquis par les pluis vaillantz gens de pais solonc la porport du dite Commissioun ordine par ledit conseil, qar autrement le droit de Roi et del

Page 84

Corone et des Maiour et communes est vendu et achate come boef en Marche.

No endorsement 1376.

Page 85

SECTION IV

ACCOUNTANCY

Page 86

65

A.P. 10900B

A nostre seignur le Roy e a son counseil prie Hue Gubeun yadis viscounte de Northumbreland que nostre seignur le Roy luy voile graunter de sa grace kil puysse paer chescun an a sun Escheker' .xx. li' taunt ke la dette quil deit a nostre seignur le Roy seit perpaye. De ceste grace luy prie lauantdit Hue pur sun seruice ke il luy ad serui en ses Geres e vncore fet en la vile de Berewyk en la compaignie sun seignur sire Robert le fiz Roger: E desicom il ad este destrut par les Escoce e sa terre ne vaut par an ke .xl. li' en totes choses.

No endorsement

Page 87

1300.

66

A.P.E. 905

Vncore prie meisme celi Jahan de Folborn qe come il engagea ses armures a sire Labre chief de tote la Compaignie des Richards de Luk' au noef chastel sor Tyne por .c. souz desterlings, a paier a vn certain iour en engleterre ou en Irland', a quel iour les ditz .c. souz furent paies .viij. Jours auant le iour de la paye en Irlaund' a leur compaignie demorant a Diuelyne. E por ce qe leur lettre ne poeit venir a lour compaignouns demorantz a noef chastel sor Tyne le iour done de la dette de ceaux .c. souz, il vendirent les dites armures a Guilliame de Haukeswel'. E quant la lettre leur vint qe les .c. souz furent paietz, il firent tantost le dit Guilliame venir e le distrent quil preist ses deners en maniere quil returnerent les armures entierement, dount il ne rendist puis quil auoit son argent receu qe vn aketon', vn Gaumbesoun, vnes trappes, quisseaux e greues pointes, e retint deuers li vn aketoun, .ij. Gaumbesons, vnes trappes, .i. Bacinet, quisseaux e greues pointes, e vne sele a summe: Dount le dit Jahan prie qe le Roi li vueille faire remedie de droit ou de grace si lui plest.

Endorsed: Episcopus faciat sibi restaurum fieri.

1303 x 1304.

Page 88

67

A.P. 13049

A nostre seignur le Roi e a sun consail mustre Gilbert Haukyn de Nouechastel sur Tyne qe com ses treis gerners esteient occupes por vn an e demie par les blez nostre seignour le Roi, les queux gerners estoient prisez par serement de bons gentz de la ville de Nouechastel en la presence sire Robert de Notingham e Richard Demeldon' Meir de la dite ville de Nouechastel a .vj. Marc' par an de la summe etc. del entere .vj. li': E puis meismes cele sire Robert aiant assigne as autres bones gentz de la dite ville des queux lurs gerners auant este occupez par les ditz vitailes, entre les queux il auait assigne au dit Gilbert .xxxvj. qr' de auens e .i. bus': E purceo qe le dit Gilbert deuait au Roi .xviij. li' pur vitailes de lui achates deuaunt ces temps, ne voleit le dit Gilbert resceuier nuls des auains, purceo quil entendist dauoir en alloiaunce des dit .vj. liures auandit quil (?) deat a nostre seignour le Roi: E le gardein de vitailes ad rendu sun acount e le dit Gilbert est defrau de dit .vj. li', dount il prie a nostre seignour le Roi grace e remedie.

Endorsed: soit mande as Tresorer, barouns et chamberleyns del Escheker qe si le dit Gilbert deit dette au Roi pur les ditz vitailles

Page 89

et il poeint sauer par tesmoignance des bones ou en autre manere qe la ferme de ses gerners soit vncore due, qil facent allouer ce qe lui serra resonablement du en la dette qil deua au Roi. Et sil ad paie au Roi la dette des vitailles, qe adonqes facent auer au dit Gilbert paiement ou assignement de ceo qe lui serra du pur sa dite ferme.

c. 1323.

68

A.P. 4907

A nostre seignur le Roi et a son conseil prie Thomas de Cardoil iadis gardein de la nouele custume de noef chastel sur Tyne qe come il doit a nostre seignur le Roi sur son acounte de la custume auantdite .lx. li' et le dit nostre seignur le Roi soit tenuz au dit Thomas en .cxxvj. li' par diuers billes de sa garderobe pur diuers biens et vitaux pris du dit Thomas al oeps le Roi, qil voille comander a son Tresorer et as Barons de Lescheqer qils voillent allouer au dit Thomas les ditz .lx. li' sur son acounte de la dite custume en allouance de partie du paiement de ditz .cxxvj. li' et qil pousse estre paie du remenant.

Tughalle

Endorsed: ostendat billas quas habet de denariis sibi debitis in

Page 90

Cancellaria, quibus visis mandetur per breue Tres' et Baronibus etc. quod allocatur Thome id quod sibi debetur in denariis que debet etc. vt peticio supponit leuando etc.

Irrotulatur

1318 x 1327.

69

A.P. 4124

A nostre seignur le Roi et a son conseil pri Thomas de Kardoil Burgoys de Noefchastel sur Tyne qil pleise pur dieu ordiner qil poet estre paye de .lxv. li' .xviij. s. .ij. d. ob. queux nostre dit seignur le Roi li deyt pur vitailles achatees de li pur sa gerre descoce come il porra mustrer par bille de garderobe contenante la dite summe.

Endorsed: Videat Custos Garderobe billas et certificet inde Regem

Coram Rege

Lymburgh'

c. 1328.

Page 91

70

A.P. 8510

A nostre seignur le Roi et a son conseil pri Johan de Claueryngge qe come monseignur nadgeres le Roi vostre piere, quant les couenances se firent entre lui et le dit Johan de la reuersioun des terres en le Counte de Norhumbr' et aillours en Engleterre, promist au dit Johan couenable mariage pur vne de ses soeres, de quiel mariage il nad rien eu vncore, qil vous pleise, en recompensacoun du dit mariage et auxint de despenses qe le dit Johan fit en alant vers les parties Descoce par comandement vostre dit pere en message pur li qe amontont a .C. li' et plus. Et sire ploise pardoner audit Johan .CCXX. li' des arrerages de la ferme de Corbrigge, la quele il tient a foe ferme, rendant .xl. li' par an a Lescheqer, et granter qil peusse tenir a tote sa vie mesme la ville quite de la dite rente en allouuance dudit mariage et des auantditz .C. li' et des autres grandz meschiefs qil ot de sa ranson, dont vnqes gerdon nen ot: Car le pays illoques est destruit par les Escoz et il prent de ceo pou ou rien du profit, nen ad pris ces .ix. aunz. – le graunt le Roi du mariage est enroule entre les Brefs de la Chancellerie de lan quint. ^x [x] written in same hand92

Endorsed: Soit vewe Lenrollement en Chauncellerie et raporte deuaunt le conseil.

Et apres vewe et examine le roulement deuant le Conseil accorde est par le conseil qe le dit Johan etc. solom le purport de sa peticion.

1327.

Page 92

71

A.P. 3367.

Endorsed: Soit mande as Tresorer et Barons qe il facent assigner mons' Roger Heron et William de Denum denquere sur cestes choses la verite et de retourner lenquest deuant eux et sil troue soit par lenqueste qe cestes choses soient verroies qil lur facent auer alowance en son aconte et qe endemettres eit vn sursis.

Irrotulatur

1328.

72

73

A.P. 6283

Pleise a nostre seignur le Roy et a soen counseyl comander brief as Tresorer, Barons et Chamberleyns del Escheker nostre dist seygnur le Roy qe les auantditz Tresorer et barons acomptent oue Roger Maudict nadgers gardeyn del Maner de Werk sur Twede de totes maners des dettes qe le dit Roger doyt a nostre dit seignour le Roy et qe en celes dettes allouent au dit Roger les dettes a luy dues, dont il ad billes de les Garderobe le Roy Edward pier nostre dit seignour le Roy. Et si nul somme soit due a nostre seignour le Roy par le dit Roger apres les dites allowances ensi faites, qe le dit Roger pusse paier la dite somme. Et si rien soit due au dit Roger apres le dit acompte ensi fait, qe adonqes les ditz Tresorer et Chaumberleyns luy paient cele somme ou qe les dites Tresorer et barons luy assignent en couenable lue ou il purra prestment estre serui.

Endorsed: Soit mande as Tresorer, Barons et Chaumberleins de lescheker qe oi la Counte le dit Roger, si apres la counte rendue troue soit qil doit au Roi, qe veues les billes ceo qil troueront qe lui soit du par le Roi, lui facent alouer en la dite dette par lui due au Roi; et si troue soit qe le Roi lui soit tenuz en acune summe, qe lui facent paier la dite summe, ou qil lur facent de ceo auoir du assignement receiuantz les billes et chargeanz etc.

Irrotulatur

c. 1330.

Page 95

74

A.P. 2164

A nostre seignur le Roi et a son conseil prie Laurence de Duresme qe come le Roi qe mort est, piere nostre seignur le Roi qe ore est, receust de le auantdit Laurence de aprest .xv. li' par les meins les coillours de sa custume de Noef Chastel sur Tyne, sicome appiert par diuerses lettres enseales du seal de Coket, des queux deners il ne receust vnqes riens, qe lui pleise comander de faire au dit Laurence de ceo paiement, ou qe allouance lui soit faite de ceo en ses leines, qil fra carier du port auantdit.

Endorsed: Soit mande as Tresorer, Barons et Chaumberleins del escheqir qe vewes les lettres dount la peticion fait mencion sil troessent qe la dette soit vncore due, qe adonqes lui facent auer paiement ou assignement ou allouance come il demande a plus tost qil purront, Receiuantz etc. et chargeantz etc.

Irrotulatur

1331.

Page 96

75

A.P. 7134

A nostre seignur le Roi moustre William de Tyndale qe come il feust assigne viscounte de Northumbr' encontre sa volunte a la seint Michel qe auoit vn an come la date de sa commission voet, et ad este charge tanqe a lan renoel' drein passe de son sutvisconte, Clerks, Geal[our], Porter et autre grantz charge pur la pees dedenz sa baillie meyntener qe amountont a .xl. li' […] sire qe il est charge de .c. li' pur le profit de sa baillie, dont il ne poeit vnqes atteyndre par lealte ne par reson a la moyte, et il ne poeit auer allouance en lescheqer de nul dener de ses custages auantnomes: prie lauantdit William qe nostre Seignur le Roi voille auoir regard des choses auantnomes et comander de sa grace si lui plest as Thresorer et Barons de Lescheqer par brief de sa Chauncellerie qe il soit deschargez des gages pur les Ministres auantnomes en la summe del dette qil doit a dit nostre seignur le Roi.

Endorsed: Coram Rege et magno consilio

Eit bref as Tresorer et Barons del escheker qils lui allouent tieux gages come ont este allouez as autres viscontes auant ces houres.

c. 1333.

76

Page 97

A.P. 15547

A nostre seignur le Roi, prie Johan de Fenwyk' nadgairs Conestable du Chastel de Baumburgh' en temps le Roi .E. piere nostre dit seignur le Roi, qe come il ad este et vnqore est en les seruices le Roi en Escoce et paraillours sur la garde de la Marche, issint qil ne poeit estre entendant de acounter de la garde du dit Chastel, ne vnqore ne poet pur mesme la cause; et diuers brefs sont venuz de Lescheker de prendre son corps et de seisir ses terres, par vertue des queux ses dites terres sont seisiz par William de Tyndale nadgeirs viscount de Northumbr'; et pur sa noun venue, par les vsages del dit Escheker, il ne poet estre receu de acounter par attourne, ne en altre manere, einz qil se auera rendu a la prisone et fait fine, sil neit grace de nostre dit seignur le Roi; qil pleise a nostre dit seignur le Roi comander bref' as Tresorer et Barons del Escheker qils receiuent son attourne de acounter pur lui tanqe a la summe del temps qil auoit la garde du dit Chastel, nient eant regarde a nul emprisonement ne fine qe serroient affaires par cause qil ne vient point auant ces houres solonc les mandementz de le dit Escheker, et qils mandent bref' au dit William de Tyndale qil deliure aut Johan ses dites terres oue les issues ent receux.

Endorsed: Pur ceo qil est tesmoigne qil est en la seruice nostre seignur le Roi en Escoce et ad este einz ces houres come la petition suppose, eit bref' as Tresorier et Barons del escheqer qils receiuent son atourne de rendre son acompt, nient contreesteantz les causes contenues en la petition.

c. 1333.

Page 98

77

A.P. 2600

Pleise a nostre seignur le Roy et a son counseil comander bref as Tresorer et Chaumberleyns del Escheqier qe eux en les [dettes] queux Roger de Horsley nadgares Conestable du Chastel de Baumburgh' deit a nostre dit seignur le Roy al dit Eschequier facent allower les dettes dues al dit Roger, dount il ad billes des Garderobes le Roy Edward piere nostre dit seignur le Roy, et de allower auxi al dit Roger les dettes a li dues par lacompte sir William de Melton' nadgaires gardeyn de la Garderobe le dit Roy Edward le piere.

Endorsed: Soit mande as Tresorer et Barons del escheker qe veues les billes qil ad, ce qe lui serra du facent allouer en les dettes qil deuera au Roi des arrerages de son acount.

Irrotulatur

c. 1334.

78

A.P. 5226

A nostre seignur le Roy et son conseil prient Johan de Denton' de Noefchastel sur Tyne et William de Emeldon' parsone de [leglise de] Bothale executours du testament Richard de Emeldon' qest a dieu commande qe come sire Edward nadgaris Roy Dengle

Page 99

terre p[ier nostre] seignur le Roy lan de son regne septisme prist du dit Richard' des draps a la montance de .xxvj. liures .xiij. s. .iiij. d. sicom piert par [euidence] vne bille enseale du seal Rauf de Stokes adunqe clerc' de la garderobe le dit pier, la quele bille les ditz Executours […] eux, qe lour pleise auer regarde au bon lieu qe le dit Richard' ad tenu au dit nostre seignur et a ses progenitours de long temps [et commander] brefs as Tresorer, barons et chaumberleins del Escheqer de faire paiement ou assignement as ditz executours des dites .xxvj. li' [.xiij. s. iiij. d.] nient contreesteant ascun mandement qest venu au conterer as Tresorer et barons de paiementz ou assignementz.

Emeldon'

Endorsed: Moustreit en auis qant de la dette

Soit mande as Tresorer, Barons et Chamberleins del escheqer qe vewes les billes qils ont de la dette due par le dit piere le Roi au dit Richard, sil troessent qe la dite dette soet clere et vnqors due, qe adonqes facent auoir de ceo as dits executours paiement du assignement ou allouance, Receiuants etc. et chargeantz etc.

1333-4.

79

Page 100

A.P. 11934

A nostre seignur le Roi et son conseil moustre soen Clerk' Johan de Thinden' qe come il esteit assigne par nostre dit seignur le Roi et son conseil a faire redresser et reparailler le Chastel nostre seignur le Roi en la ville de Noef Chastel sur Tyne, sur queles oueraignes le dit Johan eit demoretz continuement deux aunz et demi et pluis et ad fait reparailler en ycel Chastel vne chapele tut de neuel, vne sale tote couerte de plom et enhancez les murs et le meryn vne chaumbre a bout de la sale, enhance les murs et le meryn tote couerte de plom vne quisyne pur le dressour le Roi a cele chambre et a la chaumbre la Roine tout de nouel meryn et nouelement faite, vne chambre de nouel faite al autre bout de la sale paramout les offices, vne nouele Chambre paramout la posterne de double Ostage pur la garderobe des robes, od chimeneye et garderobe tote nouele hors de la terre, et le mur de chastiel illoeqes enh[anc]e et bataille, vne chaumbre paramout la grant porte du chastel tote reparaille de nouel meryn et couerte de plom, et plusures autres necessaries reparaillez et faites illoqes a grantz coustages, des queux hom doit vncore as ouerours et pur meryn et plom achetez bien a Cent liures et plus: par quoi le dit Johan prie qil puisse acompter des dites oueraignes et qe ceo qe serra trouez deuz pur celes oueraignes et pur les gages le dit Johan solonc la commission qil en ad lui soit paier. Et qe lour plese ordener coment cel chastel et les mesons qe ore sont factes puissent mielz estre gardez et sauuez al honur et profist' de nostre dit seignur le Roi. Dautre part vous voille auiser de la haute tour illoeqes qest descouerte [et sur] point a perir si ele ne soit couerte et amendez par temps et sur ceo comander vostre volentes au dit Johan: et auxint si les portes et les pountz du chastel qe sont molt fiebles et de nulle value deuient estre reparaillez en cas coment qe le siecle se taille laundreites. Et sur ceo qa vous plese comander vous voluntez au chanceller et Tresorer et vostre autre consail en Engleterre ceo qeu doit estre fait, et au Chaunceler qil face bref as Tresorer et Barons daconter od le dit Johan et qils allouent ses gages solonc sa commission, et les gages des ouerours par tesmoignance du Meir et Baillif' de Noef Chastel.

No endorsement

Page 101

c. 1338.

80

A.P. 12349

A nostre seignur le Roi moustre si lui plest vostre petit clerc Johan de Clisseby clerk ma dame la Royne vostre compaigne, qe come le visconte de Nicole auoit nadgaires mandement par bref de vostre escheqer a destreindre Johan de Clisseby clerc nadgaires Receuour de voz vitailles en la ville de seint Johan de Perth' et en chastel de Coupre en Escoce, de lui faire venir et acompter de son

Page 102

dit office en vostre dit escheqier, le quel visconte returna fausement as vtaues de la seint Hillaire darrein passez qe le dit Johan de Clisseby clerc naueit point de lay fee dedeinz sa baillie par quoi il le poeit destreindre, mais quil estoit persone de lesglise de Symondburne en leueschee de Duresme: Dont bref issi a Leuesqe de Duresme quil feist destreindre Johan de Clisseby persone de Symondburne par toutz les biens de sa dite esglise, et la dite persone ensi destreinte vynt a son iour personelement deuant les Barons du dit Escheqer, et lour ad priez qe desicomme ils coneissent bien quil nest mie celui Johan de Clisseby qi feust Resceuour de voz ditz vitailles, car il ad serui ma dite dame la Royne .xv. ans continuement sanz vnqes auoir office dont il serreit acomptable, qils lui vousissent finalment descharger de la demande dessusdite, les queux ne le voleient faire sanz ce qe celui Johan qestoit vostre vitailler feust venuz en Lescheqer personelement, lui quel est meintenant dela la mier a ce qom dist, en quoi nostre dit seignur le Roi vousist recorder as Tresorer et Barons du dit escheqer par bref de sa Chancellerie, qe le dit Johan de Clisseby persone de Symondburne nest mie celui Johan de Clisseby qestoit vitailler comme desus est dit: Plaise a nostre dit seignur auoir regard a la Innocence de son dit petit clerc en celle partie et comander a son Chanceller de faire garant as ditz Tresorer et Barons qils facent finalment descharger le dit Johan de Clisseby persone de Symondburne de la demande auantdite et qe lexecucion se ent face vers lautre Johan de Clisseby qestoit vitailler qad a noun Johan Marcand de Clisseby: Issint qe vostre dit clerc ne soit mes entaglez nempeschez por autri defaute comment quil porte semblable noun.

No endorsement ? 1346.

Page 103

81

A.P. 6412

A lour tresdoute seignour le Roi et a son conseill suppliont ses pouerez leges executours de testament Rauf de Neuille de Raby qe come le dit Rauf auoit la garde du Chastiell' de Baunburgh' oue les appurtenanz a terme de sa vie grante de lour dit seignour le Roi sanz accompte render en regardoun de tresgrantz trauailles et costages par le dit Rauf faitz en le seruice lour dit seignour le Roi, et coment qe le dit Rauf a diversez temps ad mis tresgrantez costagez en amendement et adressenent de dit Chastiell' en soun temps, neintmayns bref est venu as ditz executours defaire redresser et amender le dit Chastiell': qe pleise a lour dit tresdoute seignour le Roi granter commission a asquns de soens denquer des empairmentz dez defautes en le temps le dit Rauf' et quele valu et queux defautez et empairmentz furent eschuez deuant soun temps en dautrein gardein a quel valu, si qe les ditz executours ne soient coarcez damender ou amendez faire des empairmentz ou damagez faitz en autreine temps. Et coment par la ley ils ne sont pas tenuz ne deiuent estre chargez de nulz amendez faire apres la mort du testatour en cas a ceo qils entendont, a la reuerence et pleisancez lour tresdoute seignour ils serront prestez damender et mender faire de ceo qe par bone et loial enquest troue serra emparment deinz le temps lour testatour suisdit, allowes a eux en ycealx les grantez costagez par lui en sa vie mis sur lamendment du Chastiel auandit.

No endorsement 1367 x 1372.

Page 104

82

83

A.P. 2016

A nostre tresredoute seignur le Roi et son bon counseil moustront les executours Johanne qe feust la femme Johan de Coupland qe come nostre dit seignur le Roi auoit gr[ante] a les auaunditz Johan et Johanne sa femme par sa Chartre a prendre a terme de lour deux vies annuelement .ciiij.^xxx. li' .v. s. .iij. d. ob. q^a. des Custumes de […] par les maines des Custumers pur la prise Dauid' de

Page 106

Bruys iadis Roi Descoce a le batail de Duresme, des queux .ciiij.^xxx. li. .v. s. .iij. d. ob. q^a. les [dites] Johan et Johanne sa femme feuront seises et annuelement paiez tanqe es temps qe leuesqe Dexcestre et monsz Richard' de Scrop' feurent Tresorer, qi temps estoiont a derier quatre aunz enteres nient paiez, qamont a .Mcxl. marcz, quele somme la dite Johanne ne purroit […] qele perdist vers Richard' lyouns .Dxl. marcz pur le remanande du dit paiement auoir. Et nostre dit seignur le Roi paia a dit Richard' […] de .Mcxl. marcz, dont les dites executours priount qils purront auoir tiel iugement pur eux vers Richard lyouns de les .Dx[l. marcz auantditz] come les executours la dame de Raueneshome auoint vers le sieur de Neuille en semblable case. Et outre ce nostre dit seignur le Roi […] puis les .iiij. anz auantditz pur vn an entier, qamont a .ciiij.^xxx. li. .v. s. .iij. d. ob. q^a., de quele somme les ditz executours priont [remedie] issint qe la volunte la dite morte poet estre perfourne et sanz quele les dettes la dite morte ne poent estre quites.

No endorsement c. 1376.

Page 107

SECTION V

ADMINISTRATIVE ABUSES

Page 109

84

A.P. 3613

A nostre seignur le Rey les sokemen de Sunderlaunde et de Schoston' se pleynient de sire Robert de Neuile ki out la garde de nostre seignur le Rey de ame deus le viles ke il lur ad fet si grant tort ke eus ne poient sustener en memes por le grant mises ke il lur ad fet doner a tort, por quey il prient a nostre seignur le Rey ke il lur face tenir en lur vsages et en lur Custumes et en lur seruises ke il ont auant fet, dunt il prient por lamur de deu siluy plest ke il lur face auer dreyt de lur tortenuses fez et ke il eyent Warantie de nostre seignur le Rey siluy plest ke il seyent tenuz en memes les vsages ke il furent tenuz en tens le pere nostre seignur le Rey ke ore est ke deu gard et por deu merci.

No endorsement 1264 x 1276.

Page 110

85

A.P. 10937

Ceo est la mustraunce ke la communalte de la vile de Nouel Chastel sur Tyne mustre a nostre a nostre seignur le Rey des greuaunces ke poent auenur a lauauntdite communalte e a poure gent del pays si nostre seignur la Roy grante ales Freres du Carme lewe de la Funteyne ke est apele Crossewell'. A de primes mustre lauauantdite communalte ke en cele Funteyne ne est pas

Page 111

naturele surse de funteyne einz est vn pues recettement de ewe douce. E sachez chere sire ke il y ad plusur gent de mester com teyntureres, fulurs e autres ke ne poent rien fere de lour mester saunz cele ewe, e de autres pour gent ke besoignent de cele ewe a fere lour manger e lour beiure, ke teaus dis ewes en este tens ne suffireient mye a lour oes. E sachez sire ke la Ryuere de Tyne est sale tut le plus en este tens. E marineres e touz autres Marchans de tote terres ky amenent lour biens a lauauntdyte vile nostre seignur le Rey vnt grant mester de cele Ewe douce, e ne ount autre recouerir fors ke a cele funteyne. E pur ceo chere sire pur deu e pur vostre alme pensez de ceste grant bosoigne ke la communalte auauntnome, e poure genz e estraunge genz plusurs en ount grant mester de cele ewe: Kar sachez certeinement ke les auauntdites greuaunces e mult plusurs auendrunt a vos gent de la vile auauntnome si Ws grantez a les Freres auauntdiz rien de cele ewe: Kar tuz iours cele ewe ad este commune a tote gent.

No endorsement 1278.

Page 112

87

A.P. 3988

A nostre seignur le Rey e a sun consayl mustre Gilbert de Vmframuyll' Counte de Anegos ke cum ly e ses auncestres tot tens ount eu vne franchise en val de Red tele qe nuyl ministre le Rey,

Page 113

Justice ne autre, ne entre defere nuyl manere de office ne ke les genz de mesme la fraunchise ne seyent nule part de hors la fraunchise empledez ne amerciez pur nul trespas ne les amerciemenz leues fork' par ses baylifs asun oez demeyne, sire Johan de Lithegreyns e sire Adam de Crok'dayk' enquerons de la money par le Conte de Northumbr' les genz de mesme la Fraunchise deuaunt eus firent venir a Noueu chastel e de mesme les genz ilok' enquestes pristrent e genz de mesme la Fraunchise ke aueyent trespasse e ateynz furent par mesme les enquestes amercierent e les estretes al Eschekere liuererent en blemissement du dist Fraunchise e ad desheritaunce le dist Conte dunt (?)il a nostre seignur le Rey e a sun consayl prie remedie.

Endorsed: Habeat diem veneris cancelled

videatur ordinacio

1300-1.

88

A.P. 4020

Robert del Ydle de Chypches mustre pur nostre seignur le Rey,

Page 114

al Rey e a son conseil ke la ou meymes celuy Robert ad vne terre en le Countee de Northumbrelaund ke est Maarchaunte od la fraunchise de Rydesdall' la quele fraunchise est a Gilebert de Humframuyle, la vienent les foresters meymes celuy Gilebert e pernent les bestes meymes celuy Robert par le comaundement lauantdit Gilebert, e les chascent hors del Countee, ieskes en la fraunchise auauntdite, e ilokes les detienent a la volunte meymes celuy Gilebert, issint ke la deliueraunce ne poet estre fete par le visconte ne par ses Baillifs, purceo ke meymes celuy Gilebert ad retur del bref le Rey en sa fraunchise: E puis kaunt il les ad tenu entur .vj. semeines ou .vij. il les lest estraer parmy le pays: Dunt Robert prye remedie al Rey e a son conseil de cest outrage.

Endorsed: Ad Cancellariam

1284 x 1307.

Page 115

91

A.P. 3205

A conseil nostre seignur le Roi priont les poures gentz de

Page 116

Northumbreland qe come il nauoit nule assise prise en la dit conte ces .x. auns por ceo qe les Justices ne oseint venir la pur la guerre, par qei plosours gentz sont desheritees, qil leur pleise ordener William de Denum et Robert de Barton' qe sont gentz de lei et du pais et poent venir, a totes les assises prendre.

No endorsement c. 1319.

92

A.P. 3198

A nostre seignur le Roi et a son conseil moustront les poures gentz de Northumbreland' qe come les Justices assignez as assises prendre en le dit Counte ne oseint venir en mesme le Counte ses .xij. auns, ne donqore osont pur la guerre, par qei plosours gentz sont desheritees en le dit Counte, dont il priont a nostre seignur le Roi et a son conseil qil voillont ordener gentz demorantz en pais Justices as assises, cest a sauer William le Denum qe est homme de lei, et asqon autre chiualer du Counte qil leur pleisse.

Endorsed: Liberetur Cancellario et Thesaurario et ordinent prout viderent faciendum.

Irrotulatur

c. 1321.

Page 117

93

A.P. 3204

A nostre seignour le Roy mustrent ses pouers gentz de Northumbreland qe par la ou il soleint rendre en temps de pees cornage, garde du Chastel e fermes de la foreste: E or sount si nettement destruitz qe feblement pussent il viure: E nepurquant veint le viscont e destreint pur lentere ausi cum il feseit en temps de pees ensi qe il voudra la poueraile qe est demurre si nostre seignour le Roy ne voile comander qe il cese de sa destresse e faire a eaux releise taunt come le pays seit amende.

Endorsd: Rex vult habere auisamentum vicecomitis et aliorum earum parcium.

Coram Rege

? 1322.

94

A.P.E. 280

A Chaunceller nostre seignur le Roi pri Johan de Brittayn Count de Rychemound, qe come il tient partie des terres en le Countie de Northumberland qe furent a sire Johan de Balliol, les queux

Page 118

terres sont ars et destrutz par les enemys descoce et par les guerres, et les queux terres sont chargez de fermes en partie deuers nostre seignur le Roi, dount le viscont de Northumberland' fait greuous destresses, qil peusse auoir bref au dit viscont a surseer de la dite destresse durant' la guerre, desicome il ne poet nul profit prendre de la dite terre.

Endorsed: Coram Rege et magno consilio

1306 x 1331.

95

A.P. 4367

A nostre seignur le Roy sy luy plest prie seen pouere Chapelayn le abbe de Alnewic' pur son chanoun frere Jon de Stanford' pris en suant les boscoynis du nostre mayson de Alnewic E ad este en prison deus aunns e demi en le Chastel de Roucestre, E est sur peril de morir pur la grant defaulte e la destresse qil suffre, E de lui fuy pris Cent souz e vn chiual pris de sync mars. E il est si loyns e nous si destrut par gere qe nous ne luy poiouns atayndre de luy ayder, qil plese au dit nostre saynur pur dieu e pur saynte charite e de sa bone grace la deliueronse nostre dit chanoun comander.

Endorsed: Declaret qua de causa captus fuit et per quem et per cuius preceptum.

Coram Rege

c. 1324.

Page 119

96

A.P. 15512

Endorsed: Semble au counseil qe ce est a faire sil plest au Roi.

Soient certeins gentz assignez denquere en la presence du conestable du dit chastel les queux conestables ont pris tiel gersom et combien et des nouns de conestables et come bien la terre vaut par an, cest a sauer par acres et sil soit a damage du Roi et auxint soit mande as tresorer et Barons del escheqer qil certifient en chancellerie de combien les conestables ont respondu einz ces houres des dites terres par an et, ceste chose returne en chancellerie, eient la dite terre par commission de la chancellerie a terme de .xv. aunz, rendant par an tant come le Roi ad este respondu einz ces houres.

1332.

97

A.P. 1564

Page 120

A nostre seignur le Roi et a son conseil prient ses poures gentz de Baumburgh' qe come ils auant ces houres eient pris les demeignes terres du Chastel de Baumburgh' a ferme pur certein terme, les vns pur terme de sys aunz ou sept, les vns pur dys aunz et alafoiz pur greindre terme, alafoiz pur meindre, ascune acre pur .ij. s. par an, ascune pur .ij. s. vj. d., ascune pur .iij. s., la ont les Constables du dit Chastel a chescune foiz qils ont este chaungez ostez les dites gentz de lour terme et ont pris de eux grant raunson, cest assauer dascun .xx. s., dascun .xxx. s., dascun .xl. s., pur soeffrer les auer lour terme a grant damage des ditz genz, les queux deniers ne viegnent a nul profit nostre seignur le Roi, mes tant soulement du Conestable, et sur ce les dites suerent par peticion au parlement dreyn tenuz a Westmoustier dauoir remedie des tieles extorsions, en priant au Roi et a son conseil qils poerent auer lettres patentes souz le grant seal de lour terme auantdit, a qele peticion feust respondu qe certeines genz feussent assignez denquer sil feut au damage du Roi ou pur son profit si nostre seignur le Roi lour grantast les dites terres a terme, et de la value de la terre et dautres articles necessaires, la quele peticion est ore en les remembrances de Chancellerie en la Tour de Londres et rien est fait de la bosoigne, qe lui pleise assigner de nouel ascuns certeines genz denquere en la manere auantdite et qe lenquest retourne, qils peussent auer ses lettres patentes dascun terme issint qils ne soient mes issint greuez et le Roi nient profite.

Endorsed: Soient certeines genz assignez denquere sil soit a damage du Roi ou a profit, sil graunte les dites terres as dites gentz pur certein terme et del noumbre des acres et de la value en presence du Conestable et soit lenquest retourne en Chancellerie, et si troue soit par lenquest qe ce ne soit au damage du Roi, adonqes eient lettres patentes souz le grant seal a ascun certein terme rendant la value de la terre.

1332/3.

Page 121

98

A.P. 15472

A nostre seignur le Roi et a soun counsail moustre Auneis qe fut la femme Adam de Yetelyngton' qe come apres la mort le dit Adam soun Baroun qe fust occis felonisement par vn de ses veysyns,

Page 122

Sire Johan de Lilbourn' viscount de Northhumberland par colour de soun office prist touz les biens et chateaux le dit Adam et les enchasa tantqe a […] son. Et pur ceo qe la dite Auneis fist suyte as ditz chateaux, le dit viscount prist le corps la dite Auneis et la mena a le Gaole de Newchastel sur Tyne et illoeqe la detient tantqe ele fist Fyn oue lui de qatre marz. Et apres ceo la mena come prisone deuant les Justices nostre seignur le Roi a la Gaole deliu[re] assignez cest asauer William de Denum et Richard de Emeldon', les quex Justicez pur ceo quil ne trouerent enditement ne apewe sur la dite Auneis par […] leasserent aler qitte. E sur ceo la dite Auneis fit sa pleint deuant sire Peris de Midelton' et William de Denum Justicez assignez denqere sur viseins et le […] qe disoient quil [nauoient] pas commissioun a tele chose faire par qi il ne poient faire nul droit. Dount la dite Auneis prie a nostre seignur le Rey qe droit la soit fait. Et pur ceo qe la dite Auneis ne puist auer ley ne resoun tam com le dit Johan demoert' vescount du dit counte si prie la dite Auneis a nostre seignur le Rey qe il soit remue et altre mis en soen lue pur le grant profit nostre seignur le Roi et tantqe la verite seit enquis.

Endorsed: Il plest a conseil sil pl[ese] a Chanceller et Tresorier qe le vicount seit oste et altre couenable mis' et qe certeinz Justices soient assignez doier la pleinte la femme.

c. 1330.

99

Page 123

A.P. 698

Endorsed: Soient assignez certeins gentz en Chauncellerie denquere en la presence leschetur des choses contenuz en ceste peticion et de totes autres articles necessaires etc. Et retorne lenqueste en Chauncellerie soit fait droit.

c. 1331-2.

100

A.P. 6365

A nostre seignur le Roi prie son lige bacheler Roger Mauduyt qe come le Roi qe mort est, piere nostre seignur le Roi qore est, granta par sa commission au dit Roger la garde des terres et tenementz qe feurent a Robert de vmframuille iadis Counte de Angos en la mayn le dit Roi le piere par la nounage le fitz et heir le dit Counte, a auoir a sa volunte, rendant ent a son escheqer lestente de ceo faite […] afaire, et pur ce qe par lenqueste retourne en Chancellerie sur le diem clausit extremum apres la mort le dit Counte deux estentes feurent faites par Leschetour des terres et tenementz auantditz, Cest a sauoir vne estente de la value des dites terres en

Page 124

temps de pees et vne autre estente de la value des dites terres en temps de guerre com adonqs feust, et Alianore qe feust la femme le dit Counte feust dowe en Chauncellerie de la tiercz partie des terres et tenementz qe feurent au dit Counte selonc lestente de pees, auxi come vsage de la Chauncellerie est, le Tresorer et Barons de Lescheqer chargent le dit Roger sur son acounte de lestente des deux parties de les dites terres del an .xix.me et .xx.me qe feurent en temps de guerre selonc lestente par la quele la dite Alianore est dowe, qe est faite selonc la value des dites terres en temps de pees, par quei le dit Roger prie depuis qe deux estentes feurent retournez par le dit Eschetur, vne de temps de pees et vne autre de temps de guerre et il tient les dites terres tantseulement en temps de guerre, qil peusse estre charge selonc lestente en temps de guerre qe est retourne en Chancellerie ou qe lui pleise de faire estendre de nouel les terres selonc ceo qils valoient en temps qil les tynt, et qil selonc ceo qe serra troue purra estre charge.

Endorsed: Soit mande as Tresorer et Barons de lescheker qe nient contreesteante lune extente ne lautre facent enquere de la value des dites terres du temps qil estoient en sa garde et qe selonc ce lui chargent.

Irrotulatur

c. 1332.

101

A.P. 3987

A nostre seignur le Roi et a son conseil prie Gilbert de Umfram

Page 125

uille, Counte Danegos, qe come de temps dont y nad memore lui et ses auncestres auoient garder touz les prisons pris deinz lour franchise de Redesdale en la prison de lour Chastel de Hirbodell' en Countee de Northumbr' et alloques […] auoir la deliuerance le quel chastel est abatuz par les Escoces issint qil ne ad nule meson en la quele les ditz prisons purrent estre sauuement gardez, qe lui pleise graunter au dit Count qil purra garder les ditz prisons en son Chastel de Prodhou, qest en mesme le Countee et illoques auer la deliuerance tanqe a ascun certein terme qil purra redrescer le dit Chastel de Hirbodell', sanz enpechement du Roi ou de ses heirs.

Endorsed: Pur ceo qil est tesmoigne deuant le conseil qe le dit Chastel de Hirbodell' feut abatu en temps du dit Count ou de ses auncestres, eit conge par lettres patentes dauer la garde des dites prisons deinz son dit Chastel de Prodhou tanqe a la fin de .x. aunz sans enpechement du Roi ou de ses heirs.

1335-6.

102

A.P. 6496

A nostre seignur le Roy et soun counsail moustre le poeple del Counte de Northubrelaund et de le Euesche de Durem qe cum les larouns et meffesours endites deuaunt Corouners en le dit Counte se retreent taunqe en la Fraunchise de Durem et en tapisouns reuenent et seo vengent de les enditours et retournent; Et en meme la manere les endites en la dyte Fraunchyse seo retreent en le geldable, sur quey il pryent bref qe les Corouners dambparts desicum il sount de record, qe checun de eux a autri tesmoignaunce facent prendre les ditz felouns.

Page 126

Endorsed: soit ceste peticion mande en Chancellerie et le Chanceller pris alui les Justices et autres sages du conseil ordeinent remedie en ceo cas.

1341.

103

A.P. 3211

A nostre seignur le Roi prient ses poures Chapeleyns les frers preschours de Noef Chastell sur Tyne qe come ils eient eu portes al entre de lour meson en meisme la ville en lour propre soil tut temps, tanqe al temps qe le Count' de Warrewyk fust gardeyn en cel pais et fust herberg[e] a lour meson, qe par contek' qe fust parentre ses gentz et gentz de la ville les dites portes furent debrusez et abatutz et vnqes mes ne furent soeffers par les dites gentz destre leuetz, qil voille granter qils puissent la auoir portes come ils soleynt auoir, et de sa grace graunter a eux chartre qils puissent a tut temps esteer pur dieu et charite si luy plest. Et qe le Roi defende a chesqun seignur quantqe il porra forfair a luy qe nul homme les abate en temps auenir.

No endorsement 1341.

Page 127

104

A.P. 10290

A nostre seignur le Roi et a soun bone counceil moustre Mauld' de Schiluyngton' de Neof Chastel sur Tyne qe come les Maire et Bailiffs del dit vile la dit Maulde destreinount en vn tenemen' en la dit vile pur .xxxiij. s. par aune del value des terres et tenementz Esmounde de Wyderyngton' le quel fuist outlaie pur la mort Johan de Denton', la ou le dit Esmounde nauoit vnqe estate en le dit tenemen' si noun come baroun Emme iadis soer la dit Mauld' qi heir el est. Plese a nostre dit seignur et a soun bone counceil pur dieu et en eoure de charite de grantere bref as Tresorer et Barruns de soun Escheker qe sils fuissent estre asserte par enquest ou en autre manere qe cest suggestioun soit verroi qe adonqe ills deschargent la dit Mauld' si biene de les arrerages come de la demaunde.

Endorsed: Soit bref fait as Tresorer et Barons del Escheqer solonc la purport de ceste peticion.

c. 1345.

105

Page 128

A.P. 3801

A nostre tresredoute seignur le Roi moustrent les communes del Fraunchis de Tyndale come ils sont plusures accions a suer sibien des pleez reales come personeles dein la dite Fraunchis et puis la morte nostre treshonure dame la Reigne qe dieu assoile, par quele morte la dite Franchis feust seisy en vos maignes, ne sont assignez Justices, Chaunceller ne Chauncellarie illeoqe come eunt este deuant ces heures: Par qoi plusures des ditz Comunes sont en point destre destrute par defaute de droit sils ne soient hastement eidez au graunte damage de Roi dont ils prient remedie.

Endorsed: Le Roi ordena remedie semable.

c. 1369-73.

106

A.P. 5025

A nostre tresdoute et tresgracious seignur le Roi et a son conseil

Page 129

moustre Johan del Chambre et autres tenantz des terres iadys a Johan de Denton' de Noef Chastel sur Tyne qe come le dit Johan de Denton' fist suggestion a nostre dit seignur le Roi et a son conseil qe trois places en la ville suisdite furent Wast' nostre dit seignur le Roi et nient parcelle du dite ville de Noef Chastel, et qe nostre dit seignur le Roi les purroit grauntir saunz preiudice des ditz Communes de Noef Chastel: Sur qoi vn ad quod dampnum feust direit au dit Johan de Denton par son procurement au temps qil feust Mair de Noef Chastel suisdite oue toute la suggestion du dit Johan de Denton' par enqueste des gentz de sa affinite feust troue et qe les places auantdites valerent par an .xx. s. et ceste enqueste retournee en la Chauncellerie: Par quoi nostre dit seignur le Roi lan de son regne .xj.^me par patent graunta au dit Johan de Denton' et a ses heirs as touz iures les dites places: Rendent pur eux par an a lui et ses heirs par les meins les Meir et Baillifs del ville suisdite .xx. s. pur les queux les ditz Meir et Baillifs furent destreintz dan en an tanqe vn Gilbert de Duxfeld Meir apres le dit Johan de Denton' moustra par bille al parlement tenuz lan nostre dit seignur le Roi .xxxv.^te le graunte faite au dit Johan de Denton' estre preiudice a toute la dite communalte a cause qe les ditz Communes au temps de la fesance du dit Patent et tout temps deuant saunz interrupcion feurent seisez de les places auantdites come de parcelle de leur ville, par quoi par auis du dit parlement brief feust grante as Tresorer et Barons de lescheqer denquerer le matire comprise en la dite bille, et si eux trouerent verray, qadonqes eux deschargerent les ditz Meir et Ballifs de les ditz .xx. s. oue les arrirages et les ditz Johan de Denton' et ses heirs de les ditz .xx. s. chargerent. La dite suggestion du dit Gilbert compris deinz la bille suisditz feust troue verray par enquest prise par Nisi prius en paiis lan nostre dit seignur le Roi .xxvj.^me deuant monsieur Thomas de Seton' et Roger de Blakeston' Justices assignez par comission de lescheqer a ceo enquer et retourne en le dit escheqer: Par quoi iuggement la feust done lan .xxvj.^me suisdit qe les ditz Meir et Baillifs feussent descharges de les .xx. s. auantditz oue les arrirages et les ditz Johan de Denton et ses heirs charges de les ditz .xx. s. oue les arrirages, pur les queux .xx. s. les tenantz des dit Johan de Chaumbre et autres tenantz des autres terres qe furent au dit Johan de Denton le iour del patent a lui fait de les trois places suisdites sont greuousement destreintz dan en an, encountre ley et reson: Par quoi pleise a nostre dit tresdoute seignur le Roi et

Page 130

a son conseil grauntir brief as Tresorer et Barons de lescheqer qe sils trouent en record la matire suisdite deuaunt eux, qe les heirs et ditz terre tenantz le dit Johan de Denton soient deschargez de les ditz .xx. s. par an as touz iours eant regarde qe le graunte faite au dit Johan de Denton feust adnulle par le iuggement suisdite et qe le dit Johan de Denton ne ses heirs nont nul auantage ne poent auoir de les dites trois places par la grante nostre seignur le Roi suisdit, a cause qe les ditz Meir et Baillifs et Communalte sont seisez de les trois places suisdites et tout temps furent come de parcelle de leur dite ville come est troue par lenqueste auantdite.

No endorsement 1352-77.

107

A.P. 5053

Page 131

Au trespuissant et tresredoute seignur Roi de Castille et de Lions et ducs de Lancastre suppliont ses pouers Oratours et humbles Chapelleins les Priour et Couent del Ordre des Frieres Augustins de Neof Chastel sur Tyne qe come tout lordre des Frieres Augustins oit tielle priuilege de nostre tresseint piere le pape qe nulli de seinte eglise, ne arceuesqe, Euesqe, nautre qeconqe auera poair pur lour citer, sommondre, molester, empescher, ne nulle manere esuoire: Nepurqant ad vn Matheu de Bolton', viqer de la eglise seint Nicholas de Neof Chastel sur Tyne, qe nient contresteante les priuileges suisditz tresgrandement ad trauaille lez ditz Priour et Couent par sommons et autres malicieuses comperassementz et oe a leur maison de Neof Chastel, Disant ouertement qil ad de nostre tresseint piere le pape priuilege pur lui moult soefficeante pur eaux somondre, citer, et pursure contre eux: Dont fortement fait meruailler as touz du dit ordre comment et en quelle manere lui serrent grantez priuileges si grande, la ou nul seignur greindre ne moindre ne se voet, ne nad cause de soi entremettre ouesqe les ditz Frieres: Pur quier plese a lour tresredoute Seignur de si tresgracieuse hauteste come cellui qest soeuereign eide a les priuileges et libertees del dit ordre maintenir, auoir inspeccion as malices du dit vicer et mettre treshonure eide pur les dits Oratours qils puissent auoir lettre du priue seal nostre seignur le Roi Comandantes au dit viqer qe de tielles iniures et greuances vers eux vsez il cesse et ouste la main tanqe les ditz frieres auerent plus ouertement par euidences de la Court de Rome apris lequel sa priuilege qil allegge pur lui soit verrae ou noun.

Endorsed: Soit tiegnent al ordinances ent affaire pur les reuerents pieres en deu larceuesqe de Canterbirs et leuesqe de Salesbire' et deux autres doctours a eslir de lune et lautre partie come autrefoitz esteit 'ordainer' cancelled accorder.

1375 x 1384.

Page 132

108

A.P. 5920

A nostre tresredoute le Roy et a tous les seignurs de ceste presens parlement moustre et se compleint si lour plest Johan de Kirkeby de leuesche de Duresme coment monsieur Mahu Redman et sa femme torteuousement et encountre la loy ount detenuz par force la femme et les biens du dit Johan countre sa volunte par cestes trois ans passez, tantqe al la value de .cxl. marcz et plus, come bien purra estre proue par les parcelles queles ele enportast le temps qele departist de sa maison oueqes les dits biens et sen alast' oue la femme du dit sire Mahu a son Chastel de Morpath, desicome il est bien conuz par les gentz du pays enviroun. Et outre ceo detent ouesque ele tous ses chartres de ses terres parount il est en point de perdre partie de son heritage, a grant disfaiture du dit Johan, dount il ne pust auoir nulle recouerer si ne soit par vostre graciouse ordinance, Par quoy il vous supplie treshonorablement qe par voye de Justice vous veullez ordeiner en ceste present parlement qe le dit Mahu soit appelle deuant vous et comande de ly faire restitucion et deliurance de sa dite femme et biens come reson demande pur dieu et en oeure de Charite.

No endorsement 1337 x 1387.

Page 133

109

A.P. 11117

A nostre tresexcellent et tresredoute seignour le Roy supplient les Maire, Baillifs et poures Comunaltee de la ville de Noef Chastel sur Tyne qe come ils sont si poures deuenuz par grandes perdes et oppressions par terre et par meer et moltz autres tribulacions, qe vous plese granter la confirmacion de leur chartre oue la clause de licet, en amendement de la dicte ville et relief des ditz communaltees.

Endorsed: Eient confirmacion ouec la clause de licet, sicome suppliez est, par la cause qe dedeinz est escrite.

?1378 or 1400.

Page 135

SECTION VI

THE REBELLION OF SIR GILBERT DE MIDDLETON

Page 137

111

A.P. 9790

A nostre seignur le Roi prie William de Felton' qe pur son grant trauail mises e coustages qil ad fet de sauuer garder les Marches Descoce e pur destrure ses enemis e nomement pur ceo qil ad seruule al deners le Roi le Chastel de Alnewike qe fust aperere a certein iour pur houstage done, e auxi pur la prise de Chastel de Mitforde e la prise du corps sire Gilbert de Midelton', qe lui voille graunter o assigner tauntqe al age le heir monsieur Henri de Percy, la Rente qe la dame de Percy rent au Roi pur les deux parties del heritage le Percy en Euerewikschire.

Memorandum on recto but upside down

De bonis Johannis de Lilleburn' ad hospitalum in villa Noui Castri super Tynam versus occidentalem .D. li' vel .D. marcas et alia iocalia et bona.

Endorsed: Les dons a sousscritz a terme de lour vie

William de Felton '	L. march' de terre
Thomas de Hetton'	L. march' de terre
Robert de Horncliue	xl. march' de terre
Johan de Thropton	x. li' aprendre a Lescheqer tant qe le Roi li eit purueu de .x. li' de terre a terme de sa vie
Johan de Faudon	xx. March' etc.
William de Faudon	x. march'
Petre de Faudon	x. March'
Roger de Faudon	x. march'

January 1318.

Page 138

112

A.P. 13945

A nostre seynur le Roi pri Johan de Faudoune qe come meismes cely Johan a parseut qe monsieur Gilbert de Middelton auoit pris le Lict' de Durrem e son frere monsieur Henry de Bealmound, leua encountre le dit nostre seygnur le Roy son seygnur lyge en contre sa pees, le dit Johan tauntost se descouery au dit monsieur Henry de Bealmound' qil voleyt qe meismes cely sire Henry feust deliuere e le dit sire Gilbert feust arestu de sa malice par auisement dudit Henry, la quele chose fu mys en fete par le dit Johan, e ses troys freres, e parlerent oue William de Felton e sa compaygnye a ceste chose fere pur profit du Roialme: Par quey mesmes cely Johan pri a nostre seygnur le Roy si ly pleyse qe ly voille graunter les terres qe feurent a sire Gilbert de Middelton' en Northhumberlanda ly e a ses heyres en gerdoun de son trauail qe valent par an .xx. marcz: E a ses troys freres qe feurent de cele couen a chescun de eux .x. liuers par an, de resceyure al Eschekier de Neuchastel sur Tyne ou a Nicole tauntqe nostre seygnur le Roy ait aillours purueu pur eux ou il plerra.

No endorsement January 1318.

113

Page 139

A.P. 12951

A nostre seignur le Roi et a son counseil Prie William de Faudon' qe lui pleise graunter la terre qe fust a Estephene de Cambous enemi nostre dite seignur en allouance des .x. mars qe vers lui grantastes de vostre grace a prendre a vostre Escheker, com piert par sa lettre qil ad de vous. Auxint prie Piere de Faudon son frere qe lui pleise granter a lui la terre qe fust a Gilbert de Whiteby enemis nostre seignur le Roi pur les ditz marcs queux nostre dite seignur lui granta de sa grace.

No endorsement 1318.

114

A.P.E. 395

A nostre seignur le Roi et a son conseil prie Thomas de Heton' qe come le Roi par auisement de son conseil graunta au dist Thomas cynkaunt mars a prendre par an a sa escheker taunqe nostre seignur le Roi le eit done Cynkaunte marches des terres qe furont a monsz

Page 140

Gilbert de Middilton' pur la prise le dit monz Gilbert et pur son seruice qe il ad fait a nostre seignur en Escoce, les queus terres sont estenduz en la Chauncellerie a .xxvij. li', qe il pleise a nostre seignur le Roi et a son conseil comaunder qe le dit Thomas eit la chartre le Roi de les dites terres pur li et pur ses heires en alowaunce de son trauaille et de les pertes qe il ad eu pur nostre seignur le Roi.

Endorsed: Coram Rege et magno consilio

1318-19.

115

A.P. 4036

A nostre seigneur le Roi si lui plest, prie Johan de Hesilrygg' qe fust au prendre Monsz Gilbert de Middilton' et des autres enemies nostre seigneur le Roi en le Chastel de Mitteforth': Et le queil Johan fust pris al descomfiture de Streuelyng' et illokes perdit cheuaux et armoures et autres chateux a la mountaunce de .cc.

Page 141

Marc' et enprisoune par .ij. aunz et reynte a .cc. Marc' et les profitz increment de .xl. Marchez de terre en le Counte de Northumbr' totes ses .v. aunz ad desperte dount la sume de si perte est .D. Marc' parount soun estat est durement abesse: Qil pleise a nostre seigneur le Roi granter al dit Johan pur soun seruice et en allouaunce de sa perte .cccc.iiij.^xx li' qe Eustauce de Burneby del Counte de Norht' deyt a nostre seigneur le Roi, et la quele dette est attermine en lescheker, apaier .iiij. Marc' par ane par le tresorrer, adunkes ila request Monsz Johan de Fereres: Et qe nostre seigneur le Roi vueille commaunder bref au Tresorrer ou a soun lieu tenaunt et as Barouns del Escheker pur cel terminement repeller, si ensi soit et qil faceint faire bref a vicount' de Norht' pur les dytes .cccc. iiij.^xx li' leuer et au dit Johan paier.

No endorsement c. 1318.

116

A.P. 1490.

A nostre seigneur le Roi et a son conseil moustre son poure chapelein Labbe de Alnewyk qe comme sire William de Middilton' iadis

Page 142

disseisi William adonqe abbe de Alnewyk' de .xxx. acres de bois od les appurtenantz en Preston' en le Counte de Northumbr', et apres la mort le dit William de Middilton entra Johan de Middilton' son fiuz et heir, sur qi le dit abbe qi ore est porta son bref dentre foundu sur la nouele disseisine pendant quel bref le dit Johan se aerda a les enemies descoce et forfist deuers nostre seigneur le Roi par quoi totes les terres le dit Johan ensemblement od les .xxx. acres de bois furent prises en la main nostre seigneur le Roi, et nostre dit seigneur le Roi ad done mesmes cestes terres a sire Johan de Crombwell' auxi comme est dit, dont il prie remedie.

Endorsed: sequatur versus Johannem de Crumbwell' si sibi viderit expedire.

Irrotulatur

Coram rege Herlaston'

c. 1319.

Page 143

117

A.P. 12952

A nostre seignur le Roi et a son conseil prie Johan de Faudon' qe les .xx. Mars queux vous luy auez grante par vostres lettres de resceyure par an a toute sa vie pur sa sustenaunce voille comaunder pur le temps qe passe est paier. Et sire si plesir vous seit pur le temps quest auenir luy voillez grantier loffice de corone de Holdernesse, et sire la baillie ne vous rent par an qe .xxvj. Mars et sire de .vj. Mars vous paierai ieo a vostre Escheqer ou queu part aillours qe vous plera comaunder, et pur dieu sire voillez auoir regarde de la grante perde qe ieo ai eu de ceo qe mon rescet ad este arz par les enemys treis foiz. Issi qe ieo suy pur moi et les mens tout sanz resort, si ie ne soi ore eide de vous, et a ceo ai ieo este pris de guerre par les enemys deux foiz et ai este rauncone plus haust qe ne purrai reyndre de toute ma terre ou de mes chateux, par qai sire ieo suy vnqor graument endette, sire pur dieu voille auoir regarde du grant meschef' qe ieo ai, qe ieo nai autre eide qe de dieu et de vous.

Endorsed: Videtur consilio quod dominus Rex terram suam dare non debet nec officium set quo ad argentum quod dominus Rex concessit mandetur Thesaurario et Baronibus de scaccario quod visis litteris quas inde habet, faciant sibi libere solucionem vel assignacionem competentem.

Irrotulatur

1318 x 1324.

Page 144

118

A.P. 4339

A nostre seignur le Roi et son consaille prie William Thorald qi ad serui vous et vostre piere en la guerre Descoce .xxiiij. aunz ou plus, qe vous voillez granter de vostre grace pur son long seruice la terre quele Johan de Middelton' morust vestuz et seysi en Westswyneburn' en Countez de Northumbr'. Lestente qe foust pris deuaunt leschetur en temps de pees fust estendu .L. s.

Endorsed: Soit enquis' de la value et de qi la terre est tenue

Coram Rege–Lymbergh'

1318 x 1323.

119

A.P. 2316

A nostre seignur le Roi et a son conseil moustre son lige vallet

Page 145

Johan de Faudon' qad perduz ses terres et tout son recept en Norhumbr' por la prise sire Gilbert de Middelton', par quei nostre seignur le Roi lui doune par an a toute sa vie a receyure a Lescheker .xx. marcs et il vient de loynz de prendre son paiement et enqil puist estre paie la moite ou plus serra despenduz et tout seit le Roi grantdement chargee il ad poi de profit destre serui en tieu manere: Dont il prie a nostre seignur le Roi et a son conseil desicome il est por lamour le Roi outrement estraungi de son pays et de son recept qe en amendement de son estat et en eide de sa sustenance, lui voille granter Loffice de Coroner en Holdernesse en allouance des .xx. mars qil prendra par an.

Endorsed: Irrotulatur

Nostre seignur le Roi ne veut mye remeuer son officier qil ad ore la saunz encheson, et por ceo si le dit Johan sachi encheson por quere le dit officer doit estre oste, le face sauer a nostre dit seignur le Roi.

c. 1320.

120

A.P. 2599

A nostre seignur le Roi prie Robert de Hornclyf qe come nostre seignur le Roi ad grante au dit Robert par ses lettres patentes quarante mars a resceiure par an, pur la prise monsz Gilbert de Middelton et pur son autre seruice qil ad fait en la marche de Escoce, de qei il nest mie paie come ses compaignons sont, dont il prie au dit nostre seignur le Roi qil voille comander qil soit paie. Et dautre part il ad demore par comandement nostre seignur le Roi en son seruice oue cynk' hommes darmes et vnqore les tient a ses coustages demeyn, par qei il prie qe nostre seignur le Roi voille ordener de leur demore et de qei il deuient viure.

Page 146

Endorsed: Quantum ad solucionem petitam de .xl. marcis annuis Mandetur Thesaurario et Baronibus de scaccario quod si eis legittime constare fecerit debitum illud deberi, tunc faciant ei solucionem vel assignacionem quamcicius fieri poterit bono modo.

Quantum ad retencionem quinque Hominum ad arma etc. si illos retinuerit de mandato Regis et inde posset apparere vel constare in Garderoba, computet ibidem de vadiis eorumdem pro tempore quo racionabiliter inde debet computare.

Irrotulatur

c. 1320.

121

Page 148

122

A.P. 3394

A nostre seyngnur le Roi e a soun conseyl Moustre soun bacheler Robert de la Vale qe come il fu sese en soun seruys a la bataille Destryuelyne, e Reynt hors de Meynes de les Enemys descotz pur Cynk Centz Marc' e puys toutz ces terres destrutz par les Enemys e ars, par quei il ne peot de eux nule profit prendre. E auxi la Mesoun de Tynemuth' par le dit Robert e par ces gentz e par ces grantz coustages sy ad este Meyntenu countre Monsz Gilbert de Middelton' e sa leue tout le temps pusqe le dit Monsz Gilbert leua encountre le Roi, issi qe rien est remyse au dit Robert par quei il peot estre soustenu, dount il prie qe il pleise au dit nostre seyngnur le Roi granter e doner au dit Robert ascun parti de vitailles pur sa soustenaunce aprendre de son vitailler au Neof chastiel sur Tyne.

No endorsement 1318 x 1323.

123

Page 149

A.P. 2314

A nostre seignur le Roi et a son conseil prient le soens liges valets William de Felton et Thomas de Heton' qe come ils fuerent a la prise Gilbert de Midelton' en le Chastel de Mitford' et les biens qe fuerent trouez dedenz le dit Chastel dudit Gilbert ne amonteit qe a chescun gentilz home .ix. marcs a sa part: Et puis nostre seignur le Roi manda son bref' a monsz William Ridel adonk' viscount de Northumbirland denquere des biens le dit Gilbert' et en qi mains ils furent trouez, ou le dit monsz William Ridel manda son sout[uisc]ount' de prendre cel enquest et il le prist par vn William de Ingow senescal le dit Gilbert et autres de ses aerdaunz et de sa couyn en absens le dit William et Thomas, qar William fut adonks en prisoune en Escoce: Et ceux par haigne et male voiliaunce qils auoint deuers le dit William et Thomas, diseient quils auoient des biens le dit Gilbert' a la mountaunce de .MM. li', cele ent retourne deuant le Roi et les estretez mandez en le Escheker, issint qe bref est venu au viscount de Northumbirland de leuer la dit soume de lours terres et lours chateux, saunz mener en iugement a respounz; de quei ils prient a nostre seignur le Roi pur dieu qe par nule tiel enquest pris de office qils ne soient dampnez et qe lui pleise mander a qi que lui plera denquere des biens le dit Gilbert, en qi mains qils serrent trouez, issint qils porount venir en respounz en vn maner ou en autre selom ceo qe nostre seignur le Roi et son conseil verrount qe lay et reson demande, qe sils soient dampnes par cel fauce enqueste y sont a desouz et desheritez pur touz iours.

Endorsed: Fiat breue Thesaurario et Baronibus de scaccario continens effectum peticionis, quod conquerentibus inde faciant iusticiam.

Irrotulatur

1324.

Page 150

124

A.P. 8735

A nostre seignur le Roi prie Wautier de Selby qe il lui voille pardon la suite de sa pees et a lui aquitte des tutes felonies, robberies, homicides, arsures, detenues des chastelx et forceletz, vtlagheries et toutes autres maneres de trespas […] en son regne de […] vostre faites. Et qe voille de sa grace a mesme celui Wauter graunt vie et ses membres et toutes ses terres et tenementz et manoirs auxibien en demeignes come en seruices et aduoweisons des eglises et toutes maneres des possessyons et rentes si fraunchement, entierement et quittement sicome il les tint le iour qe les felonies auantditz primes lui furent contremis.

Endorsed: Eit sa chartre de pardon quant as vtlagories, felonyes et trespas Et restitucion des ses terres qe sunt en la meyn le Roi. Et qe les terres qe sont en autres meyns, suye a la commune leye.

1327.

Page 151

125

A.P. 3034

Endorsed: Seit mande a visconte qil faie garnir le dit Wautier qil seit en proschein parlement a moustrer coment il est entre le dit Manoir et pur quei le dit Manoir ne deit estre seisi en la main le Roi et liuere au dit Bertram a tenir solom la forme de sa chartre, et endementiers soit serche les poes en Chancellerie pur quei le dit Wauter est entre.

1328.

126

A.P. 2550

Endorsed: eit bref as Tresorer et chaumberleyns de certifier en chancellerie ceo qe estre due de la dite somme contenue en ceste peticion e outre soit fait ceo qe droit soit.

c. 1328.

Page 152

127

A.P. 15511

A nostre seignur le Roi et a son conseil prie William de Acton' de Noef Chastel sur Tyne qe come certeins terres et tenementz en la ville de Swyneburn en le Countee de Northumbr' sont deuenuz en la mein nostre seignur le Roi par forfaiture Johan de Middelton' qe nadgeirs feust ahers a la enemis descoce et les queux ne valont par an forsqe .x. s. come piert par lextent de ces faite par leschetour et retourne en la Chauncellerie, qe lui pleise granter au dit William les ditz terres et tenementz a auoir a terme de sa vie, ou a terme de .xx. aunes, rendant lextent et outre de cetres .xl. d.

Endorsed: Preigne lextent deuant le cunseil.

Eit vn tofte et .xxx. acres de terres od leur appurtenances qe sunt contenues en lestent pur terme de .x. aunz par commission de Chancellerie rendant par an .xx. s. a lescheker.

c. 1330.

Page 153

128

A.P. 5230

A nostre seignur le Roi et a son conseil moustre leuesqe de Duresme qe come il aprompta du Roi .E. pier nostre seignur le Roi qore est deux Centz [trente] treis liures pur ganesture de son chastel de Norham qant le dit Euesqe fut deliures hors de la prisone sire Gilbert de Midelton', de [quele] some le dit Euesqe ad paie grant partie et partie vnqor est aderer, et estre ce le dit Euesqe deuoit a nostre seignur le Roi vne somme de deners pur la vesture des certein terres qe furent semez en ascuns des Maners le dit Euesqe deinz sa franchise de Duresme qant le Roi .E. [pier] nostre seignur le Roi qore est ly deliuera ces temporaltes, les queux Maners puis furent destrutz par les enemys descoce, de quele somme [il] ad pare pluys grant partie et partie doit: et nostre seignur le Roi de sa bone grace ad pardone a les hommes du Counte de Northumberland [ascun] maner de dettes queux eux lui deuoint por qecumqe cause pur les grant destruccions qil auoint soefert par la guere, deinz quele [Counte la] franchise de Duresme et de Norham est: et par la ou le dit Euesqe ad sui bref as Tresores et Barons de Lescheker de lui des[charger] de chescun manere de dettes dues a nostre seignur le

Page 154

Roi ou a ces auncestres deuant cele pardoun por qecunqe cause, les ditz Tresore [et Barons] de celes dettes ne lui voleint descharger: por qai le dit Euesqe prie a nostre seignur le Roi et a son conseil qe lui pleise auoir regarde as granz perdz qil ad eu par la guerre, et les grantz myses et costages qil ad fait en defens del Chastel de Norham et mettre de iour en iour, et qe lui pleise ordeiner qil puis estre eide par le pardoun auandit auxi come vn autre home del Counte auandit, depuis […] homme est mys hors de grace du dit Counte et il ad pluys perdu qe nule autre vers cele Marche.

Endorsed: Coram Rege et magno consilio

Pur ce qe ceste grace est faite a les genz de Northumbr' le conseil ne ose mie estendre la grace faite as dites genz de Northumbr' a leuesqe de Doresme ne a les genz de la franchise del Eueseschee sanz auiser le Roi.

1327 x 1334.

129

A.P. 11939

Au conseil nostre seignur le Roy pri Loys Euesqe de Durresme qe come le Roy pier nostre seignur le Roy [qore est le] dit Euesqe deux centz et trent et trois liures, qant le dit Euesqe fust venu hors de la prison Monsieur Gi[lbert de Middelton ou] il fust pris de guerre, pur le grant meschief et perde qil auoit eu tant come il fust en la dite prison […] et estoffer le Chastel de

Page 155

Norham od gentz darmes qe fust de guerre adunqe contre ceux descoce [le quels deux centz] et trent et trois liures tut est paie forsqe Cent marcs, qe lour pleise auer regarde a la grant perde et [damages qe le dit Euesqe ad eu] par la prise dudit sire Gilbert et as grantz mises et costages qil ad fait entour le dit Chastel sauuer [ de] iour en altre, qil puisse des ditz Cent marcs et des vint liures, pur queux il fist fin od nostre od nostre seignur le Roy qil poert auer conge de approprier la eglise de Leek quele est de sa auswerie propre, puisse paier vint mars par an as termes de Pasqe et de seint Michel tantqe les dits sis vintz et dis marcs soient perpaiez.

No endorsement 1332.

130

A.P. 1561

A nostre seignur le Roi e soun consiel moustreunt Piers Bauent e

Page 156

Margarie sa femme qe com ils feurent seisis de deux mees qarant e synk toftes vne molyn qarant e deux boues e vint acres de terre vint e deux sould' de rent e la tierce partie de vn molyn oue les appurtenanz en Esshette, Bokenfeld, Tritlyngton, Erddisdon' en la Counte de Northumbr' par force de vne remandre taille al dit Margarie a ly e a lez heirs males de soun corps engendres par Fin leue en la Courte nostre seignur le Roi, e par ceo qe troue fust par vne enquest de Office pris deuant leschetour de Northumbr' qe vne Roger de Maudut fust aerdant a Gilbert de Midelton' Enemy nostre seignur le Roi e qe le dit Roger fust seises de tenementz auauntdites a temps de la herdanz e ceo par vne enquest pris apres la morte le dit Roger si feurent lez ditz tenementz seises en la mayn nostre dit seignur le Roi e lez ditz Piers e Margarie oustes sanz respouns e dones a Roger le fitz Roger Maudut par charter nostre dit seignur le Roi, le quel Roger est mort e Johan son fitz ore tenant de tenementz susditz: de quay ils priount qe vne scire facias soit graunte pur eux deuers le dit tenant sil sache rien dier pur quay la dit Charter ne dust estre repelle e lez ditz tenementz reseise en la mayn nostre dit seignur le Roi e liueres a les auantditz Piers e Margarie issint quils poont auoir lour respouns en lour possessioun par le Roi.

Endorsed: Soite ceste peticion mande en la Chauncellerie e illoqes veue e examine la fyne dont ceste peticion fait mencion e le tenant duement garni, outre soit fait droit a les parties.

1358 x 1374.

Page 157

SECTION VII

WAR SERVICE CLAIMS

Page 158

131

A.P. 10043

A nostre seignur le Roi e soen counseil moustre Johan de Felton' Conestable de Chastiel Dalnewyk' qe com il ad retenu les gentz de la garneyseune du dit Chastiel par le comaundement nostre dit seignur le Roi entierement ensemble, ceste a sauoir .l. hommes darmes e .lx. hobeliers, del iour de Noel taunqe en cea e vncore les retint de iour en autre, voet il prier si pleiser lour soit qi volent comaunder qil puis acounter en la garderobe de ceo qil ad resceu e qe lui est arierre de lour gages issint qil les puis mettre en certein, qar graunt parti de la dit garneyseune demort en cest vile taunqe il eient respounz de ceste chose, par quai le dit Chastiel est en graunt peril de lour demore si longement.

Endorsed: Mandetur Custodi Garderobe per breue quod super contentis in peticione computet in gardroba et vlterius faciat quod in huiusmodi casu fuerit faciendum.

1317.

Page 159

133

A.P. 4337

A nostre seygnur le Roy e son Consail prie Nicholas de Swyneburn qe il voylunt pur Dieu de ly pite auer qe long' temps ad suy a ses costages e vesqui a si graunt' martire que sa dolure ne purra il a nuly cunter por les enemiis de Escoce, que souent ount touz ses terres arcis e destrutes e ly meimes pris e enprisune e mis a plusures paines de sun cors e raunsune e naurre pur poy a la morte: E de sa grace ore ordinere pur ly aucune auauncement ou seruis ou sustenance en sun oustel ou en aucune albaye ou mesune de religiune en queu lu qe plerra a nostre seygnur le Roy e son consail en la cyte de Lundres ou prochain ent[ur pur] taunt cum ceus qe ount demore en le pyel de Stawrth sur sa terre saunz ren donaunt ount eu coe six aunz touz les proffiz de sa terre ilok' dunt il purra [viuir] en le onur e seruis nostre seygnur le Roi pur saufuere la Marche e par taunt mult ount greue les enemiis, e pur taunt cum a nostre seygnur

Page 160

le Roy nostre dame la Roynge pria pur ly, pur la requeste jadis la Contesse de Hereford qe dieus assoyl, e prie qe le meuz ly purra estre en regarde de charite a cete feyz.

Endorsed: Sauise en quel lieu et le Roi en auera auis.

Coram Rege H[er]l[aston]

c. 1319.

134

A.P.E. 363

A nostre seignur le Roy prie Lucas de Warton' compaynon Adam Carbonel qe fuist demoraunt en la companye Roger de Horsle en le chastel de Berewyk qe est mahayne en le dist chastel et fut pris en Norhthumberlaund par les enemys et paya pur son raunsoun .xliiij. mars, dunt il ad engage sa terre au dist Roger, qe pur dieu li voilles granter lestat de vn frere en la mesoun seint Leonard de Euerwyk.

No endorsement 1317 x 1327.

Page 161

135

A.P. 8205

A nostre seignur le Roi et a son conseil prie Henri de Oggel qe lui ad serui en les guerres Descoce come homme darmes et ad este pris de guerre et raunzone par laide de ses amys, et est ore a grant meschef; qil pleise a sa graciouse seignur comander par ses lettres au tresorer et chamberleins qil seit paie de .c. s. .x. d. qe vous lui estes tenuz, sicome piert par sa bille du temps monsz Johan de Weston' qe feust Chamberlein Descoce, desicome il ne est vncore reguerdone de nostre seignur le Roi pur totes le damages qil ad resceu en son seruice et pur son long' trauail.

Endorsed: Seit mande as Thresorer et Barons qe cerchee la conte Johan de Weston' si il troefsent qe sire Johan se eit charge en son aconte, qe eux facent dreit a Henri.

Coram Rege

c. 1319.

136

A.P. 4077

Page 162

A nostre seignur le Roi mustre Robert de Clifford' qe par la ou il fu en sa guerre a Estriuelyn pris et raunsone a cent liures et perdi illoqes ses Chiuaux et Harneise a la vaillance de cent markes et ses issues de ses terres ad perdu touz ces sys aunz, qe valerent par an en temps de pees cent liures, et touz iours en cea ad demore en son Chastel de Baumburgh' a ses costages demein sanz riens prendre du Roi, par quoi il prie a nostre seignur le Roi qil voille granter a le dit Robert la ferme de Kyngesclyue qe rende a lescheker par an .lxij. li' a tener a la volunte le dit nostre seignur le Roi taunqe le dit Robert de son meschief soit clere.

Endorsed: Le Roi en voet auer auis od monz Roger de Horsle et puis en dirra sa volunte.

1319-20.

137

A.P. 4119

A nostre seignur le Roi mustre Roger de Horseleye qe la ou il ad acounte oue James de Broghton' iadis Chamberlayn Descoce du temps qil auoist la garde du Chastel de Berewyk sur Twede, dount

Page 163

le Roi lui est tenuz pur la dite garde sicomme piert par le dit accounte dount il ad bille de .cliiij. li' et .xj. d. Et auxi il mustre au dit nostre seignur le Roi qe la ou il ad acunte oue le tressorer de la garderobe du temps qil ad eu la garde du chastel de Baumburgh tanqe la translacioun de seint Thomas darein passe, dount nostre seignur le Roi lui est tenu sicomme piert par bille de la dite garderobe en .ciiij. li' .vij. s. .v. d., par quoi il prie au dit nostre seignur le Roi qe il voille comaunder qil soit paie de les dites deners et ordeiner coment il voet qe soun dit Chastel de Baumburgh' doit estre garde des hore enauaunt. Auxi mustre le dit Roger la ou le Roi lui auoist grante par commissioun de soun seal .xl. marcs par an issauntz de sa baillie de Baumburgh' il nad rien resceu ces deux aunz pur ceo qe le Roi les ad pardoner.

Endorsed: expediendum est

1320-27.

138

A.P.E. 282

A nostre seignour le Roy prie Robert de Umframuille Counte Danegous qe desicom ces terres Dengleterre e Descoce sunt nettement destruz par les Enemys Descoce dont rien ne lui est remise, qil sili pleis voille ordeigner susteinaunce pur sunt estat e pur son Chastell' de Prodhou, ensi sire sil vous pleise qil ne seit a tieu

Page 164

Meschief com il ad este deuant ses hours et est eincore. E sire voliez comander sil vous plest qe .cccxvj. li' .xiij. s. .iiij. d. accontez en Garderobe luy seient paiez qe arer lui sont des Gages des gentz darmes qil ad tenuz en la Marche Descoce par couenans taillez entre les voez e luy, ou qe assignement lui seit fete des terres la ou il les porra prendre.

Endorsed: Coram Rege et magno consilio

1316 x 1325.

139

A.P. 4118

A nostre seignur le Roi prie Richard de Horsley qe comme autre foitz il lui graunta brief as Culliours de la custume de Hertilpol' de lui paier qarant liures, qe lui furent duez por ses gages [quant] il demora en la Compaignie le Cunt Dangos, sicome pert par bille de la garderobe, les queux Culliours ne lui ont rien paie, qil de sa grace voille comaunder brief as ditz Culliours de Hertilpol et as Culliours de la Custume de Noef chastel sur Tyne, qil soit serui.

Endorsed: Fiat breue collectoribus sicud prius

1322.

Page 165

140

A.P.E. 356

A nostre seignur le Roy e a son consail prie Alice qe fu femme Monsz Guischard de Charron qe fu en seruise nostre dit seignur le Roy a Estriuelin occys: Com ele puis la Mort son seignur ad este souentefaiz destructe e si diuersement par les Enemys qel ne se peot viuer ne de nul part cheuir ne ayder, qe lour pur deu de son estat ordener qele se puisse viuer e de ses anguysses e de son grant meschef releuer.

No endorsement 1324.

141

A.P.E. 370

A nostre seignur le Roy prie le soen vallet si ly plest Williame de Beenley feuz et heire a Williame de Benley, qe ly as serui de enfaunz en sa guerre Descoce, et en la garneisoun de soun chastell' de Berewic sur Twede ad endure meschef oue ses autres compaignouns genz darmes de mesme la garneisoun: Comme Williame de Benley son piere tynt sa terre qil ad en le Conte de Northumbrelond' de le Counte Patrik, rendaunt par an .viij. li' desterlings por

Page 166

totz manere seruicez et demaundes, le queux deners ly sount forfaitz par le enemite leuauntdit Counte et sount leuez par son viscount de Northumbrelond' a soen oeps, qil voille si ly plest pardoner mesme les .viij. li' et quitclamer a ly et a ses heires pur soun seruice.

Item prie leuauntdit Williame a nostre dit seignur le Roy le Roy sily plest: Pur ceo qil ad perdue sa mounture en soun seruice, voille comaunder qil soit mounte en tieu manere qil ly pusse seruir en sa guerre qil ad contre ses enemis Descoce sicomme il ad fait cea en arrere.

Item pur ceo qe ces enemis Descoce ly ount derobbe de touz ces biens mobiles et de ces robes pur ly et pur sa femme, voille si ly plest comaunder vesture comme il auera meistre necessarie.

Endorsed: Coram Rege et consilio

1318 x 1327.

142

Page 167

143

A.P.E. 397

A nostre seignur le Roi et a soun consail Moustre Johan de Bilton vallet darmes, qe com il ad lungement serui luy et son pere en lour guerres Descoce oue treys autres de sa Compaignie et ad perdu ses deux freres en son seruice, dount il est tenuz a luy en arerages de ses gayges et restor des Chiual en .Cent sinkaunte treys. liures quatre soutz et sys deners, de la quele somme il ad garaunte sicom il piert par ses billes: Par quay il prie pur dieu et pur lalme le Roi Edward que mort est que dieux assoille quil ly voillount ordener payement ou assignement de la dite dette issint que il pusse estre preste deseruir nostre seignur le Roi en ses guerres com il ad fait deuant ces houres.

A nostre seignur le Roi et a son consail Moustre Robert de Bollesdon' vallet darmes que com il ad lungement serui ly et son pere en lour guerres Descoce parount nostre dit seignur le Roi est tenuz a ly en arrerages de ses gayges [et restor des] Chiuals en vynt et set liures, de la quele somme il ad garaunce sicom il piert par ses billes: [Par quay il] prie pur dieu et pur lalme le Roi Edward que mort est que il lui voillont ordener payement ou

Page 168

assignement de la dite dette issint qil pusse estre preste deseruir nostre seignur le Roi en ses guerres com il ad fait deuant ses houres.

A nostre seignur le Roi et a son consail Moustre William de Bollesdon' vallet darmes […] etc. for £8

A nostre seignur le Roi et a son consail Moustre Johane qe fu la femme Monsz William de Muschaunce qe par la ou le dit Monsz William fust pris a la bataille destriueln en son seruice et son fitz et heir pur deux Cent li' de sa raunsoun enprison oue les Escotz est detenuz: Dount ele prie pur dieu qe nostre seignur le Roi la voille payement faire ou assignement de la dette quil doit a son seignur, si com il piert par billes de la Garderobe, issint qe son fitz pusse estre deliures de la dite prison.

No endorsement 1314-1327.

144

A.P. 2889

A nostre seignur le Roi et a son conseil prie son lige bacheler Johan de Lilleburn qe come il est ouste et nettement destruit par les enemys descoce de ses terres et tenementz en le Counte de Northumbr' et aillors nad dont viure, si non de la bone grace nostre dit seignur le Roi, qe pleise a nostre dit seignur et a son conseil pur lui, sa femme et ses enfauncz ascun recet couenable ordener: Et si pleise a nostre seignur le Roi dordener genz darmes et hobelours

Page 169

vers celes parties pur la seures et sauue garde des dites parties, le dit Johan serra touz iours prest de trauailler a ses comandementz.

Endorsed: Eit commission en la Chancellerie destre viscount, et si le[s] lettres veigne face son serement et si ceo nount seit mande al escheqer de faire son serment.

1327.

145

A.P. 8101

[A nostre seignur le Roi et a soe]n conseil prie le soen lige vallet William de Felton qe come il tient ascuns terres et tenementz en le Countee [de Northumbr' a M]atfen West par la gran seriancie qe ne amount forsqe a quartorze liures diz et seet sould' et quatre deniers par an, les queux terres [n]ettement destruitz par la commune guerre en temps nostre seignur le Roi Edward piere nostre seignur le Roi qe ore est, si qil ne peait […] terres et tenements ne au dit nostre seignur le Roi ne al meismes puis encea ne vncore ne poet, pur defaute des tenauntz qe […] destruitz par lauauntdite guerre: par quai le dit William prie au dit nostre seignur le Roi et a son conseil si li pleise, qil li voille de [grant]er relesse de la dite rente a terme de sa vie, pur son seruice fait et affaire.

^x [x] Endorsement: illegible, being covered with skin170 c. 1328.

Page 170

146

A.P. 5558

A nostre seignur le Roi et a son consail moustre son liege vadlet Thomas de Fethirstanhalgh' qe come le dit nostre seignur le Roi lui auoit grantee a terme de sa vie par sa chartre la garde du Manoir de Werk en Tyndalle en guerdon' pur son seruise a lui fait et a ses auncestres en sa guerre descoce et aillours, la qele garde valust a lui par an .xx. li', le quel Manoir nostre seignur le Roi ad done a monsz Johan Darcy a lui et a ses heirs as touz iours et issi le dit Thomas puis le dit doun ad este oustee dela dite garde: Par quoi il prie a nostre seignur le Roi qen allouance de cele garde lui voille granter a terme de sa vie lerbage de Allirdall' en Englewod' qe vaut par an .xx. mars.

Endorsed: Coram Rege

Soit enquis come longement il tynt la baillie et come bien la baillie vaut par an et queux damages il resceut par ce qil feust ouste et a quele value, et ceste chose enquis, soit le Roi certifie.

1329.

Page 171

147

A.P. 234

A nostre seignur le Roi et a son conseil prie son lige Bacheler Johan de Fenwyk' qe come il eit tot son temps serui al piere nostre seignur le Roi qore est en tote sa guerre Descoce et il soit nettement destruit en totes ses terres en le Countee de Northumbr' par la dite guerre, et le dit Roi le piere lui auoit grante par ses lettres patentes .xl. mars par an aprendre des issues del Countee de Norhampton', des queles .xl. mars par an il feist prestement serui tanqe al an le dit Roi le piere .xv., et .cc. mars lui soient dues des arrerages de Cynk' aunz du temps de mesme le Roi le piere, et auxi come le dit Roi le piere lui soit tenuz en .xxviij. li' pur ses feez et robes, come piert a diuerses billes de la garderobe le dit Roi le piere, qe lui pleise pur lalme son dit piere en releuement del estat le dit Johan, granter alui qil pousse estre paie de les summes auantdites.

Endorsed: Soit ceste peticion mande en Chancellerie et cerchez illoeqes les roules et si troue soit qe le grant le Roi le piere ne feust mie repelle, qe adonqes mande soit par bref as Tresorer, Barons et Chaumberleins del escheker qe de ce qe arere est audit Johan du temps le dit piere lui facent paiement ou conuenable assignement, et auximent soit mande as ditz Tresorer, Barons et Chamberleins qe veues les dites billes sil troefsent qe la dette contenue en neles soit vnqore due, qe adonqez lui facent de ce auxi paiement ou couenables assignement: Resceiuantz les billes et chargeantz etc.

Irrotulatur

1331.

Page 172

148

Page 173

149

A.P. 2602

A nostre seignur le Roi et a son consail prie leur Bachiler Roger de Horsley que come sire Edward iadys Roi Dengleterre piere nostre dit seignur le Roi graunta par sa chartre a dit Rogier a terme de sa vie quarant Marcs pur son bon seruice qil fist en le chastel de Berewyk' et aillours apprendre des issues de chastel de Bamburgh tanqe il fust purueu de quarant Marche de terre a auoir a terme de sa vie […] ir quoi fust comande par le dit nostre seignur le Roi et son consail a son primer parlement a Westmester qe le dit Roger fust seruy des dites quarante marcs, par quoi il ad suy multz des brefs a monsz Robert de Hornclif' Conestable de dit chastel de ly paer les dites quarante Marcs et le dit Conestable se ad escusse qil ne poeit nul dener leuer pur la guerre Descoce: Par quoi sil vous plest voilez ordiner qe le dit Rogier soit serui de coe qe arere lui est des dites quarante marcs et desore mesmes les quarante Marcs solonc la tenore de la chartre auantdite.

Endorsed: Ostendat cartam in cancellaria et certioretur Rex per quantum tempus predicte quadraginta marce aretro existunt, et Rege inde certiorato mandetur constabulario quod soluat eidem Rogero arreragia et exnunc predictas .xl. marcas et vlterius sequatur processum versus predictum constabularium.

Irrotulatur

1327 x 1332.

Page 174

150

Page 176

151

A.P. 3114

Endorsed: Soit mande as Tresorer, Barons et Chaumberleins del escheqer qe vewe le bref qil auoit autre foiz de comandement qil lui facent outre execucion selonc la tenure du primer bref, ou qil lui facent auoir allouance com il demande.

152

A.P. 3807

A nostre seignur le Roi et a son conseil prie pur dieu Hugh fitz Piers de Twydemeuth' que long' temps ad serui son piere que deux lassoille que vnqor de rien ne lui fuit regarde de son long' seruice, mes lui granta sa garisoun par sa chartre de grant seal enseale la quele il ad deuers [ly], qil luy plese pur dieu et en oeure de charite de lui granter de sa grace la seriantie du Chastel de Baumbourgh' dauoir a terme de sa vie.

Endorsed: Tesmoigne est deuant le conseil que vn autre teneit la seriaunte en homage.

Temp. Edward III.

153

Page 177

A.P. 9177

A tresexcellent et tresredoute et tresgracious seignour nostre
seignour le Roi

Supplie treshumblement vostre pouere seruant as armes Johan Mosdale Que come le dit suppliant ad este par long temps et vncore est Gardein du vostre Chastell' deine nouell' Chastell' sur Tyne saunz ascune fee ou regard pur ycell' a graund costages et expens' du dit suppliant, plaise a vostre treshaut et tresgracious seignourie graunter au dit suppliant la garde de vostre Chastell' susdit ensemble oue vne piece de pree appelle le pree du Roi close deins lewe de Tyne pres le dit Chastell' le quel pree rend' a vous par an .l. s. a auoir au terme de vie du dit suppliant sanz rien ent a vous rendre pur dieu et en oeure de charite: Considerantz tresredoute seignour qe le dit suppliant eit la garde de vostre Chastell' de Scarburgh' en regard de son fee de serjeant oue .c. marcs par an del Viscont deuerwyk' et .v. marcs par an par les Baillifs de Scarburgh' pur ses allouances pur les reparacions del dit Chastell' de Scarburgh'.

No endorsement 1401.

Page 178

SECTION VIII

WAR DAMAGE CLAIMS

Page 179

154

A.P.E. 365

A nostre seignur le Roi et son conseil mustre Roberd de Esslyngton' qil est si destrust' par la gere Descoce qil nad riens dount viure ne dount susteynir luy ne sa femme ne ses enfaunz, par quoi yl pri al dit nostre seignur le Roi qil voillie ordeyner par soun conseil comment il pusse estre susteynu sulume son estait.

Endorsed: Coram Rege et magno consilio.

c. 1309 x 1327.

Page 180

155

A.P. 8520

A nostre seignur le Roi et a son conseil moustrent les gentz de la communalte de Nouel Chastel sur Tyne qe come il vnt garde la dite ville a leur coustages demeyn puis le commencement de la guerre descoce en cea, et grant partie de mesme la ville enclos de mure et tute la ville de fosse a leur coustages par diuers tailliages mis entre eux, et ceux de la dite ville qe auoient terres dehors sont si nettement destruits par les enemys qil ne pernont rien de profit, et ceux qe sont merchantz de la dite ville se vnt done tant a la garde de mesme la ville qil ne poont merchander pur mesme la garde et ceo qil vnt charge est pris et robe sur la meer par les ditz enemys et par les flemengs issint qe rien ne lour est remis, et ceux qe sont gentz de mester de mesme la ville ne trouent rien a ouerer pur ceo qe le pais est destruit en viron et ceo qil auoient vnt mis et despendu por la dite ville garder: Par qei la dite communalte ne poet la dite charge sustenir ne endurer santz eide de nostre seignur le Roi: dont il priont a sa seignurie qil voille si lui plest auoir regarde a leur meschief et issint ordener pur eux qil poont la dite garde meyntenir et sauuer auxint come il vnt fait auant ces houres.

Page 181

Endorsed: Placet Regi et magno consilio quod habeant perdonacionem firmarum sue ville predicte de duobus annis prout Comes Pembroch' nunciauit ex parte Regis et (?)scrutat' in rotulis parliamenti.

Coram rege et magno consilio

1316.

156

A.P. 1652

A nostre seignur le Roi et a son conseil moustront ses poures Burgeys de la ville de Baumburgh' qe come il rendont par an a Lescheqer nostre seignur le Roi vynt et sys mars et il vnt este souent auant ses heures destruitz par les enemys descoce, et vnqes rien demanderont de dit nostre seignur le Roi ne vnqes de rien feuront regardez, et ia de nouel sont pris et destruit, qar il sont nettement ars et plosours de leur veysins et de leur femmes et de leur enfantz sont pris et peynt, issint qe rien ne leur est remis, par qei il priont a nostre seignur et a son conseil qe pur dieu et pur totes les pertes et destrucions auauntdites voillont pardoner as ditz Burgeys la ferme auantdite tantqe il porront la dite ville autre foitz inhabiter et leur profitz receiure, et pur ceo qe sys mars de leur ferme del an dreyn passe sont arere pur leur grant [me]schief, qil leur pleise

Page 182

pardoner les dites sys mars. Et dautre part, il priont au dit nostre seignur le Roi et a son conseil qe [pur ceo qe] il sont herberagez as leur custages demeyn deinz la chastel de Baumburgh' et veillont et gardont le dit chastel a leur [custages] demeyn, voillez comander a conestable du dit chastel qil ne preigne rien des ditz Burgeys pur lour recette, ne pur […]

Endorsed: Placet Regi quod de gracia sua habeant perdonacionem firmarum suarum ac aliorum onerum quorumcumque de hoc anno futuro et super hoc habeant breue [sub suo] sigillo illi vel illis quorum etc.

Item quo ad .vj. marcas que sunt a retro et de firma predicta prout peticio ponit, placet Regi de gracia sua quod habeant perdonacionem sub hoc breue vt supra.

Item quo ad hoc quod petunt quod non onerentur amodo de logiagio placet Regi de gracia sua quod amodo inde non onerentur de huiusmodi logiagio et super hoc habeant breue Constabulario Castri de Baumburgh'

Irrotulatur

Coram Rege et magno consilio

1318.

157

A.P. 3681

A nostre seignur le Roi et a son conseil moustront ses poures tenantz de Shoston' et de Sunderland que tenount du chastel de

Page 183

Baumburgh' de Northumberlaund' que come il vnt este souent destruitz par les enemys descoce auant ces heures, et sur ceo aprocheront asqons des ditz tenantz au dit nostre seignur le Roi enpriantz qil leur pardonast la ferme qil rendent pur leur terre pur ceo qil ne poyant mie leur terre sustenir, et sur ceo feust bref mande a monsz Johan de Fenwyk' kil se enformast' queux des ditz tenantz sont en poer de leur ferme rendre et queux neine, et ore puis ceo mandement sont il enterment destruitz, qar il sont outrement ars et leur femmes et leur enfantz pris par les ditz enemys issint qil ne vnt rien remis, sicome est tesmoinge par la lettre Roger de Horseley conestable du dit chastel, par qei il prioient a nostre seignur le Roi et a son conseil qil leur pleise mander au dit conestable qil pussent estre quitez de leur ferme de puis […] en poer de leur terre gaigner ne sustenir et pur ceo que rien ne leur est remis dont il poent viure sil soient ten[uz le] Roi en dit chastel auant autres et qil […] de logage, qar le conestable auantdit prent pur leur place […] herbage en le chastiel grantz rancons […] que nostre seignur le Roi voille en autre manere [ quit]ance.

Endorsed: Placet Regi quod habeant de gracia sua perdonacionem firmarum suarum ac aliorum onerum quorumcumque penitus de [toto] anno proximo futuro et super hoc habeant breue de magno sigillo illi vel illis quorum interest etc.

Item quo ad hoc quod petunt quod amodo non onerentur de Logiagio, placet Regi quod mandetur per breue de magno sigillo Constabulario castri de Baumburgh' quod amodo non exigat ab eis logiamentium, quia non placet Regi […] nunc inde in aliquo onerentur.

viij

Coram Rege et magno Consilio

1318.

158

Page 184

A.P. 5581

A nostre seignur le Roi et a son conseil priont ses poures tenantz de Bedenale en le Conte de Northumbreland qe come il sont nettement destrutz par les enemys issint qe rien ne leur est remis, qil pur dieu leur voille pardoner par asqon tenps quatre liures trois soutz et vyt deners qil rendent au chastel de Baumburgh' et vynt et on soutz et deux deners qil rendent al lescheqer nostre seignur le Roi par la meyn le visconte de Northumbreland' et trent soutz qe sont arere de leur ferme por leur meschief.

Endorsed: Dominus Rex vult inde habere auisiamentum.

Inquirat Thesaurarius per dominum Rogerum de Horseleye et alios et certificet inde Regem.

Irrotulatur

Coram Rege

1318 x 1327.

159

A.P. 2553

A nostre seignur le Roi et a son counseil prie le poure Priour de Hextildesham son chapeleyn qest ars et destrut par les Enemys Descoce qil lui voille si lui plest de sa aumoigne granter pur la sustenauntz de .viij. des sez chanoignes .xl. Marcs par ane de prendre des issux de Knaresburgh' ou dasqon autre eschet ou ile lui plera taunqe ils purrunt aprocher lur Meisin demeisne: Desicome ils sunt mise en despersion et rien nunt de lour dount viure.

Endorsed: Domino [Regi ]ssio pro Priore de Hextildesham

Rex non habet ad presens noticiam de dampnis que sustinuerunt et cum venerit versus partes boriales faciat inquir' etc.

Page 185

Irrotulatur

"Expectet aliud parliamentum" cancelled

Coram Rege

c. 1318.

161

Page 187

162

A.P. 4107

A nostre seygnur le Roy pri la prioresse et le Couent del Halistane en redesdale qe coment els sont destrutz par les Enimys des Escos outrement qe renz ne les ont de [qoi] viuer et coment qe se desparpeillent pur defaut des sustenance sil ne eynt Eyde de vus lure lege seygnur, par quay cher seygnur, si pleisir vus sait qe de vostre bonte lure voillez eider pur lure sustenance et pur dieu granter a eus des issues de Neuchastel pur lure sustenance por saint charite oue aliopis la ou vus Woille si pleisir vus sait cher seygnur, kar sanz eide de dieu et de vus els ne pussont plus logement ensemble demourer en lure maissone certainment: Pri ladit Prioresse et le couent pur dieu qil vout commander sa lettre ad mesttre Richarde de Cotes person de Alwentton qil ses de dures qil lure fait et bieyfer des Dymes qil lure toult de cynk' viles: Cest asauire, Burgdon, Bydlisden, Harden, Thirnam et Cotes, cest chos cher seygnur voilles auer a quer et penser de nostre trawaille et auer Compassione de nostre estat.

Endorsed: Quant al prime soit mostree al Tresorer car le Roi voudrait qeles fuissent eidees; et quant al autre, eient bone lettre et aspre

c. 1320.

163

Page 188

A.P. 3984

Pleise a nostre seignur le Roi et a son Conseil granter a Johan de Yerdhill' qi ad perdu quant qil auoit du moeble en le Contee de Northumberland' par les enemis Descoce, et estre ceo ad desporte les profitz de quarant liurez de terre par an en le dit Contee par les ditz enemis touz ces quatre aunz, par vnt son estat est si abesse qil nad rien dount viure, la garde de totes les terres qe furent a monsz Nichol de Seinmore en Neuton' sur la mere en le dit Contee ensemblement oue les issues receuz en le meen temps, les queles terres en temps de pees valeront quarant' marz par an, mais ore sont de petite value pur la destruition des ditz enemis, et la quele garde a nostre seignur le Roi apent' par reson del noun age le heir le dit monsz Nichol, a tenir a lauantdit Johan en alouance de totes ses pertes, tantqe le dit heir soit de plein age, et garde de garde, si nul soit cheu peus la mort le dit monsz Nichol.

Endorsed: Mandetur Escaetori quod inquirat de valore terre petite et per quantum tempus custodia inde rema[ne]bit in manu Regis et alia circumstancia et certificet Regi in Cancellaria.

Irrotulatur

Coram Rege

? 1322.

Page 189

164

A.P. 4463

Endorsed: Coram domino Rege

Mostre ceo qe ele ad de .l. li' deuant le Chanceller et seit le Roi certefice.

c. 1323.

165

A.P. 4725

A nostre seignur le Roi et a son conseil moustrent ses poures gentz de la ville de Baumburgh' en le Countee de Northumbreland qe come il sount nettement destrutz par les Escotz et il deuient a nostre seignur le Roi .lij. Mars por lour ferme des aunz seszisme et quinzisme qore corount sur eux en demaunde, par quoi il sount destreintz par lour bestes qil ount purchacez oue graunt meschief por lour gaignerie, issint quil ne poent lour terre gaigner ne viure:

Page 190

Dount il prient qe nostre seignur le Roi de sa grace por dieu voille pardoner les dites .lij. Mars as dites gentz por toutz les meschiefs qil ount suffertz qar il ount estee totes foitz prestz a son seruice, et vncore voillent estre.

Endorsed: Rex perdonauit de gracia sua speciali.

Irrotulatur

"Auis est au conseil qil eidreit molt pur releuer la ville le Roi et de poepler et enhabiter de faire les ascune grace sil place au Roi." cancelled

1324.

166

A.P. 8209

A nostre seignur le Roi et a son conseil prient les soenes liges gentz du counte de Northumbreland qe come ils sont nettement destrutz par guerre issint qils nauoient de quoi viure et ore puis la trwe pris des dettes et des rentes qe sont dues viegnent le demande et somonse del Escheker, qil pleise a nostre seignur le Roi de sa grace totes les dettes et les rentes pardoner en […] sont este liuerez a les villetz, qil lui sont deux Centz villes en mesme le counte ou il ad nul home demor[aunt] et tank' come celes dettes viegnent en demande par somons del Escheker le terre ne serra iames enabite.

Et auxint qe plese a nostre seignur le Roi comandera monz Roger de Orseleye conestable del Chastel de Baumburgh' qe des rentes et cornages, truncages et gardes dues al dit Chastel puis la bataile de Streuelyn en cea qil ne leue nul dener.

Page 191

Endorsed: Il semble au Conseil sil plast au Roi qe pur plus hastiuement [enhabiter] les pais des bones [gentz pur defense] de la terre et pur ceo qe le […] qe dissent respoundre de […] et sunt tenuz […] qe […] le Roi les face grace a sa volunte.

Coram ipso Rege

? 1325.

167

A.P. 3199

A nostre seignur le Roi et a son conseil prient les poures gentz de la Communaute de Northumbreland qe come ils sount enterement destruez par les enemys Descoce et ore, puis la True prise, dettes qe ount este duees a nostre seignur le Roi du temps qe le paies ad este de guerre et destruit par les enemys sount demaundees de eux par somoune del Escheker, qe le Roi pur dieu et pur le alme son pier lour voille celes dettes pardoner du temps qils ount este issint destrut' par guerre, qar isount deux Cent villes dedens mesme le Countee ou il ad nul homme demoraunt, et taunk' come celes dettes veignent en demand' la terre ne serra iames enhabite.

Endorsed: Il semble au Counseil sil plest au Roi qe pur plus hastive

Page 192

ment en habiter les pais des bones gentz pur defense de la terre, qe nostre seignur le Roi les face grace a sa volunte.

Coram Rege

1327.

168

A.P. 1565

A nostre seignur le Roi e a son conseil priont ces poures gentz de la ville de Baumburgh' qe come il ount este destruz par la guerre descoce touz ses doze auns e ore de nouele il sont nettement destruz issint qe rien ne lour est remys, qil pleise a sa seignurie en amendement de lour estate pardoner as dites gentz les .xxvj. mars qil deuient a Lescheqer pur la ferme de lour ville du terme de Pask' drein passe, qar sil ne eient cest pardoun il couent qe plusours des dites gentz Weyuount la ville.

Endorsed: Eient respit tant qe a la seint Michel qe vendra en vn an de la grace le Roi.

Irrotulatur

1327.

169

Page 193

A.P. 1682

A nostre seignur le Roi et son conseil prient ses poures Chapelleyns Labbe et le Couent de la Blaunchelaund qe il [voille] pur dieu auoir regard de Lour destruccons et damages qe il ont eux par les soueneres venuz des enemys Descoce. Et ore drein par lost [le Roi] de tous maneres de puruiaunces et des bleez cressantz en terre, cest asauoir de .xl. acres de furment et de segle, cent acres des auens, cent acres des pretz et .v. cent berbiz, issint qe riens lour est remis dont pur defaute il sont en despercioun et en uoy de perdission sil ne [auoient] eide et socour de nostre seignur le Roi, pur lamour de dieu et pur les almes de ses honorables auncestres.

Endorsed: Se auisent de quele chose le Roi les poeit eider et en quel lieu.

1327.

Page 194

171

A.P. 3202

A nostre seignur le Roy et son conseil prient les gentz de la ville de Noef Chastel sur Tyne qils voillent commander au gardein des vitailles illoeqes qil face paier a les dites gentz pur lour mesons occupeez des ditz vitailles puis le temps qe les ditz vitailles vindrent illoeqes, qar launcestres nostre dit seignur le Roi lount toux iours faitz.

Endorsed: Soit mande as Tresorer et Barons qil facent en ceo cas auxi come ad este fait en temps les progenitours le Roi.

Irrotulatur

1328.

172

A.P. 6522

A nostre seignur le Roi et a son conseil prient ses poures Chapeleyns labbe et le Couent de Neumoster en le Counte de Northumberland' qe come ils ount este destruitz par les guerres descoce en le temps lael nostre seignur le Roi et tout le temps le piere et en son temps demeyne et ount perduz des moebles en le dit temps plus qe a la value de .xx. Milles liures et lael nostre seignur le Roi

Page 195

en la restoraunce de lour damages en son temps qe amounterent a .xij. Milles .clvj. li' .xiij. s. .iiij. d. trouez par enquest pris a Noef Chastel sur Tyne par son commandement dona as dits Abbe et Couent par sa chartre Colmeshynche en Escoce qe valut par an plus qe .cc. li' de quoi ils pristrent poy de profit et le dit Abbe soit tenuz a nostre seignur le Roi en .cxliij. li' .vj. s. .viij. d. pur vitailles achatez en temps son piere, qil pleyse a nostre dit seignur le Roi pur dieu et pur lalme son piere et en restoraunce de lour perdes auantditz, pardoner les ditz .cxliij. li' .vj. s. .viij. d. qils deuient a nostre dit seignur le Roi.

Endorsed: Coram Rege

Pur ceo qe conue chose est au conseil qil sont destruz et qe pur defaut il pristrent les vitails plus cheres qe eux ne valerent, il semble au conseil sil plest au Roi qe aumoigne et honur serroit au Roi a pardoner as ditz Abbe et couent les dites .cxliij. li' .vj. s. viij. d. en releuement de lour estat qar le Roi ne purra faire nule parte aillours greindre aumoigne.

Il plest au Roi

Irrotulatur

1330.

173

A.P. 1683

Page 196

A nostre seignur le Roi prient ces poures chapeleins Labbe el Couent de La Blauncheland' del Counte de Northumberland qe come il ount este destruitz par .xxx. aunz et plus par la guerre Descoce et auxi par loste nostre seignur le Roi quant il estoit al Park de Stanhope, issi qe par la dite guerre lour meisones sont ars et destruitz et lour terres gisent frisches, par quoi il sont come mendinances, qil pleise au dit nostre seignur le Roi pur les almes ses ancestres et par oure de charite auoir regard a lour poure estat, et les graunter pardoune de .xxvij. li' .xiij. s. .iiij. d. de vitailes qils pristrent en temps son piere a Noef Chastel sur Tyne pur meschief et defaute qe adonqes auoint de lour sustenance, la quele dette courte sur eux par somons del eschekir au viscount de Northumberland issi qils ne pount profist auoir de lour terres ne de rien qil ount.

Endorsed: Il semble au conseil sil plest au Roi qe aumoigne serrent au Roi, pur les grauntz pertes et destruccions qil ount suffert par la guerre Descoce, de pardoner la dite summes.

Il plest au Roi

Irrotulatur

1331.

174

A.P. 5749

Endorsed: Il semble au conseil sil plest au Roi qe aumoigne serroit au Roi pur les grauntes pertes et destruccions qil ount suffert par la guerre descoce, de pardoner la dite summe.

Il plest au Roi

Irrotulatur

Page 197

1331.

175

176

Page 199

A.P. 1563

A nostre seignur le Roi et a son conseil priont ses poures gentz de la ville Baumburgh qe come la dite ville ad este ars et destrute par la guerre descoce meintefoits deintz ses vint auns et ore de nouel est tote entirement destrutz par les enemys qe chescun iour font mal et destruccion a la dite ville, par quoi il ne poent endurer les meschief qils ont soefert auant ces houres sil ne soient eide du Roi, qil pleise de sa grace pardoner as ditz gentz les vint et sys mars qil lur deuiont de le terme de Pask' drein passe a son escheqer pur la ferme de la dite ville et auxint pardoner la dite ferme de la Pask' proschein auenir, qar les profitz de la ville, qil auoient cuillie et ordenie pur la dite ferme de deux auns aquiter, est entierment destrutz ensemblement oue toutz lour autres biens, qil sont en cas de Weyuer la ville, sil ne eient eide et securs.

Endorsed: Fiat perdonacio de .xx. et sex marcs debitis de termino Pasche proximo preterito et de tempore futuro nichil

? 1333.

177

A.P. 1566

A nostre seignur le Roi et a son conseil prient si lui plest ses pouers gentz de Baumburgh' qe com ils ount este souient deuant ces heures destrutes par la guerre descoce, et ore de nouel ils sont nettement ars et destrutz, et ceo le plus par lencheson qe nostre la Reine a ceu temps fuist demorantz en la chastel illoeqes, qe lui pleise pur dieu et en releuement de lour estats pardoner a eux les

Page 200

vint et siz marks qeles ils deuient a nostre seignur le Roi a lescheqer de la ferme de la dist vile de Baumburgh' de terme de Pasqe proscheine auenir, et auxint altres vint marks qil deuient a nostre dist' seignur le Roi de arrerage de la dist ferme de temps passe et les queux sont estalle a .vj. mars.

Endorsed: Coram Rege et magno consilio

Eient pardon' de les .xx. mars del estallement, et soit mande as Tresorer et Barones qil ne soient esparchez de ceo qil eut decruse lestallement

1334.

179

A.P. 15310

Page 201

A monsieur Geffray de Scrope Moustre le […] Priour de Hextildes[ham qe come lou]r Priouri este si souent feit ars et destrutz par la guere descoce et ne poet estre releue [sanz secours] et eide de nostre seignur le Roy et il vnt vne eglise qest appelle Aldeston' quest de lour doun […] auoeison et ne vaut forsqe .x. li' par an par estenz, le quele eglise lour adura moult […] pur lour priouri et lour eglise releuer sil leussent en propre eus: De quei le dit Priour pri au dit monsieur Geffrai qil voille si lui plest prier au Chaunceler ou au sire Thomas de Bamburgh' qil lui voille graunter vn bref ad quod dampnum de forme la chose ne cherra en damage de nostre seignur le Roy ne de nul autre.

Endorsed: [Ei]ent bref ad quod dampnum retournable en Chancellerie et quan lenquest serra retourne en Chancellerie adonqes suent deuers le Roi.

1334.

180

A.P. 13312

Endorsed: Pur chescun Moigne […] et qils ne auisent ou le Roi […] a faire auere ausmes.

1336-6.

Page 202

181

A.P. 2521

A nostre seignur le Roi et son conseil moustre Richard del Haye qe come il tient vn mees en la ville de Noef Chastiel sur Tyne chargee a nostre dit seignur le Roi en quatre Marche de rente par an, la vindrent le viscont et gardeins du Chastiel de la dite ville en temps le ael nostre dit seignur le [Roi et le dit m]ees abatirent en temps de guerre deuant qe les mures de la dite ville feurent leuez, pur ceo qe auys lour feust adonqes qe [le dit] mees feust auisauntz au dit Chastiel, a damages le dit Richard de .xl. li' et issint la place du dit mees gist vnqore voide dont il proit nest pris et nostre seignur le Roi ad perdu sa rente du temps auantdit tanqe en cea: Par quoi pleise a nostre seignur le Roi pardoner les arrerages de la dite rente eant regard a les damages le dit Richard et le dit Richard est prest de rendre la rente […] a nostre seignur le Roi du temps auenir.

Endorsed: […] la peticoun fait mencion feirent abatuz par les Mini

Page 203

stres le Roi par la cause contenue en la peticion ou par autre cause et comebien le dit mes valoit quant les mesons feurent abatuz et comebien [la] place vaust ore, et comebien le mes soleit rendre au Roi et sur touz autres articles tochantz ceste bosoigne et de retourner lenquest en Chancellerie et lenquest retourne soit outre fait droit.

1337.

182

A.P. 7157 No endorsement 1379-80.

183

Page 204

A.P. 8882

A nostre tresexcellent e tresredoute seignur le Roy supplient voz poures Chapeleyns le Priour e Couent del Frers Prechours de Bamburgh' de fondacion de voz tresnobles progenitours Rois Dengleterre, qe come la greindre partie de la paiis dont ils soloient estre sustenuz e viure est gaste e destruct' par les ennemys Descoce si qe ne poient plus outre en Couent illeoqes demurer ne dyuine seruice sustenir pur voz ditz tresnobles progenitours e altres les bienfaisours pur scarste viuer sanz vostre tresgraciouse socour e eide, qe plese a vostre tresgraciouse seigneurie pur dieu e en oeure de charite granter as ditz suppliantz la Chapelle apelle la Maugdeleyns en Bamburgh' qe vaut par an qe quarant sould' e de vostre donysoun mettre a eux e a lour successours pur toutz iours en augmentacion de diuyne seruice e lour viuer illeoqes.

Factum est inde breue ad quod dampnum, per consilium

1381-2.

184

A.P. 15761

A soun tresgraceouse seignur le Chaunceller Dengleterre

Supplie humblement vostre pouer oratour William Robynson de

Page 205

Rothebiry qe come le dit William entour le fest de Noell' lan du nostre tressouerein seignur le Roy qor est sisme feust maheimez et priz prisoner par lez Enemys Descoce sur la Marche Descoce et amesnez iusques a la ville de Egerston' deinz la forest de Jedworth et illeoques greuousement enprisonez et raunceonez au dys marcz et nad rien dont viuer ou paier sa dite raunceoun sinon deide et socour des bones gentz: Please a vostre tresgraceouse seignurie de vostre tresbenigne grace grantier au dit Suppliant vne proteccioun dalmoigne pur coiller sa dite raunceon entre bones Cristiens pur dieu et en oeure du charitee.

No endorsement 1383/1405/1419/1428.

Page 206

SECTION IX

CUSTOMS AND TAXATION

186

Page 208

A.P. 8451

A nostre seignur le Roi et a son counseil prient ses poures chapeleins Priour et couent de seint Oswald qe com ils soient tenuz au dit nostre seignur le Roi en .Cij. li' et diz soudz de lour dismes qe courent ore endemande sur eux, et le dit nostre seignur le Roi soit tenuz as ditz Priour et couent en .Cij. li' et diz soudz pur biens pris de eux par sire Roger de Horseleye, adunqes Conestable du Chastel de Baumburgh', al ops nostre seignur le Roi pur la sauue garde du dit chastel, dount ils enount bille enseale du seal sire William de Melton', Erceuesqe Deuerwyk', adonqes Gardrober nostre seignur le Roi, et la quele dette est pleinement doue as ditz priour et couent sicom piert par lacounte le dit sire Williem rendue a lescheqer', de qei ils mistrent peticion en le drein parlement qe nostre segnur le Roi voleit alower la vne dette en lautre, dount rien fust fait vncore (?)tant fust ceo comande de par nostre seignur le Roi, qili pleise auoir regarde a lour grantz meschief et destruccions et comander de sa grace especiale qe lune dette soit aloue en lautre.

Endorsed: Fiat breue

Adeant Cancellariam et ostendant ibi billas quas habent de denariis eis debitis, quibus visis, mandetur Thesaurario et Baronibus quod viso compoto Custodis Garderobe allocent Priori in debitis que debet de decimis ad scaccarium id quod ei debetur vt peticio supponit, onerando etc.

Irrotulatur

1327.

Page 209

187

A.P. 7988

A nostre seignur le Roy et soun conseil moustre Robert Oliuer qe come mesme celi Robert iadys acounta deuaunt les Barouns del Eschere qe adonke furent de la garde dela Custome des leynes el port de Neof chastel sur Tyne et de Herterpol et feust troue en la dette le Roi des .ccclxvj. li' ou il vynt deuaunt leuesqe Dexcestre adonke Tresorer et demaunde allowance de la dite dette pur ceo qad fuist derobbe les enemys le Roi Descoce de mesme les deners et ars iesqes en terre tant come il fuist par aillours en le seruice le Roi, et estre ceo il pria allouance de .cxl. li' qe le Roi lui deuoit sicome apiert bien par billes qil les moustra et vncore purra moustrer, et estre ceo il pria allouance de .c. liuers les queux il paia par comandement le Roi et par sa bref, les queux allowances le dit Euesqe par sa malice et la male voillance Hugh' le Despenser et Roger Belers lui desallowe tut entier et le geta en prison primes en Flete et puis en la Tour de Loundres par deux aunz et plus par quei il est destreynt dount il prie grace et remedie qe les dites allouances resonables lui puissent estre allouer, et ceo qe demort il prie de la grace le Roi qil puisse auer lestallement resonablement par an sicome il peut atteyndre.

Endorsed: soient les billes et la lettre de commaundement mostrees en Chauncellerie et de ceo qe ly einz serra compris soit mande bref as Tresorer et Barons qe recete laconte dont la bille fait mencione, facent a li dite allowance de ce qest compris en les billes et lettre en les dettes qil doit au Roi.

Page 210

Et quant al estallement, suyet deuers le Tresorer etc.

Irrotulatur

1327.

188

A.P. 3218

A nostre seignur le Roy e a soen counseil priunt ses gentz du Couunte de Northumbr' qe com il sunt destrutz par les enemis descoce e nostre seignur le Roy ad maunde sa comissioun pur taxer les dite gentz e leuer de eux le quinzim, il priount pur diew qe nostre seignur le Roy voil auoir regarde a lur meschef e voil si luy plest pardoner a eux le tax auauntdit.

Endorsed: Coram Rege et magno consilio

Page 211

Eient bref de respit tanqe a la fest de seint Johan.

1333 or 1334.

189

A.P. 6490

A nostre seignur le Roi prient ses ligges gentz de la Communalte de Northumbreland' qe pur les graunts destrucions, arsons e meschiefs qil eunt [soeffert] par les enemis descoce qil veulle de sa graciouse seignourie pardoner a eux les dites taxes del quinzyme denier e del disme qe courent sur eux en le Counte de Northumbreland: Pur quele demaunde il sont fortment greuez.

Endorsed: Pur les grantz meschief' qils ont soeffert deuant ses houres et vnqore coment qils soeffrent il semble au conseil sil plese au Roi qe aumoigne serroit a faire pardon a eux de ceo qils demandent.

Il plest au Roi qils eient pardon de la primere taxe et qe del autre ils eient respit tanqe a la seint Michel.

1334.

Page 212

190

A.P. 14914

A treshonurable pier en dieu et lour treschier seignor si luy plest sire .J. par la grace de dieu Erseuesqe de Caunterbyrs, Primat de tote Engleterre et Chaunceler nostre seignor le Roi Moustrent le Meire et les Marchantz de la ville de Noef Chastel sur Tyne pur eaux et pur les autres Marchantz de la Comune Dengelterre qe comme ils soleient en le temps quant le Roialme Descoce fuist en la meyn nostre seignor le Roi Dengleterre des quirs, leynes, et peaulx launes chargez a Berewyk' sur Twede et ailliours dedenz le dit Roialme paier lour custume et les ditz quir leyne et peaulx launes mesner a la dite ville de Noef et aillours qeu part qils voleynt en Engleterre et iloeqes si mestier fuist descharger et recharger en autres Niefs par conge des Custumers si qe les ditz biens ne fuissent a nul autre Marchant venduz et ne soleient rien doner forsqe vne curtoisie au Clerc pur chaunger lour Cocket Descoce et prendre le dit Cocket deuers eaux pur lour garaunt, la venent les Custumers a Noef Chastel et des quirs leynes et peaux launes chargez a Berewyk' et ailliours dedeinz le poer nostre seignor le Roi en Escoce dont ils ont lour custume deuant paiez et pernent nouele custume encontre launciens vsages a grant damage et empouerissement de eaux: Dont ils prient grace et remedie.

Endorsed: Soit mande as Coillours de la custume qe des leynes et autres marchandises des queux ils aueront paie lour custume a Berewyk' et les queux ils facent descharger et recharger e[n E]we qil ne paient autre foit lour custume.

Page 213

1335 x 1337.

192

A.P. 3219

A nostre seignur le Roi et a son conseil moustront ses marchauntz

Page 214

de Noef Chastell' sur Tyne Robert de Shyluyngton', Johan Flemyng, Pieres Fauoler, Thomas Deuerwik', Johan de Halywell, Johan de Bury et autres qe com nostre seignur le Roi es parties par dela lour eit assigne les custumes et subsides des leynes, quires, et peals lanutz resceus par ses custumers en portz de Noef Chastell' sur Tyne et Hertelpole pur vne grant summe dargent qe les auanditz marchauntz prestoient a nostre dit seignur le Roi es dites parties, sicome apiert par patent' enseale de son seal et des seals des autres de son conseil, prelatz et Countes, queux grantz de son dit conseil adonqes les promistrent qe lour couenantz contenuz dedeinz la dite patent' lour deussent estre fermement tenuz tanqils fussent perpaiez del dit argent; queles couenantz par brief issauntz de la Chauncellerie de iour en autre sont en cele manere debrusez qe par la ou nostre dit seignur le Roi et son conseil lour promistrent qe nul assignement ne nule grant ne dust estre fait ne grante a nuly pur charger leynes, quires ou peals lanutz es dites Portz, mes paiant as dites marchauntz les custumes et subsides. Et auxi pur plus seurte faire as ditz marchauntz nostre dit seignur le Roi et son conseil leur ad grante la garde dun foille de Coket' en chescun des dites Portz, les dites briefs de la Chauncellerie sont de tiele fourme qe si les dites marchauntz ne voillent suffrer en autre manere leynes, quires ne pealx lanutz passer sanz paiaunt la custume et subside sicome lour est promys ne lour part de seal de Coket' deliuerer, qe les custumers par tiel garant des briefs preignent lune foille de Coket' ceo qils ount mesmes en gard' et lour seal demesne en lieu delautre part, si qe les dites marchauntz sont destourbez de lour paiement a grant pert de eaux: Par quei ils prient as ditz nostre seignur le Roi et a son conseil de lour ordeiner tiel remedy qe desi enauaunt lour couenantz lour soient tenuz, eant regard' a lour grantz pertz qils ount ewe de la dite destourbance et auxi de lour grantz pertz qils ount ewe par gentz de Caleys qe lour ount robbez de deux niefs charge de leur leynes propres et de nules autres a la summe de leur biens sanz pert de lour amys de deinz les dites niefs tuez .trois Milles. marz: Les custumes de queles leynes sont acomptez as ditz marchauntz en partie de lour paiement qe nostre dit seignur le Roi lour est tenuz par le dit patent', de quele custume prient les ditz marchauntz, depuis qe lour dites biens furent toutz perduz, qils puissent de sa bone grace estre deschargez, ou alowe entant de custume autrefoitz.

Endorsed: Coram rege

Page 215

1340.

193

Page 216

A.P. 3208

A nostre seignur le Roi et a son conseil prient ses liges hommes de la ville de Noef Chastel sur Tyne qe come sur le grant fait a nostre seignur le Roi a son parlement del .ix.^me des garbes, aigneux et tisouns de deux aunz commissioun fut mande au seignur de Perci et a mouz Rauf de Neuille dassere et leuer de la dite commune les neuismes du primer an, les queux par serment de leals gents assistrent et leuerent de la dite ville .cc. mars oue grant diligence et a grant peyne, et puis par la commonalte du roialme fut grante a nostre seignur le Roi Trente Mille sacs de leynes en recompensacion des .ix.^mes del seconde an a leuer en deux aunz, les vint Mille la primer aun et le dys Mille le secunde aun, des queux .xx. Mille la dite ville fuist assys a .lxxiij. sacs .i. quartron de leyne .ij. peres .iij. libres .i. quartre .iij. libres de leyne, et de les .x. Mille sacs la dite ville fust assys a .xxxvj. sacs demi. iiij. peres .v. libres .ij. quartres demi de leyne en absence de eux, la quele summe ne puist estre leuee de eux sils ne soyent destruitz et Mis a meschief pur touz iours: qe plese a nostre seignur le Roi a prendre de eux .cc. mars en lieu des leynes issint sur eux assys, come auant fuist fait pur les .ix.^mes du primer an: Eant regard a lour grant meschiefs queux ils ont eu par la guerre et a les fines et raunsoms queux ils ont fait au Roi parount la dite ville est mout empoury.

Endorsed: Suent auers le Roi

1341.

Page 218

195

A.P. 13003

[A nostre] seignur le Roi et son counseil moustrent les gentz de la comunalte de la ville de Noef Chastel sur Tyne qe come la dite comunalte eit soeffert grantz meschiefs tant pur les greueuses et outrageouses sommes as queux plusours de celle ville eunt este mys par sire William de Kildesby et pur diuerses taxes illoqes fait saunz auoir regarde a les grantz destruccions et perdes queux ils ount eu et soeffert pur la guerre Descoce come es plusours autres maneres, et plusours des bons gentz par queux la dite ville soleit estre garde et gouerne seit mortz et plusours deux qe sont demurer sont si pouers deuenuz qils nount apoi dount eux meismes sustenir, issent est la dite ville en si grant peril qe eux demoerent en ycelle ne suffisent a la garde dycelle sils ne soient eide et succurrez par nostre seignur le Roi: par quoi plaise a nostre [dit] seignur le Roi et son counseil, eantz regarde a lour grantz meschiefs queux ils ount soeffert et vnqore soeffrent de iour en au[ltres, pardoner] a eaux les Cent et oyt sakes de lein qe current en demande sur eaux pur lour porcion de Trent Mille sakes de lein grantez a [nostre seignur] le Roi par la comune de son Roialme pur les deux aunz proscheins passer et pur queux ils sont outraiousement destreintz et perdont […] de iour en iour, et de faire examiner les recordes et processe fait deuant monsieur Thomas Surteys et ces compaignons et les queux sont returne a Chauncellerie par brief nostre dit seignur le Roy, et ceux qi serront trouez trop' outraiouses amenuser selonc le grante faite a eaux [par nostre seignur] le Roi deuant son passage

Page 219

en Bretaigne, come pleinement poet estre tesmoigne par Lerceuesqe de Canterbyrs, le Count' […] et le Count' de Huntyngdon', issent de celles sommes issent amenusez puissent estre allowez en la dette qe purra estre […] et a la dite comunalte due par nostre dit seignur le Roi.

Endorsed: Pur la commune de la ville de Noef Chastel sur Tyne

Coram Rege

c. 1343.

196

A.P. 8562

Ples a nostre seignur le Roi et a son sage conseil granter vne supersedeas de le Coillet de le derrain subside granter a vostre seignur le Roi entre leawe de Coket et leawe de Twede, qest pur la greindre partie degaste par les escoces, et vne autre supersedeas pro le Counte de Northumberlande a cause qe les Coilleurs et assessurs du dit subside illoeqes ne osent chiuacher en la dite paiis a cause de le grant treoble et debat qe sont en les dites parties entre les gentz illoeqes, tanqe monsieur de lancastre [ou] aucune autre persone veigne en les dites parties pur cesser les ditz treobles et debatz.

Eient supersedias tanqe al Natiuite seint Johan Baptiste prochein auenire

Page 220

No (further) endorsement ? 1370.

197

A.P. 6439

A nostre seignur le Roi et a soun tressage counseil suppliount les lieges de Norhumbr' qils puissent auoir pardoun del subside dez grosses darreins grauntez qar ils ne sont autrement de power de paier la quinszime.

Item qe les poueres de dit Counte pluis proscheyn as Escoce queux sount degastez par les enemys puissent auoir mitigacioun du la paiement del subside solonc lour quantite.

No endorsement ? 1377.

Page 221

198

A.P. 916

Endorsed: Facent les ditz suppliant par auys des Gardeins de la Marche illoqes et mettre en escript tiele remede come leur mieltz semblera pur eux accordant a bon foy et resoun et les facent moustrer as seignurs pur leur ent auiser.

1379.

199

A.P. 11263

A nostre tresredoubte seignur le Roi supplient ses poures Comunes de Northumbr' qe lui please auoir consideracion de lour graunt pouerte et necessite, lour ottroiant grace del subside de les trois grosses grauntez al parlement de Northampton', le quelle ils ne sont de pouair appaier, encas qils paieront le quinzein en ceste present parlement graunte, come ferront autres voz liges.

Page 222

Endorsed: Cesse la demande des ditz Grotes tantcome la quinszisme ore grante soit a leuer en dit Contee, et sur cest grant soit brief fait as Tresorier et barons de leschequer de surseoir en le moien temps et tanqe ils ent aient autre mandement por les dites causes.

1382.

200

A.P. 6420

A lour tresredute seignour le Roy et son sage Conseill' suppliont ses poures tenantez de Noefchastell' sur Tyne, vn keye de North' et resset a vostre Oest et vostres poures communes de Northumberland en temps de guerre et necessite, pur quel vile et le port du ycelle oue les comoditez ils rendont a nostre tresredoute seignour le Roy .C. li' par an com a sa Coron, en aide et parcelle du quelle Ferme les Progenitours nostre seignour le Roi et lour tenantz du dit ville ount estez seisez de tout temps de tonuz et Custumes de touz les gentz du Lynne tenantz al Euesqe de Northwich' et nemy tenantz ne rien rendant a nostre seignour le Roy sanz interupcoun

Page 223

iesqes en le temps nostre seignour le Roy qorest, qe les ditz gentz du Lynne, claimantz estre Fraunkez de tonuz et custumez a Noefchastell' com vnqes ne furront, de lour meistrie et saunz processe pur tonuz de eux prise a Noefchastell' a valu de .xxij. li pristeront a Lynne par voye de Withername serteins biens et chateuz al valu de .xiiij.^xx li' de vn Thomas Philip et autres gentz de Noefchastell' qe vnqes ne furrent ministres a Noefchastell', Custume ne tonu pristeront de ceux de Lynne ne de null autre, encountre leye et reson et lestatut, et les ditz biens ne voiderent deliuerer pur null mandement nostre seignour le Roy tanqe ils auoient serteins gentz lieez en le Chaunselerie en .iiij.^c li': qe please a vostre tresredute seignourie et sage counseil ordeignere qe le dit Withername seit pleinment diliuere et le reconisance et processe ent fait adnulle, puise qe le Court nostre seignour le Roy ad poiaer et Jurediccoun a faire droit et reson a chescun partie deins sa Roialme compleinantz, considerantz qe tels torseonosez et excessiues. Withername encountre le Rialte poient faire grantz distauz et debates dens le Roialme.

No endorsement 1382.

201

Page 224

A.P. 11248

A tresexcellent et tresredoute seignur nostre seignur le Roy

Supplient voz pouers Merchantz de vostre ville de Noef Chastell' sur Tyne qe come on pardeuaunt ces heures vostre custume et subside des leyne en le port du dicte ville par trois ans et plus feurent [de nulle] value a cause qe les leyns illoeqes tut enviroun feurent et sont si feblez et le rett' de illoeqes a Caleys si long et perilouse le freyght et auenture si grant et chargeant et pur leur febles ne purrent estre […] al dicte ville de Caleys ne deliuerez, issint qe les charges et grant custume et subside de tieux febles leyns sont emportables as ascuns autres leyns de vostre roialme, queux meschiefs considerez de [vostre] grace especiale et par lauys de vostre tressage conseil grantast' as ditz Merchantz par voz lettres patentes deuaunt ces heures qils purroient en le dit port eskipper Mille saks de leyne a passer ou leur plerra, par quele gr[aciouse] grante voz custume et subside illoeqes feurent encrescez en vn an a deux Mille et sept Centz marcz et plus, voz custumes et subside aillurs rien anientissez par ycel: plese a vostre hautesce granter as ditz Merchantz enhabitantz en la dicte ville licence pur eskipper en le dit port trois Mille saks de leyns quirs et pealx lanuz et toutes autres merchandises appurtenantz a lestaple a passer as queux parties de part dela ou lour [plerra], paiant pur le sak' a custume et subside selonc le sage descrecioun de vous et de vostre sage conseil, considerant qils purront achatre le sak' en ycelles parties pur deux marcz, a grant encres de voz custumes et subsides et amendement de voz poures susditz, considerant auxi leur grandes costages et reparacioun de vostre dicte ville et leur grandes perdes sibien par terre come par meer come plusours foitz ad este sue et moustre a vostre treshaute et trespuissant seignurie a plein anientissement et destruccioun de voz ditz Merchantz, sils neyent vostre graciouse eide en celle partie, pur dieu et en oeure de charite.

No endorsement

Page 225

1382 x 1386.

202

A.P. 10768

A lour tresredoute et tresgracious seignurs nostre seignur le Roy et son tressage counseil

Supplient ses pouerez Marchantz del Noef Chastiel sur Tyne qe come grande partie de les leyns dycelles parties ont este et sont eskippez a Berewyk', paiant a custume pur le sak' qune marc', et voz dits pouerez Marchantz paiantz .l. s. a custome pur le sak' de mesmes les leyns, parount ils ne purroient vendre de mesme le merche come les gents de Berewyk' et vivre et supporter lour charges paiantz la dite custome: Sur quoy et autres meschiefs et diuerses perdes a vous tresredoute seignur et vostre tressage counseil moustrez de vostre grace especiale grauntastes as ditz suppliant deskipper illoeqes Mille sakes de leyns quyrs et pealx lanutz paiantz del sak' .xl. s. a custome tanqe la fest de toutz seint prochein, deinz quel terme a cause de sa brieftee et lour pouerte ils ne poeront estre

Page 226

prestz ne nules leyns eskipper, qe pleise a vostre tresgracious seignurie de continuer le dit graunte pur tout lan proschein et par bone estimacioun vous tresredoute seignur auerez illeoqes .ij^M. li' de custome ou nauastes nul denier par dieux ans passez, pur dieu et en oeure de charite: Considerantz qe Northumbr', Westmerland' et Cumbr' en quelles ils soloient viure et marchander, sont pleinement ars et destruit par voz enemyes.

Endorsed: Samedy le .xvij. iour Doctobr' lan etc. xij.^o Accordez feut par les seignurs a Cantebrig' qe les supplianz aueront licence par lettres desouz le grant seel deskipper en port de la ville de Noef Chastel sur Tyne par eux et par autres sibien aliens come denizeins Mill' saaks de leyne, quirs et peaux lanuz de la cressance du Contees de Northumberland Westmerland et Cumberland leueschee de Duresme et du Contee de Rychemond tant soulement et de nul autre paiis parentre cy et la Pasqe prochein venant: Rebatant de chescun des ditz saaks de la custume due a nostre seignur le Roy dycel dys soldz tantsoulement et paiant au Roy le surplus de mesme la custume.

1388.

Page 227

SECTION X

TRADE

Page 231

205

A.P. 15424

Ion le fiz Roger burgeys de Neuchastell sur Tyne se plaint de les gent de Seyland ke la ou la nef Meim cely Jon fust en la Mere parentre Donewyche et Orford le Jur seint Pere agule Auste en cest an la vindrent les genz de Seyland et cele Nef roberent et les bens emporterent ala Muntanse de .c. et .xiij. Mars de vne parte et .i. hanape de argent ki Custa .xl. s. Et ix. dras ke custerent .xxv. Mars et .iiij. .s. Et vne Huche et Jueles ke custerent .xiij. Mars: Summa .vij.^xx Mars et .xiiij. s. .viij. d. Dunt Meime cely Jon pri a nostre seignur le Roi et a son conseil pur deu ki il puis auer remedi de cel trepas.

Norhumbr'

Endorsed: Responsum est ei.

1277-79.

Page 232

207

Page 233

A.P. 3212

Ce mustrent au Conseil nostre seygnur le Rey les Burgeys de Neuchastel sur Tyne ke la ou meymes ceus burgeys vnt la vile aferme de nostre seygnur le Roy pur vne certeyne summe de argent rendaunt par an, la vient le Priour de Tynemuwe e voet enfrauncher les marchaunz ke venent od lur marchandises en le ewe de Tyne ke a ly vendent e ne soffre ke il paent lur custume du, eynz lur fet charger e descharger dedenz le ewe de Tyne en vn lu ke hom apele les Scheles, e vendent a Marchaunz payn e cerueyse e ce ke mester lur est, endeseritisoun nostre seygnur le Rey e encountre sa fraunchise e en destruccoun de la vile auantdite, de sicum la custome de la vile est icele ke nulee nyf venaunt ou Marchaundises ne poet attainre rien dedenz le hauene de Tyne de sa Marchaundise vendre ou descharger ke il ne paye custume de kaunt ke il ad dedenz la neyf, la vent le Priour auantdit e vout enfrauncher ceus Marchaunz ke il ne payent custome com fere deyuunt solom les usages auantdiz: Dunt memes cely Priur enplede les Burgeys au Baunk', e de ce ke la ou nostre seygnur le Rey soleit auer ses prises, ceo est asauer de chescone nauee de Harang vn cent, de chescun batel venaunt od pesson a la vaunt dite vile .i. Morue pur .i. dener, e .i. Cent de Haddok de chescon batel en la sesun pur .vj. dener, dunt le Rey ne ad rien de chose kest descharge en le lyu auantdit. E de ce prient il remedie si ke la fraunchise nostre seygnur le Rey ne seye perie taunt com il sunt ses fermers, ne le play parentre eus e le priur auauntdit ne passe mye en iogement saunz la presence nostre seygnur le Rey ou la vostre ke son lyu tenez, purce ke il dutent le pays ke taunt est procure par le priur. E estre ceo la ou soleyunt estre caseles al Sheles a herberger pestors venaunz de la mer soulement pur tempeste, la est ore leue vne vile graunde aferestal de la vile auantdite ou il bracent e furneent en destruccoun de la vile auantdite: Dunt la vile nostre seygnur le Rey est enpere chescon an de dyz liueres.

Page 234

Endorsed: In Cancellaria sequatur breue pro Rege et burgensibus noui castri ad faciendum venire Priorem de Tinemue ad proximum parliamentum post pascha.

Habeat breue secundum formam peticionis

1289-90.

208

A.P. 9946

Ceo moustre Rauf de Gatesden de Londres as Auditours deputez depar le Roi de France et le Roi Dengleterre a redrescer les damages faitz as gentz de Lune terre et delautre qe com il ont mys a Noefchastel sur Tyne en la Nef que fu apelle La Rose de Scardeburgh vn tonel et vne Pipe pleins de Cendres de foundurs dargent pris de .xxx. li' .xv. s. de sterlyngs de amener a Londres, vindrent sire Reigner Grimbauld et Michel de Nauere lor gentz et lor aidantz en mois de Aust, lan de grace .MCCCiij. deuant Mergate sur la coste Dengleterre E les ditz biens a force e as armes pristrent e enfirent lor volentez: De quai il ia grand fame a renomee en le pais enuiron de Mergate e a Scardeborgh e aillors: Dont lauantdit Rauf prie remedie e restorance de ses ditz biens e de ses damages que amontent a .x. li' de sterlings: Les queux choses

Page 235

auantdites en tut ou en partie le dit Rauf' se offre de mettre a veir solom ceo quil apartendra e ceo quil porra prouer li vaille.

No endorsement 1303.

209

A.P. 11348

A treshonurable tresnoble e trespuissaunt Prince nostre Seignur sire Edward par la grace de dieu noble Roi Dengleterre Seignur Dirlaund e ducs Daquitaine ses hommes liges les Bailiffs e les Burgoises de sa ville de Nouechastel sur Tyne, honurs e reuerences com a lour seignur lige: Cheir seigneur a vostre Roial poer fesoms asauoir que com Thomas de Burgh' Burgois e Mariner de vostre ville auauntdite ala vers les parties de Strallesond en Alemagne en vne nef' oue ses biens e ses marchandises com leal Marchaunt les Eskeuins e les Burgoises de la dite ville de Strallesond pristrent le dit Thomas e le enprisonerunt e enprisone le detiendrent e encore le detient, Ensusmettauntz a dit Thomas quen ia .xiiij. aunz passes duit auoir este a diuerses roberies e homicides fetes a lour vaisins en la Meere vers les parties de Bamburg', en qeu temps le dit Thomas fu en la compaignie des Mariners des cink' portz sur la Costere de fraunce e nemy illoeqes: E ceo sire auoms nous auaunt ses houres ensu […] par nos lettres enseilles su commun seal de vostre ville auauntdit pur le dit Thomas as Eskeuins e Burgoises auantditz e les auoms prie afeir deliueraunce de lui desicom il nest de rien cupable des choses que li sount susmis, e

Page 236

eux nule foie deuauntz a nostre lettre ne a nostre tesmoignaunce rien vncor ne euount feit: Dount cheir seignur a vostre Roial poer prioms pur dieu que pite vous preigne de vostre homme, e que vous voillies pur lui ordeiner couenable remedie, e sil vous plest cheir sire […] tesmoign' par vostres lettres patentes a les Eskeuins e Burgoises auauntditz auxi com nous vous tesmoignoms par les nos. Escripts a vostre ville de Nouechastel auauntdite le .xij. iour de septembre, Lan de vostre Regne quart.

No endorsement 12 September 1310.

Page 237

211

Page 238

A.P.E. 396

A nostre seignur le Roi e a son conseil moustre William de kilpyn Come en lan de son regne quart quant il estoit a Berewyk' sur Twede ledit William de kilpyn ala enla compaignie monsz Pieres de Gauaston' adonques Conte de Cornewaille a les villes de Dunde e de seint Johan de Pierth e illoeques achata .xxiij. dacres e dim' des quirs, .cc. salmons, e des quirs des bestes saluage ala montance de .c. soudz e de meismes celles marchaundises chargea vne Nief a Londres. E come la dite Nief passa deuers Londres deuaunt le hauene de Neubigging' vynt vn Caleiser e prist ladite Nief e tua quantque furent leyntz. E sur ceo le Caleiser vist vn bat venir loynz sur la Meer e por pour se mist ala fute en son batelle od touz ces gentz de sa Nief. E les pescheours virent la felonie estre fait e approescheront ala dite Nief e aparceurent vestures senglantes des gentz occis enla Nief e pristrent la Nief e la towerent a Neubigging', e vynt vn Johan le clerk burgeis de Neubigging' e fist porter meismes les biens ala terre e les fist mettre en vne messon come lexchete le Roi e lendermein par commun conseil de ceauz de la ville il fesoient maunder le subeschetour du pays, e il vynt e prist enqueste doffice auxi bien des Mariners come des gentz du pays e des burgeis dela ville ceo que hom freit desditz biens. E lenqueste dist que home freit garder les biens, e si nul home de la foi le Roi venist les biens chalanger solomc' la custume e les vsages du pays dedentz lan e vn iour les biens serreient liuerez a lui entierement. E ledit William vynt dedentz les .vj. semeignes apres ala ville de Neubiggyng' e troua illoeques ses biens, les chalangea, mes nule deliuerance auer ne poeit, par lencheson que vn Rouland de Redinges fist entendaunt au Roi que meismes ceaux biens furent a ses enemis Descoce, par quele fauxe suggestion nostre seignur le Roi les fist maunder par ses mariners tauntque Berewyk e quant il

Page 239

furent venuz il les dona a ses mariners. E le dit William suyst deuaunt monsz Henri de Percy e sire William de Melton' mes nul recouerir auer ne poeit mes fust conseille par monsz Henri e sire William de suire sa demande en chauncellerie e deguerpist la suite par noun poair e vnques puis ne vnqore nest de poair de suire mes toute voies puis a demorre en meschief, par quei il prie a nostre seignur le Roi por lamour de dieu e por les almes ses auncestres, que de sa grace especiale lui voille ascune allouance si qil ne seit mendinant por touz iours.

No endorsement 1312 x 1314.

212

A.P. 1495

A nostre seignour le Roi et a son conseil moustrent Robert de Angerton' et Walran de Lomley ses Burgois de sa ville Noef Chastel sur Tyne qe come Caux auoient charge a sa dite ville de Noef Chastel .xx. sacs de leyne, pris' de .cc. liures, en vne Noef de Jarnemou en le Moys Daust' lan du regne le dit nostre seignour le Roi duzisme, damesner a seynt Omer, La Vyndrent Flamangs Robeours en la Miere pres de Ille de Taunete le iour seynt Barthelmeu en meisme le Moys, dedeinz la Trewe prise entre nostre seignour le Roi et les Flamangs, et la dite Noef en alaunte vers les dites parties pristrent et les dites leynes enmesnerent et lour volunte enfirent: Dont les ditz Robert et Walran prient a nostre seignour le Roi qil voille de sa grace si lui plest ordainer por Caux couenable remedie en ce cas.

Page 240

No endorsement 1319.

213

A.P. 5451

A nostre seignur le Roi et a son consaille Moustrent Richard' de Emeldon' et Thomais Thorauld de Noef Chastel sur Tyne comme il auoient chargez hors del hauen de Tyne vers les parties de Flaundres en Lan du regne nostre seignur le Roi qore est quinte deux neef' del sluys od .xxxiij. sarpler' de layne et deux lest et demi des quires, pris du sarpler' de leyne .xiiij. marcs et pris du lest des quires .xxx. li', vyndrent Mesfesours de Flaundres et pristrent les dites leynes et quires et les amenerunt en Holaund' a vne ville qest apelle le Brele et quant leuauntdit Thomas Thorauld et Robert de Emeldon' seruaunt Richard' de Emeldon' auauntdit auoient entenduz qe les dites biens furent amenez illoqes, il alerunt pur auoir deliueraunce de les dites biens et quant il vyndrent alauauntdite ville de Brele illoqes trouerunt les dites biens en la seysine Giles Doppe, Clays de Thoraud et Peres de Bereflete chargez en barges enuers Flaundres, et les dites Thomas et Robert suerunt les dites biens tauntqe ale Sluys en Flaundres et illoqes furent les dites biens arestutz a la suyt' de dites Thomas et Robert par le Baillif' del Sluys et mis au terre, et herbergez deinz Mesoune. Et les ditz

Page 241

Thomas et Robert suerunt deuaunt le count de Flaundres Monsieur Robert de Betoyne qi adonqe fust pur la deliueraunce des dites biens: Et le dit Count comaunda qe les dites biens demurrassent en mesme le lue en arrest' tauntqe dreite fust faite as dites Thomas et Robert: Et sur ceo vyndrent les auauntdites Giles Clays et Peres od lour force et les dites biens pristrent hors del arrest et les amenerunt la ou il voudraynt, par quai qe les dites Thomais et Robert furent garniz par lour amys, qe si il suassent mes pur auoir deliueraunce de les dites biens, qil perdraint lour vies, issint qe les auauntdites Thomais et Robert ne furent si hardiz depuis en [cea a] demorrer pur meisme la suyte fere mes adonqes se alloignerunt hors du Pays a plus en haste qil poaynt: Dount les auauntdites Richard de Emeldon' et Thomais Thorauld prient a nostre seignur le Roi et a son consaille qil voille si ly plest de ceste chose ordeiner couenable remedie.

Endorsed: Expectet tractatum habiturum inter Regem et Flandr'.

? 1322.

214

A.P. 1471

A nostre seignur le Roi et son conseil mostre Willam de Acton, Burgeis de Noef Chastel sur Tyne, qe come en temps de pees entre les Rois de France et Dengleterre il auoit en la ville de seynt Walerice .viij. toneux de Waide pris de .iiij.^xx li' et illoeqes les auoit mys en noef pur auoir amene en Engleterre, le Roi de France les fist arester illoeqes saunz encheson deuers le dit Willam, par quoi il auoit brefs al Roi de France souent fietz empriant qil

Page 242

comandast la deliuerance des ditz biens, et fist grant seute, tanqe al darreyn qe le Chancellier de France en propre persone ly respondi qe courtement nulle deliuerance ne ne dust il auoir, pleise al conseil nostre seignur le Roi pur dieu en eiant regarde a la grant seute du dit William de ordeyner graciouse remedi.

Endorsed: Expectet tractatum.

1325 x 1337.

215

A.P.E. 408

A nostre seygnur le Roy e sun Consayl prient les poueres Borgeses de Corebrig qe il voylunt ore de lur grace graunter a eus vn pountage de sustener lur punt' jekes il pussunt estre de pouer de coe fer, desicum il sunt ore si netemente destrut qe il ount ren dunt uiuir e apoy touz sunt ale en pouerte hors du paiis par les enemiis de Escoce issi qe il solum lur (?) graunter' le pussunt leuer des marchaunz qe passent le dit punt od lur marchaundise qe sert a touz de cele Marche pur coe qe il ni ad nul autre fet fors cel sul de Neuchatel sur Tyne jekes Kardoyl' en nul lu sur cel eu de seruir le paiis e coe est enperil si il ne ayt ayd et sayt sustenu. E le plus volenters si lur veynger a gre les voylunt il a eus ceste grace ore fer en regarde de charite pur taunte cum il entendent de tener en chef de nostre dit seynur le Roy pur touz jurs apres le desese munz Johan de Clauereng' lur seignur.

Endorsed: Coram Rege

1327.

Page 243

216

A.P. 13788

Auxint prient les Burgoies la ville de Noueu Chastel sur Tyne qe desicomes il ount tot perdue par la guerre, si qe ren lour fust demorre forsqe lour blees qe furent creissauntz entour la ville de Noef Chastel auauntdite, les queux blees furent toutz destrutz nettement par lost nostre seignur le Roi a son derrein aler deuers escoce, qil poent auoir restitucioune de lour damages, ou allouaunce en les vittailles les queux il ount achate nad'gerres de nostre seignur le Roi en la ville auauntdite.

Auxint prient se poures Marchauntz de la dite ville, qil puissent aler od lour simples marchaundizes qe leur sount remis, cest a sauoir leynes, peaux lanutz, et quires, et od autres marchaundizes as lues ou il se puissent meultz enpruer pur amener vittailles de illoqes pur lour sustenaunce et pur la garnesture de la ville auauntdite, kar il ount nulles vittailles sil ne les amenent hors de les parties de la entre.

Auxint prient les dites Burgoies qil puissent auoir breef au Tresorer de la Garderobe, qil account […] eux de diuers parceles qil ount a acounter deuaunt ly.

Endorsed: Quo ad duas primas peticiones coram Rege

Quo ad terciam peticionem habeant breue de computando

Coram Rege

Page 244

? 1327-29.

217

A.P. 3606

A nostre seignur le Roi et a son consail prie Ermynrode of Stralleson Marchant de Estlond, qe comme il ala nadgueres par Meer oue ses marchaundises, la vint sa nief par mesauenture trop pres de la terre et debrisa a queu lieu le seignur de Percy vint et fist arester tuz ses biens par commandement qil auoit du Roy darester tuz Marchantz aliens, par quoi le dit Ermynrode aprocha a la Curt et sui tant deuers nostre seignur le Roi qil manda ses lettres au dit seignur de Percy, qil feist deliuerer au dit Ermynrode tuz les biens qil auoit arestu du soen, et il ensi fist et le lessa aler quites, puis apres vint Thomas Haukyn de Noef' Chastiel sur Tyne et lencontra pres de Halielond' et la prist et arestut tuz ses biens auantditz et vncore les detient, dont il prie a nostre seignur le Roi, qil voille commander par ses lettres au dit Thomas, qui lui face deliuerer ses ditz biens issint qil puisse aler queu part qil voedra.

Percy

Endorsed: soit mande bref a Thomas qil certifie en Chauncellerie sil prist les biens etc. come suppose est etc. adonqes queux biens

Page 245

et par quele cause et de quele value, et ceste certificacion returne en Chauncellerie soit fait droit.

c. 1327.

218

A.P. 10080

A nostre seignur le Roy e soun Counsail peye le Comun poeple demoraunt sur le Ewe de Tyne en le Counte de Northumbr' qe il voile assigner par sa Comissioun Conseruatours a garder e fere serche sur le Ewe de Tyne des outrageus gors leues de nouel, et de ceux qe portient sameunseux en autre tens ou en autre Manere qe statut et aunsiene Costume ne doune.

Conseruatours del Ewe de Tyne

Roger Maudut Richard de Emeldon Johan de Meneuille

Endorsed: Soit ceste peticion mande en Chancellerie e le Chanceller, pris a lui les Justices e autres, face ordeiner remedie sur les choses contenues en la peticion.

Before 1333.

Page 246

219

A.P. 14423

A nostre seignur le Roi et son consail moustrent ses liges gentz et Marchanz Richard de Galeweye, Robert de Shiluington' et Adam Tredeflour Marchanz de la ville de Noefchastel sur Tyne qe come ils chargerent a la dite ville diuerses marchandises en la Nief appelle le Petit Cutbert de mesme la ville de Noefchastel qest a lauantdit Richard de Galewaye et qe cele Nief se ariua en sauete et en bone pes a la ville de seint Walery sur Summe en Pycardie a sa droite descharge: Et puis les auantditz Marchanz Richard, Robert et Adam rechargerent la dite Nief oue diuerses marchandises illeoqes a la value de .cccl. Marz, cest assauer de les bienz lauantdite Richard .cl. Marz et des bienz lauandite Robert .c. marz, et des bienz lauantdite Adam .c. Marz: Et quant la dite Nief fui charge illeoqes vint vn Johan de Mier qe se noma Admiral du Roi de France par ses gentz de Depe et aresta de par le Roi de France la dite Nief qe vaut .c. Marz, od les auantdiz marchandises de la value de les .cccl. Marz susdiz, deuant la feste de la seint Michel' darrein passe, as grantz damages des Marchanz auantdiz: Par quei ils prient a nostre dit seignur le Roi et a son consail qe remedie et restor soit faite a eux de la dite Niefe et de lour bienz: Et qe plese a nostre dit seignur le Roi et son consail auoir ceste besoigne au qoer le plus tendrement et graciousement par la reson qe lauantdite nief lui serui a son darrein alier en este es parties Descoce.

Endorsed: Coram Rege et magno consilio

Soient co[uenu]es gentz bones et loiaux assignez par commission du grant seal denquere auxibien par serement des marchantz come des autres si la roberie et la arest contenues en la peticion feurent faites come la peticion suppose et par queux ils feurent faites, et de qi poair ils sont, et de queux biens et marchandies ils feurent

Page 247

desrobbez et de quele value, et des autres articles, et quant lenqueste serra retourne et la roberie serra troue faite, et le passage de la mer soit clos come il est aore, adonqes eient arest sur les pieres et communers des ditz robbeours issint qe larest ne se estend' mie as biens et marchandies des Marchantz demorantz en Engleterre ne ad fraunk' tenement en Engleterre, et si le passage soit ouert quant lenquest serra retourne, adonqes soit mande a les seignurs de faire droit et soit outre tenuz launcien cours.

1336/7.

220

A.P. 2082

A nostre seignur le Roi et a son conseil prie son Marchant Johan de Denton' de Noef Chastel sur Tyne ke come nadgeres en temps de pees et de trewe entre nostre seignur le Roi et ceux de Flaundres le dit Johan enuoia en Flandres par William de Matfen son seruant leines et autres biens et marchandies a la value de .D. li' pur marchander et ent faire son profit, le Counte de Flaundres et les scauyns et les Burghmestres de Brugges les auantdites leines et autres

Page 248

biens et Marchandies trouez en Brugges firent arester et entre eux departir et faire lour volunte et mesmes les leines, biens et marchandies a lauantdit Johan vnqore detiegnent en grant empouerissement de son estat, et le dit William son seruant pristrent et detindrent en prison tanqe il auoit fait raunceon a eux pur sa deliuerance, de qoi il prie qe remedie lui soit fait.

Endorsed: Coram Rege et magno consilio

Soient certeines genz bones et loiaux assignez par commission du grant seal denquere auxibien par serement de [com]marchantz come des autres si larest feust fait come la peticion suppose et par queux il feut fait et a qi sute et queux biens feurent arestuz et a qi les biens feurent et de quele value et en qi mains ils deuyndront et si le dit Johan ad riens resceu des ditz biens en partie ou en tut et des autres articles tochantz ceste bosoigne, et quant lenquest serra retourne si larest serra troue fait come la peticion suppose et le passage de la meer soit adonqes clos come il est aore, adonqes eient arest sur les communers et pers de ceux qe firent le dit arest issint qe larest ne se estend' mie as biens et marchandies des marchantz demorantz en Engleterre ne qe ad fraunk' tenement en Engleterre, et si le passage soit ouert quant lenquest serra retourne adonqes soit mande a les seignurs de faire droit et soit outre tenuz le auncien cours.

1337.

221

Page 249

A.P. 3439

A nostre seignur le Roi et a son Consail supplie Thomas Renter le son homme lige de Pountise qe come il venoit du nouel Chastel sur Tyne oue sa Nef charge de [Carbons] de Meer deuaunt le Hauen de Jernemuth' les Mariners William de Gosford' pristerent son Neef et meneront a Jernemuth' pur la guere nostre seignur le Roi dengleterre et le Roi de France, pur dieu qe il soit maunde au bailifs de la dite ville qe la Neef et les Carbons soient renduz et deliures a leuantdit Thomas, quar il est homme nostre seignur le Roi et madame la Royne lui eust maunde au Consail.

Endorsed: soit mande a William de Goseford et as ballifs de la ville de Jernemuth' qe il se auisent si le dit Thomas mester de la Neef' dentz escrite soit du poer le Roi Dengleterre de la Contee de Pontise, et si la Neef' et les biens dentz escritz soient arestuz par la cause suppose en la peticioun et ne mie par autre, adonqes soientz les ditz Nef' et biens deliures au dit Thomas.

Irrotulatur

? 1337-40.

222

A.P. 6448

A tresredoute et tresgraciouse seignur le Roy et a son consail Moustront ses lieges Mair, Baillifs et la commonalte de la ville de Noef Chastel sur Tyne qe come fust ordeigne par son conseil lan de son reigne .xxxvj.^me qil ne lirreyt a nully de quele estat qil fust damener carbons du meer hors de roialme, et sur ce brifs maundez a touz les

Page 250

Gardeins des portz du roialme pur ent proclamacion faire sur peine de forfaiture des carbones issint amenz, les queux commonalte de la ville de Noef Chastel suisdit nont autre commone marchandice pur lour estat mayntener ne la ferme nostre seignur le Roy del dite ville de Noef Chastel paier, qe de lour carbons auandit, pur quele chose auandit les ditz mair et Baillifs sont greuousement destreintz dan en an de rendre acompt en leschequer: Par qey plese au dit tresgraciouse seignur le Roy et a son conseil pur dieu et en oeure de charite pur repeler lordinance auantdite, eiant regard a les causes et meschiefs suisdit.

Endorsed: probetur

1362/3.

223

A.P. 10313

A nostre seignur le Roi et a son conseile moustrount les Mayre et bonez genz de la vile de Noeuel Chastel suer Tyn qe com ascons genz de dit vile ensemblement oue aultres estraunges se entrelyerent et puis pur muysere lour fauxin se vindreunt en Chauncelry nostre seignur le Roy et purchasserunt vn chartre de lycenz pur a colier vn fraternite en la dit vile, la quel fraternite et chartre par verray cause com plus pleinement appart par recorde en la Chauncelry par nostre seignur le Roy et son conseile feust repelle et aniente. Et ore ascons de dit fraternite pursuount de iour en aultre par faux susgestiouns et brocages pur recolier et resscessiter la dit fraternite in neneruacoun du dit reuocacoun: Plese a nostre dit seignur le Roy et a son conseil qe la dit fraternite des ore en auaunt ne soit

Page 251

ressussite sans commune assent de parlement come nostre seignur le Roy le dit vile voet sauluere sans perel e destruccoun. Quia scribitur disencio populi est distruccio Ciuitatis.

Endorsed: Soient les ordinances et fraternite repelle en ceste present parlement et eient sur ce patente solonc le purport de lour peticion.

1365.

224

A.P. 3210

Pleise au conseil nostre seignur le Roi comandre as Maire et Baillifs et Colliours de custumes et subsides nostre dit seignur le Roi en porte de Noef Chastiel sur Tyne qe estrangers et preues poiont chargier en la porte suisdite des niefs ou carbons et peres quex sont appellez gryndesstones pur lours custumes ent paiant pur lour profit

Page 252

faire, depuis qe les ditz carbones et peres ne pertenent a lestaple, qar quant les dit niefs veignont a Caleis ou les ditz carbones et peres les marchantz ne trouont nulles hommes qe voillont les ditz carbons et peres achater ne laborers pur les ditz carbones ne peres dez ditz niefs a la terre ent porter, et issint les custumes nostre dit seignur le Roi sont enentz et la dite ville de Noef Chastiel et grante partie de la naue nostre dit seignur le Roi en plit destre perduz enentz et defait, sur qoi pleise au dit conseil de ceste bille comandre voz voluntees.

No endorsement 1365.

225

A.P. 6251

A nostre tresdoute et tresgraciouse seignur le Roy et son sage conseil Moustrent sez lieges Meire baillifs et la comunalte de la ville de Noef Chastell sur Tyne qe come en diuerses lieux de lewe de Tyne soient edifiez diuerses Gortes pluis largement et estreitement qestre ne duissent, issint qe Niefs et bateux sont desturbes de lour passages et lewe suisdite de son cours estopp' par sables queux les ditz Gortes encomblent entre eux a cause de lour estreitenes suisditz, et plusours foitz gentz oue lour batelx en la dite ewe perissent a cause suisdite: par qoi plese a nostre dit tresredoute seignur le Roi et a son conseil pur dieu et en eouere de charite ent ordeiner hastif remedie.

Page 253

No endorsement 1368.

226

A.P. 7792

A nostre seignur le Roi et son bone conseil mustront ses poures liges Thomas de Fenwyk' Wauter de Heselden' William de Fellyng' Johan de Norton' meistre del Westspetill' William Toller' William de Hesilden' William de Hathyngton' William Scotte et Ede Cragge qe come nostre dit seignur le Roi assigna par commission mons' Gilbert Vmfrauill' Counte Dangois et autres solonc lordinance dune estatuz nadgairs fait' a Westm' pur enquerer queux gorces molyns estankes pales et kydelles en lewe de Tyne puisse le temps du Roi Edward laiel nostre seignur le Roi furent mise oue leuez et par queux, et a ceuz tiels gortz molyns piles pales et kydell' en la dit Ewe de Tyne puis le temps laiel de Nouell' leuez, par queux le passage de Niefs et Bateaux sont destourbez, saunz releuacion toutoutrement abatire et oster selonc le purport dun commissioun dont la cope a cest bille est annexe; par force de quel commission les ditz Thomas, Wauter, William, Johan, William, William, William, William et Ede furent endetez del article auandit et lours corps prises et emprisone tanqe ils aueient faitz grauntz fynes et outrageouses encountre lei et reason et saunz garant del dit commissioun

Page 254

come piert par la record mande en la Chauncellerie et les estretz des ditz fines mandez par les ditz Justices en lescheker et del dit Escheker au viscount de Northumb' pur les ditz fines leuer encountre la lei a graunt pouerissement et defesaunce des ditz Thomas et ces compaignes; Par quei pleise a nostre dit seignur le Roi et soun bone counseil pur dieu et en oeure de charite qe depuis les ditz fines sont faitz encountre lei et resoun et saunz garantz del dit commission, de graunter breef a Tresorer et Barons del Escheker de supersedendo comme et auxint a dit viscont de rebailler ceo qil ad leue issint qe les ditz Thomas Wauter William Johan William William William William et Ede ne soient defaitz ne destruitz a touz iours.

Endorsed: Soit brief mande a les Justices qe sont assignez qe facent de abatre et ouster touz cieux annusances entre cy et la feste de seint Michel sur peine de .cc. li' solonc la fourme de lour comission et outre soit brief mande a viscont' de Northumbr' de surseer de tout de leuer les fines faites par ciele cause et mandez a lui a leuer par estrete de lescheqer, et sil eit rien leue, qil le face repaier, et autre brief as Tresorer et Barons del Escheqer de surseer de tout de celle demande, et de celles fines les descharger.

c. 1368.

227

A.P. 14834

A Chaunceller nostre seignur le Roi moustront les powers marchantz de Noef Chastelle sur Tyne qe come ordeigne est dan en an pur eslire vne Meire et deux Conestables de lestaple pur gouernaille des marchandises et pleez parentre marchant et marchant, si eoms eslue Johan de la Chaumbre en Meire, Johan de Eghton' et Johan de Houden' en Conestables pur gouernaille de dit office et profit des marchantz: Par qei pleise a nostre dit seignur le Chaunceller pur dissobesance de ascunes et grendre surete affaire, defaire

Page 255

commission as ditz Johan de la Chaumbre, Johan de Eghton et Johan de Houden' pur gouernaille de dit office. En tesmoignance de quel chose as cestes noz lettres eioms mys le seal de lestaple de Noef Chastell' sur Tyne. Escrit a Noef Chastell sur Tyne le .xij. iour de Januer lan de regne nostre seignur le Roi Edward tiercz puis le conquest Dengleterre quarrant et quint et de Fraunce trent secunde.

No endorsement 12 January 1372.

228

A.P. 2253

A nostre seignur le Roi et a son bone conseil moustrent les poures Marchantz del Cite Deuerwyk', del ville de Noef Chastiel sur Tyne et de Cicestre qe come les ditz Marchantes esckipperent certeynes sakes de laynes en les portes de dites villes vers Caleis lan du regne nostre dit seignur le Roi .xxxvij.^me et les dites laines bien et loialement' a lour ascient custumes et cokettes passant' por grant tempest de mere en temps de yuere a Caleis par les serchours illeosqes de nouel poise furent arestuz pur ce qe les ditz laines adonqes moelz

Page 256

poisseront pluis par les pois Dartois qe lour cokettes purporteront, issint qe les ditz Marchant' sueront par peticione au nostre dit seignur le Roi et son bone conseil par longe temps pur auoir liuere de lour ditz laines come ceux qe nauoient rienz forfait', et sur ce agard fuist par le dit conseil qe le surplusage dez dites laines de ceo qils poisseront pluis qe lour cokettes purporteront serroit forfait a nostre dit seignur le Roi, et qe le remenant demurrait en arest tanqe le dit conseil fuist pleinement auiser de quel surplusage nostre dit seignur le Roi est pleinement paiez, et la quel remenant demurte vncqore su arest as grant eneuasement' et defessantz dez ditz Marchant': Par qoi pleise au nostre dit seignur le Roi et a son bon conseil pur dieu et en ouere de charite qe eiant regarde qe les dites laines furrent poissez a lour venue a Caleis tutes moels et qe la pois Dartois illeosqes si est maynes qe la pois Dengleterre et a le grant perrelle de mere et perde del dit surpluisage et a la longe pursuite quex les dits Marchant' ont eue par les causes suisdit' et a lour grant' custumes quels ils ont paie pur la dit remenant come appiert par lour Cokettes, de comandre qe les dit' Marchant' puissent enioier la dite remenant dez laines et estre quite vers nostre dit seignur le Roi issint qils ne soient defet' et enent' a touz iours.

Endorsed: Suent en la Chancellerie et illoeqes droit lour serra fait.

1363-77.

229

A.P. 6483

Plese a nostre seignur le Roi et son conseil grantier en eouere de charite as Communes des Counte de Northumbr' qils poent eskipper les leins [du] Counte a Nouel Chastel sur Tyne et les amesner doultre meer en mesme le manere qe nostre dit seignur le Roi et son conseil [permettent] as gentz de Berwyk a eskipper mesmes les leins a Berwik', sanz pluis charge sur ditz communes prendre ou leuer pur les [biens] illoeqes eskipper.

Page 257

No endorsement Temp. Edward III.

230

A.P. 6422

A leur tresredoute seignour le Roy et son sage Conseil suppliont ses poures Communes de Noef Chastell' sur Tyne, vn keye de North' et resceu a vostre Ueste et poures communalte de Countee de Northumbr' en temps du guerre et necessite, qe come ils et leurs predecessours de tout temps ount ewe le dite ville a fee ferme del Corone oue tout le port du ycelle ouesqe custumes et autres choses al port apportenantz pur les queux ore rendunt al Corone .C. li' par an, de queux ville et port oue les custumes les tresnobles pro

Page 258

genitours nostre seignour le Roy et ses ditz tenantz del Corone ount estez pleynement posessiones et ioiez de tout temps sanz interrupcoun iesqes en cea qe le honorable Pier en dieu leuesqe de Duresme ad purchace vne chartre du nostre seignour le Roy pur auoir a luy et ses successours a touz iours charge et descharge de touz maners de marchandises forpris layne quirs et peulx lanutz par toutz maners des vesselz del partie de Eueschie de Duresme deins le dit port de Tyne et le Fraunchises du dit ville et les dites marchandises hors mesner sanz custumes tonuz ou autre charge paier, nostre seignour le Roy nient appris par ad quod dampnum ne ses tenantz du dite ville nient garnez du dit grant. Sur comis du quel grant et purchace du chartre le dit Euesque voet faire ville Marchet en Gatished' dautre part lewe de Tyne en leueschie de Duresme de part opposite du dit Noef Chastell' ou charge descharge ne ville Marchee furent vnques deuant, ou Tax Custume ne Tonu ne pertent a nostre seignour le Roy, et ou les inhabitantz ne fount Watche ne Ward' nautre charge come eux de Noef Chastell' fount, et outre les gentz de Noef Chastell' paient tant de dismes et autres taxes come ceux del grant Citee Deuerwyk forprise qarant Marcz ou ceux del dit Eueschie a teux taxe et chargez riens ne paient, ycy qe le dit chartre soit execute et nient repellez les communes de dit Noef Chastell' eux aillour remuer en Gatished' en le dit Eueschie ou ils poient enioyer tieux Fraunchises sanz dismes, taxes, custumes, tolnes, ou autres charges paier a nostre seignour le Roy ou Watche ou Ward faire eince ils fount ore en le dite Noef Chastell', [par qei] perdera nostre seignour le Roi sa ferme de .C. li' par an et sa dite ville pleyn[em]ent degastez et destruit; qe pleise a vostre tresredoute seignourie et vostre tressage conseil ordeigner qe la dite chartre soit repellez et vostres ditz tenantz et ville mesnes en mesme le gree com ils furent en le temps du vostres nobles progenitours pur dieu et en eoure de charite.

No endorsement 1384.

Page 259

231

A.P. 12458

A nostre tresexcellent et tressoueraigne seignur le Roy

Supplie treshumblement vostre poure lige Robert Caleway de Noef Chastel sur Tyne, qe come en lan de vostre tresgracieuse regne douszisme de vostre roiaume grauntastes au dit suppliant voz tresgraciouses lettres de proteccion pur aler soiourner et sauuement ouesqe ses biens demurrer en la ville de Noef Chastel sur Tyne ou aillours deinz vostre Roiaume ou lui plerront sicome en voz dites lettres ouertement par les Mair et Baillifs de la dite ville proclamees plainement est declarez: Puis quele proclamacion fait aucuns de la dite ville en apperceyuantz la dicte proclamacion estre vraie, cest

Page 260

assauoir Robert Olyuer et Roger del Rosce, Thomas Colman et William de Lynne servants au dit Robert les queux de force et armes ent hontousement et feloneusement mahaymez et naufrez le dit suppliant ainsi qa poy eschipa de vie a grand contempt de voz dites lettres et tresgraund disease et damage du dit suppliant, qe plese a vostre roial et tresexcellente seignurie granter brief pur faire venir les ditz mesfesours pardeuant vostre tressage consail pur respondre au grand contempt par eux fait de voz dites tresgracieuses lettres et auxi au graund damage qils ont fait au dit suppliant et qe gres soit fait sibien dudit contempt come restitucion du damage fait au dit suppliant selom la sage discrecion de vostre consail et qe les ditz mesfesours soient chasticez par manere qe autres purront prendre ensample pur eschuir de mal faire pur dieu et en oeure de charitee.

No endorsement 1390.

Page 9999

End