Page 7

SECTION I

BERWICK UPON TWEED

Page 10

1

AP 4548

A nostre seignur le Roy et a soen consail Mustre Michel le Spicer de Berewyk' sur Twede qe Johan de Botelston a force et arme et a contre la poes nostre seignur le Roy, li ad deseisi de soen fraunk' tenement en Berewyk sur Twede, et de vne place qil tient a terme des aunz, del les le vantdit Michel pus le terme passe ad vendu a Wautier de Gosewyk' en fee sanz ascun gre faire al vantdist Michel: dunt il prie pur deu remedie de ceste chose.

Ausi mustre le vantdist Michel qe come il auoit vendu a Wautier de Gosewyk' troys Shoppes pur .x. Mars en la ville avantdit en tiel houre dunt il ne fut en bone memorie, Le queux Shoppes Le vandist Michel auoyt de doun nostre seignur le Roy pur ses damages de .lij. li' qil auoit en temps apres qe le Roy auoyt conquis Berewyk' de ore a sis aunz; dunt il prie pur deu remedie.

De autrepart mustre Le vantdist Michel qe come il auoit baille a

Page 11

Adam de Dunbar tenementz qil auoyt en la vile avantdite pur .xx. Mars a terme de sis aunz, apres cel terme vint le vantdist Michel e demaunda deliueraunce de les tenementz, e de rien ne pout estre respundu: den apres murust le vandist Adam e entra vn William de Byntele et detient hors le vantdist Michel qe nul entre en les auantditz tenementz ne put auer e ceo oue grant tort; dunt il prie pur deu remedie.

De autrepart mustre e se pleint le vantdist Michel de vn Richard le Barber a qi il auoit baille son forcet a grader e vint le vantdist Richard e par collusion feet entre li e Johan de Botelston, le quel Johan fut tenu al vantdist Michel en .xx. li', si debrisa le forcet qil auoit en garde e prist le seal aluantdist Michel e fit al vantdist Johan vne quiteclamance de la vantdite dette, issi qe le vantdit Michel, qi pur homme esteit conuz, par les auantditz Johan a Wauter est tut destrut si qe rien nad ont viure par quei il prie pur deu de ceste chose remedie.

Berewyk'

c. 1302.

2

AP 5328

A bone Consail nostre seignur le Roy Mustre Heruy de Doway, burgeoys de Berwic' sur Twede, pur ceo qu lez couenant' de Berwic' fayt de par nostre seignur le Roy sunt affirme en tuttez

Page 12

poyntis qu chescon burgez auerra sez heritage et sez possessiouns qu luy et sez ancestres auont el temps le Roy Alysander. Et vne Johan Leche ad purchese vne tenementz du dit Herui en Narugate le quele il ad catera de verey heyr qe volte onkore en la dyt vile de Berwic'. Pur quey le dyt Heruy pri pur dieu et pur la alme nostre seignur le Roy Edward qe dareyn seurreit qe dieu luy asoiel qe il peut auoire couenable Remedy et droyt si pleys vers sy.

post 1333.

3

Page 13

AP 4953

A nostre seignur le Roi et a son conseil prie Johan de Chilton soun homme lige de Engleterre qe come il achata vn burgage en la ville de Berewyk' tant come la ville feust en la mein le Roi qi mort est piere le Roi qore est de vn Nichol Moyses, le quel Nichol et ses auncestres furent seisiz du dit burgage du temps le Roi Alisandre, et auxint le dit Johan par vertu de son purchace auantdit du dit burgage feust seisi tant qe la dite ville feust prise et trahie par Robert de Bruys: et ore puis qe la dite ville feust renduz a nostre seignur le Roi le dit Johan porta vne assise de Nouele disseisine deuers Esteuen le Fourbour tenant de dit burgage et autres, par vertu de quele assise feust troue qe le dit Johan feust disseisi come il se pleint, par quoi il recoueri sa seisine: et purceo qe troue feust par mesme lassise qe ascuns nomez en mesme le bref ne furont mie a la disseisine le dit Johan feust amercie a .x. li' par la custume de la terre pur sa faux pleinte, la quele custume est qe chescum homme serra amercie deuant les Justices a .x. li' et ne mie a meins: qe lui plese de sa grace pardoner a lui le dit amerciement depuis qil perdist quant la ville feust prise touz ses biens et chateux, qe amounteront a deux Milles mars, et touz iours puis il ad esquy a meschief en la Countee de Northumbr'.

Endorsed: le Roi lui ad pardone de sa grace

1333-34.

Page 14

4

AP 3849

A nostre seignur le Roi et a son conseil prie Robert Wake de Baumburgh' qe come il ad pris de nostre seignur le Roi vn mees en […] la ville de Berewyk' sur Twede pur vn an, rendant a lui pur mesme le an .vj. mars, le quel mees est en sa main par […] vn Piers kymbri[gge]ham, et le dit Robert est en volente a demorer en la dite ville et enhabiter le dit mees sil auoit […] outre en mesme le mees, qe lui pleise granter au dit Robert et a ses heirs mesme le mees rendant le ferme […] au meyns a terme de .x. auns.

Endorsed: Eit le dit mees a terme de sis auns pur la ferme qil rend' aore, issint qil troefse surete au viscont de Berewyk' de enhabiter le dit mees [par] lui ou par ascune autre suffisant Dengleterre et qil sustendra le dit mees en auxibien estat come est aore et qil paiera sa ferme prestement au Roi.

1334.

Page 15

5

AP 5001

[A] nostre seignure le Rey dengleterre mustre Adam de Corbrig' qe come Rauf Philyp soen vnkel qi eir il [est feu seis]i cume de soen dreyt e soen heritage de diuers tenemence en la vile de Berwik' taunke il [est deseisi p]ar force de gere, cest a sauoir, de .viij. tenementz en Soutergate, une gisant entre le [ d]e Coldingham vers le North' e la Rwe de Walkergat vers le Swe, vne autre gisant entre [la tere] iadyse Wiliam de Kergate vers le North' e la tere Roger Wyly vers le Swe, .vj. tenementz gisante [entr]e la tere iadys Wiliam de Kergate vers la North e la tere Robert de Irwyne vers le swe; vne [aut]re tenement gisant en Vddynggate entre la tere les Nonailes de Southeberwyk' vers le North' e la [r]we de Hydegate vers le swe; .iij. tenementz gisance en Briggate .ij. entre la ter Johan de Lundres vers [l]e Est e la tere Steuyne Fourbur vers le West, le terce tenement gisant entre la tere de la Mesoundeu vers [l]e Est e la tere iadis Patrik' Schot vers le West; vne tenement gisant en Waldef' gate iust le tere iadys Waryne de Pebles vers le swe e vne croft' gisant en Kergate entre la tere Frere Wiliam Maydyne mestre del brighouse vers le Est e le Vikerwende vers le West; .iij. croftes gisance dehors les moures de Berwyk' vne entre le Bardyke vers le North e le croft' Labbe de Meuros vers le swe, vne autre gisant entre le dist croft de Meurose vers le North e le croft del Brighous vers le Swe, le terce croft gisant entre le chemyne qe va del Bongat vers le Snoke vers le North' e le croft del Meusondew vers le Swe: Et de .xvj. souz de rent issance du tenement' iadys Adam de Banysclef e Johan Banysclef' en Sayntmarigate, E de vne Marche de rent issaunt du tenement

Page 16

Cristolf' de Coloyne en Crosgat; les qeus tenementz apres la mort le dist Rauf', pur ceo qe le vaunt dist Adam feu engles a la foy le Rey Dengleterre demorant, Sire Robert de Bruys iadys Rey de Escoce les dona a sir Robert de Louwedre, par qi forfeture les tenementz sunt ore en la mayne nostre seignure le Rey: dount il pri remedi e grace pur dieu.

1333-34.

Page 17

6

AP 1590

A nostre seignur le Roi et a son conseil prie le soen liege homme nee dengleterre Symound' de Bedenhale, Burgeys de Berewyk sur Twede, qe come vn William Spore vncle le dit Symound' qi heir il est fust seisi dun tenement en Soutergate en la dite ville de Berewyk' come de fee et de dreit tauntqil fust euste par la guerre mue par sire Robert de Bruys: Et auxint vn Symond Spore pier le dit Symond' de Bedenhale qi heir il est fust seisi dun tenement en Seyntmarigate en la dite ville de Berewik' come de fee et de dreit tauntqil fust euste par la dite guerre. Et le dit Symond' de Bedenhale pres le rendre de la dite ville de Berewik' enpleda vn Adam Brekroue et William Mayden adonqes tenauntz des ditz tenemenz, et pendaunt son plee le ditz Adam et William sount ahers a les enemis descoce, et sur ceo le Chamberleyn de Berwik' ad seisi en la mayne nostre seignur le Roi les ditz tenementz come sa forfeture: pleise a nostre seignur le Roi de grante bref au Chaumberleyn de Berewik' denquer la verite et qil lui face dreit et resoune.

Endorsed: Eit bref forme sur sa peticion au dit Chaumberlein denquere sur les pointez de sa dite peticion et de returner lenquest en chauncellerie, la quele returne et vewe le Chaunceller face

Page 18

assauer au Roi ce qe serra troue par la dite enquest et le Roi lui face outre sa grace.

1333-34.

7

AP 6782

Al consayl nostre seignur Le Roy Mustre Johan de Routhbiri, Chapelayn, que Johan de Routhberi iadis burgois de Berwyc' son oncle, Murruste vestu et seysi com de fee en Le tens le Roy Alexander de [terres] e tenement' en La Rew nostre dame en Berwyc', gissaunt entre Le tenement William de Poulwrth' enuers le North' et le tenement Labbe de kelsow enuers le seu, Le quel tenement est en La Mayne le Roy par le forfecture Peris de kymbregham. Et pour ceo qe Le diste Johan de Routhberi chapelayn est plein prochayn aire Le diste son oncle, si pri il grace et remedie pour dieu.

Page 19

1333-4.

8

AP 5737

A nostre seignur le Roi et a son conseil prie le son Hugh de Hecham de Noef Chastel sur Tyne qe come nostre seignur le

Page 20

Roi ad grante par ses lettres patentes enseales de sous seal qil vse a Berewyk' sur Twede au dit Hugh' vn mees od les appurtenaunces sur la Nesse en la dite ville de Berewyk' qe feu a Piers de Kymbrigeham et vn mees od les appurtenaunces pres de Brideþurgh' gang en la dite ville de Berewyk qe feu a Rauf de Staunford' nadgairs [enemys] nostre dit seignur le Roi, et les queux par la forfaiture mesme deux Piers et Rauf deuindrent a les mayns mesme nostre seignur le Roi et issint sont en sa mayn a auoir tanqe a la seint Martin lan du regne le dit Roi oitisme, reddant au dit nostre seignur le Roi .xl. s.: qe lui pleise granter au dit Hugh et a ses heirs a touz iours les ditz mees od les appurtenaunces queux sont sasetz, reddant chescun an au dit nostre seignur le Roi et a ses heirs .xl. s. par eweles porcions, et le dit Hugh' veot enhabiter et edifier illoqes.

Endorsed: Eit les ditz tenementz a terme de sis auns pur la ferme qil rend' a ore: Issint qil troefse surete au viscunt de Berewik' de enhabiter les ditz tenementz a lui ou par ascun autres sufficients Dengleterre, et qil susten[t les dites] tenementz en auxi bien manere qe ils sont a ore […] sa ferme present au Roi.

c. 1334.

Page 21

9

AP 7939

A nostre seignur le Roi et a son conseil pri son marchaund' Richard Colle de Norham, qui bien et leilment ad serui […] bien nostre seignur le Roi Edward' son pier cum en temps nostre seignur le Roi qi ore est, et fust demoraunt […] long temps en ayde de lui en sun guere Descoce au Berewyk' et au demure en la Marche des Escoces en ten […] de son vie: pur quoi le vandit Richard' pri qe vous pleise lui grantre vn petit mes en la vile de Berewyk' […] le qel mes est sur la corner del Nes pur vn raynabel pris, issint qil puisse de ci enauant auoir illoqes certein recetz […] afforcement et defens de la dite ville de Berewyk'

Endorsement illegible even under ultra-violet light c. 1334.

Page 22

10

AP 8739

A nostre seignur le Roi prie Rauf de Coldingham qe cum Thomas de Coldingham vnkle le dit Rauf qe heir il est purchasa un burgage en Berewyk' de Symon Frysel, de quel il feut seisi com fee e droit, descharge de tote manoir de rente saue .vj. deners au Roi par an taunke il feut de ceo burgage ouste par Robert de Bruys: en qi temps le dit' Simonde entre mesme le burgage e le dona a vn Patrik' Flemyng', le quel Patrik' lessa mesme le burgage a Giles de Myndrom en Fee rendrant a luy e ces heirs quatre liures par an, par la Forfaeiture de quele Patrik' les ditz quatre liures sount ia seizerz en la Meyn nostre seingnur le Roy. E le dit Rauf puys qe la vile vynt en la Meyn nostre seingnour le Roy aed recoueri le dit burgage uers le dit Gyles par bref de droit deuant le Maier e les balifs de la seisine le dit Thomas, e ia le vescount ilok' lyu destreynt pur les quatre liures, sur queu il Mist vne peticioune en le parlement dareyn tenuz a Eurewyk' en priant ale Roy qe il feist enquer la verite, ensi qe il pueit teneir le dit burgage descharge com son auncestre le tynt, sur quia par comaundement nostre seingour le Roy enquest est pris e retourne en Chauncelerie par quele est troui qe son auncestre le teynt descharge de ditz quatre liures: qe lyu plrra comaundre qe il pueit teneir le dit burgage descharge de les quatre liures com le dit Thomas son vnkle que heir il est le teynt, e sur ceo maunde son bref' a son vescount ilokes.

Endorsed: Soit lenquest [returne] en chancellerie probably erased

Soient lenquestes returne en chancellerie vewes et examinez et si troue soit come les peticons supposse, adonqe soit droit fait en chancellerie.

1334.

Page 24

11

AP 4612

[A nostre seign]ur le Roi et a son Conseil mostrent ces burgees de sa ville de Berwyk, qe por la ou eus et lour [auncestres] furent en possession de le Berfrai de Berwyk en le temps le Roi Alisander et grant temps deuant cum […] qe la comunaute de la dit ville aueyt pris a fe ferme pur les bones gentz qe adonqes furent a eus, a lour heirs et a lour successours burgeis de la dit ville pur totes iours de vn Symond' Maunsel a qe la place voide estoit en fee, rendaunt a nostre seignur le Roi .vj. deners par ane et au dit Symond' et a ses heirs .xx. soutz par anee et fesent a lour propres custage herbergier la dit place com il est ore: Ia est venu Robert de Tuggal viscunt et ad sessi le dit Berfreit en la meyn nostre seignur le Roi et leue les issues: de qoi il priount remedy pur dieu.

Page 25

sewn to above

Ensement musterent les vantditz Burgees qe le Canage de la hauen de la vantdit ville solait en le temps le dit Roi Alisander et deuant son temps ester leue et garde en la furme qe ensute: Les bones gentz de la comunalte esleisoient chescun aune deuz prode hommes de bon estat iurrez de receiuer la Canage et en temps qe amendement dust ester mys de purchascer ouerrons et de metter Les Custages en la mendement de Holdeman par le Consail et la Weu des plus sage de la ville et de render aconte vne feez par an de lour recepte et despense, issi qe nul dener ne veent au minister le Roi ne au profit de la ville forke tanke soulement fust reserue a Holdeman qe est vn perilious entre pur le nefs qe venunt Et chescun an demande grant Custage; Ia Roberd' de Tugal vaunt dit recepte totes les issues, par qoi la dit Hauen est en poynt destre perdu: de qoi il priount remedy pur dieu.

Ensement mustreint meismes les Burgeys qe par la ou en tous temps pus qe le Punte de Berwyk' chaij il ount este fraunche et quyt de paier passages al ferry cum il fust troue nadgaires par lenqueste qe passa parenter nostre seignur le Roi et le Eueshe de Durrem, Ia par commandement Robert de Togal les passagers ne suffrent nul Burgeis passer saunz paier passage: de qoi il priount remedy pur dieu.

Ensement mustrent les dites Burgeis qe par la ou il ount este en le temps Roi Alisaunder et en totes temps quites de tote manere de gaugages des vines et de draps, Ia Robert de Tughal les fet paier gaugage et ensement tronage […] il furent totes jours quites; de qoi il priount remedy pur dieu.

Ensement mustrent les dites Burges qe vn grant Custume greueus est leue en Engleterre sur les Burgeis nostre seignur le Roi de sa dit ville de Berwyk, cest asauoir qe come il arriuount eu lour marchandises en les villes et as hauenes sur la mere par tote Engleterre il leuent de chescun liuer de deners et de chescun liuere de marchandises treis deniers, qe est vn grant enpouerisment a les gentz nostre seignur le Roi de sa dit ville qe sunt en simple estat par lencheson de la gere: de qoi il priount remedy pur dieu.

Ensement mustrent les dits Burgeis qe com il soloient en temps Roi Alisander et de tote temps en touz les Burgs le Roi en escoce ester quites et frans de tounages, et eaux de les dites Burgh' furent franches de tounages en la dite ville de Berwyk', Ia pur ceo qe lein leue tounage de euz en Berwyk', ils leuent de touz

Page 26

eaux de Berwik' cum ils sount en lour partyse: de qoi il priount remedy pur dieu. Et pur ceo, Trescher seignur, nous vous prioms pur lamur dieu si com nous […] Burges qil vous plest de vostre grant grace grantter qe nous purroms ester quites en totes partie Denglettere ou noz marchaundises, et les marchaundes Dengleterre quites dever nous, si com il solaint ester en le temps Roi Alisander.

Endorsed: Peticiones de Scocia liberate apud Nouum Castrum super Tynam.

1337.

Page 27

12

AP 9313

A nostre seignur le Roi prie son lige home Henri de Chesham Marchant de Loundres Come Thomas de swanlend et ledit Henri eunt pris en fee ferme par Chartre nostre dit seignur de Chanceller en Berewik' sur Twede vne voide place en la Haute Rue dedenz la porte appelle Watergate qe fu nadgueres a Symon de Saltoun et ore forfaite, qe contient en longure .lij. pies rendant pur chescun pie par an .xij. d. qest trop chier a home de nouel venu a faire son profit, pleise a nostre dit seignur le Roi graunter as ditz Thomas et Henri et leur heirs par Chartre la dite voide place pur .vj. d. par an sicome vne autre burgage rende en la dite ville, et adonke le dit Henri purra edifier et mettre custages et inhabiter en afforcement de la dite ville.

Endorsed: Eyt pur .L. s.

temp Edward III.

Franchises

Page 28

13

AP 1614

A nostre signour le Roi et a soen Cunsoyl prient les Burgeys de Berewyk' sur Twede, que cum eux soyent noueles gentz veniz en la dite ville, et graunt mester auereyent et vnt del ayde du Roy, E eus plusures feze eyent priee a nostre signeur le Roy ausiben pur soen prou et amendement pur sa ville de Berewyk' cume pur les Bourgoys enhabitantz que il lur voillet grauntier certeynes articles des franchises, lesqueux sont contenues en la Bille que est attachee a ceste: Lesqueux fraunchises nostre segneur le Rey leur promist a Rokesborgh' de auer et confermer a soen procheyn parlement, et par la reson de la fraunchise multz des marchantz et altres gens suffisantz sunt illeuques venuz et demorrees puys ceu temps. Et ceste chose prient il pur dieu, que le Roy et soen Cunseil voleyent aueir au quoer, kar il vnt lungement demorree entur ceste suyte fere.

Endorsed: Coram Rege quia de Scocia

Further endorsement illegible c. 1306.

Page 34

15

AP 5211

A nostre seignur le Roi e a son conseil moustre Lowys Euesqe de Duresme qe la ou Lewe de Twede est Marche en plusours lieux entre Engleterre e Escoce issi qe le File del Ewe iloqes parte les deux roialmes, le Roi descoce ad eu passage par Bate de passer gentz hors de la ville de Berewyk' e autres choses […] Twedemuth' e illoqes arriuent sur le soile le dit Euesqe en Engleterre […]

Page 35

doit le dit Euesqu auoir au tieu passage e arriu […] Berewyk' le queu passage valeit au dit Euesqe e a ces predecessours pluys de vynt liures par an le see pleyn e au ta […] e valant au Roi deschoce meinteint son passage par pouer e par force e desturbe le dit Euesqe qil ne peot […] en damage de lui e desheritaunce de sa Eglise e de la Corone. E sire ceo la ou le Roi Descoce ad la riuail […] ok' les queux ne deyuent ancreer de cea le File del Ewe de Twede forsqe vne hour la venoi[ent] […] i Deschoce e ancreont de cea le File del Ewe […] par quei le dit Euesqe perde le profit de sa pecherie qe […] [de]uoient auoir de droit le see plein e le Roi […] [Fra]nchise de Norham est tenu de le dit Euesqe come le dreit de sa Eglise de Duresme vne place de terre qest appelle […] en Lewe de Twede e est parcele de dit Manoir de Derd' e ad este de tote temps […] tenuz dela dite ville […] atreit la dit place au Roi Deschoce au damage le dit Euesqe e desheritance de sa Eglise e de la Corone […] vsqe eit suy a sire Robert de Brus en son temps a ales gardeinz Deschoce qe puis en cea ont este qe les tortz e les […] faissent amende e redresces si ne poait il vnqes vnqor reson auoir: par quoi il prie a nostre seignur le Roi […] voleit de cestes choses ordeiner remedie e pur le droit de sa Corone.

Endorsed: Coram Rege et magno consilio

Quant le Roi verra temps, il ordeinera de remedie en ceste partie, mes aore ne poet il mie.

?1331.

Page 36

16

AP 13028

A nostre seignour le Roi e a soun counseil [moustre] Richard eueske de Durem' [qe com]e le pount entre Berewik' sur Tuede e Twedemuth' fuit enf[rait] a temps le Roi Edward ael nostre seignour le Roi qe ore est, accord se prist entre le Roi descoce qe adonqes fuit e leuesqe [de Durem'] […] le dit Roi passereit par

Page 37

batz les gentz e autres choses hors de Berewik' iusqe a Tuedemuth' e qe [leueske de Dure]me yn meisme la manere passereit les gentz de Tuedemuth' tant qe a Berewyk' e qe le profit del dit passage durr […] ewelment de parti entre les ditz Roi e leueske, e issi fuit vse tant qe lan sisme de nostre seignour le Roy qe ore est [en] temps sire Lowis qe dreyn moreust eueske de Durem', qe Dauy de Bruys leua de guerre contre le Roi […] achaca, e les tenantz e les reseauntz de Tuedemuth' e ardist e destruyt. E apres quant la dite vile de Berewik' deuy[nt en] la mayne nostre seignour le Roi adonqes furent les temporaltes del euesche de Durem' en sa mayn par la mort le dit L[owi]s, du quel temps les ministres le dit nostre seignour le Roi de Berewyk' pristront le profit du passage entierement […] par lour batz sur le soil de dit eueske en Tuedemuth', en desheritaunce de sa eglise de Durem' […] dont il prie remedie.

Endorsed: soit mande au viscount e autres les ministres de Berewyk' que sils puissent trouer par bone enqueste a sibien gentz Dengleterre come Descoce que Leuesque feust seisi de la passage decea auant le temps Robert de Br[uys] e adonque ils soeffrent les Ministres le Euesque par decea auer le dit passage come ses predecessours lauoient e qils surseessent de faire tieles oppressions sur le poeple.

1334.

Page 38

17

AP 8247

A nostre seignur le Roi et a son consail prient Rogier de Lue

Page 39

et Johanne sa femme come le Noble […] Roi sire Edward [ael nostre seignur le Roi] nadgairs auoit done a Johan Hayward qe estoit son chief boteler pur sa bouche par vynt aunz et plus contin[uellement, si come] purra estre testmoigne par les grantz qi adunqe feurent, piere la dite Johanne qi heir ele est, par sa chartre […] de la ville de Berewyk' pur son bon seruice le passage de Twede a Berewyk' pur auoir et tenir au dit Johan et [ses heirs et assignes] tauntqe vn pount entre Berewyk et Twedemouth feust suffisalment reparaille issint qe gentz a pee et a chiual et charrue […] summages peussent illoeqes saluement passer. Et le dit Johan nul autre regerdoun auoit de lui a demorer pur ses […] son lung seruice forqe le dit passage, et par vertue de la chartre auantdite et par confermement le […] Roi Edward […] sont prestes amostrer a vostre volunte, estoit pesiblement seisi de cel passage et de prendre de ce les profistz tauntqe [ils sont] ostee par sir' Robert de Brus quant il par force et par tresoun prist la ville de Berewyk' et la terre Descoce sur le […] Et sur ce le dit Roger en eyde nostre seignur le Roi Dengleterre qore est et de monsieur Edward Baillol Roi Descoce pur les [dits] […] reconquere les eyt troue vn homme arme a Chiual a ses custages, si come purra estre testmoinge par les grantz qi illoeqes [feurent] […] son droit suyre et chalanger, del comencement tauntqe a la fyn, qil pleise a nostre seignur le Roi de sa grace rendre as ditz Roger [et Johanne] le dit passage come leritage la dite Johanne a tenir solon la forme de les chartres de ses Auncestres de si come eux ounte […] prest vn homme arme en la Manere auantdit.

Estre ce prient a vostre seignurie les ditz Roger et Johanne si le vous plest pur ce qe le dit Johan Heyward auoit de son […] de vostre Ael ascuns burgages en la dite ville de Berewyk' en Hudgate, les queux il meismes herbergea et puis les lessa a […] de seint Botolf, burgeys de meisme la ville, rendant au dit John et a ses heirs sept Mars par an, dont il est en pesiblement seisine [tauntqe le] dit sire Robert de Brus par force et par treison prist la ville auantdite, qe vous veullez de vostre grace granter as ditz Roger et Johanne qe eux peussent auoir leurs seisine des tenementz auantditz ou de la Rente auantdite come del heritage la dite Johanne de [sicome ils] ont troue vn homme arme a leurs custages del comencement tauntqe a la fyn […] nostre seignur le Roi entra par genz darmes […] le terre Descoce auantdite.

Page 40

Endorsed: Soit ceste peticion mande en Chancellerie et la vewes lour chartres et munimentz qils ont del dit passage et des tenementz contenuz en la peticion, et quant le Chanceller serra enfourme il avise le Roi et le Roi ent comand' sa volunte.

1333-37.

Page 41

18

AP 2153

A nostre seignur le Roi e son conseil moustre leuesqe de Duresme qe come lewe de Twede departe les Roialmes dengleterre e Descoce de quelle le dit Euesqe est seignur tanqe a file dycelle par tout ou ses terres sont ioignantz e son soil come de droit de sa esglise de seint Cutbert de Duresme, e lui e ses predecessours de tout temps seisiz de touz les profitz prouenantz de le soil de le ewe tanqe au file dycelle tanqe Mestre Johan de Bolton' nadgairs Chamberleyn de Berwyk' seisist les profitz de le passage illoqes sanz cause, come piert par la certificacion de Robert de Tuggale, Chamberleyn, par brief super modo et causa qe certifia en la Chancellerie qe le dit Mestre Johan seisist le dit passage quia credidit et intellexit qe le dit passage deueroit appurtener a la ville de Berwyk; pur quai del houre qe le dit passage feust seisi sanz cause il prie a nostre seignur le Roi e son conseil de lui granter restitucion oue les issues, eiant regard qe Richard de Burry darrein predecessour le dit Euesqe, sur sa peticion quelle sui a nostre dit seignur le Roi en lan oitisme de son regne, auoit restitucion de mesme le passage pur tant qe Robert de Bruys lui ousta par force, e ensi troue feust par enqueste sibien par gents Descoce come Dengleterre qe sa peticion feust veritable, e puis morust seisi e leuesqe qore est seisi tanqe le dit Mestre Johan lui ousta nounresonablement.

Endorsed: soit cest bille mande en Chancellerie e appelle le Chamberlein e autres qe sont appeller, soit fait droit.

c. 1367.

Page 42

19

AP 2185

A nostre seignur le Roi e son counseil moustre leuesqe de Duresme qe par la ou lewe de Twede depart les Roialmes Dengleterre e Descoce, de quele ewe le dit Euesqe est seignur tanqe au fyl de ycele par tot oue ces terres sont ioignantz a ycele, e lui e ses predecessours seisitz de tote les profitz prouenantz de la dite ewe tanqe au fyl sanz destourbance tanqe maistre Johan de Boulton' nadgers Chaumberleyn de Berewyk' seisit les profitz du passage de Twedemouth, quiel passage est fait sur la terre le dit Euesqe de part dengleterre, entendant qe les profitz de passage del ewe de Twede apurtinentz entierement a la ville de Berewyk',

Page 43

quel chose est en desheritance de mesire le Roi e de sa Corone Dengleterre, e oustant le dit Euesqe de son droit; sur qoi le dit Euesqe suyst peticion en parlement dauoir remedie en cel partie, quel peticion fuist endosse e mande en la Chauncellerie de faire droit illoeqes, e puis le dit Euesqe ad suy en la dite Chauncellarie de iour en autre e ne poet nul fyn auoir, dount il prie a nostre seignur le Roi e son conseil comander qe finale discussion ent soit faite solonc lei e resoun.

Endorsed: Soit qe ceste bille vewe en la Chancellerie, cy soit fait droit.

c. 1374.

Trade

Page 44

20

AP 1616

A nostre seignour le Roy e a son counseil moustrent ses Burgeis de la vile de Berewyk' sur Twede qe par la ou nostre seignour le Roy auoit ordine e graunte pur la cresaunz de la dit vile e pur son profit les croftes e les voides places qe gisent dentz le paliz de la vile: Ore vent Mestre Nichol de Kardoyl akatur nostre seignour le Roy e plusurs autres e demandent meismes celes croftes e places a tenir de nostre seignour le Roy en fee, a deshericesun nostre seignour le Roy e de ces heirs e a preiudis e greef damage de eux e a menusement de la dit vile: Cume Marchauntz veignent a la dit vile de iour en iour e si demandent les voides places pur herberger pur les graunt fraunchises qe nostre seignour le Roy ad graunte a la dite vile: E si nostre seignour le Roy graunt a akuny les voides places il serra forclos entre la vile e la Meer, issint qe ceux de sa vile ne auerunt nul issu de vers la Meer: E sil graunt les places hors de sa meyn, la vile de ceux qi prendrunt les places si serra plus graunt qe la vile le Roy meismes; dunt il prient pur son graunt pru e le profit ses heires qil ordeyn acun remedy qe seit pur eux e la dite vile.

No endorsement 1302.

Page 45

21

AP 2470

A nostre seignur le Roy e a son consayl Mustrent Roger de

Page 46

Gosewyk' et Johan de Chilton', Burgeys de sa vile de Berewyk' sur Twede, qe par la ou il auoient achatez en Northumberlount Trente deus saks de Leignes, e mesmes ceaux Leignes amenerent tanqe a Berewyk', e la les chargerent en vne Nief de Beuerleye et loiaument payerent lours grantz noueles Custumes dues a nostre seignour le Roy auxsint come il temoigne par sire Robert Heron parsone de Forde e gardeyn de mesmes le Custumes, e mesmes ceux leignes amenerent tanqe Darneburgh' en Flaundres, la vindrent sire Johan de Courtreye Burgeys de Brugges et deus Alemaunz, leun a noun Herman Sidentop de lubyk' e lautre Tidman felescape de Goten, e mesmes ceux Trente deus Sakes aresterent par encheson qe nostre seignur le Roy auoyt maunde ses Mariners de Santwych' ou vne Nief' qe feust appellez la Plente e vne Barge de mesmes la vile Dunt Willmen Langeters estoyt mestre par Comaundement nostre seignur le Roy pur garder la Meir de Escot' qe nul Nief' ne luj entrat pur sustoiner ses Enemyes: la vint mesmes cele Nief' le plente oue la Barge et pristrent deuant Aburdein vne Nief' de Flaundres chargez de Leignes e mesmes cele Nef' amenerent tanqe ala vile de Berewyk' e les leignes venderunt la ou bien lour fust: Par quey qe sire Johan de Curtreie e les Alemaunz disoient qe nous auioms mesmes ceux leignes achatez de les ditz Mariner. E par cele encheson mesmes ceux leignes detenent il les Trente deus saks, pris de chekun Sak' dys et vt Mark' par assent des Esquiuines e la Comune de Ardenburgh' an Flaundres, a nos greues damages de .ccc. li' pur la quele chose nous vous prioms si vous pleise de ceste chose grace et remedye.

Endorsed: Habeat breue Comiti Flandrensi in forma communi

c. 1305.

Page 47

22

AP 1627

Ensement priount memes les burgez au Roy e ason conseyl qe le Marche de Twedmouth' seyt abatu cum soleyt estre en tens le Roy Alexaundre, le quel Marche il vnt leue saunz garant en grant damage du Roy e de sa dite vile de Berwyk

Assigenentur Johanni de Sandale Camerario Scocie et Thome de Sheffeud' ad inquirrendum vtrum forum solebat esse ibi ab antiquo an non et per quot tempus vsi sunt ibidem foro, et inquisitis istis et omnibus aliis circumstancibus certificent Regem et consilium suum.

Ensement priount memes lez burgez au Roy e ason conseyl desicum il lour ad grante feyre par sa chartre de la Pasche iekes al seynt Michel qe il lour voille sily plest ceste poynte changer e grantir feyre du iour de la seynte Croyce en May iekes a la feste de seynt Johan le Baptist' procheyn suaunt, kar ceo serreyt greinour profit au Roi e amendement a sa dite vile de Berwyk'.

Videatur Carta per quam habent feriam et si ita sit, fiat eis secundum peticionem suam et restituant aliam cartam

The Latin endorsements are added below each petition. 1307.

Page 48

23

AP 2386

A nostre seignur le Roi et a son conseil moustre William Gettour de Berewyk' qe certeyns gent de Flaundres del poer de la seignurye le Counte de Flaundres le Samady en la veille des Palmes En lan du regne nostre seignur le Roi Edward filz le Roi Edward vtisme pristrent vne Nef del dit William qe hom apela le Messager de Berewyk deuaunt donwych' pres de la Coste de la Mer, passaunt de Berwyk' vers Flaundres et les biens le dit William et ses compaignouns en mesme la Nef trouez, cest asauoir Cent sacks de Layne pris le sack de vnze Marcks La summe Mil et Cent Marcs, quatre Centz du quirs des boefs et des vaches pris du Sinkaynte Liueres, .x. saks des pealus du Layne pris du synkaynte Liueres, et la Nef qe valust .iiij.^xx liueres, et Cent Saumonz qe valerent diz Marcs, pristrent et amenerent tauntqe a Flaundres, et .xiij. genz en la Nef trouez tuerent: par quei le dit William prie a nostre seignur le Roi et a son consail qe la-Rest se face deuers les ditz Flemyngs taunqe restitucion lui soit fait de ses biens et ses chateus suthdites en tele manere amenez et enportez.

Endorsed: Quia negocium istud tangit Flandrenses tradatur domino Willelmo de Ayremyne qui se de negociis Flandrensibus intromittit.

1315.

Page 49

24

AP 4425

A nostre seignur le Roi et a soun Counseil prie William de Ayremynne, clerk, qe come le dit nostre seignur le Roi nadgeres estoit tenutz a Wautier de Gosewyk Burgeys de Berewyk en trois

Page 50

Centz liures qil resceust de lui daprest et en Centz et vynt et cynk' marcs, les queux le dit Wautier emprist apaier pur nostre seignur le Roi a monsieur Rogier de Moubray, des queux sommes nostre seignur le Roi voleit et granta qe le dit Wautier eust este paiez de la custume de Hertelpol, sicome plus pleinement piert par les lettres ouertes sealees du priue seal nostre seignur le Roi dount le transecrit est cusu a ceste peticion: et puis auant qe le dit Wautier resceust rien de la dite custume le dit William par assent de sire Johan de Sandale adoncs Chauncelier et de monsieur Wautier de Norwicz adoncs Tresorer liuera au dit Wautier de Gosewyk' vne garde, qil auoit achate de nostre seignur le Roi, et prist les dites lettres du priue seal deuers lui: et sur cel lui eit este assigne auant ces houres le marige Johan filz et heir Johan de Londeham' en value de Centz mars, Le Tresorier et Barons de Lescheker ne volent faire allouance ne paiement de celes lettres pur ceo qe mencion nest pas faite qi resceut ceux deniers du dit Wautier, par quoi le dit William prie a nostre seignur le Roi qil lui pleise comander ent sa bone grace.

Endorsed: Soit maunde as Tresorrer et Barons de Lescheqer qe serchez roulles et remembraunces de Lescheqer et autres remembraunces tochauntz la dite matyre et appelles a eux qe sount appeller facent son gre en due manere de tant come li est arere ou par paiement ou par assignement.

AP 4426

Attached: Edward par la grace de dieu Roi Dengleterre, seignur Dirlaunde et Ducs Daquitaine, a touz ceaux qui cestes lettres verrount saluz. Sachez nous estre tenuz a nostre cher Marchaund' Wautier de Gosewyk' Burgeys de Berewyk' sur Twede en treis Centz liures qui nous receumes de lui de prest, et Cent et vint et cynk' mars les queux il emprist a paer pur nous a monsieur Roger de Moubray, des queux soumes nous voloms et grauntoms qe le dit Wauter soit paez des primeres issues de la graunt custume de Hertelpol, entesmoignaunce de queu choses nous auoms fait faire cestes noz lettres patentes. Doun souz nostre priue seal a Berewyk sur Twede le .xiiij.^me iour de Juyl, lan de nostre regne quint.

Endorsed: Irrotulatur Coram rege

post June 1318.

Page 51

25

AP 4114

A nostre seignur le Roy et soen consail prie Johan Hayward qe come Wauter de Goswyk' nadgeres Meir de Berewyk' et autres

Page 52

Burgeises de mesme la ville pur eaux et les autres comuners de mesme la ville se eusent reconuz en la Chauncellrie soen pere qe dieux assoille Descoce, Lan de soen regne trentequinte, destre tenu audit Johan en quatrevyntz mars par an pur le passage pesage et tronage de Berewyk' et ascuns terres et tenementz en mesme la ville a eaux lessez, de la quele reconisance lez ditz Burgeises lui sont tenuz en .CCC. li' des issues de ce rescues auant la ville perdue, parquoi ledit Johan sui bref' nostre seignur le Roy qe ore est a soen Chaunceller' Descoce qil feyt venir en sa Chauncellrie Dengleterre la reconisance auantdite et il issint ad fet, parquoi ledit Johan Hayward ad sui dauer bref' hors de sa Chauncellrie Dengleterre pur sa dite dette leuer dez biens et chateaux dez Burgeyses et comuners de la ville de Berewyk' auantdite trouez en Engleterre, mes ledit Johan ieskes enca est destorbe en sa dite Chauncellrie de ce bref' auer, dont il prie remedie.

Endorsed: Il bosoigne qil demoerge ci la qe autre chose soit ordene.

Coram magno consilio

?c 1320.

26

AP 11930

A nostre seignur le Roi et son conseil moustrent le Maire et

Page 53

les benes gentz de sa ville de Berwyk' Pur ceo qe touz les leynes cresceantz en escoce dedeinz la seignurye nostre seignur le Roi qe soloient estre eskypez a Berwyk par cause de noun passage sont ore meintenant amener et tratez de iour en autre as enemys descoce a grant perte et arrerissement de sa dite ville et en meintenance des ses ditz enemys: Pleise au Roi et a son dit conseil maundier ses briefs a Chaunceler, Chamberleyn et viscontes de Berewyk denquere par bones gentz qaunt des leynes crescent en mesme la seignurye par estimacion en vn an et qe la somme trouez pusse passer en outres et amendement de sa dite ville et mout plus.

slits for closure

Endorsed: Soit respondu comment homme quide qe lestaple et le passage des leines serra ouert en Engleterre a la Goule daugst', et adonqes serra le passage enter a Berewik' et en le meen temps soit enquis des choses compromises en ceste bille.

1352-53.

27

AP 4749

A nostre tresredoute seignur et tresexcellent seignur le Roy supplient voz poures lieges Burgeys de vostre ville de Berewyk' sur Twede qe come ils ont sustenuz plusours perdes et damages en vostre dite ville sibien par enemys descoce come de Normandie et le Mere et ala sumour en Flandres ils perderont .viij.^xx et .x. sarplers de layn a value de deux Milles liures a tresgrant

Page 54

aneyntissement de lour estat, dont plese a vostre tresgraciouse seignuris considerer les grantz perdes et meschefs qils ont sustenuz en vostre dite ville et granter as aux de vostre grace especiale deux Mils saks de layn de la cressance de Northumbr' deskypper a vostre dite ville de Berewyk, apaier pur chescun sak' a custume .xiij. s. .iiij. d. la ou ils paiont au presente .xxvj. s. .viij. d., en confort et relefe de vos ditz Burgeys pur dieuy et en oeure de charite.

Endorsed: le Roi de sa grace especiale ad grante as suppliantz en releuacion de lour estat qils puissent achater Milles sakes de layn en le Counte de Northumbr' de lancressance du dit Counte et les carier a la ville de Berewyk' sur Twede et el port illoeqes charger et dilloeqes a quelle partie qe lour plerra del amitie le Roi amesner, paiant pur chescun sake .xiij. s. .iiij. d. et nient plus: Niencontresteant qils furent charge par lettres patentes du Roy a eux autre foith grantez de paier pur chescun sake de mesne la cressance .xxvj. s. .viij. d.: Issint tante […] es qils ne chargent el dit port namesnent des ditz parties ascuns layns de la cressance de nulle autre lieu dengleterre ne greindre nombre de la cressance du dit Countee, sur peyne de forfaiture de touz les layns auantditz.

c. 1392.

Page 55

28

AP 4760

A nostre tresexellent et tressouereigne seignur le Roy Supplient

Page 56

voz poures Burgeis de vostre ville de Berewyk' […] apres lar[son] et destruccion de vostre dit ville en comfort et releue de vos ditz Burgeys et en […] les maisons deinz mesme la ville de vostre grace especial' et […] de voz custums deins le port du dit ville par les mayns de vos custumers illoeqes […] depuis quel temps […] les ditz Burgeis conferantz de vostre tresgracious doun sont edifiez de nouel lour maisons deinz la dite ville a lour propres costages et mys ent'rompe ne puissent […] nulle paiement de ditz Mill' marcz forsqe tauntsoulement .xxxiij. li' a grande empouerisment et anyentisment de lour poures estate: Plese a vostre tresgracious descrecioun ordeyner qe plein et hastiue paiement soit fait as ditz Suppliauntz de la residue de les Mille marcz auauntdites en eide Comfort et releue de cez ditz Burgeys ou outrement ils ne puissent pluis longement demurrer illoeqes.

Item supplient voz ditz Burgeys qe come ils paient a vous diuerses custumes pur leyns quirs et pealx lanutz venaunez au port du dicte ville, cest assauoir pur chescun Sak' des leynes quirs et pealx lanutz cressaunt parentre les ewes de Coket et Twede en le Countee de Northumbr' .xxvj. s. .viij. d., de chescun Sak des leyns quirs et pealx lanutz del cressance de Tevydale .xiij. s. .iiij. d., et pur chescun Sak des leyns quirs et pealx lanutz del cressance descoce .vj. s. .viij. d. en grande diuersite et ambiguite des paiements de vostre dicte custume parentre voz custumes illoeqes et voz Burgeys auauntditz: Plese a vostre tresgrante roialte pur ouste lambiguite des paiementes de voz ditz custumes illoeqes, en comfort et releuement de voz ditz Burgeys de eux faire demurrer et enhabiter vostre dit ville en temps auenir, de vostre grace especiale granter a voz ditz Burgeys licence qils et chescun de eux de cy enauaunt purront et purra achater leyns, quirs et pealx lanutz del cressance de les troys parties suisditz et eux amesner tanqe al port du dicte ville et la eux eskipper, paiantz a vous pur la custume de chescun Sak' .xiij. s. .iiij. d. tantsoulement, ou autrement eux couyent de necessitee envoider et remuer del dicte ville et enhabiter en autre villes ou mielx lour purra ordeigner, considerant tresredoubts seignur, si vous plest, qe le Roy Richard vostre darrein predecessour, qe dieux assoille, granta a eux quant ils nauoient nulles perdes ne mischiefs licence deskipper Mille Sake de leyns, quirs et pealx lanutz del cressance del Countes de Northumbr', paiantz a luy pur chescun Sak dicels .xiij. s. .iiij. d. sanz pluis en eide et comfort de eux.

Page 57

Item supplient vos ditz Burgeys qe come les mures du dicte ville sont debrisez et degastez et en plusours lieux cheitz a terre, issont qe nulle defence y poet estre encontre vos enemys illoeqes sinon de vostre tresgracious ordinaunces et secour en celle partie: Plese a vostre tressouerain seignurie, de vostre tressage discrecioun, issint ordeigner qe les ditz mures purrent estre amendez et reparailez deinz brief temps, en saluacioun de vostre dit ville, comfort et releue de voz ditz Burgeys, et en defence encontre voz enemys auauntditz.

Endorsed: Especiales peticiones

Touchant le second article de ceste peticione, le Roy veullant conforter les Burgeuses, Marchants et enhabitantz de la ville de Berewyk' et autres ensi y vorront venir pur enhabiter, de sa grace especiale voet qils aient leffect de cest article, adurre pur trois ans proscheins aduenirs: Pur […] toute foitz qe des leynes cressantes decea leawe de Coket ils ne facent eskipper en le […] sur peine de forffaiture dicelles durant le terme suisdit. Galled throughout

1410.

Page 59

Defence of Berwick

30

AP E970

A nostre seignur le Roi et a son conseil moustre Randolf de Benton' qe come monsieur Morice de Berkeleye gardein de la ville de Berewyk' et sire Esteuen le Blund auoient commission denquere si ieo eusse liuere les vitailles le Roi qe ieo auoi en garde as gentz de la garneson de Berewyk' par fauses Mesures et si ieo eusse change les bons vitailles por mauueis et pris lower por faire leschange, et par la ou la commission voleit qil eussent pris lenquest par bons et loiaux viendrent par leur fause alliance et procurrerent les primers Abettours et se cuilleront ensemble et tute la garneison ouesqe eux, et disoient qil voleint meintenir ceo qil auoient commence por morir en la peine et issint procurerent lenquest des plus fauses gentz de la garneison et de la ville et de celes gentz pristeront il lenquest encontre la forme de leur commission, et ieo estoi manace qe ieo ne oseie riens parler por mon esta demeyn, qe si eusse parle iea eusse este tue: par qei ieo pri a nostre seignur le Roi et a son conseil qe cele fause enquest issint passe fausement encontre moi ne me courge en preiudice, mes qele demoerge en pees tant qe

Page 60

a la venue le Roi en celes parties ou de asqon gardein qe voille et ose et force de poer de prendre lenquest en forme de lei et par loiaux gentz, qar deuant le Roi et son conseil ieo ateyndrai lenquest estre prise par fauses gentz et encontre la forme de leur commission qil auoient.

No endorsement 1315.

Page 61

31

AP E276

A tresnoble et treshonourable seignur le son liges Maire Baillifs et la communalte de sa ville de Berewyk' seur Twede honure reuerences et seruices duez a vostre seignourie: sire sil vous plest fesoms a ententer qe Johan le Iirois vint a Berewyk' auauntdist' le Lundy deuaunt dimy quarrem darrayne passe et demaunda conge du Gardein quil poait aler vers les partiez del West pur vos enemys greuer et si fait a son pouer et puis reuynt a Berewyk' le douzsme iour de Auerill' oue .xxx viij homes de armes et .liiij. hobellours bien aparaillez et si ad le dist' Johan oue ses gentz en la defense de la dist' ville demore tauntque au iour de la confeccione de ceste lettre et vncore demorent ses gentz. Sire dieu vous doint

Page 62

bone vie et long et victorie de vos enemys. Escristis le .xx. iour de Auerill'

No endorsement 1317.

32

AP E275

Treshonure seignur, vostre vadlet Johan le Hireis veint a nous a Berewyk' il memes le Dimenche en mi quarreisme et lessa ses genz en Northumberland et nous pria counge daler deuers les parties de Carleyle pur greuer les enemys pur ceo qe noz marches furent lointeynes et nous li donasmes le counge et il se returna a ses gentz et alereit et firent vn bon eschek' sur les enemys et mout anoeaunt.

Page 63

Et puis mon seignur reuint le dit Johan a nous le Lundi prochein apres le vtaues de la Pasqe et fit vne moustreson deuaunt le Chamberlein et nous de .xxviij. hommes couenablement mountez et armes Daketoun Hauberioun et bacinetz, dount assez de peuvres genz qils ne sount receiuent douze deners le iour en la Garnesoun, et de .xxvj. Hobelers couenables. Et semble au dit Johan, sire, qe come il fait volunte de ceo qe ses genz ne sount mie receuz solome lestat qil sount a ceo qil dit, mes nous ne li poums autre chose faire sire pur ceo qe vostre mandement parla tout de Hobeleurs, sauf qe le memes fut alowe a .xij. d. le iour. Dount sire sil vous plest voillez auer reward du dit Johan come de cesti qe bien le uaut a mon iugement et touz iours ad greeve as enemys a son poeir. Mon Seignur dieu uous doint bones nouelles de vous eir. Escrit le .xxij. iour Aueril.

No endorsement 1317.

Page 64

33

AP E378

A nostre seignur le Roy prie le soen vallett William de Weston' qi ad serui a nostre seignour le Roy son treshonourable piere de bone memorie qe deux assoille et a ly en Flaundres et en totz ces guerres Descoce et ore en son chastell' de Berewic sur Twede, pur ceo qe ces cheuax et ces armours sount engages a Noef Chastel sur Tyne pur dix liueres pur les costages de ces chivax puis le comencement du seege de soun chastell' de Berewic auauntdit, por lor despences puis qil vindrount de Chastell', voile si le plest comaunder a son Tresorer qil ly face paiement pur aquiter ces chiuax et ces armours auauntiditz.

Item a nostre seignur le Roy prie leuauntdit William de Weston' pur ceo qil ly est tenuz pur arrerages de ses gages et de ces conpaignouns et por restor de lor chiuex perduz en son seruice dedenz le temps auauntdit, sicomme piert par billes qil ad seales de seales de sa garderobe et del office de sa Chaunbleynrie Descoce en six Centz liuerez et plus, et ces terres et rents qil auoit en Escoce qi ly solent valer par an Centz Marcz et touz ces biens moble ad perdu par ses enemis Descoce, Dount il ni ad riens pur sustener ly ne ses conpaignouns sinoun la seignurie de ly et son bon eide: qil voille si ly plest comaunder a son Tresorer qi a ly face assigner en ascune manere coment il porra estre paiez de sa dit dette et auoir ces sustenaunces pur ly seruir en due manere sicomme il ad fait cea en arrere.

Item a nostre seignur le Roy prie leuauntdit William de Weston' qe, si ly pleise qe il et ces conpaignouns ly seruent a sa volunte sicomme il ount fait cea en arrere, voille comaunder lour sustenaunce et ordeiner lour estate en quel manere et en quele estat ly pleise lour demore.

Item a nostre seignur le Roy prie leuauntdit William de Weston' qe, sil pleise a sa seignorie de ly graunter ascun Office dount il ly porra le plus honurablement seruir, ly voille si ly plest graunter la bailie de Holdurnesse a sa vie.

Page 65

Endorsed: Coram Rege et consilio

1318.

34

AP E374

A nostre seignur le Roi et a son consail prie Johan Baudewyn fuiz Thomas Baudewyn chiualer, iadis Burgeys de Berewyk, Come il ad demore as chiuaux et as armes puis la primer conqueste de la dite ville, enfesaunt sur les enemys la greuaunce qe il poeit dedeins et

Page 66

dehors saunz nul denier prendre, ne vnqes ne assentist qe les Burgeys de la dite ville la garde enpreissent mes touz iours encriaunt sur eux qe la ville se perderent pur lour graunt couertise et noun sachauntie, et ceo prie il qe seit enquis pur graunt profit le Roi, issi qe vous poiez certifie de ceux qe coupes ne auoient qe la ville se perdi et pite auoir de ceux qe coupes ne auoient. Par quei le dit Johan Baudewyn requert vostre grace de sustenaunce pur lui et sa femme et ses enfauntz, come celui qe perdist en la dite ville qaunt qil auoit, et puis sa femme et ses enfauntz hors de prison raunsouna dount son eigne fuiz en hostage vncore demoert.

Endorsed: Coram Rege

Post-1318.

35

AP E383

A nostre seignur le Roi et a son conseil moustre Robert de Blakeburn' qe come ledit Robert eit serui nostre seignur le Roi et son bon pere qi mort est dieus assoille en la ville de Berewyk et ensa

Page 67

Guerre Descoce .xxij. aunz et plus et ore demorra en le chastel enla compaigny' Roger de Horsle tauntqe le chastiel fust perduz et ad estie pris de Guerre en son seruice et naufre tout ala mort et a la bataille Destriuelyn perdist son frere et tout ces .x. aunz ad il perduz les issues de toutes ses terres en la Marche descoce qe soleient valer par an .iiij^xx. mars, issint qil naueit riens dont viure forsqe .xx. liures qil prist par an dune pescherye qil aueit en lewe de Twede, taunt comme la ville de Berewyk' se tynt, et de cel ad il vesqui taunt ala perte dela dite ville et ore nad il riens dont il puist estre sustenuz: Par quei il prie por dieu a nostre seignur le Roi qe por son lung' service et la grant pierte qil ad eau et ad de ses dite terres qil lui voelent ordener honurable sustenance dont il purra estre sustenuz tauntqil porra auer ascun recouerir de ses terres par leide de dieu et de nostre seignur le Roi.

Endorsed: Coram rege

post 1318.

36

AP E412

A nostre seignur le Roy pri son lige home Wauter de Gosewic qi en la treson nadgers faite en la ville de Berewic' perdist tous ses biens et ses chateux, et lui et sa femme et meigne pris, et puis par aide et le meschief qil poiant quer de ses amis reintz, qe lui pleise por dieu et por pite auer regarde al bon seruise qe le dit Wauter lui ad faite a son poiar, et a les perties qe il ad eu, et del meschief ou il est pur sa foi et por sa loiaute sauuer deuers son seignur lige qe il lui voille receiuere a sa grace et granter le, qe il puisse sanz em

Page 68

peschement de son corps ou de ses biens par cele encheson viuere denz son roiaume et son poiar et marchander, qar autrement lui et sa femme et ses enfanz perireint, de quoy il prie a son seignur lige qil ent eit pite.

Endorsed: Coram Rege per Adam de Standon'

1318-19.

37

AP E393

A nostre seignur le Roi et a soen conseil prient ses ligez gens qi iadis furent burgayses de Berewyck' qil voille pur lamur de dieu graunter a eux qe il puissent fraunchement demorer et marchaundier dayns son Realme, saunz areste ou atachement de eux ou de lour biens, teles comme il sount, et auer lour enfaunz hors de prison: Car lour corps serrount prestes a la volunte nostre seignur le Roi.

Endorsed: Coram Rege et magno Consilio

c. 1318.

Page 69

38

AP 9231

A tresnoble, trespuissant et tresexcellent Prynce nostre seignour sire Edward, par la grace de dieu tresnoble Roi Dengleterre, Seignour Dirlaunde, et Ducs Daquitein ses homes liges si lui plest Water de Gosewyk', Johan de Chilton', Johan de Ponfreit, Randolph de Holme, Roger de Butilstane, Henri de Dene, Simon de Skindelby, Johan Wake, William de Scothou, William de Botilstane, Thomas de Duxfelde, Gilbert de Duxfelde, Gefrei de Frodesham, Thomas de Scothou, William Thoraud, Adam de Bolton, Robert de Loundres, Rauph' de Belforde, Henri de Knapton, Richard de Ouerton', Robert de Holande, Water Storm, William de Donewyz, William de Derby, William del Burne, Richard le Barbeer, et Robert Hauxey, ses Burgois iadys demorauntz en la ville de Berewyk' sur Twede, corps et auoir et quantqe il ont, oue tote manere de honours, reuerences, et seruyses prestz et apareilliez a ses comandementz comme a lour seignour lige: Treshonurable seignour, por ceo qe nous auoms entenduz qe vn vostre lige homme et nostre cher veisyn et Comburgois Aleyn Scot est pris et detenuz en prison en la ville de Burdeaux, por suspecione qe ascunes maliciouses gentz lui ont susmys maliciousement qe il duist auoir este assentant dauoir trai la dite ville de Berewyk'. A vostre real poer treshonurable seignour sil vous plest, fasoms assauoir et loiaument vous tesmoignoms en bone fei par cestes nos lettres, qe le dit Aleyn vnqes ne fu assentaunt ne voillaunt ne sachaunt a la dite ville trair en nule manere: Mes voilliez cher seignour sauoir sil vous plest qe le dit Aleyn touz iours bien et loiaument se ad porte a vostre foy en touz pointz comme il feire deuoit: Par quoi sire prioms a vostre seignourie et requeroms

Page 70

sil vous plest por dieu qe vous voilliez de vostre grace, por la deliuerance du dit Aleyn couenable remedie ordiner. Treshonurable seignour, dieu vous doynt bone vie et lounge et victoire de touz vos enemys. En tesmoignance de qeu chose a cestes lettres patentes auoms mys nos seaulx: Escrites a vostre ville de Noef Chastell' sur Tyne le disme iour de Juyn, lan de vostre regne sire, trezisme.

tags for seals; no endorsement 10 June 1320.

39

AP 10342

A nostre seignur le Roy et a son conseil prie Johan de Burdon' Chamberlein de Berewyk' qe pleise a eaux descharger Luy de son office de Chamberlein et mettre vn autre en son leu qe il ne poet endorer le grant costages qe il ad mis auant ces hours sil ne soit a defesance de son estate, sicom touz les gardeyns qe ont este le pount tesmoigner. Et pleise a nostre seignur le Roy sauer qe il ad retenu tote le temps qil ad demore dysze homes darmes et dosze hoblurs pur les queux il ne prist vnke rend' sauf pur quart semayns.

Endorsed: Le Roi serra auise.

1340-43.

Page 71

Compensation

40

AP 3712

A consail nostre seignur le Roy moustre Johan Taillour Burges de Berewik et prie grace qe come il vint en Engleterre ala ville de Lynne en pelyrynage vers Cantewarbures par lettres de Conduit de les gardeyns de la Marche a meyntenir la Trewe, cest assauoir la lettre le Counte de Preddu et la lettre monsz Roger de Horsle de salf' conduit de passer et retouner saluement sauntz destourbaunce, vindrent les baillifs Leuesqe de Norwz et soun corps ount arestu et ses biens et ses lettres de Conduyt lui ount tollu qil ne poet issir en nul liu: Par quei il prie pur dieu qe remedie lui soit ordine qe nules gentz Dengleterre ne soient arestuz ne lour biens en Escoce pur sa demoere.

Page 72

1324.

41

AP 10319

A nostre seignur le Roi et a son counseille prie Johan Marchaunt de Berwyk' qe leur pleise comander au Tresorer et as Barouns et as Chaunbreleyns del Escheker qe le dit Johan peust auer paiement ou couenable assignement de .xlij. li' .xj. s. pur fourment de dit Johan achate al oeps nostre seignur le Roi, piere nostre seignur le Roi qe ore est, par Rogier de Horselee, iadis Conestable du Chastiel de Baunburgh' pur le dit Chastiel vitailler, sicome piert par les liueres de la Garderobe du temps qe sire William de Melton' Erceuesqe Deuerwyk' fuist Gardeyn de la dite garderobe, dount lacompt est rendu en lescheker, et le dit paiement ad este maunde et nul paiment ne assignement peust il auer a ses greues damages, dount il prie remedi pur dieu.

Endorsed: Coram rege Soit mande as Tresorer, Barons et Chaumberleins de lescheker qe veue la compte le dit garderober,

Page 73

sil troessent qe le Roi feust respounduz du ditz blez et qe largent soir vncore du, qe adonqe lui facent auoir paiement ou couenable assignment.

Irrotulatur

1331.

42

AP 7076

A noble Consaille nostre seignur le Roy Mustre Adam Schankis burgez de Berwic' sur Twed' qe il ad ferme totez les pecheris de salmon en la Ewe de Twede qe pertenent a labbe et le Couent de Dryburgh' de les dytes Abbe et couent pur les termes de .v. aunez [l]ur primer terme en comensand' al Pentecost' lan de grace .M.CCC.xxxij. dank' qe .v. annis soyent plenement complies, et si est passe de sez termez vne Aune a pentecost darreyn passe: Pur quoy il prie qe il est burges et veyson et en les condiciones du dit ville de Berwic' qe il put auore ces termes enterment Complies si vous plest.

Page 74

July-November 1333.

43

AP 7073

A tresbone Consaile nostre seignur le Roy Mustre Adam Scankys burges de Berwik sur Twede qe il ad pris aferme les pecheris de salmon les quex sunt apelles Totyngford' et le Lawe et Callet' en lewe de Twede les quex pertenent al hospitalle de seynt marie Magdeleyn de Berwic' du Mester du dyt Hospitalle pur les termes de .iij. aunes del fest de seynt Martin Lan de grace .M.CCC.xxxij. Et si est passe de ces termes vne Aune al fest de seynt Martin procheyn, et le dyt Adam son argent ad paye deuant Mayn vne party: Pur ceo il prie il est burges et veysyn du dit ville et dedens les condicions nostre seignur le Roy, qe il put auore ces termes enterment complies si vous plest.

Page 75

July-November 1333.

44

AP 7064

A bon consayle nostre sengnur le Roy Moustrunt' Adam Schankes et Clement Todde Burgoys de Berwyk' sur Twedde qe Robert de Tughalle Wyscount' de Berwik' Avandist pryst' deux lour pecheryes deu salmon en lewe de Twede Com eschet nostre seynur le Ray queus sunt appellez Ald Waterstelle et Outer Waterstelle, Le quelles Pecheryes eux pristerent au ferme del Abbe de dunfermelin et de Dryburgh' pur terme de Cynk' aunz des pentecost Lan de grace .M.CCC.xxxii.et sy sunt passes de lur terme deux aunz: Dount le dyt Adam et Clement vous pry pur dewe Com eux qe furent en le condiscioun nostre seynur le Roy qe dewe garde qe vous vollez ordyner Remedy sur ceo sy vous plest, qe eux pussynt auoir Lour terme Comply.

Endorsed: soit mande par bref de la Chauncellerie au seignur de Percy, gardein de Berewyk' et a sire William de Beuercote Chauncellor de Berewyk' et a Robert de Tughale viscont de Berewyk' denquere des choses contenues en cest peticion, et sil

Page 76

trouent lour suggestion verroie, et ils soient des condicions des gentz de la ville, qe les pescheries lur soient restituz a tenir com ils les tient a deuant sauue le droit le Roi et de chescun autre, Rendant au Roi la rente durante le terme auandit.

c. Whitsun 1334.

War damage

45

AP 7673

A Rey e A son consayl Adam de Ryston' senpleynt de syre Oseberun de Spaldynton' Gardayn de la vile de Berewyk' de grant trespas qe il luy ad fet en meyme la vile de Berewyk' e de ceo il vous pri mercy qe vous luy facez Remedi, si vous plest. Et vous Mustre syre qe meymes celuy Oseberun vyent a ses Mesons en la vile de Berewyk' e veleynement e hautise […] [deh]ors iete sa genz de ces Mesons e les ad Bayle as Auterene gentz a ses greuez damages. E pur ceo Chere syre il vous prie vostre lettre a meymes celuy Oseberun qe il luy deliuere ces Mesons cum il auant aueyt, e qe il les pusse tenir pur la Rent pur la seruice qe apent solum la taxacyon cum autre genz de la vile tenint. E si vous pleise comaoundez au Tresurer de Berwyk' qe il luy face auer Chartre cum les Auteres de la vile vunt, qe ieo ne pu my aler la e purpri de vostre lettre si vous plest. E seyniur celuy Oseberun ad Receu .xxviij. souz de ma ferme.

Page 77

Endorsed: Habeat breue ad Thesaurarium de Berewyk quod inquirat et super hiis de quibus conqueritur faciat sibi fieri iusticiam.

?1296.

46

AP 424

A nostre Seignur le Roy prie Alayn le fiz Richard de Corbrige quil si luy plest luy voille rendre vn Mes' e troys shopys oue les apurtenaunces en Berewyk' les quels il auoit deuant la gere Descoce comencee e les quels vnt estez en vostre mayn pus le dit conquest e vncore sunt, si quil ne poat vnqes sa seisine rehauer; desicome sire i est de Engleterre ne e en tutz temps en Engleterre demorant e a vostre fay, e seruise vous fist a cheuaus e armes al conquest de la dite vile e par tut le Reaum Descoce, ne rien sire nad forfayt par quei il doyt estre de sa terre foringe, plus qe vos bones gentz Dengleterre qui terres auoient en la terre Descoce ne sunt de lur dites terres foringez.

Endorsed: Adeat custodem et Camerarium etc., audiatur, et fiat sibi iusticia. Coram Rege

Page 78

pre-1307.

47

AP 428

A nostre seignur le Roy a son drayn parlement pria Alayn le fiz Richard de Corbrigge par sa peticion qe le dit nostre seignur le Roy vousist comander qil vst restitucion de vn Mees e treis Shopes oue les apurtenaunces en la vile de Berewyk' sur Twede les quels il auoit deuant la guere commencee, e les quels, puis qe la dite vile fust prise, ount este e vncore sont en la mayn nostre seignur le Roy, desicome le dit Alayn est Dengleterre ne e tut temps ad en Engleterre demurre a la foy le Roy e fist al Roy son seruise a la prise de la dite vile. Par la quele peticion le Roy li graunta vn breif a sire Johan de Segraue e sire Johan de Sandale, le quel est cosu a ceste peticion, qe eux faite sur ceo bone enqueste luy feissent faire hastyue remedie; les queux sires Johan e Johan tut trouerent il par enqueste, la quele est ausint cosu a cest peticion enseale de lur seals, qe le dit Alayn tut iours ad este a la foy e la pees le Roy demurrant en Engleterre, neqedent rien ne poeient faire par la resun qe diuerses gentz sunt feffez de dites Mees e Shopes par les chartres le Roy: par quei le dit Alayn prie a nostre seignur le Roy qil pur lamur de deu voille commaunder qe ses tenementz luy soient rendutz, desicome il nad rien fait encountre le Roy nencountre autre par quei il doit estre de eux foringe.

Page 79

The writ and inquest are missing pre-1307.

48

AP 10345

A nostre seignur le Roi Dengleterre et son bon counsail moustrent ses liges gentz Meyr et Burgeys de la ville de Berewyk sur Twede qe com nostre seignur le Roi lael od son bon consail apres la primere conqueste de la dite ville auoient regard a la fondacione et douesone de la meson dieux en la dite ville, qe purement et perpetuelment si est graunte as .xij. des meillours de la dite ville par queux la ville si est gouerne et deit estre a touz iours et des greuouses sentences enbullez par bulle de nostre seignur le Pape sur la confirmacionem de les possessions a la dite meson appurtenantz, quitclama par sa Chartre enseale du grant seal pur lui et ses heyrs a touz iours de rien claimer la fondacion ne douesone de la dite meson en blemisement des priuileges et possessions qe a la dite meson appendent: qe de sa bone grace et en oeuere de charite en eschuauntz les auantditz greuouses sentences les voille par ses graciouses lettres la fondacion et douesone de la dite meson graunter et confermer.

Endorsed: Moustrent ceo qils ont pur eux.

Page 80

c. 1333.

Page 81

49

AP 1659

A nostre seignour le Roy et a soen consaille moustrent les pouers freres et soeres de la maison dieu de Berewyk' sur Twede qe la ou vn Phelip de Ridale feunda la dite meson et ordina illusques vn mestre chapelain et autres quatre chapelains de chaunter illusques perpetuelment, et sept clergeonetz de chaunter a la messe de nostre dame et quinque pouers langisantz dauoir lour sustenance en la dite meson en viuere et vesture, et pur cele chaunterie et cel almosne sustenir il purchacea .C. liuerez de terre et de rente en Engleterre et en escoce, et outre ceo il ordona que a quel houre que la meson se voidast par la morte dascun mestre chapelayn le Mair et la comunalte de Berewyk elirrent vn autre suffissant en soen lieu, et si ceo ne feusent le Roi mettreit la mayne et ordinereit solonc ceo que bon serroit. Et par defaute que le Roi pier nostre seignur le Roi que ore est troua il dona la meson a vn Mestre Thomas Paynton, Clerk, le quiel Thomas la tient tantque a la Bataille de Bannokburn' et peus la dona a vn de ses chapelayns demeisne sire Esmon de Londres, le quiel sire Esmon la tient tantqil fust oste par Robert de Bruys. Et le dit Robert de Bruys pria a la comunalte de Berewyk' pur vn William de Rokesburgh' que peus en cea lad tenu et vncore tient, issint que vnques en son temps chapelayn fust troue forsque vn, et a la foitz nul ne pouer homme sustenance nauoit, mes gist oue sa concubine et despend les biens de la meson. Et voille nostre dit seignour le Roi emendre si li pleise que le dit William tous iours en cea ad este capital encaux nostre seignour le Roi en ead et counsaille et deuant ceux houres en temps de pees tua deux hommes et espousa deux femmes en la ville de Berewyk'. Par quoi les ditz pouers prient que nostre dit seignour le Roi voille auoir regarde al noun ablete du dit William et a la destruccion de la meson et issint ordoner que la chauntrie peusse estre maintenu et les pouers auoir lour sustenance, kar ils vont touz mendinantz lour payn.

Endorsed: [Pur ceo qil] est tesmoigne qe la douison del Hospital appent de Meire e Baillif' de Berewik', soit mande a eux par bref qil facent tieux redres e amendement sur les choses contenues en ceste peticion qe le Roi ne mette mie la mein en defaut de eux.

1333-34.

Page 82

50

AP 1608

A nostre tresexcellent seignur le Roy e a som consoille Moustrent le Meistre, le pouers frers e soers de la meisonedieu de Berewik sur Tuede qe com en temps de lassege leur eglise e leur meisouns furent abatuz par engynes, si deueite qe il ny auoit nule quarter reinys esseaunt seyn, e le dite maistre ad mys ses costages pur les auauntdit eglise e maisouns repareiler, si quil ad pluys mys que resceu, e ad engage ses chalices e vescemuntz pur lauauntdit redrescement, que loureigne est si tendre en luy meismes quil ne pute endurer le Ivere sauntx estre porry pur touz iours, e le dit maistre est encuraunt de iour en autre a soen poure poeirt ne ne pute lauauntdite oure si en hasty porfournire sauntz grant aide, purquei tresgraciouse seignur il prie a vostre tres haute realte quil vous plest pur lamoure de dieuy e pur la saulucte de vostre alme de vostre grace e de vostre charite commander de vostre almoigne ceo que vous plest pur lauantdit oure repareiler, quil ne soit legerment perdu a remenaunt, que treshonurable seignur si vous e vostre bon conseile noliez eider, autre aide ny ad en terre que les voet eider.

No endorsement 1333-34.

Page 83

51

AP 5736

A nostre seignur le Roi et a son conseil prient les executours du testament Thomas le Hatter de Berewyk' qe come le dit Thomas fuist en la ville de Berewyk' au temps qe la ville feust rendu a nostre seignur le Roi et puis long temps tanqe il morust, por qoi le dit Thomas doit enioyer les condicions grantez par nostre seignur le Roi a ceux de la ville le iour qele feust rendue, et puis en la vie le dit Thomas puis le rendre de la dite ville certeins meffesours de Noef Chastel sur Tyne pristrent diuers biens et chateux le dit Thomas en vne nef sur la Meer, siglant deuers Berewyk' et les amenerent a la dite ville de Noef Chastel, les queux biens sont puis menez a Euerwyk' et liuerez a la Garderobe nostre seignur le Roi: et le dit Thomas ad suy par bref du grant seal as Meir et Baillifs de Noef Chastel tanqe les biens feurent en lour mayns dauer deliuerance et il ne poeit rien auer, par qoi les dits executours prient qe les ditz biens lour soient restorez selonc les condecions auantdites.

Endorsed: Pur ce qe tesmoyne est deuant le conseil qe le dit Thomas feust en la vile de Berewik' le iour qele feust rendue.

post 1333.

Page 84

52

AP 591

A nostre seignur le Roi prie le son lige Robert de Tughale qe comme touz ses mesons qil auoit en les villes de Rok' e de Scremerston' en le Counte de Northumbr' […] ars e destrutz par les enemys descoce a lour drein venue en Engleterre, e ses bledz de […] cest assauoir .iiij.^xx acres de fourment, .viij.^xx acres des aueins e .xl. acres dorge cresanc' en terre furent destrutz par les […] del hoast nostre seignur le Roi quant il gust entour la ville de Berewyk', et ses bestes cest assauoir .c. boefs e vaches pris e fraies par les dits enemis […] descoce la noet quant les dites enemys vindrent sodeinement a Twedemouth', qe li ples doner au dit Robert vn tenement qest en la meine le Roi par la forfaiture Emme Bettes en la boucherie de Berewyk' en allowaunce de plusours pertes e damages qe le dit Robert ad resceuz par les ditz enemys lescoces ou ordeiner ascuns [certein remedie] en releuance de son estat.

Endorsed: Habeat antiquam firmam ad terminum vit[e sue et] quod post […] Robert' et hered' the endorsement is virtually illegible even under ultra-violet light.

c. 1335.

Page 85

53

AP 11299

Pleise a nostre seignur le Rey granter a son lige Robert de Tughall' le hamlet de Ederington' et vne pescherye en lewe de Twede qe est apelle Edirmouth a terme de sa vie, en alouance de costages et trauailes qil ad fet en sa ville de Berewyck', et pleise a Luy sauer qe le dit Robert iad demore peuse qe la ville fust rendu, et ad troue a ses costages de meme ouyt homes armez et quatre hoblurs pur les queux il ne prist vnke rens saf' pur les ouyt par ouyt semayms, et de ore prent il recorde de touz les gardeyns qe ont este et de Chanceler, Chamberlein et Mayoir.

Endorsed: seit enquise des choses contenues en ceste peticion la verite, et le Roy ent certifie si quil peusse outre commander sa volunte.

1335.

Page 86

54

AP 10341

A nostre seignur le Roy et a son consail Moustre si lui plest Cristofre de Colloyne, Burgeis de Berewik' et nee de Almaygne, qe comme il est emprisone et arestu son corps en la ville de Noefchastell' sur Tyne, et ensy ad este par vn an et plus encontre les condiciouns t[ai]lez parentre vostre treshaute seignurie et ceux de la dite ville de Berewik' sanz cause ou nulle manere de trespas: Dount il pri pur dieu et pur regard de pite de vostre grace especial endroit de sa delyuerance auoir: Desicomme il nad de rien trespasse a son eient, et sur ceo le dit Cristofre ad despendu quank' qe il auoit si qe rien lui remaynt dont il purra celle penance plus longment endurer.

No endorsement c. 1335.

Page 87

55

AP 10346

A lur treshonurable seignur Lerceuesqe de Cantorbirs et Chancellier Dengleterre, Moustrent si lui plest les Burgeis de Berewik qe se rendirent ouesqes meisme la ville ala pees sur bones condicions taillez a nostre seignur le Roy, qe come ils sount emprisonez et arestuz lur corps en la ville de Noefchastell' sur Tyne et ount este passe ad vn an et plus, sanz cause et desert ou aucoun manere de trespas: Dount il prient pur dieu a vostre treshaute seignurie de vostre bone eyde et consail devers nostre dit seignur le Roy endroit de lur delyuerance auoir: Desicomme il nount de rien trespasse, et sur ceo si ount il despendu quank' qe ils auoynt, si qe il ne purront celle penance plus longment endurer.

Endorsed: Les Escoce qe demorent a Noef chastel eient cunge de marchander deinz Le roialme Dengleterre et sils voelt venir a Berewik pur leur condicions demander soient responduz par les deputez.

1335.

56

AP 11310

Emelden'

A nostre seignur le Roi pri le soen clerk' et seruant William de Emeldon' qe lui pleise granter a lui les places de terre quele Richard de Emeldon qest adonqes comande, vn[cl]e le dit William, tenoit en la ville de Berewyk', la quele terre nest mie enhabite ne rien

Page 88

vaut' ne rent au dit nostre seignur le Roi, a auoir au dit William et a ses heirs a touz iours, rendant au dit nostre seignur le Roi et a ses heirs tant come le dit Richard rendist pur meisme la terre.

Endorsed: Eit les places et les face en habiter, et Rendant ascune chose au Roi.

c. 1335.

57

AP 4599

A nostre seignur le Roi et son counseil moustre William de Brunton' Marchant de Noef Chastelle sur Tyne qe come […] nostre dit seignur le Roi et son conseil lui eussent ordeinez destre Maire de la ville de Berwyk sur Twede apres le Conquest dycelle et de entendre seulement a cel office, parmi quele entendance il ad perdu tanque encea les auantages et profit de tutes ses marchandises qil soleit vser parmi le roialme Dengleterre, et estre cea du temps qil receust loffice auantdit […] [ad perdist] grantment de soen, qant a

Page 89

son menuz estat, par reson de mesme loffice garder et meintenir al oeps et auantages [nostre dit] seignur le Roi, queles despens il ne poet mais meintenir sanz leide nostre dit seignur le Roi: Dount pri lauandit William qil pleise au nostre dit seignur le Roi et son conseil ordeiner pur lui ascune certeine dont il purra le dit office garder […] come il ad fait tanqe encea, saunz trop perdre de soen, eant regard a les despens auantdites et a la grande perde qil ad eu en le meem temps de ses marchandises auantdites.

Endorsed: Eit .x. li' quex les Meirs soleient auant ces houres prendre pur leur fee; et autres .x. du doun le Roi, et soit bref mande au Chaumberloin illoqes de lui paier.

1335.

Page 90

58

AP 10343

A nostre seignour le roi pri si ly plest le soen lige William de Burneton' qe comme par il ad demore en office dedeinz sa ville de Berewyk sur Twede par soen comandement puys qe la ville fust rendu en cea: Et le dit William ia est [moult] trauaille et si a mal ese qil ne purra sanz peril de soen corps tel office al honour et profit du dit nostre seignur le Roi meintenir, qe li pleise graunter de sa bone grace qe le dit William pusse estre allege et assouz du dit office: Et de quel houre qe dieu li durra recouerir de saunte il serra prest, en pees et en guerre, a seruir et faire loialment et bonement quantqe en li est en cel office ou autre, quiel lieu qe li plerra comander. Et pleise a nostre seignur le roi granter al dit William qil sait quite de Costume par tot le pouer le Roi pur terme de sa vie pur les trauayles et costages qil ad mis en son seruise et prest serra a fer quiel hour qil serra a ese de corps.

Endorsed: Soit parle oue lui qil demoerte en loffice, et endreit de son trauail il plest au Roi et a son conseil qil seit regarde couenablement.

?c. 1335.

59

AP 1609

Pleise a nostre seignur le Roi pur lamour de dieu et les almes ses auncestres grauntier as ces poures Nonayns de Berewyk' sa chartre

Page 91

de confirmacion de .xl. Marches de Rente en la dite ville de Berewyk' qe feust le comencement de lour fundacioen, et de comaunder a ses ministres de Berewyk par ses lettres qeles puissent franchemente enioier lour terre et tenementz et lour pescheries auxibien en Twede en Escoce come en altres Ewes qe sont deinz sa seignurie en Engleterre et en Escoce sicome eles auant ces houres ont eu. Et qe lui pleise comander a ses ditz ministres qe les ditz Noneyns soient serui del argent quel le dit Roi granta a eux pur redresser lour Esglise et lour altres maisons et les vint liures les queux il ad graunte de sa grace especiale sicome plus pleinement est contenu en sa chartre, qar eles ne eunt rien resceu de ceo puis la bataille fors tant solement vint Martz, de sicome eles furent destrutz de touz leur biens, bledz et bestes et quaunt qils auoient par reson de la bataille

Endorsed: Quant au conferment […] tantqe le Roy soit serui de ses terres.

Quant au paiement soit mandez a Robert de Tughale, Chaumberlein de Berwyk', qe il fait la paie.

c. 1337.

Page 93

SECTION II

CUMBERLAND

Legal

60

AP E498

A nostre seignur le Roy et a son consail mustre Adam de Bowes qe come Gilbert de Querton, Henri de Threelqeld et Willam de Goldington' auient porte bref sur luy de trent acres de terre oue les apurtenances en Niwebygging en le Conte de Comberlaund, mesme celi Adam auantdit vint en response par son aturne Williame Pynkene et auient ior lendemain de seint Martyn lan du nostre seignur le Roy trentisme quart, le vantdit Williame de Pynkene enchemenant de Euerwyk' auer Londres pur pleider pur le vantdit Adam murust a Pondfreit: nent sachant le vantdit Adam, qe fut en seruiz nostre seignur en Escoce, tesmoinant par Roberd de Swyneburne, perdit sa terre al ior auant nome par defaute: Dunt le auantdit Adam prie grace et remedie, issi qe cel ior li seit sauue et qe ne seit mie perdant pur cele defaute.

Endorsed: Sequatur quod habeat testimonium quod fuit in seruicio Regis

1306/7.

Page 94

61

AP 3042

A nostre seignur le Rey e a sun consail Mustre Margarete qe fu femme sire Huberd de Multon' qe com Johan lur fiz e heir ne seit vncore qe de age de tresse aunz e en la garde nostre seignur le Rey, par la resune qe le dit sire Huberd tint tuz ces tenemenz en chef par seruices de chiualer le iour qe il morust del heyr Thomas de Multon' de Gilleslaund qe aloure fust dedenz age e en la garde nostre seignur le Rey, vn Willame le Brun, bastard qe le dit sire Huberd' engendra akun tens de vne sue cousine Ade la Brune, la quele il ont primes espuse sachaunz le cosinage e entreques deuorz fesist puys par proue fete de la dite sachaunce de cosinage auant les espusailles, com la dite Margarete set e poet suffisaument mustrer, seut endeceyte du Rey e du dreyt heir susdit de auer seisine de terres qels furent au dit sire Huberd': Dunt ele prie qe nule seysine liure luy seit, ke le Chaunceler seyt garni qe il ne liure nule seysine de dites terres saunz fere garnir la dite Margarete a mustrer ceo qe ele sauera dire pur le estat le Rey e le dit heyr qe est denz age e en sa garde. Endreit de tenemenz fet asauer, le Maner de Ishale en le Cunte de Cumberlaund' E le Maner de Surlingeham en le Cunte de Norffok'.

Endorsed: Non deliberetur sine speciali precepto domini Regis.

c. 1310.

Page 97

64

AP 12939

A nostre seignur le Roy et a son conseyl mustre Roberd de Welle qe come par fyne fece en la Chauncelerye pur le trespas qe il fit esposaunt Maud qe fut la femme monsieur Roberd de Clyfford' sauns le conge du Roy ceux trespas lui feust pardones, et sur ceo nostre seignur le Roy manda par Bref de son grant seal a sire Roberd de Clydrowe adunqes achetur desa Trente qe il lui deliuera terres oue touz les issues resuez de meismes les terres pus le temps qe ele esteyent saysies en la meyn le Roy, de quei le dit Roberd de Clidrowe detient deuer lui alamontanse de Cent Mars, dount il prie remedye.

c. 1316.

Page 98

65

AP 3044

A nostre seignur le Roi prie la sue lige si lui plest Alianore qe fu la femme Thomas de Multon' de Egremound' qe lui pleise dire sa volunte du Mariage purparle en temps le dit Thomas soun seignur entre Johan soun fiz e soun heir e Johane la filie monsz Piers de Gauaston' nadguers Counte de Cornuaill' et qe de sa grace la voille granter la garde de deux parties des terres qe furent au dit Thomas soun seignur en le Counte de Cumberland' tanqe lage le heir, rendaunt par an lestente returne en la Chauncelrie qe amonte a .lxxvj. li'. viij. s. .i. d ob. q^a. Et voille nostre seignur le Roi si lui plest entendre qe les Mesouns en le Chastel sount ruinouses, et pur taunt voleit ele si lui plest auer la garde asusteiner les Mesouns. Deleted: Et sil plest a nostre seignur le Roi ele prie qele puise auoir la nurture de lenfaunt agarder al oeps nostre seignur le Roi taunt qil eit ordeine de lui ceo qe lui plest.

No endorsement

Page 99

AP 13987 is a duplicate of this, endorsed Coram Rege Herlaston, without the deletion of the last sentence and with the verbal difference of en point de for ruinouses. ?1322.

Page 100

66

AP 1937

A nostre seignur le Roi et son conseil moustre Isabele qe fut la femme monsz Richard de Cleterne qe par la ou ele estoit en son Manoir de Alenburgh' en le Counte de Cumbr' en la pees dieu et de nostre seignur le Roi qui ore est, qe dieu garde, la vint vn Adam le fitz Gilbert de Culwen' le vnkel nuyttantre et autres plusours oue li meffesours a force et armes encontre la pees nostre dit seignur le Roi, et la dite Isabele contre son gre rauirent et ses gentz oue li trouetz batirent, naufrerunt et malement treterunt et puis la ietterunt sur vn chiual a trauers et en tiel manere hors de son Manoir la menerent tanqe au Chastel de Aykhurst' et illoqes la tindrent tanqe rescus la fut fait par le power et leide monsz Antoigne de Lucy, les queux meffesours ount ia lour procuraturs en court pur chartre de pardon: Dont ele prie houmblement a nostre dit seignur le Roi et son conseil, pur lamur de dieu et saluacion del alme le Roi et pur honur de femmes, qe la pees leu soit defendu, qar chartres de pardon sont grantez si communement par procurement de ceaux qe sount pres du Roi, nient eiaunt regard' a Lestatut' nadgueres fait, par qai qe la lai nest de rien dotee mes le meffesours dassez plus enbaudiz de meffaire et nomement en la Marche susdit, pur le resut qil ount Descoce apres lour felonies faites.

Endorsed: Il ne doit mie auoir pardoun.

1338 x 1343.

Page 101

67

AP 8082

A conseil nostre seignur le Roi moustront les comunes du Counte de Cumbr' qu par la ou trew fust pris parentre le Roi Dengleterre et le Roy de Scoce [y] veynent les gentz de Tyndal' quil sont de la Seignurie nostre Dame la Roine et passent parmy le dite C[ou]nte de Cumbr' et font grant damage en Escoce et robbent lours biens et Chateux et reuenient noctauntre par la dite Counte, pur quel[s] damages et robberies les ditz Communes du dite Counte de Cumbr' sont destreutz de faire redresces par cause qils ne [purrent] suer les maufesours susditz de arester denz les dits Franchies de Tyndal': Pur quoi ils priont remedie pur dieu et en [oeure de] Charite.

Endorsed: soit le Conseil ma dame le Royne appelle et si ele ne orde remedie desdits meffesours adonqe soit grante commission as seignurs du paiis ou tielx meffesours passent darester et prendre mesmes les meffesours.

c. 1342.

Page 102

Financial

68

AP E726

A nostre seignur le Roy e a soun conseil prunt Thomas de Colewen e Hughe de Muleton' ke la ou il furent assignez e chargez par comaundement le Tresorer de taxer Leuer e receiuer le Quinzime en le Cunte de Cumbr[elaund], en meimes ceus tens les viscuntes de Cumbrel[aund] e We[stmor]laund les mistrent en assises e iurees au Baunk nostre seingnur le Rey ou eus ne poeyent ateindre pur le seruise le Rey, par quer les viscuntes returnerent Lur issues e or est comaunde au vescuntes a leuer meimes les issues: Dunt eus prient nostre seignur le Rey

Page 103

ke disicum ifurent en sun seruise ke il l[ur] voyelle de ceste chosse sa grace fere e de sicom il demorerent a Messun par le comaundement le Tresorer.

1297.

69

AP 2939

A nostre seignur le Roy e a son counseil Mustrent Johan de Lucy e Wauter de Bampton' Taxours e Coillours del Trentisme e [del] vincisme en le Counte de Cumberland qe la ou il sunt chargez a leuer les auaunditz trentisme e vintisme, il ne trouent

Page 104

viscount' ne autre baillif' le Roy qe a eux pust estre entendaunt pur les prises de bleez e cariages e autries bosoygnes le Roy sicom il dicunt: Par quai il ne vnt vncore resceu forsqe .xxx. liuers, de quels il prient qe vous voilez assigner a qi il purrount faire la paye en ceo pays, e priount sil vous plest vostre counseil de ceo qe est a leuer.

c. 1306.

70

AP 25

A nostre seignur le Roi et a son consail mustre Michel de Hartcla que par la ou le Roi luy aueit grante de sa grace a son parlement a Westmuster lan de son regne trentisme tierce qil vst allouaunce de ses arrerages les quelx il ne poeit leuer tant come il fu viscunte en le Counte de Cumbreland pur arsuns et destructions que les Escotz aueient fait en meisme le Counte, et il ne poet allouaunce auoir si le Tresorer et les Barons del Escheker ne soient certifiez de ses damages et ses pertes quil aueit par les Escotz en le dit Counte, par quei il prie vncore la

Page 105

grace le Roi et al consail quil eit auditurs denquer de ses damages et ses pertes et pur certifier le Tresorer et les Barons issint quil puisse allouaunce auoir: Come le Roi luy granta autrefoith' de sa grace.

Endorsed: Assignentur Johannes de Insula et Johannes de Kirkeby per breue de Cancellaria ad inquirendum super contentis in peticione. Irrotulatur

1307.

71

AP E506

A nostre seignur le Rey e a sun consoil moustrent le pouers gentz de Kyrkeby en Kendale com la dite ville ensemblement oue lour biens e chateux fust ars, de quei il sount pouers e mendynauntz, venent les taxours e taxer les voillent solom les biens e chateux qil vrent a laseint Michel, nyent eyaunz regarde de la cheaunce qe lour aueint vn Moys apres laseint Michel, Dount il prient pur dieu qe il peussent estre taxes solom les biens e chateus qe il ount ore entermeynes.

Endorsed: Nichil fiat.

?temp. Edward I.

Page 106

72

AP 5121

A nostre seignur le Roi et a son Consayl moustre Richard Champion qil ad troue myn de plom et dargent en moltz des Lewes en le Counte de Comberlond et de Westmerelond dunt nostre seignur le Roi poet auer grant profit sil voit mettre costages, et si pleysir soit a nostre seignur le Roi qil voile graunter la chose pur le dysme dener, il trouera bien qe le prendereit pur meuz certifier a nostre seignur le Roi qoi il purra valler.

Endorsed: Soit moustre ceste peticion au Tresorrer et il enface ceo qest affaire pur profit le Roi. Coram domino Rege

c. 1324.

73

Page 107

AP 594 1346.

74

AP 6761

A nostre seignur le Roi et a son bon conseil de ceste presente parlement moustront les tenant' nostre seignur [le Roi] de la vile de Penreth' qe come il ad nulle eawe en la dite vile, qest

Page 108

enhabite od grante numbre des tenantz le Roi, forqe dune petit ryuol qest vne braunche tirrant du autre eawe, la v[ient] tannours demorantz en la dite vile et mettent lour pealx en grant noumbre a giser en le [dit] ryuol checun temps del an et rendant ent par an au Roi .iiij. s. de nouele arente par le seneschal de lieu, par queux pealx et diuers vermyne nurree par yceux leawe est confect qe les ditz tenant ne autres gentz du pays venantz au dite vile pur la marche […] ne pount auoir lour easement ne estre seruis dy cele pur la confectione suisdite: Sur quay pleise au dit conseil examiner leuesqe de Kardoill' qest fermer nostre dit seignur le Roi de la vile susdit et ent ordeigner remedy.

Endorsed: Soient certeines bones gentz et sufficeants assigne denquere de la matire comprise en la bille et de ent certifier en la Chauncellerie.

1376.

Page 109

Carlisle

75

AP E522

A nostre seynor le Roy et a son Consayl Mustre Henr' de Dalston' ky par la ou il amena vne skeppe de Bras' de Orge al marche de Kardoyl le samedy prochayn auaunt la fest Saynt filipp' et Jacob' pris de .vj. s. Lan du regne nostre seynor le Roy quy deu garde .xxiij. la vynt vne Syr William de Kardoyl cheualer et prist la vauntdyt scheppe de Bras' par vne Ricard alatymer purueur meme cesty Willam' en la pris' et apres la prys': Dunt meme cely Henr' se pleynt a nostre seynur le Roy et a son Consayl et prye remedy pur deu, pur ce damage amuntunt a .x. s.

Endorsed: Sequatur per communem legem.

?1295.

Page 110

76

AP E517

A nostre seignur le Roy e a son consail prient e requerent les poures chaitifs e meseysez freres e soers del Hospital de seint Nicholas hors de Kardoil, qui prient pur dit seignur le Roy noit e iour come pur leur lige seignur, e qi sount destruit par guerre e par arzouns, qe nostre seignur le Roy voille pur lamur dieu auoir merci de eux e graunter eux de sa grace quil puissent auoir lur gardeyn Leuesqe de Kardoil, come toutz iours ount eu del temps dount memoire ne court puis le temps qe le primer Euesqe de Kardoil Ewale par noun, a qi le Roy Henry le secund, auncestre nostre dit seignur, auoit graunte la garde del dit Hospital en pure e perpetuele aumoigne a lui e ses successours pur trouer vn chapeleyn chauntaunt pur les aumes le Roy Henry auauntnome e les almes de ses auncestres e ses successours a toutz iours, le quel Ewale assigna vn chapeleyn qi fust gardeyn desouz lui del dit Hospital e des possessions a meisme Lospital apurtenantz e de toutz les biens moebles e nient moebles e a la charite de la mesun sustenir, e issint chescun Euesqe apres autre de cel temps puis en cea, iesqe au temps Leuesqe qi ore est, e vncore puis son temps tant qe sire Hughe de Cressingham prist le auaunt

Page 111

dit Hospital en la mayn le Roy par le quo Waranto en eyre des Justices, pur ceo qil nauoyent nul garaunt des choses auantdites, kar lur chartres qe ceo tesmoignerent furent arses par la graunt arson de kardoil, dunt vnqes puis ne teyerent ne lur sustenaunce nauoient come auoir soloient mes lur rentes, mesons, gaignerie e toutz lur autres possessions e biens sount anyentitz e destruitz par defaute de garde: Par quoi il sount honiz aremenaunt sil neyent eyde de nostre seignur le Roy, Dunt il prient pur lamur de dieu e seint Nicholas qe hastif remedie lur soit graunte, e qe le Roy voille comaunder qe leuesqe eit la garde, si come ses predecessors la soloient auoir e come la chartre qe est arse la tesmoigne.

Endorsed: Coram rege Roy non habet consilium ad restituendum illud quod recuperauit in Itinere Justiciariorum.

1296-97.

Page 112

77

AP 10187

A nostre seignour le Roi e a son conseil prient ses gentz de la Cite de Kardoil qe par la ou il sount taxes de lour rentes al disme dener e de lour moebles al quinzime dener pur les queux deners il sount ore greuousment destreintz e les Huss de lour meisouns ensealles: dount il vous prient de la nouele taxacion estre relesse ou mis en respiste.

No endorsement 1312.

78

AP 10186

A nostre seignur le Roi et a son conseil prient ses pouers gens de Cardoill' qil lour voille grantier Murage a sa volunte a dorer pur reparailler le Mure de la ville qest descheu de nouel, et pur bretager meisme le Mure et pur les fosses redrescer, et pur le portes et les pontz treticz sustener et meintenir, desicome la ville est en greignour qele ne fu.

No endorsement 1314 or 1336.

Page 113

79

AP E539

Au conseil nostre seignur le Roi pri Johan de Dysorford' messager de Karlel qil voillent ordener pur la dite ville de Karlel e pur le Chastel de mesme la vile solunc ceo qe le Roi comaunda par sa lettre e cestes choses voilletz hastiuement faire, kar la dite vile e le Chastel sunt en graunt peril par defaut' de deners e de vitaille e les messagers sunt a si graunt meschef qil ne poent mes demurer par defaut.

No endorsement ?1316.

80

AP 3029

A nostre seignur le Roi et soen counseil moustre Johan de Morpath' qe come il auoit ces Mesones en la vile de Cardoill' dedenz les Mures, vindrent nos Enemys Descoce et assegerent la dite vile par .xij. iours et lassailerent de iour et de nuyt par Ber

Page 114

frays et autres engines, la vindrent monsieur Andreu de Harcla et monsieur Robert de Swyneburn' ensemblement oue la Comune de la dite vile et abatirent les dites mesones qe valoint par an .v. mars et emporterent le Merin pur faire Berfrays et bretages en defense de la dite vile, et vnkes le dit Johan ne auoit restoraunce dount il pri remedi pur dieu.

Endorsed: Soient certeins gentz assignez en Chauncellerie denquere par quele cause sa meson fust abatu et de totes autres articles necessaires etc. et returne lenqueste en Chauncellerie,

le Roi se auise et face reson.

c. 1316.

81

AP E417

A nostre seignur le Roi et a son conseil moustrent vos liges gentz de la ville Cardoill' qi vnt demorrez en la garneison dela dite ville .vij. aunz entierement, vnt soeffert leyntz feym, seif et mult dautre cheytiuete et tout par defaute des gages, et a ceo vnt il perduz et engage chiuauz, armures et autres choses quantqil porreient fyner et tout par defaute de paiement, car les vitaillers qe vnt demorrez illoeqes vnt estie souent remue et vnt ale auaunt

Page 115

et ne voeleient nyent acompter oduesqes eaux, et tieu chose les vnt mult mis a meschief od autres mauueises seruises qe les vitaillers les vnt serui, car vyns et autres vitailles qil vnt eau et qe vnt estie de petite value, il vnt mis si haut vn tonel de mauueys vyn a Noef mars qil nel porreient vendre a peyne por .ij. marcs et en tieu manere de ble qil pristrent, et tieux paiementz les ad mult od autres mauueys paiementz mis en pouerte, le Roi a Norhampton' comanda qil deussent estre serui de Robes et dargent et vnqes nul homme les voleit de riens regarder por tout le meschief qil vnt eau et vnt; de quei il prient por dieu qe remedie lour seit fait, issint qe por lour long' seruice ne moergent en defaute.

Endorsed: Coram Rege Deleted: Coram Rege et consilio

1307-18.

Page 116

82

AP 12914

A nostre seignur le Roi et a soun consoille prie Isabelle de Vernoune qe come ele amoua ses biens al Chastell' de Cardoille et a la ville pur sauuement garder pur les enemyes Descoce come autres gent fesoient, cest asauoir deux sakes de leynes prise de .xx. mars et vne coupe dargent prise de .xl. s. et vne Jupell' prise de .c. s. et vne seal a pallefre pur chiualer prise de .ij. mars et vne demy drape de tanne prise de .xl. s. et vne lyet pur vallet cest asauoir vn matresce vne caneuesce de yndecarde pris de .x. s. vne huce vne tapite de la suyt pris de .xx. s. vne Maunteill' vermeille Dirlaund' pris de .x. s. vne Aketon' pris de. .xx. s. vne Paneloun et vne spozeyn pris de .x. s. vne bacinet et vne Auentayille pris de vn mark vn Hauberk prise de .L. s. et vne Coursour ferraunt pris de .xx. li' et vne someer ferraunt pris de .iiij. mars et vne Rouncie ferraunt pris de .xij. mars. Et quant sire Andreu de Harcla se forfist deuers nostre seignur le Roi totes cestes choses furent pris en la mayne nostre seignur le Roi parmy les mayns sire Antoyn de Lucy sire Hugh' de Louther' sire Robert de Banton' Thomas de Fethirstanhalght et William de Haltecle et Johan Dounay. Et puis quant sire Wmfray de Waldin et William de Aykeleued' furent assigne denquerrer de les chateux le dit Andreu [si] troue fut qe les auandit chateux troue en la ville et en le Chastell' furont al dite Isabelle et ceo vouche ele recorde del enquest pris par les ditz Vmfray et William par quoy de cestes choses ele prie remedie.

Herl[aston']

Endorsed: Soit mande bref a sire Antoin etc qil certifie de la cause de la prise des biens nomez en la petition en la main le Roi et queux biens etc de quele value et a qi il furent etc, cestes certification retorne en Chauncellerie, soit illoeqes face droit.

Et aussint soit mande a Humfree qil certefie de ce qe fust troue deuant li par enqueste.

post 1323.

Page 117

83

AP 2209

A nostre seignur le Roi et son conseil prie Benet de Eglefeld qe come il soit tenuz au Roi en .xv. li' pur vitailles achatez du Roi le pier a Holmcoltran en counte de Cumberland' et le dit Roys luy soit tenuz en .xv. li' dune dette qe luy est due en Lescheqer dun assignement a luy fait par Thomas de Bourgh' clerk' dun surplusage qe mesme celuy Thomas y auoyt dune dette qe le dit Roi le pier luy deuoyt pur vitailles de luy achatez a Brigham pur la garnison du chastel et de la ville de Cardoil', plese au dit nostre seignur le Roi et son conseil pur dieu comander al Tresorer et as Barons del Escheqer qe Lune dette soit deschargee pur lautre, eyauntz regard si leur plest qe le dit Benet est vn pouers homme de la Marche Descoce et qe les dites vitailles furent achatez pur sa soustenaunce pur grant defaut et meschief qil ad soeff[er]t par les soueneres venues des enemys en celes parties.

Endorsed: Soit bref mande as Tresorer et Barons de lescheqer compernant leffect de la peticion qe si troue soit qe le surplusage feust assigne au dit Benet par assent des ditz Tresorer et Barons qils lui allowent lune dette en lautre.

?c. 1327.

Page 118

84

AP 5046

As tressages seignures de ceste Parlement Moustront les poures Citezeins de Cardoill' qe come il ont ewe et vncore ont grandes trauailles et costages entour la reparacioun et amendement des portes, mures et fosses du dite Citee et des continuelles agates de noet et iour sur les mures du dite Citee et la sauue garde dycelle, et come par le bon auys le seignur de Neuille illeoqes gardeyn grandes oueraignes a de nouelle sont commencez et nient perfornez come en Turnepikes et grandes garettes sur les mures et nouelles fosses: et come ils sont chagez al Escheker nostre seignur le Roi annuelment de paier qatrevintz liures pur Tonealx, Molyns et

Page 119

Pescheries, dont les ditz Tolnealx, Molyns et Pescheries ensemble oue le greindre partie de lour Citee sont toutoutrement arcez et destruitz par les enemys Descoce et ensement ore tarde toutz les terres et tenementz ensemble oue bles, biens et chatealx de toutz parties du dite Citee sont arcez, gastez et destrutz par les enemys de France et Descoce engisantz deuant la dite Citee al Assumpcioun de nostre dame darrayn passez, pur cause des queux perdes, enpouerissementz et nomement des grandes agaites sur les mures du dite [Cit]ee par eux toutz iours continuez grande partie des communes du dite Citee ont disgerpez la dite Citee et vncore plusours veullient, si ne soient voz tresgraciouses [secours]: Pur qoi plese a voz tresgraciouses seignures considerier les ditz meschiefs, enpouerissementz et les grandes agaites et qe le Tolnealx, Molyns et Pescheries [sont tou]toutrement destrutz par les enemys auantditz et grandes oueraignez commense et nient perfornez, et ent ordiner remedie: Cest assauoir destre descharges [de ferme] […] e al Escheqer par qatre ans ou trois tanqe les ditz Tolnealx, Molyns, Pescheries et oueraignes soient leuez et perfornez, por dieu et en oeure de [charite].

No endorsement 1385.

Page 120

Holme Cultram

85

AP E516

A nostre seignur le Roy e son conseille prient ses Moignes le Abbe e le Couent de Holmcoltram qe les purprestures e les arentementz qe sunt prises en la foreste denz lour commune a lours grauns greuaunces e dammages en diuerses lyus seynt ostez de tut en tut, ou kil les puyssent auer a fee, rendaunt la ferme au Roy, desicom il deyuent de (?)drait ester plus pres qe nul autre de prendre de lur commune demayne.

Endorsed: Quia parliamentum iam finitum est, nichil potest fieri hac vice.

?c. 1302.

86

Page 121

AP 2583

A nostre seignur le Roy e a soun consail priunt ses Moygnes Lalbe e le Couent de Holmcoltram ke si com en lan de soun Regne .xxv. furent aprisez e pris a karnaruan al hus nostre seygnur le Roy .lxviij. quarters e demie de furment de lauantdit Albe, pris del quarter .v. s. .viij. d. dount lalbe ad taille du pris, en quel pris le Roy est vnkor tenuz. Dount lalbe e le Counent priunt alowance de la dette ou ke meme la dette les fait alow en la dime kil sount tenuz au Roy.

Endorsed: Johannes de Kyrkeby examinet tallias et ad cuius comodum frumentum deuenit et quis debet inde onerari et certificet Consilium. Irrotulatur

1306-7.

87

AP 2592

A nostre seignur le Roi prient ses pouers Chapeleyns Labbe et Couent de sa Meson de Holmcoltran qe come eus seient destrutz en plusors maneres par la guerre Descoce et ia de nouele ars et desrobez en plusors lieus et leur bestes fraiez, Cheuaux boefs et vaches .v.^c et plus, et si sunt il enpoueriz par tant qil ne pount viuer ensemble a

Page 122

dieu seruir sanz grant aide: Par quoi il prient a nostre seignur le Roi leur auoue, qil voille pur dieu auer regarde de leur grandes pertes en temps son pier qe dieux assoile et en son temps, et qil les voille graunter de sa grace la voesone del Esglise de Burgh' desoutz Estaynesmore en le Counte de Westmorland dunt il est verrai Patroun, et qil la puissent approprier en amendement de leur pouer estate.

1315-16.

88

AP 2588

A nostre seignur le Roi prient ses po[ures Ch]apeleins Labbe et le Couent de Holmcoltran qe come ils ount este tut outragement destruitz par les gueres Descoce et a ore en la dreine guerre deuaunt la bataille de Berewik' quant les enemis Descoce […] rent et destruerent en celes parties et les biens enchacez hors du pais Les ditz Abbe et Couent en lour graunt meschef […] lement pur lur viure achaterent des vitailles nostre dit seignur le Roi a la summe de .xx. mars, queux il deuient a lour treshautisme seignur auauntdit: qil pleise a sa seignurie reale, de sa bone grace et pur les almes de ses auncestres, eyant regard a leur graunt destruition et pouerte et a ceo qils sunt de sa propre fundacion et a ceo qe totes les vitailles nostre seignur le Roi furent et sount en celes parties herbergez en leur meisouns et graunt partie des ditz vitailles par eux car[riee] en

Page 123

profit de lur treshonurable seignur auauntdit, pardoner a eux les. .xx. mars auauntditz en amendement de leur poure estat pur oeure de charite.

Endorsed: Coram Rege et magno consilio

Eient respit tanqe a la seint Michel prochein auenir et endemettres suent deuers le Roi dauer grace.

1334.

Page 124

The Liberty of Cockermouth

89

AP E66

[A nos]tre seigneur le Rey prie William du Gardyn quil voille de sa grace grantier quil eit sa terre de Louthwait en le [Conte] de Cumbreland, la quele terre fu seisi en la Mein nostre seigneur le Rey en la primer guere descoce, pur ceo [ches]kun vescont dengleterre auoit Lectre aseisir Lour terres descoce en lour vescontiez, et il adunc par […] tenuz par le Conte de Bouchan, ne vnques armes ne porta contre le Rey, mes touz iours puis […] le Rey et vnquor est prest afair, par quai il prie la grace le Rey.

Endorsed: Consimilis peticio est coram Rege Rem'

?c. 1299.

90

AP 3976

A nostre seignour le Roy e a son consail mustre Johan de seint Johan, gardeyn du Chastel e del honeur de Cokermuth' du baille Roy, qe come Adam de Kereseye son Baillif e Johan Burghman seon Gaoler de mesme le Chastel eussent receu en leur garde vn prison qi ont a noun Simon Fot a sauuement garder en la prison de mesme le Chastel, E mesme cely Simon eust

Page 125

debrise la prisoun de mesme le Chastel e eschape hors de lur garde e eux tantost leue la menee e le sywrrent tanqe ateint fust e descole, par quey il prie le Rey de sa grace les voille pardoner cel eschap desicome il porta Juyse par leur siwte, isse qil nen soient chalangez en Eyre de Justices ne allyours en temps auenir.

Wygeton'

Endorsed: Si ita sit Rex concedit quod quieti sint de escapio illo nec occasionentur in Itinere Justiciariorum.

1302.

91

AP 3967

A nostre seigneur Le Rey e asoen conseil Mustrent Johan de Seint Johan e thomas de Lucy qe desicom eus tenent Le Boys de Allerdale denz la foreste denglewode en commun issi qe nul ne fet son seueral, la vient nostre seigneur le Rey e sei voet apruer en le dit Boys a grant damage lauantdit Johan de seintiohan e a la desheritaunce le dit Thomas, pur ceo qe le dreit Thomas fust enquis par brief de la Chauncelerie quant nostre seigneur le Rey e le dit Thomas tindrent le dit Boys en commun e lenquest returne en la chauncelerie, parunt Thomas auoit

Page 126

brief as approuours le Rey quil sessasent de appruer tanqe usent autre Maundement; E or venent de nouel e fount les apprumenz sicom auant fesoient, dunt il prient remedie.

Endorsed: Rex uult ponere in sufferenciam approuamentum suum, quamdiu dictus Johannes tenuerit Manerium de Cokermue de concessione Regis. .C. Irrotulatur

?1302.

92

AP E92

A nostre seignur Le Rei Moustre Johan de seint Johan et Thomas de Lucy que com il tyngnent Le Boys de Alredale et grant partie

Page 127

du Boys de Engelwode en commun apurtenaunt au Maner de Cokermuthe et la gistement et pannage et attachemenz de mort Boys appent a eus, issi que au Rei rien demoert fors que le soil, et cel Boys est desaforeste, plurous gens du pays par auctorite et soffraunce de Ministre Le Rei purpernent et enclount graunt partie del Boys des auantdyz Johan et Thomas de Fosse et de Palys, par quei il perdent agistement et attachemenz et pannage et autres choses que a eus appendent, dunt il prient que si nostre seignur Le Rei se voille apprower de sun soil que il Lour grante de arrenter cel Wast et respoundre au Rei parmi Lours Mains de cel aprowement, pur coe que il deiuent estre plus procheins, par la resun que le Boys et le couert est lour et quant que i appent sauue le Soil.

Cumbreland

Endorsed: responsum est huic petitioni sicut peticioni domini Johannis de sancto Johanne Rem' irrotulatur

1300-03.

93

AP 22

A nostre seygnur Le Rey prient ses Burgeys de Cokermuth' en Le Counte de Cumbreland qe come les treys pountz de mesme le Burgh' feussent en portez auaunt le Nowel dreyn passe par la grant cretine de ewe qadonts feu: Par quey le dist Burgh', qe est Burgh' le Rey, e le Marche e totes les fermes le Rey illeuqes sount grauntement enpirez e le pays en viroun moult en damage: qe le Rey de sa grace lour voille grauntier pountage a durer taunt come il luy plest pur refayre mesme les pountz.

Endorsed: fiat per quinquennium Irrotulatur

1304.

Page 128

94

AP 24

Cumbreland:

Thomas le fiz Thomas de la Moriley prie a nostre seygnur le Ray sa Grace de sa tere ke est en la mayne le Ray en les viles de Alneburgh', Petit Brouthton', Godrykby e Pykhou en le Counte de Cumbreland par la resoune ke Thomas de la Moriley soun pere ky hayre il est fue encountre le Ray en la prime Gere de Escoce e en meymes la primere gere vint a la pese le Ray e tute sa vie se tint a la pese e morust a la fay le Ray, E fet aremembrere ke il est de playn age e ne tient neent enchef du Ray.

Endorsed: Coram Consilio […] second endorsement erased?

1304.

Page 129

95

AP 49

A nostre seignur le Roi e a son conseil moustre Thomas de Lucy qe la ou le Roi e meisme celui Thomas tiegnent le boys de Allerdale en comun, issi qe le soyl est au Roy e la moyte de meisme le boys a meisme cesti Thomas, La viegnent les gentz le Roi e ount abatu tut le pluis de meisme cel boys pur Lenclosture de Holmcoltram e ensement pur le piel nostre seignur le Roi de Dunfres, par quei le dit Thomas prie remedye.

Endorsed: Robertus de Clifford vel eius locum tenens et Johannes de Insula videant boscam et ibidem inquirant de dampnis infra contentis per breue de Cancellaria et certificent consilium.

c. 1305.

96

AP 48

A nostre seignur le Roy e a soen consail Mustre Thomas de Lucy qe la ou nostre seignur le Roy e luy tenent le boyz de Allerdale en commune, issi qe le soile est a nostre seignur le Roy e le couert en commune, la ad nostre seignur abatu tut le plus de le Boyz pur soen peel de Dunfres e soen peel de Holmcoltram: Dunt il prie a nostre seignur le Roy, qil luy voil faire ascun rewarde e alouwaunce de sa grace.

Endorsed: Robertus de Clyfford' vel eius locum tenens et Johannes de Insula videant boscum et ibidem inquirant de dampnis infra contentis per breue de Cancellaria et certificent consilium. Irrotulatur

1305.

Page 130

97

AP E372

A nostre seignur le Roy et a son conseil prie soen lige vallet Johan de Warthole qad demorez ouesqe nostre dit seignur le Roy en tote sa guerre descoce et ad este pris et raunczonez par les enemis trois foiz et grant meschief suffert en diuerses maneres par quoi ses terres biens et ses chateux sont tut destruitz: quil lui voille de sa grace granter en eide de sa sustenance vne petite baillie en Derewent' felles a terme de sa vie que nul homme ne tient quant ore ne riens ne rent a nostre dit seignur le Roy, la quele baillie il entent que lui purroit valer entour .xl. s. par an.

pur Johan de Warthole

Endorsed: coram Rege et magno consilio

temp Edward I.

98

AP E375

A nostre seignur le Roy prie Richard de Denton' qe ly pleize de sa grace graunter a ly en regerdoun de son seruiz la mestre forestrie Denglewode a terme de sa vie et qil voille auoyr garde, a ceo qe le dit Richard' ad este ia deux foitz pris par les enemis de scoce en le seruicz nostre seignur le Roy et ses teres ore tuttes destrutes.

Endorsed: Coram rege

?1296-1322.

Page 131

99

AP 6779

A nostre seignur le Roi et a son conseil mustrent Thomas de Redman et Johan le Venur de Camberton', Cosyns et heirs Alayn de Camberton', qe com Marie qe fust la femme le dit Aleyn de Camberton' tynt en dower la tierce partie des terres que furent al dit Aleyn iadys son barun en le Cunte de Cumber' del heritage les auantditz Thomas et Johan, Lauantdite Marie tant come ele vesquyt' puis le comencement de la guerre Descoce tynt oue les Escotz encontre nostre seignur le Roy, dunt le viscunte del Cunte de Cumberl' seisi le dites terres qele tynt en dower en la mayn le Roi, dunt le Roi vncore est seisi: Par quei les auantditz Thomas et Johan prient pur dieu granter remedie desicome la dite Marie Morust treis anz passez.

Endorsed: Petrus Malorre et Johannes de Insula Capiant istam Inquisicionem. Irrotulatur

1307.

Page 132

100

AP 2210

A nostre seignur le Roi et a son counseil prie Beneit de Eglesfeld qe com il eit purchace le Maner de Clifton', qest tenuz del Honour de Cokermouth', qe est en la meyn nostre seignur le Roi et nient de la Coroune, la vient Leschetour et ad seisi le dit Maner countre la fourme de la graunde chartre, pur ceo qe le dit Benet ad purchace le dit Maner saunz counge nostre seignur le Roi, sur quei le dit Benet prie brief al Eschetour qil ouste la meyn.

Endorsed: Sequatur in Cancellaria Irrotulatur

1320.

Page 134

SECTION III

COSTS OF WAR

101

AP 871

A nostre seygnur le Roy et a son counseil prie le Clerge de leuesche de Carduill' et del Ercedekene de Richemundshire, qe come il ount este souentfeat destrutz par la venue des enemys Descoce et de ceo sunt moult enpoueritz, parquoi autrefeat en diuers eides qe lui furunt grauntez de leur benefices le dit nostre seygnur le Roy fit taxer de nouel par son bref mesme ceux benefices, et solunk' cel tax ensi fete de nouel fit leuer les eydes, et ore eit le Pape graunte au dit nostre seygnur le Roy la disme du clerge Dengleterre en eyde de luy, qil plese au dit nostre seygnur le Roy par charite auer regard' a leur pouerte et meschefs qil ount et longement ount eu, et comaunder a leuer de eux cest disme solunk' le dit drener tax qe fut feit par son comandement, quar de autre ne pount il vnquore estre chargez, purceo qe lour estat nest de riens vnquore releue, et plusors benefitz sount taxez a graunt value, des queux home ne pout rien prendre, pur la destruccion […] fet sur eux. Et qil pount sur ceo auer bref' sicome graunte est a ceux de leuesche de Duresme.

Endorsed: Fiat ista vice de gracia, saluo iure Regis in aduentu. Irrotulatur

Page 135

1318-19.

102

AP 4086

Item, A nostre seignur le Roi prient ses lieges gentz des Countez de Cumbr' Westmerl' et Northumbr' qe come il soyent destrutz par la gere et par sodeyn morin de[s b]estes issint qil nount dount viure ne lour terres gayner, qil voille pur lour grant meschief pardoner a eux totes maners des dettes qe vienent en demand sur eaux par somouns hors del Escheker ou qe en altre maner est demande de rent annuele, tanqe en cea pur terres et altres choses, et pur treis aunz a venir ou tanke qils soint releuez par layde de dieu et de luy, la quele dette il ad mis en respit tanke qe a la feste de touz seintz prochein a venir, dount eux luy mercient moult.

Endorsed: Pur ce qe triene estre, le Roi voet qe ses dettes se leuent apres le respit passer.

Page 136

c. 1321.

103

AP 5117

A nostre seignur le Roi prie son chappleyn Johan Euesqe de Cardoil qe come nostre seignur le Roi ly comanda de tourner a Noef Chastel sur Tyne en message od autres grantz de la terre a la Purificacion lan de son regne .xiiij.^me de treter de les Escoce sur certeynes poyntz, en queu message il demura .ix. symeyns et myst grantz custages, plese au dit nostre seignur en eiaunt regard de sa grant destruccion, comander qe alowance ly soit fait de ses despenses pur le temps auantdit.

Endorsed: Il semble au Roi et a tut son counseil qe depuis qe il ala pur commune profit du Roi et du Roialme et de sa Euesche et qil ne ala mie si loinz hors de Leuesche, qil se put suffrir.

Irrotulatur Coram Rege

1321-24.

Page 137

104

AP 5208

A nostre seignur le Roi si lui plest, prie Johan de Denum qe la ou il ad vne forterece on le Countee de Cumberland qest appelle la To[urr]e de Melmorby, la quele poet estre garde par duz hommes darmes: E il la dite Tourre toutz iours ad garde iesqes encea e souent ad este assailly par les enemys Descoce e toutz iours bien defendu par la grace de dieu tanqe a ore, a grauntz damages de ditz enemys e pert de lour gentz, e ia soient les terres le dit Johan si destruytz la e ailliours par tout qil nad poer de trouer les coustages: Par quoi pleise a nostre seignur le Roi qil lui voille aider en ascune manere a cele garde faire, ou de gages ou dautres choses a la value, tanqe le secle se chaunge deuers teles parties, qar graunt peril et graunt pert serroit a tout le pays entour si ele feust pris e perdu, qe dieu defende, par defaut de garde.

Endorsed: Se auis daucun Mariage, garde ou ferme et en certifie le Roi, et il par bon conseil lui fera aucun regard' par qoi il le puisse du mielz garder, a saluacion du pais. Denum

1320-26.

Page 138

105

AP E391

A nostre seignur le Roy e a son conseil moustre le […] Prieur de Seint Oswald qe sa meison dount il est gardeyn est molt a desouz et enpouery par la reson des mauuaysez anneez qe ount estetz e de sa Eglise de bamburgh' qe solait estre la grayndre soustenaunce de sa meison, qe nettement est destrut', Dount il lui coueynt ses chanoignes en dispersion maunder: E le vauntdite […] Prieur de vn frere Johan de Hexceldesham, chanoigne de Gedeworth, sez deux auntz par nostre seignur le Roy ad este charge, Dount le vauntdite Prieur pri pur dieu qil poet estre descharge e le dite chanoigne remue.

Endorsed: Coram magno consilio

1315-26.

Page 139

106

AP 6776

A nostre seignur le Roi et a son conseil pri vn Clerk' de Northumbreland quest apelle Johan de Roubiry, le quel est destruit oue les enemis Descoce et ses parentz octiz par les guerres qont estee, pur lamour nostre seignur le Roi quil lui pleise granter de sa grace ses lettres al Abbe et le Couent de Thorneton' sur Humbre qil voille receiure le dit Clerk' en Chanoyn de lour Meson pur dieu seruir et prier pur nostre dit seignur le Rois et pur ses auncestres et lui trouer abite a lour custages, qar le dit Clerk' nad riens dont il meismes le purra trouer.

Endorsed: Coram rege Herl[aston]

temp Edward II.

Page 140

107

AP 5225

Pleyse a nostre seignur le Roi et a soun counseil pur ceo qe ses liges Bachelurs Richard de Denton et Johan de Orrete ount entenduz qil y soynt ascunes gentz descoce qe sount del enemite nostre seignur le Roi et voillynt estre a sa fay, et le plus volentz sil entendisent qe Richard et Johan auaunt nomes eussunt poer de nostre seignur le Roi de les retceiure a sa pees, qil lui plese son commission granter pur le profist nostre seignur le Roi et en artrissement de ses enemys.

Endorsed: E[iant] semblable commission qe monsieur Antoigne de Lucy en ad, issint tot foitz qe par cele cause la commission le dit monsieur Antoigne ne soit defeite.

1327.

108

AP 5206

A nostre seignur le Roi et son conseil prie son lige sergeant Johan de Denum qe lui pleise commander a sire Robert de

Page 141

Wodehous, gardein de la Garderobe, qil acompte od lui de temps qil estoit en uostre message es parties du North' en la compaignie Lerceuesqe Deuerwyk' et autres, et qil lui en face bille desouz son seal en paiement.

Endorsed: Soit fait.

1327-28.

109

AP 8625

A nostre seignur le Roi et a son conseil moustre la Clergie del Euesche de Duresme, des Countez de Northumbr', Westmerl'

Page 142

et Cumbr', et des Ercedekenez de Richemund', Clyueland', Euerwyk', Estrithyng et de la franchise de seint Cuthbert de Aluerton', Aluertonshire et Creyk auxibien seculers come religious, qe par la ou par la guerre Descoce qe lour dura .xxxiiij. auns il ont este destruitz en biens et en possessions, lour eglises et lour Manoirs ars, et lour liures et lour chalices et les ornementz de seinte eglise desrobbez et emportez de […] soit issint enpouerez qil ne suffisent a grant peyne a la sustenance de lour Ministres, et en plusurs lieux vnqore ne […] mie, et nient contreesteant lour pouerte et lour destruccion si sont il prestz de paier la disme de quatre aunz nadgaire […] la verroie value de lour benifices quant aore, et pur ce qe les coillours de la dite disme firent compulsion par escouiengement et […] de seinte eglise a la dite Clegie a paier selonc lanciene taxacion, ceux de la Clergie del Euesche de Doresme, [des Countez] de Northumbr' Westmerl' et Cumbr', et des Ercedeknez de Richemund' et de Clyueland' suyrent par lour peticion d[evant] […] le Roi ore a cest conseil qe dreyn feut a Notingham et prierent remedie, par quei le Roi manda par son bref, le transescrit est cosu a ceste peticion, a Mestre Johan Souereyn, coillour de ladite disme, qil ne deueroit rien leuer des benifices es dites […] selonc le nouel tax tanqe a cest parlement et qe des benifices en mesme les parties qe ne feurent mie de nouel tax […] roit de tot et rien demander tanqe au dit parlement, dont tute la Clergie auantdite prie qe remedie lour soit fait.

Endorsed: Seit [mande a Mestre Johan Sovereyn] pro ascun grant le Roi qil veigne deuant le conseil pur la cause auantdite.

Et puis […] Mestre Johan par la comandement nostre seignur le Roi et sun conseil est deuant eux en parlement, purce qe le Roi de sa grace auoit grante a la dite Clergie qil paieront la [moite] de la dite disme reserue a son oeps selonc le nouel taxe, et qe les benifices et temporaltez ens bien susdites, qe ne feurent mie einz ces heures taxe, soient de nouel taxe e dont lour value a ore, e selonc le dit taxe paierent la dite moite de la disme a nostre seignur le Roi: granta a la reuerence nostre seignur le Roi e son conseil qil de ceste chose escriuest a nostre seint piere le Pape as aident sa volunte de lautre moite reserue a son oeure, e tanqe il serra par le Pape de ceo certifie, qil leuera rien des ditz benefices e temporaltes forsqe selonc le nouel taxe, e dautre benefices e

Page 143

temporaltez de nouel nient taxe il surserra endemettres. Et purce soit lettre mande au dit Mestre Johan qil face leuer la dite disme endemettres en la fourme auantdite.

1330.

110

AP 2936

A nostre seignur le Roi et a son conseil pri Antoigne de Lucy qil lour pleise ordeyner qe reson ly soit fait de William de Douglas William Bard' ses prisons pris de guere en Escoce, les queux ly feuront tolletz en la Manere qe nostre dit seignur le Roi et son conseil ount bien entendou auant ces heures, qar tout eit nostre seignur le Roy comaunde auant ces heures souent qe les ditz prisons ly fuissent liueretz, vnqore rien en est fait.

Endorsed: Coram Rege et magno consilio

Enfourme le conseil des nouns de ceux qi pristrent les prisons de lui qe mettent chalange en eux, et adonqes eit bref a eux qil soient deuant le Roi a Noef Chastel sur Tyne lendemayne

Page 144

de la Trinite a faire et recey[ure] ce qe le Roi ordenera et son conseil, et soit le dit Antoigne illoqes a mesme le iour.

c. 1333.

111

AP 10289

Au counsaile nostre seignur le Roy moustrent ces lieges gentz du Counte de Cumbr' qe come monsieur Auntoigne de Lucy soit maundee au parlement par brief a la quinzeyn de la seynt Michel tote soit il assignee vn des gardeyns en les Countes de Cumbr', Northumbr' et Westmerland: a queu iour ou deuaunt les Enemys Descoce oue tote lour poer sount prestes a entrer la terre Dengleterre et destruer. Par quey par nostre grant request auoms priee monsieur Auntoigne qil voile demurrer entre nous a ceste foith, a faire le bien qil purra pur la saluete du paies, desicome il ny ad nulle altre grant vers ces parties a qi toes les gentz du paies se attrerunt si entierment, ne de si bon volente a prendre en sa compaigne le bien et le male solom les auentures de guerre come a luy. Par quey sires nous vous prioms humblement qe a ceo parlement luy voilliet auoir excuse. Et vous requerroms

Page 145

sires qe vous voillietz doner foy et credence a nos chyualers du parlement porteurs de cestes, des choses qils vous moustrount plus playnement par bouches touchauntz les meschiefs et les periles de la marche susdite.

Traces of red wax on dorse representing two oval seals and one small round seal. 1339.

112

AP 4147

A nostre seignur le Roi et son conseil mostrent ses poures liges gentz des Countez de Cumberlaund et de Westmerlaund qe ia soit […] air ordeyne feut par nostre seignur le Roi et son conseil qe nul seignur ne Conestable de chastel ne Chastelleyn ne Gardyn n […] des dites gentz pur socurs de Chasteux durant le poeir des Enemys, Iadumeyns Gardeyns, Chastelleyns, Conest[ables] […] s parnent si outragouses raunceons de eux qe plus lor vaudroit de voider la terre pur le temps qe tiel socurs quere […] s pur deux nuytees ou treis .v. s. et daucuns demy marc, nemye eant regard a ce qe mesmes ceux gentz se voelen […]

Page 146

de vie et de membre et de quant qils ount pur defendre et sauuer les chasteux a lor custages demeyn pur lor demoer […] ils prient pur dieu remedi par si reale mandement, qil ne lor coueigne mye voider lor terre et qe mote soit el mandement qe les en revenantz respoignent deuant enquerors a chescuny pleynte solom lei de terre quant nostre seignur le Roi les voudra assigner denq[uerer] de cestes choses.

Endorsed: Seit maunde etc par brief' des choses contenues, et tutes autres acordez en tieu cas a suifere de faire greuaunce contre laccord: auxint seit comande de crier et publier ceo qe feut acorde et […] ceux qe contre lacord desore vodrent faire.

temp Edward II-III.

Page 147

113

AP 6477

A lour tresredoulte et tressouereyn seignur le Roy moustrent les Comunes des Countees de Northumbr', Cumbr' et Westmerland les […] ables greuaunces qils s[oeffert] […] desoutz Colour dune trieu, la quelle est a eux plus damageant qe ne serroit ouerte guerre.

A de primes ount les Escoces acrochez les possessions sibien de Roi come de pluses de ses lieges les Counteez de Berwik', Roxbergh', Drumfreez, […] a la somme de trent Mille liures et plus.

Item ils ount dedeins ceste trieu tuez plus de sept Cent persone et (?)serarde chiualcheez dedeins les seignuries du Roi sibien en Escoce come en Engleterre […] [l]es Countez de Northumbr' et Cumbr' susditz sept Cent Charues et plus, et si ascuns persones defensables qe lour purra greuer soient par eux pr[is] […]

Item la ville de Berwyk paie certein tribute sibien en deniers, vyn, come en autres vitailles al Counte de la Marche descoce: Nientcountreesteant qe le Roi doun Mille Marcs […]

Page 148

Item Twedemouthe, qest aieynaunt a la dite ville, paie cest an .x. marcz.

Item la Chastell' de Werk ad paie ceste an .xx. marcz.

Item les lieges du Roy dedeins le viscounte de Roxburgh' paient ceste an .C. marcz.

Item les gentz de Ridesdail' par an .l. marcz.

Item diuerses lieges du Roi deins les Counteez de Cumbr' et Drumfreez paient par an .C. li'.

Item, est assauoir qe touz les desusditz qe ensi soit raunceonez par les Escoces sont de tiel condicion qils nosent Suppouaillier lour veisins quant les Escoces chiualchent parmy eux pur mesfaire enuers les lieges du Roy, ne faite rescous quant les Escoces ratournent ouesqe la mesfaite.

Item, le Chastell' de loghmaban, qest assye vint leuez dedeins Escoce, est en tiel distresce qe homme, vitaille ne puruoiance y poet entrier sanz especial licence de Monsieur Archibaud de [Douglas].

Item, les lieges du Roi sont plusours raunceonez come prisoners et les autres detenuz en vile prison countre les expresses parolles des trieux: Pur quelles greuaunces desusditz les […] Gardeins se ount retreatz a cause de nounpouair, et ensi est tout la paijs desolate, et coment les vrays lieges du Roi voidier lour terres et heritages et quere lour viures aillours […] abaundonier les paijs as Escoces si remedie ne soie ordeignez en ceste present parlement.

Item, outre tous ces articles desusditz y sont aderiers nient paiez oitz Mille marcz et quatre Mille marcz al seint Johan le Baptistre proschein venant […] Marcz de la raunceon du Roi descoce qe darrein morust, de quelle somme la roialme en ad des graunt mestier.

No endorsement 1379/80.

Page 149

114

AP 5037 1377.

115

AP 4221

Page 150

A son tresgracieus tresnoble et tresdoute Seignour le Roi de Chastell' de Lyoune et Duk' de Lancastre moustre Rauff' Baroun de Graistok qe come il fuist ordeigne par commission vn des gardeignes de la Marche oue le Counte de Northumbr' et auxi il fuist ordeigne par le Roi et soun conseil dauoir la garde del Chastell' de Rokesburgh' et sur ceo en chyminaunt deuers le dit Chastell' de prendre la garde dycell' solonc ceo qil auoit en comaundement il fuist pris deinz le Roialme Dengleterre par le Count de la Marche Descoce et mys a grant somme de Raunceoun, la quelle somme il nest point de poiar depaier si noun qil seit toutoutrement destruyt par terme de sa vie saunz releuer: Par quay plese a vostre tresgracious Seignourie, pur dieu et en oeps de charite, de luy eaider qil ne soit outrement defait, eiant regarde tresnoble Seignour pur ceo qil fuist pris deinz le Roialme Dengleterre rien fesaunt encountre lordynaunce de la grant trieu, ne vnqes ne fist male alescoces deinz lour Roialme Descoce ne deinz le Reialme Dengleterre nyent plus.

No endorsement 1380.

Page 151

116

AP 8864

A nostre tresredoute et tressouereign' Seignour le Roi Supplient vos lieges le Baroun de Greystok', William de Aton', Robert de Hilton' portur des presentz pur eux et autres chiualers esquiers et archiers al nombre de .vj.^xx et plus qe furent pris par le Count de la Marche Descoce dedeinz vostre Roialme Dengleterre alant vers le Chastiell' de Rokesburgh' pur la salue garde dicelle sanz ascun mal faire, et le quel Count les tient en prison a cause des biens prisez en vn Nief Descoce par monsieur William de Hilton' et les biens vnquore pur la plus graunt partie sont a force ocupiez par les gentz de Noef Chastell' sur Tune, Kyngeston' sur Hull' et Lyne: Qe pleise a vostre Roialte graunter briefz as ditz villes de deliuerer les biens par eux ocupiez com desus par endenture pur ent respondre au graunt iour de Marche, qe moult purra valoir

Page 152

al deliuerance des ditz suppliantz, et ceo vous pleise graciousement faire, considerez qils furent pris en vostre seruise.

Traces of red seal on face

Endorsed: Soient lerceuesqe Deuerwik', le Count de Northumbr', le Baron de Greystok', monsieur Rauf de Euere, monsieur William de Skipwith', monsieur Johan Conestable de Halsham et monsieur Walter' de Petwardyn coniuntz a resceuire les ditz biens et briefs faitz a ceo deliuerer par eux et lour deputez.

?1381. AP 8870 is a duplicate of above, even to the endorsement.

117

AP 5624

A nostre tresredoute seignur le Roi et soun tresage consail en cest present parlement moustre Rauf Baroun de Graystok' qe come il fuist assigne par les ditz nostre seignur le Roi et conseil de garder le Chastell' de Rokesburgh', sur qoi le Cont del March' desescoces lui prist et autres plusours de ses gentz dedeinz la roialme Dengleterre enalant a dit Chastell' a cause dune punde pur Niefs descoce od plusours Marchandis en ycels, quels Niefs vn monsz William Baroun de Hilton' oue diuerses gentz de Northumbr' et autres Engleis pristerent, le quel Rauf est mys a Raunsoun de Mille marcz: qe plese a nostre dit tresredoute seignur le Roi et son sage consail comander qe le dit monsz William, et touz autres de sa compaignie qy furent, soient arrestuz en qeconqe partie

Page 153

dengleterre qils puissent estre trouez, tanqe gree soit fait a dit Rauf pur soun dit Raunsoun et du remenant gree soit fait a nostre dit seignur le Roi.

Endorsed: Soit commission faite as certains suffisantes et indifferentes persones denquere et de eulx enfourmer viis et modis des niefs et les biens en y celles dont ceste bille fait mencion et as queux mains ceulx sont deuenuz et de quele value ceulx sont, et de arester touz ceulx en qi mains les biens serront trouez et de les tenir en arest tanqz ils verront faire et aueront fait surtee suffisante de respondre au Roi de la value de mesmes les biens a lour mains issint deuenuz. Et si par cas aucun vorra trauerser lenqueste prise en ce cas, soit lessez aler a large par suffisante meinprise de respondre au Roi des ditz biens ou de la value si soit trouez encontre lui.

1381.

118

AP 8179

Pleise a consell' nostre seignure le Roi dordeigner commissions as certeignez seignurs, Chiualers ou Esquiers dez Counteez de

Page 154

Northumbr', Cumbr' et Westmerl' denquerrer queux sont lez villez arsez et destruyt par les Escoce es Countez susditz et de ent certifier as Tresorer et Barouns de lescheqer par tant que lez Coilliours des dismez et quinzismes que sont acompter poient estre descharger dez dismez et quinzismez assys sur lez villes issint destruyt.

Sil plest a monsieur le Tresorer, sez sont lez nouns deux as quex lez commissions serront direct ou as deux eux

leuesque de kardoill' Johan sieur de Ros Rauf sieur de Neuill' Monsieur Johan de Irby Chiualer Monsieur Johan de Derwentwatre Chiualer Monsieur Cristofer de Morisby Chiualer en lez Counteez de Cumb' et Westmerl' Monsieur Richard lescrop' added

le Conte Marsshall' Monsieur Maheu de Redmane Monsieur Raufe de Eure Monsieur Thomas Vmfravill' Johan de Mitford' En le Counte de Northumbr'

domino Cancellario Per Thesaurarium

1389.

Page 155

119

AP 10868

A tresexcellent et tresgracious seignour nostre seignour le Roi et son bone conceille moustrent et ceux compleynent sez pouers lieges et inhabitantz dez Contez de Northumbr' et Westmerl' qe come voz ditz lieges et inhabitantz dez Countez auantditz sont demurant sure la Marche descoce dont lour possessiouns, bienz et chateux sont arsez et destrutz par souent chiuachez de vos ennemys descoce et pur la greindre partie rienz nont dont viure, issint qe voz ditz lieges et inhabitantz sont en poynt de guerpre la paijs toute desolate, si par vostre tresgraciouse seignourie et eide ne soient releuez; qe pleis a vostre hautesse et souerein seignourie releser as ditz voz lieges la quinzisme grante en vostre darrein parlement tenuz a Cantebr' en amendement de leur pouer' estate, pur dieu et en oeure de charite.

Endorsed: Soient respite tanqe le mois de seint Michel et comiss' ordeinez de inquiere dez terres degastez en le mesme temps

Pur Northumbreland' le count Mareschall' Monsieur Matheu de redman Monsieur Thomas dumframville John de Mitford

Pur Cumbeland leuesqe de kardoill' le sieur de roos le sieur de neuille Monsieur Johan de irby amand manceux

Pur Westmerland le sieur de clifford Monsieur richard de scrope Monsieur W Lancastre Willum Ormesheud'

1390.

Page 156

120

AP 15295

A tressoueraigne et tresgracious seignur le duk de Bedford' lieutenant Dengleterre

Suppliont humblement les poueres liges nostre seignur le Roy des Contes de Northumbr' Cumbr' et Westmerland qe come ils ount este chescun an par longe temps deuant ces heures et soint a present par sodeyne inuasions des enemys descoce arsez, despoilez et destruitz, et auxint sibien par grantz mortalites des ditz liges illoeqes come par plusours autre perdes, damages et greuances, queux les di[tz lig]es par grantz chiuaches et resistence de la malice des enemys auantditz ount sustenuz et susteignent de iour en autre sount anientez, empeirez et empouerez qe si ascun charge, imposicion ou taxe soit mys sur les ditz liges et de eux leuez les ditz liges serrount anientez et destruitz, et les ditz Countes des enhabitantz en ycelles desolacz et destituitz pur touz iours: qe pleise a vostre tresgracious seignurie considerer les premisses, et come les ditz Countes sont les frountures sur les Marches descoce et chescun iour vexez et trauailez et mys a importables charges, et sur ceo pardoner et relesser a les ditz liges et a chescun de eux touz maneres des dismes et quinzismes et autres taxes ou taillages qeconqes grauntez a nostre seignur le Roy en cest present parlement par les loyes gentz et les ditz liges des ditz Countes, et les Collectours dycelles ent acquit et descharger en lescheqer nostre seignur le Roy par les causes preditz en oeuere de charite.

No endorsement 1415.

Page 161

SECTION IV

DURHAM

Trade

121

AP 4982

A nostre seignur le Roy priount Johan de Cotes et William de Cotes, Merchauntz de la ville de Duresme, qe come les auauntditz Johan et William amenerunt lour leyns a le Porte de

Page 162

Kyngiston' sour Hull' en lan du regne nostre seignur le Roy qore est primer, dount nostre dit seignur le Roy apromta de eux de chesqun sak' de layne vn Marc', et Robert de Burton' et Johan de Barton' furont a tiele houre Custoumers de la dite ville et resceuront les ditz deniers et ount rendu lour acompte en Lescheker et paie les deniers: Dount priont le dit Johan et William qil pount auer lettre de priue seal a Tresorer et as Barouns de Lescheker pur ensercher les Roules del acompte les ditz Robert et Johan, et ceo qe serra troue due audit Johan et William qe le Tresorer et Chaumberleyns del Escheker luy facent paiement ou couenable assignement de les ditz deniers, nient countresteaunt quecumqes mandementz ou ordenaunce faitz auaunt ces heures.

Endorsed: Soit mande as Tresorer et Barouns de lescheker qe ils veues les lettres dont la peticioun fait mencioun, sils troeffent qe la dette seit clere et vnqore due, adonqe facent paiement ou couenable assignement, Resceuiantz etc.

c. 1330.

Page 163

122

AP 7522

A nostre seignur le Roi et a son conseil prie Johan Belle de Hertilpole qe come nostre seignur le Roi li auoit assigne destre contrelour al port de Hertilpol [et co]manda as Tresorer et barons del Escheqer qils li feissent auoir gages acustumez, a queu mandement les ditz Tresorer et Barons respondu qils ne poent gages acustumez paier a li pur ce qe vnqes contrelour ne fust en cel port deuant le dit Johan, issint [qe ne] voillent rien paier si ses gages ne soient mys en certein; qe pleise a nostre dit seignur le Roi comander qil preigne tiels gages come ils allow[ent] les autres contreroulours de Noef Chastel, ou de Kyngeston', ou de seint Botulf ou aillors en autres portz ou autrement […] ce qil prenda pur ses ditz gages.

Endorsed: Soit mande as Tresorer et Barons del escheker qe en regarde a ce qe autres Contreroulours en autres portz pernent pur lour gages, facent paier au dit Johan ses gages pur le temps qil ad demore selonc lour descrecions.

c. 1332.

Page 164

123

AP 5767

[A nostre seignur le Roi et] a son conseil prient ses liges gentz de la ville de Hertilpole qe come le progenitours nostre seignur le Roi qore est, cest a sauer le Roi Johan et le Roy Henri son fitz, eont grantee as les ditz gentz de Hertilpole par lour Chartres qils seient frankes Burgeis e auoient meismes les fraunchises, leis et coustumes come les Burgeis de Noef Chaustel sure Tyne eont, et les ditz Burgeis de Noef Chaustel sont quittes de coustumes de tonneu, morage, pauage, pontage, passage, stallage, lastage, hidage, kayage, strandage, terrage, pikage, ankerrage et de toutz tielz coustumes par tout le Roialme Dengleterre, qe lour pleise auoir regarde a lour graunt destructioun et a lour graunt trauailes qils ont eu en la gere de ses progenitours et en sa gere demeigne, et en regerdon de toutz lour grantz trauails granter as ditz gentz de Hertilpole, lour heirs et lour successours qils puissent estre quittes des coustumes de tonneu, morage, pauage, pountage, passage, stallage, lastage, hidage, kayage, strandage, terrage, pikage, ankerage et de toutz tiels coustumes par toutz le Roialme a poer nostre dit seignur le Roi et par toutz les portes de Meer auxi bien deinz les Cynk' portes come aillours a toutz iours, de confermer les chartres les Rois susdites de la clause de licet.

Endorsed: Soit vewe ses chartres en Chauncellerie et si riens ne soit compris qe soit preiudiciel au Roi, soit conferme par resonable fin, et auxint soit vewe la chartre de la ville de Noef Chastel et si troue soit qe la chartre de Hertilpol' soit tiele come la peticion suppose adonqe eient declaracion de tonnue Murage et autres tieles custumes contenues en la chartre de Noef Chastel par resonable fyn.

temp Edward III (probably 1331 x 1365)

Page 165

124

AP 2149

A nostre seignur le Roi et a son conseil mustrent les Burgeys de Duresme, Derlyngton', Aukland', Gatesheued et Stocton' en la franchise de Duresme qe come ils sount francs Burgeys et de franc estat et nient taillables par le […] de […] vnqes taillez ne furent eux ne lour auncestres en nul temps le see pleni ne le see vacaunt mes de temps [le Roi. E. ael] nostre dit seignur le Roi, et puis encea par extorcioun des gardeinz des temporaltes, le see vacaunt, et ore e[ncea] […] apres Loys nadgares Euesqe de Dureme cele extorsioun fut continue sur eux et tailles a plus qu .Lx. li', les queux [deners] ils eunt paiez; par quei les ditz Burgeys prient au

Page 166

dit nostre seignur le Roi qe lui plest pur les ditz deners qils eunt paiez, issint qad este fait deuant ces houres encountre eux, mes ne soit tret en ensaumple.

Endorsed: Seit maunde as Tresorer et Barons par bref du grant seal de sercher les roules et remembrances del escheker touchantz ceste chose, qils certifient en Chancellerie de queu temps cels taillages comencerent et par quele cause et, quant ceste chose serra returne en Chancellerie, le Chanceller apellez a lui les Justices et autres du conseil, face ouir droit.

In a bad state post 1333.

Page 167

125

AP 1962

A nostre seignur le Roi et a son conseil prient ses Marchauntz Robert Cokside de Duresme et Robert de Gretewych' de Duresme qe come les ditz Robert et Robert en temps de pees entre nostre dit seignur le Roi et ceux de Flaundres eussent enuoiez en Flaundres par lour seruantz, William Cokside et Richarde de Lyndeseye, xxx. sarplers de leyne a marchander et faire ent lour profit, le Counte de Flaundres fist par ses Ministres sodeynement et sanz cause arester les corps des ditz seruantz et auxint les dites leynes pris de .ccc. li' et vncore les detient en arest a graunt enpouerissement des ditz Marchauntz. Et auxint par la ou les ditz seruantz les ditz Marchantz auoient acthate en les dites parties de Flaundres .xxviij. draps de colour pris de chescun drap .lxx. s. et vynt et cynk' draps de Raye pris de chescun drap' .iiij. Marcs, et Mille de Caneuace pris de .ix. li' et vne pipe despicerie et Mercerie pris de .xl. li', le dit Counte a la sute Simon Fauuale fesant suggestion au dit Counte qe nostre seignur le Roi feust tenu au dit Simon en vne summe dargent, fist arester les ditz draps, Caneuace, espicerie et Mercerie pris de .ccxiij. li' .xiij. s. .iiij. d. et vnqore les detient souz areste en anientissement de lour estat, dont ils prient pur dieu qe remedie lour soit fait.

Endorsed: Coram Rege et magno consilio

Soit mande a Leuesqe de Duresme par bref contenant leffect de ceste peticion qil face enquere auxibien par serment des marchantz come des autres si larest feust fait come la peticion suppose, et par queux et de qi poair ils sont, et queux biens et marchandies des ditz marchantz feurent arestuz, et de quele value et des autres articles et quant lenquest serra retourne et larest serra troue fait, et le passage de la Meer soit clos come il est aore, adonqes eient arest sur les piers et communers de ceux qi firent la dit arest, issint qe larest ne se estend' mie as biens et marchandies des marchantz demorantz en Engleterre ne qi ont fraunk' tenementz en Engleterre, et si le passage soit ouert quant lenquest serra retourne, adonqes soit mande a les seignurs de faire droit, et soit outre tenuz launcien cours.

Page 168

1337.

126

AP 2163

A nostre seignur le Roi et a son conseil mostrent ses poures Marchantz William de Duresme de Derlyngton et Johan son frere

Page 169

qe come ils en temps de pees entre nous et les gentz de Flaundres auoient amenez hors du roialme dengleterre .xix. sarplers et vn poket de leine a la vaillance de .ccxxxvij. li' a les dites parties de Flaundres pur marchander illoqes et ent faire lour profit, la vyndrent le Counte de Flaundres et ses Ministres illoeqes et aresterent les dites marchandises et ent firent lour volunte et vnqore les detenent a grant empouerissement de lour estat, de qoi ils prient remedie.

Endorsed: Coram Rege et magno consilio

Soient certeines genz assignez denquere auxibien par serement des marchantz come des autres si larest feut fait come la peticion suppose et a qi sute et par qi il feut fait et par quele cause, et quant lenquest serra retourne si troue soit qe la peticion contient verite, adonqes si le passage soit clos come il est aore, eient arest sur les piers et communers issi tote foiz qe larest ne se estend' mie as biens et marchandies des genz demorantz en Engleterre ne qe ont frank' tenement' en Engleterre, et si le passage soit ouert adonqes suent par launcien cours cea en arere vse.

1337.

Page 171

127

AP 12493

A nostre tresredote et tresgracieux seignur le Roy Supplie vostre humble Chapellein et oratour Johan Euesqe de duresme qe comme par vn estatuit qe feut fait en le temps du Roi Edward vostre aiel, qe dieux assoille, en son parlement tenuz a Euerwyk lan de son Regne noefisme, ordenez soit et establiz qe touz marchantz, aliens et denizeins, et tous autres de quel estat ou condicion qils soient qi achater ou vendre vuillent queconques marchandises ou autres choses vendables de queu part qils viegnent, par foreins ou par denizeins, a quel lieu qe ce soit Citee, burgh, ville, port de mier, feire, marchee, ou autre lieu deinz le Roiaume dedeinz franchise ou dehors, les puissent franchement et sanz destouber vendre a qi qe leur plest, et qe nul alien ne denizein ne soit destourbez qil ne puisse franchement achater les diz marchandises et autres choses vendables en les lieux susdiz et carier la ou li plerra a son oeps demesne ou au profit du Roi et des grantz et du poeple du dit Roiaume, nient contreesteant chartre de franchise a ascune Citee, burgh', ville, port de mier ou autre lieu deinz le dit Roiaume grantez au contraire, ne vsage, ne custume, ne Juggementz renduz sur leur chartres, vsages ou custumes qils purront allegger, sicomme en mesme lestatuit est contenuz plus a plein: et soit ensi qe la ou les predecessores du dit Euesqe soloient auoir grand profit annuel de leur charbons esteanz en leur soil deinz leur paiis appellez leueschee et franchise Roiale de duresme et nomeement par la deliuerance et passage qils en auoient par niefs et vesseux qe les venoient querre en leawe de Tyne, liquel profit estoit vne grande parcelle du profit de leglise et Eveschee de duresme, les gentz de la ville de Noefchastel sur Tyne pur leur singuler profit, encontre le purport de lestatuit auandit et en grand preiudice de la dite eglise et en grand grief et subtraccion du profit du dit suppliant, ont destourbez et destourbent mesme le suppliant et ceux qe ses ditz charbons volroient achater, en tiele manere qe le dit suppliant nen poet auoir ascune deliuerance ne profit sicomme il deuoit par vertue de lestatut auandit: et en especial la ou le dit suppliant par grant et confermement de voz nobles progenitures Rois dengleterre faitz a ses ditz predecessures doit auoir arriuail des niefs et autres vesseux de la partie du dit paiis appellez leueschee en leawe susdit, les dites genz de Noefchastel et leur Ministres

Page 172

destourbent qe nul vessel ne poet arriuer ne se charger des ditz charbons ne dautres choses de la dite partie du dit Eueschee en leawe auandite, et ne volont soeffrir le dit Euesqe a ce qil est garniz auoir nuls vesselx du sien propre en mesme leawe pur li seruir a la deliuerance de ses ditz charbons, et auxi les dites genz de Noefchastel, sanz grant ou auttorite Roiale, ont pur leur singuler profit mys et mettent greuouses imposicions et charges de deniers aprendre sur chescum chaldre de charboun qe sera chargez en la dite eawe, et mesmes les imposicions et charges ont demandez et demandent des charbons du dit Euesqe des genz qe les volroient auoir eskippez, la quele chose est auxi en grand preiudice et damage dudit suppliant et de leglise auandite: pur lesqueles causes le dit Euesqe nauoit onqes puis son temps ascun profit de ses charbons susditz: Il plese a vostre hautesse considerez les choses susdites puruoir sur ce de remede couenable pur le dit Euesqe et pur ses dites eglise et Eueschee, et par especial qil vous plese de vostre benignite Roiale granter au dit suppliant et a ses successures a touz Jours par vostre chartre pur pees et quiete de mesmes les eglise et Eueschee, et pur ouster perpetuelement la greuouse destourbance auandite, qe les marchanz et autres queconques amys de vostre Roiaume qe volront, puissent peisiblement et quietement ouesqe leur niefs et autres vesselx queconques arriuer sur la partie du dit paiie appellez leueschee et franchise Roiale de duresme en quel lieu qe leur plerra en la dite eawe de Tyne, et illeoqes charger et descharger charbons et autres merchandises et choses queconques qils y volront charger et descharger de mesme la partie, et les ditz charbons et autres choses queux ils ensi chargeront amener la ou leur plerra, sanz destourbance des dites genz de Noefchastel ne dautres queconques, et qe le dit Euesqe et ses successures puissent auoir leur vesselx propres en toute la dite eawe, queu part qe leur plerra pur eux seruir a la deliuerance de leur ditz charbons, et faire charger et enuoier leur ditz charbons queu part qe leur plerra, ou les vendre a les marchantz et autres qi achater les volront, et qe les ditz marchantz et autres les puissent eskipper et amesner la ou leur plerra, sanz ansune destourbance ou ascune imposicion ou autre charge queconque estre pris ou leuez de mesmes les charbons ou autres choses auandites par les gentz de la dite ville de Noefchastel ne par autre queconques nulle part en leawe auandite, queconque chartre, franchise, vsage, custume ou autre cause qe purra estre alleggez contre le purport

Page 173

du dit Estatuit nyent contreesteantz.

No endorsement. Slits for closure, but no trace of wax. 1383.

War Claims

128

AP 7419

A nostre seigneur le Roy Mustre Johan de Wessington' qe come la comunalte del Euesche de Duresme luy mist en hostage por [suretz] del dit Eueschie a sire Robert de Bruys por vne soume denar' dieue au dit sire Robert por suffraunce de guerre a certein Jour a paier, outre quel Jour il fust detenuz illoqes par deux aunz por ceo qe .xxxvj. Mars' furent vncore despayez, de quels deners

Page 174

il mesmes prest la paye por sa deliueraunce auoir. E des quels deners il ne peot vers la ditte comunalte remedie ne resone auoir, sour quei il pri au dit nostre seigneur le Roi de sa lettre al Euesqe ou a son leu tenant qe remedi e resone sur ceo a luy soit fait.

Endorsed: Mandatur Episcopo quod audita querela super contentis in peticione fieri faciat iusticiam Ita quod Rex non audiat amplius inde querelam. Irrotulatur

1317.

129

AP E360

A nostre seignour le Roi e soun counseil Moustre Johane qe fu la femme Johan de la Chaumbre qe par la ou nostre seignur le Roi auoit maunde a leueske de Durem qil feist auer a mesme cele Johane couenable sustenaunce solum son estat en la Maisone de Shireburne, pur ceo qe le dit Johan soun baroun fu occis en le seruice nostre seignour le Roi en defens du Chastel de Berewyk en la compaignie Roger de Horsleye, La ad Leueske respondu qe la Mesone est taunt charge qele ne puet illoqes estre serui: Par quei la dite Johane prie a nostre seignour le Roi qil de sa grace la voille granter vne partie des vitailles dont ele puet viuere, aprendre

Page 175

a Noefchastel sur Tyne, qar le poi qele auoit dont viuere ad ele despendu enfesant ceste suyte, par quei ele prie la grace le Roi.

Endorsed: Coram rege

c. 1318.

130

AP 5938

A nostre seignur le Roi et a son conseil moustre William de Kellawe de Thornlawe qe la ou nadgeres par commun assent del euesche de Dorrem il prist de les deniers William de Heberme en Dorrem .lxx. li' qe feuront paiez por la sauuete la dite euesche a sire Robert de Brus par commun assent de tut le pais: les queux deners le dit William de Heberme apres en la darayne vacacion del euesche auantdite recouera vers le dit William de Kellawe et

Page 176

ses damages a .c. s. deuant sire Robert de Sapy, sire Adam de Brom et Adam de Bowes adonqes Justices nostre seignur le Roi, deuant queux il feust commande ala prisone pur les ditz deners et vnqore demoer en prisone: par qei il prie a nostre seignur le Roi, desicome ceo fust fait de commun et por commun profit, qil voille mander al euesqe de Dorrem qil face leuer les deners auantditz de la communalte auantdite, issint qil soit acquite et qe il ne soit destruit pur son benfait et sen le meen temps son corps puisse estre par meynprise.

c. 1318.

Page 177

131

AP 2537

A nostre seignur le Roi priount ses liges gentz le Mair e la communalte de Hertilpoll' qe come sire Roberd de Brus ad graunte vne trewe a tout Leueschee de Duresme forpris la ville de Hertilpoll', quele il est en volunte arder e destruer pur vne neef qils pristerount en la Meer chargee de ses armeours e de ses vitales, par quoi les ditz Mair e la communalte ount enclos graunte partie de la ville e sont defesauntz le Muyre tancome lour poer purra suffir, qil pleise graunter a eux Cent marz qe duez lui sont

Page 178

de vitales achatez de son pier par vn Roberd' de Musgraue, dont le terme du paiement serra a la Pask' qe vendra a vn an.

Endorsed: fiat in auxilium operis murorum erased

1319.

Page 179

132

AP 6512

A nostre seignur le Roi moustre Rauf de Neuille qe com monsieur Robert de Neuille son frer fut tue par les enemys Descotz e sire Alexandre de Neuille e Johan de Neuille ses freres e il mesmes pris a mesme la iorne e ses deus freres detenuz tanqe il vrrunt grante ransone paye: E il mesmes est mys aransone de deus Mile mars, pur queus ses ostages demorunt tanqe les deners soent payez ou qe son corps seit reentre: Dount il pri a nostre seignur le Roy siluy pleise qil luy voille de sa grace eider deuers sa ransone de asqune garde, mariage ou autre chose de qei il pust deners prendre en eide de sa ransone. E qil voille doner le conge a sire Randolf' de Neuille son pier qi heir il est de feffer luy de son Maner de Houton' en Norffolk, qest tenue de nostre seignur le Roy, en eide de la ransone le dit Rauf' e de sa sustenaunce, car le dit sire Randolf est si enpouery par ransones qil ad paye pur ses fiz qil nad rien dount il pust eider le dit Rauf forqe a doner luy de sa tere.

Endorsed: Le Roi en voet auer auis.

Le Roi ad grantez le conge del feffement.

c. 1320.

133

Page 180

AP 2160

A nostre seignour le Roi e a son counseil moustrent ses Chapeleins le Priour e le Couent de Duresme qe comme il soient destrutz par la guerre descoce qe por grant temps ad dure, et par la suruenue des enemys descoce, qe souent les ount ars et destrutz, et por autres diuerses oppressions il ount suffert par resun de la guerre, e nomement par la drein venue des auantditz enemys descoce par acord et assent des ascuns enemys le dit nostre seignour le Roi Dengleterre en Engleterre, issi qe par la demoere des ditz enemys descoce del venderdi apres la seint Hillar' iusqes la samadie proschein deuant le Chaundelour les manoirs le dit Priour, ses viles, ses eglises, ses graunges e ses bleez arstrent e destruistrent, ses tenantz pristrent e esmeneient, ascuns tuerent, asquns mistrent por rauncoun, issi qe ceux qe sont demorez ne sont de poer a terre tenir, ses boefs, vasches, Berby, cheuaux de Harace e tut autre manere de moeble pristrent e emporterent et enchacerent, par quoi rien ne lour demora de quoi il pount viure, hospitaute tenir ou autres charges sustenir, dont il prient nostre seignour le Roi qe pur laffeccion qil ad deuers le gloriouse corps seint Cuthbert e leglise de Duresme e por les almes de ses auncestres, por oeure de charite e pur le bien de lui mesmes, qil voille ordeiner asqune eide e sustenance por eux dont il pount viure e la seruice dieu meintenir en mesme le lieu, tanqe deus par sa grace e le eide de lui y mette amendement.

Endorsed: Coram Rege Herl[aston]

1322.

Page 181

134

AP 13516

A nostre seignur le Roi prient ses poures gentz de Aukeland de si come il nauoient rien dont viuere pur plusurs destructions qil ount eu par les Escoces mes pristrent pur lour vie sauuer de ses vitailles qe furunt venduz a Noef Chastel sur Tyne a la mountaunce de .xix. li' .xij; s. e il nount riens dount leuer ceux deners, Mes prient a sa haut seignur quil enueille auoir regard a lour grauntz damages quil suffrirent e autre foitz prest serrunt a suffrir pur son honur, qil les vueille allouer en cele dete vne bille de .xxx. li' dues a ceux del temps qe sire Roger de Northburgh' fust son tresorer de sa garderobe e quil enpuissont auoir ses lettres as coillours de ses deners a Duresme qil enueillent prendre cele bille en allouaunce de la dette auantdite.

Endorsed: Le Rey veut estre payr de la vente et payera ses dettes

Page 182

quant il verra etc. videtur consilio quod est faciendum si placeat Regi set tamen coram Rege.

c. 1323.

135

AP 15562

A nostre [seignur le Roy prien]t ces pouers Chapeleyns Priour et Couent de Hextildesham qi sount destrutz par la guer descoce qil les voille granter d […] com en eyde de lour sustenaunce, pur lamour de deu et les almes ces Auncestres, la tere qe luy est escheu en la ville de Silkesword' par la mort monsz Thomas iadis Count de Lancastre a tenir de nostre seignur le Roy enrendaunt a son escheker la Rente assise, en quele ville ces dits [Chap]eleyns tyndrent de dist Thomas partye des teres en almones.

Endorsed: Coram rege

c. 1323.

Page 183

136

AP 3778

A nostre seignur le Roi pri Gilbert de Toutheby que pur les grantz pertes qil ad eu par resoun de les Escoc[es] de totes ses terres qil ad en Leuesche de Duresme, qil luy plese de sa grace perdoner luy .lxvij. li' .x. s. queux il luy deit pur la garde de le terre et del heir Robert de Bauent, la quele il achata de nostre seignur le Roi son pere que dieux absoille.

Endorsed: Il semble al counseyl qe ceo est almoyne a faire sil plest al Roi. Il plest au Roi et pur ceo eyt pardoun.

1327.

137

AP 2237

A nostre seignur le Roi et a son conseil moustre Roger de Esshe qe come nostre dit seignur le Roi fut en leuesche de Duresme

Page 184

a Stanhope la vyndrent les gentz le Roi a force a Esshe et les bleez le dit Roger et ses preez a la value de qaraunt liures sierent, faucherent et emporterent, et trent et deux gros bestes et quatre vyntz et ouyt motouns de luy et de ses gentz pristerent et enchacerent sanz paiement faire: dount le dit Roger prie a nostre dit seignur le Roi qe il voille de sa grace faire enquere la verite et faire a luy ascun regarde de sa grant perde auantdit, desicome il ad souent este en temps passe ars et destrut par les enemys Descoce.

Endorsed: Soient certeines gentz assignez denquere la manere de cest fait et lenqueste ent returne en Chauncellerie soit fait droit.

1327.

138

AP 2159

A treshonurable piere en dieu Leuesqe de Wyncestre Chaunceler Dengleterre prient le Priour et le Couent de Duresme qe come ils aueient des vitailes du Roi qi mort est, piere nostre seignur le Roi qore est, a la mountant de .CCC. li' des queux ils vnt

Page 185

pae les .CC., et la maison de Duresme est destruyt par les enemis Descoce comme de lour terres de Northumbr', et Lesueschee et de Escoce, et est souent chargee pur venuz des Rois; qe vous, sire, por dieu et pur lamour de seynt Cuthbert voillez faire le bref et mettre vostre bone eide deuers nostre dit seignur le Roi qe les dites .C. li' seient relessez sicome qeles est fait as tous autres Abbayes et Priouries de Northumbr'. Et, sire, tote la force de nostre sustenance fust en le dit Contee de Northumbr'.

Endorsed: Y semble au conseil sil plese au Roi, pur ceo qe les ditz Priour et Couent ount suffert et pris grantz malz par les Enemis et le Roi ad fait pardoun au tutz autres de pais, qe le Roi pardonir a eaux les dites cent liures come est demande en la peticion.

1333.

139

AP 5312

A nostre seignour le Roi et son conseil moustrent ses pours Chapeleyns le Prior et Couent de Duresme qe par la eu le grant partie de leur sustenance si est es parties de North' sur lez Marche Descoce, dont le greyndre partie est destruyt par enemys Descoce,

Page 186

et vn lour selle appelle Coldyngham et Coldynghamshire, dedeinz les Marche susditz de la value de .Mille. marcz par an, de quele ils et lours predecessours de tout temps sibien en temps de guerre come en temps de Pees ount este seises peisiblement come de dreit de lour eglise de seint Cuthbert de Duresme et come parcelle del Roialme Dengleterre, de quele selle les ditz Priour et Couent sont oustez par Robert Stuward' gardeyn du Roialme Descoce qe se dit le Roi Descoce et ocupie par le Count de Marche Descoce en desheritesoun nostre seignour le Roi et sa corone et distruccion del Meson les ditz Priour et Couent de Duresme: Pur qei pleise a nostre tresexcellent seignour le Roi et son tresnoble conseil en oeure de charite et pur lamour le gloriousse confessour seinte Cuthbert de Duresme ent ordeigner remedie, et ore de nouelle, com les ditz Priour et couent ount entenduz, a le instance Descocez le seint Pier lappostelle ad puruieu vn Cardinale a mesme le selle, ad quele auxint les ditz Priour et couent Priount remedie.

Endorsed: Soient les sieurs qi serront apres Nowel a le grant iour de la Marche chargez de ent treter diligeaument pur le reparement auoir par due manere des ditz attemptatz.

1346-57.

Page 187

Clerical

140

AP 3695

A nostre seignur le Roy moustre Johan de Sneynton' que com Richard iadys Euesque de Durrem ly auoit en sa vie done la eglise de Whitebern' que adonque fust voide par le resignement sire William de Ayremynne et le dit Johan feust en peisible possession

Page 188

de cele eglise viuaunt le dit Euesque, Nichol de Welleburn' apres fist entendaunt au dit nostre seignur le Roy que la eglise feust voide apres la mort le dit Euesque, par quele suggestion noun verraie il auoit presentement de nostre seignur le Roy a cele eglise e par colur de cel presentement est le dit Johan ouste de cele eglise a tort, e de ceo se est pleynt en la Court Cristien countre le dit Nichol sicom appent a la conissaunce de saynte eglise en tiel cas, en quele busoigne le dit Nichol ad faus Instrumentz publiz, e les ad vse en Iugement e ia du meyns, par suggestion qil fait a nostre seignur le Roi que cele busoigne touche son droit, porte lettres de nostre seignur le Roy sur sa targe as Juges e autres du conseil le dit Johan countre ly pur le dit Nichol de requeste et maundement: Issint que le dit Johan est delaie en le sute noun duement par tieles lettres: par quoi il prie a nostre seignur le Roi qil voille maunder as ditz Juges e autres qe lentente nostre seignur le Roy nest pas qe par encheison de ses requestes ne maundementz eux ne lessent de faire droit al dit Johan sur la dite busoigne, sicom appent a seynte eglise. E de ceste chose pleise a nostre seignur le Roy denquerre la verite de sire William de Ayremynne, car il le siet bien.

1317.

Page 189

141

AP 3072

A nostre seignur le Roi et a son conseil moustre son chapelyn dan Hugh' de Mohaut, Mestre del Hospital de Kypier pres de Durem de la collacion Leuesque de Durem et seisi fust tout son temps, qe Symond de Eycot de son menage atort vient le dymange en la eueille de touz seynz lan du regne nostre seignur le Roi qe dieu gard disme al dit Hospital de Kypier disant sei auoir collacion de nostre seignur le Roi del dit Hospital, en supposant le Hospital estre voide ou il est pleyn et councilie del dit dan Hugh', et lui emeta del Hospital susdit a force et les biens de la eyntz gaste et destrut atort, dount il pri a nostre seignur le Roi grace qil puisse estre restitut a sa possessioun desicome il fust sanz agarde et iugement oste.

Page 190

Endorsed: Habeat breue de Cancellaria de venire faciendo Clericum Regis coram ipso Rege ad certum diem et ibi fiat partibus Justicia. Irrotulatur

1316 x 1320.

142

AP 12008

A nostre seignour le Roy prient ses Chapeleyns le Priour et le Couent de Duresme qe li voille de sa grace, pur lamour de dieu et de seint Cuthbert, confermer les faitz de soun Peer et de sez Auncestres et des Euesqes de Duresme, pur saluacioun de sa Eglise de Duresme et honour del Corps seint, qe molt ad este honure de lui et de sez Auncestres.

No endorsement 1319.

Page 191

143

AP 12967

Au nostre seignur le Roi et son conseil prie son cler Robert de Warthecoppe, persone de la eglise de Wessyngton', qe come sa dite eglise soit charge de diuerses empensions et dune porcion qe amontent a .xxij. marcs apropers a diuers mesons de Religion en leueschee de Duresme, et mesme leglise ensemblement ouesqe celle empensions et portion sont taxez a. .xxij. li' et .x. s., et tout soit ceo qe la dite persone soit prest de paier la disme grantee au nostre seignur le Roi si auant come a sa por[cion] auient de la dite taxe, outre la somme des porcion et empensions susdites lui ont uieyns, les Coilliours des dismes en le dit Eueschee en fauour des dits Religiouses ont leue de dit Robert la disme de tote la taxe susdite issint qe la ou le dit Robert ne nest tenuz de paier qe .xxij. marcs des empensions et porcion susdites quele sont rentes espritiels si auant come la dite eglise, de ceo lui ont desditz Coillours charge de paier outre sa porcion de leglise, cest assauoir la disme pur mesme les porcion et empensions qe amontent a .ij. marcz .ij. s. viij. d. en chescune disme grantee al Rei et auxi des autres imposicions par le pape ou a trouer despenses des Cardinals, nemye eiant regard as greuouse charges de denairs dont leglise est annuelment charge. Pleise al dit nostre seignur et son bone counseil comander brief as ditz Coilliours qe les parnours des empensions et porcion susditz soient chargez chescun solonc sa porcion de paer dismes al Roi, qe de celles dismes allouance soit fait al dit Robert de ceo qils leue de lui outre la Rate de la taxe auantdit.

Page 192

Endorsed: Eit bref as Tresorer et Barons de lescheqer qils facent venir deuant eux les ditz religiouses a certein iour a moustrer sils sacheit riens dire pur quei ils ne deuient estre chargez de la disme, chescun solonc les pensions et porcions qils pernent de la dite eglise et illoqes d […] les resons dune partie et dautre outre soit fait droit et reson a la dite persone.

1353 x 1366.

Page 193

144

AP 3524

A nostre seignur le Roi et a son consail moustre Alein de Schutlyngdon' clerk, nadgaire gardein del hospital de Schirburn deinz leueschee de Duresme, qe com il eust et tignt le dit hospital de lung' temps del doun leuesqe de Duresme qore est et ia vn bref de quare impedit estoit porte sur lui a la suit nostre dit seignur le Roi de mesme lospital, supposant le dit hospital estre voide en le temps Richard de Bury nadgairs Euesqe de Duresme apres la mort Thomas de Hessewell' adonqes meistre du dit Hospital et ensi voide demurrir tanqe les temporaltes deuindrent en les meins nostre dit seignur le Roi apres la mort le dit Richard de Bury; la ou en le temps le dit Richard de Bury le dit Hospital estoit done a meistre Thomas de Neuille immediat apres la mort le dit Thomas de Hessewell' par mestre Johan de Why[t]chirch, viker general le dit Euesqe Richard, eiant de lui plein poair et general de donir toutz les benefices et hospitals de son patronage (lui esteant en le message nostre seignur le Roi es parties de delai a Andewerp), et puis par le dit Euesqe Richard le dit Hospital grauntez et confermez au dit meistre Thomas, par

Page 194

qeux doune et confermement le dit meistre Thomas tigne le dit Hospital ans et iours en le temps le dit Richard de Bury et sesze ans en le temps leuesqe qore est, toutefoitz continuant sa possession tanqe sa mort, issint qe le dit Hospital en nulle maner purroit estre voide apres la mort du dit Richard, esteantz les temporaltes en les meins nostre dit seignur le Roi, ne par tielle cause ne par autre cause, colour ou droit purroit acrestre a nostre seignur le Roi auantdit de donir le dit Hospital; et ia tarde par vertu dun Nisi prius pris deuant les Justices nostre seignur le Roi a Neofchastiell' par gentz loingteins de pluis foreins lieus del Countee de Northumbr' et de gentz de petit valu n[i]ent eiantz terres suffisantz Chiualer ne seriant, de valu leinz et ascuns nulle terre eiant', ne vnqes somons par viscont ne iour auoient mes sudungnement mene a la ville lendemain [apres] la iour del Nisi prius a houre de prime par sire Alein de Heton et autres aduersairs du dit Alein de Shutlyngdon' et par lour deuys enpanellez et mesme le panel ensemblement od le brief adonqes et venuz deuant liuerez au dit viscont, come le dit Alein est et touz iours serra prest de moustrer a nostre dit seignur le Roi et a son consail auandit par toutz les voies qe a son dit seignur plerra et a son sage consail ordeigner; et sur ceo pur verdit de tiels gentz procurez et nient eiantz ne auoir voillantz conissaunce de consideracion du droit de dit Alein coment qil lour moustra son droit deuant les Justices nostre seignur le Roi par les euidences dessuisdits, les qeux il est vnqore prest a moustrer, ne vnqes ne sauoient verdit donire mes qe lospital fust voide come ils estoient enfourmez par les aduersairs du dit Alain, iuggement est rendu encontre lui et le dit Alein mis hors de son hospital auandit, encontre dreite et bone conscience; qe plese a nostre tresexcellent seignur le Roi et a son consail pur lamour de dieu et en oeure de charite ordeiner qe le dit Alein poesse auoir remedie en celle partie et descoueir son droit et de ceo fair discussion solonc ceo qe bone conscience et dreit demandent, nientcontreestant les proces et le iuggement en la fourme suisdit sur ceo renduz; dissicome nulle ne poet auoir remedie par voie datteint la ou nostre dit seignur le Roi est partie sanz especial conge de lui et en cas qe plerroit a nostre dit seignur le Roi de sa grace, fair venir deuant mesmes les Justices, viscont, et southviscont et autres ministres nostre seignur le Roi qe furent presente au [jour] du dit enqueste pres destre iurez examinez sur la verite de choses suis

Page 195

ditz, sit autre ent grantir, qe le dit Alein purra auoir latteint a passer par chiualers et meuth auuez de celles parties, car a autre qe a sa tresgracious seignurie et a son consail ne poet home compleint ne pursuit de son droit aiugez.

No endorsement 1362 x 1366. AP 7949 is an alternative version, with the endorsement:

Soit le Roi pleinement enfourme de ceste matire et sur ce dit sa volunte

Page 196

145

AP 5336

A lour redote seignur nostre seignur le Roy et son grant consaille prient ses Chapelleyns Priour et Couent de Duresme qe come nostre dit seignur de sa grace especiale dona congie as cez ditz Chapeleins dapropriere a eux et lours successours la eglise de Hemmyngburgh, supportanz grand' gargez espiritels pur le dit congie pur nostre dit seignur le Roi, cez heirs et cez progenitours pur la dite esglise qant ele serra aproprie duement, en recompensacon de quel grant ses dit chapeleins relesseront a nostre dit seignur .xl. li.' annuele del subsidie des leins a Berwyk sur Twede grante a eux par le Roi Edward laiel et comferme par nostre dit seignur le Roy qorest perpetuelment a durere. E coment qe nostre dit seignur le Roy souent par ces lettres ad supplie a nostre seint Piere le pape pur lapropriacoun de la dite esglise et qe cez ditz chapeleins, as greuouse mises et costages, eient mys lour diligence en celle partie ils ne poent ascunment aue[nire] a la dite apropriacoun mes sont respondu autrement qe iammes ne le aueront. Pur quei plese en oeure de charite auoir regard a la bene feie et conscience et comander qe la dite patent de la custome de .xl. li' soit renouelle et afferme adurere en le primer course qils le auoient deuant la dite relesse, eiant regard qe entre la dite relesse faite a dit seignur ils donerent congie daproprier la esglise de Simondburn' a la chapell de Windesore a la request nostre dit seignur le Roy. Et auxint qe la celle de Coldyngham en la terre Descoce leur est tollet de quel celle ils soleit reporter grant profit, issint qe de toutez pars ils sont grantement anientz et si par vostre graciouse seignurie eus poent estre releuez.

No endorsement ?1376-77.

Page 197

AP 5315 is virtually identical except for the reference to the late King Edward the King's grandfather. This is endorsed:

Soient veues les endentures de couenantz ent faitz et autres euidences, si nulles y soient parentre le ditz Roy et Priour et Couent, et sur ce nostre seignur le Roi par auys de son conseil y ferra reson chescune part.

Page 198

146

AP 5024

A nostre tresdoute et tresgraciouse seignur le Roi et a son sage conseille Moustre Thomas del Chaumbre et autres ses compaignons fermers a vn Cardinall' de lesglise de Bysshop' Warmouth deinz leueschie de Duresme, et par vn an passe furent fermers de la esglise suisdit de le lesse vn Raymond' Pelegryn procuratour de dit Cardinall' pur certeins termes deuz queux vnqore duront, qe com vne peticion soit mys sus en cest present parlement qe nulle liege home nostre dit seignur le Roi ne serra seruant, procuratour ou fermour as Cardinalx ou autres aliens de lour benefices en cest Roialme sur peine de vie et de membre et forfaiture de lour biens, quele peticion sil fuisse generalment grante serreit tresgrande perde et damage a dit Thomas et a ses compaignons fermers de lesglise suisdite de lour dismes a prendre de cest an et de lour blez semez et meynoeur faitz en les terres le dit personage, et a plusours autres de Roialme esteant en mesme le plite, et auxint touz tieux fermers susditz serront escomengez et perdrent grantz somes en queux ils sont liez al Chaumbre le Pape si eux ne paierent lour ferme sibien de temps qe eux ne pernerent my les profitz des ditz esglises com de temps qe eux occupierent et pristerent profitz, qe plese a nostre dit seignur le

Page 199

Roi et a son conseille pur dieu et en oeure de charite de Veier et regarder as damages et meschiefs susditz, dordeigner qe forsprys soit fait des fermours des esglises des ditz aliens lessez a ferme deuant cest present parlement ou autrement ordeigner qe les ditz fermers puissent occupier les ditz esglises pur cest an tanqe eux eient pleinement leuie lours profit de lour esglises susditz, puisqe eux couient de necessite pleinement estre chargez de paier les fermes de cest an auantdit.

No endorsement ?1378.

Page 200

147

AP 11088

le Roy ad graunter ceste bille par lauyz de chaunceleri.

Mountagu

A nostre tresredote seignur le Roy moustre laurence de Allerthorp' Mestre de lospital seynt Esmon de Gatesheued qe come il tient le dit Hospital del la collacion lonorable pier en dieu Johan Euesqe de Duresme, patron del dit Hospital, a quel Hospital apent institucioun et induccion del Ordinar', et nostre dit seignur le Roy ad porte vn quare impedit del dit Hospital deuers le dit Euesqe et Mestre Adam Fenrother nadgaires Mestre del dit Hospital, sur quel brief nostre dit seignur le Roy et les ditz Euesqe et Adam sount a issue de pais come pleinement poet apparer par le plee ent pendant deuant les Justices del comune Bank', et ore vn Richard de leuesham, a qi nostre dit seignur le Roy ad done le dit Hospital pendant le dit issue vnqore nient trie, ad nonduement enfourme nostre dit seignur le Roi qe le dit Richard est duement adhept paissible possession du dit Hospital par vertu de la collacion auantdit, et qe ascuns safforcent de luy oster induement de sa dite possession, la ou le dit Richard nauoit vnqes possession par institucion et induccion del dit Hospital sicome le ley demand'; par vertu de quelle suggestion nostre dit seignur le Roi par ses lettres patentz de son grant seal a Notingham le quint iour Daugst lan de soun regne septisme ad assignez Thomas de Claxton', quest cosyn le dit Richard, et William Emeldon ou lun deux de maintenir le dit Richard et ses procuratours en possession del dit Hospital, par colour de quelle comission les ditz Thomas et William sount [en] purpes douster le dit laurence de sa dite possession del Hospital auantdit; qe pleast nostre dit seignur le Roy de granter vn supersedeas direct' as ditz Thomas et William de surseer del execution del dit comission issint encontre ley et resone grante, consideres qe le plee est vnqore ent pendant en la Court de Roy.

No written endorsement but a cruciform trace of red wax 1383.

Page 201

148

AP 9151

le Roy ad grante scire facias et apres la dite commission qe droit soit fait

A le tresexcellent tresredoute et tresgraciouse seignure seyngur le Roy Supplie vostre humble lige Thomas Cothom', prebender de la Prebende quele Johan Kyngeston' nadgaires quant il vesquis auoit en leglise de seint Cuthbert de derlyngton', qe come par colour dune vostre collacion fait de la dite Prebende a vn Robert Dalton' Clerc qi null' droit ad a ycelle le dit Thomas soit enquiete et destourbez de la possession quelle il ad en mesme sa prebende, et soit auxint par celle cause nonduement vexez et desesz en vos Courtz, contre tout droit et iustice: Plese a vostre

Page 202

roial maijeste commander vostre Chanceller qil face venir par vostre brief de Scire facias le dit Robert en vostre Chancellerie pur moustrer le title quel il le pretende dauoir en la dite prebende, et sil ne sceit moustrer qe vous auiez cler droit de la doner mesme la Prebende, adonqes vostre dit Chanceller face casser et reuoquer voz lettres patentes au dit Robert enfaites, seoffrant et grantant au dit Thomas depursuir en qeconqe Court Christiene ou seculer qil verra estre affaire pur peisible possession auoir en sa Prebende susdite, sicome reson est, en oeuere de charite.

1389.

Page 203

149

AP 12497

A nostre tresgracious et tresexcellent seignur le Roy, Supplie humblement son poure orator Johan Kyllome Clerc' qe come le dit Johan auoit vn prouision de la Pape Vrban darein qe dieux assoile […] la collacion et auowre leueqe de Duresme qe pur le temps serroit, cest assauoir de benefice cure de taxe de vynt et cynk marcs et benefice nient cure de taxe de dys et oyt marcs, la y ad vn porcion en leglise parochiele de Norton' deinz la diocese le dit Euesqe qest benifice nient cure et de taxe de noef marcs tantsoulement et qest du patronage du dit Euesqe come de droit de sa eglise seint Cutberd' de Duresme, et a quele porcion Johan de Fordame nadgaires Euesqe de Duresme fist collacioun a Robert de Scampston' et lui fist institucion et induccion en ycell' estre mys en corporele possession, la quele porcion voida par la mort le dit Robert long' temps deuant le vynt et noefisme iour de Januer lan de vostre regne treszisme, le quel Johan kyllome par force de sa dite prouision susdit accepta la dite porcioun et par executours de ses bulles en ycell' fuist mys en corporele possession et ce long temps deuant le dit vynt et neofisme iour et celle possession continua tanqe vn William Ryall' Clerc, fesant suggestioun nient veritable a vostre roiale mageste vous auoir droit a doner la dite porcion, et sur ce auoit collacioun du dit porcion de vostre Haut seignurie par voz lettres patentes, par force de quell' collacion le dit William est par le reuerent piere en dieu leuesqe du Duresme a dite porcion accepte et institut et induit et mys en corporele possession et vostre dit poure oratour Johan Killome du dite porcion ouste en perpetuel aririsement de son estat: Qe pleise a vostre hautesse et roiale mageste de commander vostre tresreuerent Chanceller de faire venir le dit William en vostre Chancellerie pur moustrer et declarer illoeqes vostre title a doner la dite porcion et outre qe vostre Chanceller face droit et reson a le dit poure suppliant en ceste cas, non

Page 204

obstantz les admission, institucion et induction susditz, pur dieu et en oeure de charitee.

No endorsement 1391.

150

AP 12491

A tresexcellent et tresredoute seignur le Roy Supplie humblement vostre poure liege Johan Herle Clerk qe come il auoit prouision del pape Vrbane darrein a vn prebende en lesglise colligiall' de nostre Dame en Cestre en le strete deinz le Fraunchise de duresme parentre les ewes appelle Tyne et Tese, en le quel Esglise est vn prebende appelle le prebende de lameslay le quel

Page 205

est del patronage del Euesqe de duresme et la quel prebende Johan Fordam iadys Euesqe de duresme dona a Robert Scampston' Clerc' et luy instituer et inducter et en corporele possession dycelle fist metter, la quel prebende par la mort de dit Robert fust voide par long' temps deuant le vynt et noefisme iour de Januer' lan de vostre reigne treszisme: et le dit Johan Herle par vertue de sa prouision suisdit mesme le prebende accepta et par executours de cez bulles fuist mys en corporele possessioun dycelle par long' temps deuaunt le dit vynt et noefisme iour de Januar' et mesme la possessioun continua pesablement et quitement tanqe il ent fuist ouste par colour de vostre collacioun fait a vn Thomas de Westm[inster] Clerc' par voz lettres patent a sa mayns verra suggestion deuant a vous a entendre qe le dit prebende fuist void et de vostre collacion, ou ele ne fuist pas, a grant damage de dit suppliant; qe pleise a vostre tresexcellent et tresreall' mageste graunt' voz brief de scire facias hors de vostre Chauncellarie de fayre garnir le dit Thomas destre deuant vous et vostre Chauncellar' de moustrere pur quoy voz lettres patentz a luy faitez del dit prebende ne serront my repellez et anullez et le dit suppliant al dit prebende restitut, pur dieux et en oeure de charite.

No endorsement 1393/4.

151

AP 12390

Plaise a nostre souerein seignur le Roy granter a vostre treshumble oratour Johan Stafford, parsone de leglise de saint Nicholas en la Citee de Duresme, ratificacion de sa dite eglise pour dieu et en oeure de charite.

No endorsement 1407.

Page 206

Financial

152

AP 8737

Le Priour e le Couent de Dureme mercient a nostre seignur le Roi de touz biens faitz e especialment de grant peyne qil en ad mys a mettre leglise de Dureme en bon estat, e font assauer a luy qe le Euesqe de Dureme ad fet sa visitacion en si bone

Page 207

manere qil ad la dieu merci en la meson de Dureme vnyte, charite, amones e hospitalite.

E pur ceo qil troua en sa visitacion qe les biens de la meson sont aloignez grantment hors de soen poer, si prie le Priour et le Couent auantdit nostre s[eignur le] Roy qil ly pleyse maunder vn brief au visconte de Euerwyk et vn autre au visconte de Northumberland' qil facent les biens apurtenant as meson de Dureme en lurs baillies trouez alauantdite meson estre restorez.

E pur ceo qe ascune gent vnt dit qe le Euesqe de Dureme auoit aproprie a luy des biens de la meson, dient il fraunchement qe ceste chose ne contint nule verite, eyns en ad il mys grantment du soen e mettra enqe la meson soit releuee.

E prient vncore qe les Moynes de la meson qe se courent par la court le Roys soient comandez qil viegnent a lur meson e a lur obedience, e prest serront eaux e tut le Couent ala volonte le Roys, qant il les vodra comander.

No endorsement ?1301.

Page 208

153

AP 417

A nostre seignur le Rey e a son Counsail Moustre Richard Priour de Dureme e le Couent qe par la ou nostre seignur le Rey fraunchement par sa Chartre graunta as ditz Priour e le Couent de la vaunt dite Mesoun de Dureme .xl. lj. dargent, a receiuer de an en an al Escheker de Berwyk' a deus termes del an, ceo est a sauoir a la feste de seint Martin en yver la vne Moite, e a la Pentecost' prochein suant lautre Moite sicum contenutz est en sa Chartre, pur distribucione fere a .vj. Milles poueres en les deus festes de seint Cutbert par an: Cest a sauoyr en la principale feste a treis Milles e al translacione a autres treis Milles, e a cheskun de poueres .i. d. E estre ceo pur pitaunce au Couent de la vauntdite Mesoun, en cheskun des iours de seint Cutbert auauntditz .l. s. E pur soustenir .iiij. sierges entour le fiertre del vauntdit Cors seint, dount chescun des deus serra de .xx. li. de cire, e les autres deux de auenaunte Mesure, sicum la Chartre voet: E pur trouer vn Chaplein chauntaunt cheskun iour del an en lauauntdite Eglise de Dureme en vn lu qil apelent la Galyleie: E a soustenir ileoskes oueoskes cele Chaunterie deux sierges auenaunces. Des qeux auauntditz .xl. li. le Priour e le Couent de la vauntdite Mesoun de Dureme furent seisi par la lyuere sir Hugh' de Cressingham e par la lettre le Rey, lan de son Regne .xxiiij. e puis ceu temps ieskes enca le Priour e le Couent auauntditz ount Meintenuz lauauntdit aumoigne entierement de an en an solome ceo qe la Chartre voet, e nul alowaunce nount en-puis lan qe le doun sei fist ieskes aea, dount il prient a nostre seignur le Rey les arrerrages e qe il voille si pleysir luy seit comaunder a son tresorer de Eschoce qe la paie seit fete de an en an en tens auenir, issi qe lauauntdit aumoyngne peusse estre Meintenuz, solome le purport de la Chartre.

Page 209

Endorsed: Duresme Coram Rege

Mandetur Camerario Scocie quod soluat de exitibus Scocie eis et illis de Beuerlaco similiter arreragia et decetero annuatim secundum Tenorem Cartarum.

?1305.

154

AP 2123

A nostre seignur le Roi mustrent le priour e le Couent de Doream qe la ou nostre seignur le Roi qi ore est par sa chartre graunta .xl. li' a prendre par an de sa escheker de Berewick' tant cum il les aueit purueu aillors tere ou benefice de seint Eglise a la vaillaunce de .xl. li' pur certain asmoun fair, cum contenu est en sa chartre, les quels .xl. li' les sunt souent detenutz par quei il sunt mult perdant et traueilletz, einceo qil poent les deners auoir e si funt il lasmoun qe enioint les est qe amountz a les .xl. li'; dunt il prient nostre seignur le Roi qil les voille graunter alcun certein chose en tere ou en benefice de seint eglise en lieu couenable pres de la Marche ou il les puissent prestement auoir.

Endorsed: Mandetur per breue de Cancellaria Custodi et Camerario Scocie quod inquirant vbi Rex melius possit prouidere eisdem de petitis et tantum Canonicis Ecclesie de Beuerlaco et super hoc certificent Regem in a different hand. Irrotulatur

c. 1305.

Page 210

155

AP 7807

A nostre seignur le Roi et a son counseill' moustre Robert de Barton' qe come il fust assigne resceuur par commissioun nostre seignur le Roi des issues de la Temporaulte del Eueschee de Duresme vacaunte par la mort Antoyn de Bek, de prendre a tant pur ses despens pur la demoere qil froit en cel office come pristerount les resceuurs le dit Antoyn en soen temps. Et ia soit y ceo qe en fauour de Richard de Kellawe, eslit de cele eueschee apres la morte le dit Antoyn, pur diuers resouns le Roi liuera graciousement et hastiuement la dite Temporaulte al dit eslit' et maunda a sire Henri de Percy qui mort est, adonqe gardein de mesme leueschee, et a lauantdit Robert qeuls liuerassent al dit eslit la Temporaulte auantdite, issint totes voies qe les issues appendauntz al Roi de la dite voidance fuissent pleinement leuez a soen oeps, a quel temps il furent arere plus de .M. li' des dites issues, entoure le leuer de quels issues le dit Robert demurra vn demi an outre le iour de la liuere de la dite Temporaulte, nepurkant le Tresorer et les barouns del esckeker ne volent allouer al dit Robert ses despens forsqe al iour de la deliueraunce de la dite

Page 211

Temporaulte al dit eslit': Par quei le dit Robert prie qe ses despens ly soient allouez taunt de temps come il demurra entoure le leuer des dites issues, sicom euls purrount trouer par bone tesmoignaunce ou par autre resonable demoustrance qil demurre taunt de temps besoignablement: Eauntz regarde sil lour plest qil ad estee taunte foitz arz et destruz par les enemis, qe a poy rene ly demure forsqe la terre nue.

Endorsed: Soit mande bref as Tresorer et Barons del Escheqer qe se enforment par enqueste ou en autre manere combien il demorra par necessite entour les issues del Euesche leuer apres la liuere fait al Euesqe de la Temporaulte et pur tant de temps li facent due allouance.

1316.

Page 212

156

AP 107

A nostre seignur le Roi et a son conseil Prient le Prior de Durrem et le Couent qe come Eustace de Vescy iadis seignur de Swynhow en le Contee de Northumbr' granta a dieu et a nostre dame et a seynt Cuthbert et a les Moynes del yle de Farneland cynk quarters de furment chescun an pur tous iours par sa chartre a prendre de son Maner de Swynhow, et Williame de Vescy fitz et heyr le dit Eustace et Johan de Vescy fitz et heyr le dit Williame ceo confermerent sicome il pert par chartres des queux les transescritz sont atachez a ceste peticion, et des queux cyn quarters le Prior de Durrem et le Couent et lur predecessores ount este seisi pus la confeccion des dites chartres tanqe a la Mort sir Henri de Percy, qe du maner de Swynhow morust seysi, apres qi mort par le nounage le heyr le dit sir Henri le Maner de Swynhow fust seysi en la meyne nostre seignur le Roi et le dit furment southtret, dount il priont remedie.

1316. AP 108 is the transcript of the charters, minus witnesses and dates. The original charters are printed in J. Raine, North Durham [1852], App. pp. 122-3.

Page 213

157

AP 4095

A nostre seignur le Roi prie le Clerge del Euesche de Durem qe come cel pays souente fiez eit este destrut par la venue des enemis Descoce e de ceo feit mout enpouery, par que altre foiz en diuers aeides que lui furent grantez de lour Benefices le dit nostre seignur le Roi fit taxer de nouel par son Breef meismes ceux Benefices e solonc le Tax ensi fet de nouel i fit leuer les eides, e ore eit le Pape grante al dit nostre seignur le Roi la dime du Clerge Dengleterre en aeide de lui, qil pleise al dit nostre seignur le Roi par charite auer regard a lour pouerte e meschiefs qil ount e lungement vnt eu, e comander a leuer de eux ceste dime solonc le dit drener Tax qe fut fait par son comaundement, qar dautre ne poont il vncore estre chargez, pur ceo que lour estat nest de riens vncore releue, et plusors benefices sont taxez a grant value des quex homme ne peut rien prendre pur la grant destruction qe ad este fete sur eux.

Endorsed: Le Roy ad graunte a ceste foiz qe la disme soit done solom la nouele taxacion, sauue son dreit autrefoiz.

Deleted: Vocentur Thesaurarius et Barones de Scaccario et fiat per eorum consilium

1319.

Page 214

158

AP 2150A

A nostre seignur le Roi et a son conseil prie le Priour de

Page 215

Duresme qe come sire William de Fellying, iadis Cones[table vostre] Chastel de Rokesburgh', pur ganesture de mesme le Chastell' taunt come le dit Chastell' fust en la mei[ne le Roi] .E. pere nostre seignur le Roi qore est, achata du Priour de Duresme predecessour le priour qore est les dismes de […] ham pur tresze liures .vj. s. viij. d. les queux sount vnqor dues au dite, come pert par vn bille del Chaumberleyn [Deschoce] qe au ceux temps fust de ceo en fait, par quoy le dit Priour prie a nostre seignur le Roi qe les ditz Tresze liures .vj. s. .viij. d. puissount estre alouwes en dettes qil doit doit a nostre seignur le Roi pur vitailles qil achata de dit nostre seignur le Roi et de son pere en son graunt meschefs.

Estre ceo le ditte Priour de Duresme prie a nostre [seignur le] Roi et a son counseil qe come le Roi .E. ael nostre seignur le [Roi.E.] qore est graunta au Priour de Duresme, predecessour le Priour qore est, vne Annuelle rent de qarant liures a re[ceiuer de an] en an de sa Escheker de Berwik sur Twede a la fest de Pentecost' et de seint Martyn en yuer par [egales] porciouns pur fair certein aumoigne pur lui e ces heires, sicom plus pleinement apert par la chartre le ditte Roi .E. [lauauntdit] le transescrit de quele est cusu a cest peticion, de quele rent arer est au dit Priour deux cenz [et vynt liures du] temps qe la ditte ville fust en la meine le Roi .E. pere nostre seignur le Roi qore est, come apert par un bille du Chaumberleyn deschoce qe au ceux temps fust, et en quele temps le Priour e le Couent feiscent le ditt aumoigne et […] fount graunt partie, par quey le dit Priour prie a nostre seignur le Roi qe lui plese a lower partie de les ditz deux cens et vynt liures en dettes qil doit a nostre seignur le Roi pur vitailles qil achata de son piere et pur […] et du remenaunt qil puisse auoir paiment ou couenable assignement, et qil pleise a nostre seignur le Roi ordeine aschun porcioun dount cest aumoigne poer estre meintenus, ou dunke lui descharger de i cele.

Estre ceo le dit Priour de Duresme prie a nostre seignur le Roi et a son counseil qe come par meschef' e destruction de Guer qauoit este en Counte de Northumberland, ordene fust en parlement qe nulle bref de Cessauit dust Curz ne lieu tener des areragez en coruz ne de cesser feat en temps de Guer, e le ditte Priour soit tenuz au Priour de [Kirk]ham en vne annuete de quatre Marce par an pur certein disme denz la paroch' de Edlyngham en le ditte Counte, de quele annuete graunt arrerages sount en coruz en temps de guer pur ceo qe le ditte Priour illoqes vnke disme ne nulle profist de sa

Page 216

Eglise poat auoir, les queux arrerages le ditte Priour de Kirkham demande vers le ditte Priour de Duresme par bref dannuite deuant les Justices de Baunk', par quoy le dit Priour de Duresme prie a nostre seignur le Roi qe lui plest comaunder bref a Justices du baunk' qil ne soit charge des arerages en curuz en temps de guer en queux il nulles dismes iloqes restent, pur queles Dismes ladite annuite fust graunte come pleinement apert par lescritte qe le ditte Priour de Kirkham ad de la ditte annuite.

Endorsed: Quant au primer point et auxi quant au second' en droit des billes, qil ad come il dist: *soit mande as Tresorer, Barons et Chaumberleins del escheqir qe vewes les billes, sil troessent qe la dette soit vncore due, qil lur facent auer allouance en dettes qil deit au Roi, Resceiuantz etc

Quant au second' point, en droit de recompensacion qil demande pur la Chanterie: *se auise ou il purra auoir ascun benefice de seinte eglise a la value de .xl. li' et certifie le Roi.

Quant au tierz point–nichil

*Written in different ink post 1328. AP 2150B is the enclosure mentioned, being a slightly mutilated copy of

Page 217

Edward I's donation of £40 for candles and a dole in honour of St. Cuthbert, dated 16 September 1296 at Yarmouth.

159

AP 2169

A nostre seignur le Roi et a son consail prient les gentz de la franchise de Duresme et de Norham qils pount auoir bref as Tresorer et Barons del escheker sur le pardon feat par nostre dit seignur le Roi a les gentz du Conte de Northumbreland des dettes qils […] a nostre seignur le Roi por les vitaile et par autre enchesons auxi com autres gentz de mesme le Counte ount, de puis qe les dites franchises sount deinz mesme le Conte.

Endorsed: Coram Rege et magno consilio

Eient bref auxi come les autres genz du dit Countee du dit pardoun pur coi qe Leuesche et la dite franchise sont deinz le corps du dit Countee et parcele de mesme le Countee cancelled

Pur ce qe ceste grace est faite a les gentz de Northumb' le conseil ne ose mie estendre la grace faite as genz de Northumbr' a les genz del euesche sanz auiser le Roi.

1332-4.

Page 218

160

AP 2156

A nostre seignur le Roi et a son conseil moustrent ces pouers chapeleins le Priour et le Couent de Duresme que come ils achateront des vitailles le Roi .E. pere nostre seignur le Roi et auxint de nostre seignur le Roi qore [est] pur lour sustenance ala montanz de quatre Centz liures, de quele soume sire Robert de Notingham par mandement nostre seignur le Roi leua deux taunqe a Cent liures, et ore nostre seignur le Roi de sa bone grace ad pardone ales gentz del Conte de Northumberland' deinz quel Counte sa Priory et ces terres sont, et mesqe le dit Priour ad sui brief as Tresorer et barons de lescheker nostre seignur le Roi de lui descharger de ceo que due est par lui des ditz vitailles, les ditz Tresorer et barons ne lui volont descharger pur ceo qe sa priory est deinz la franchise de Duresme; par que le dit priour prie a nostre seignur le Roi que lui pleisse auoir regarde ales granz perdz qil ad eu par la guere et ad de iour en autre, et ore est destruit de sa meson de Coldingham et les moynes illoqes soleint estre toux sount venuz a Duresme, et comander brief si lui plest de lui descharger qar tote la franchise de Duresme est deinz le Counte de Norhumberland.

Endorsed: Coram Rege et magno consilio

Pur ce qe ceste grace est faite a les genz de Northumbr', le Conseil ne ose mie estendre la grace faite as genz de Northumbr' a les genz del euesche sanz auiser le Roi.

1332-33.

Page 219

161

AP 2214

A nostre seignur le Roi et a son conseil moustre Nichol de Ellerker qe come nostre seignur le Roi, piere nostre seignur le Roi qore est, feust tenuz au dit Nichol et a Johan son frere qi mort est, qi executour il est, en .CC. mars, les queux il apresterent au dit Roi et des queux le dit Roi lour fist ses lettres obligatories de son priue seal, et sur ceo le dit Nichol suyst par peticion en drein parlement, ou feust agarde qil eust bref as Tresorer, Barons et Chaumberleins de Lescheker de faire a lui paiement ou assignement, et par vertue de quel bref il feust assigne au priour de Doresme, Coillour des deneres pur vitails venduz par le dit Roi le piere, et sur ceo taile leue et bref mande au dit Priour, et le dit Nichol livera sus la dite lettre obligatorie en Lescheker; et ore le dit Nichol ne poet auoir nul paiement du dit Priour par reson de vn autre assignement que est fait a sire Robert de Wodehous et auxint par vn assignement fait a William de Denum, et outre les queux deux assignementz le dit

Page 220

Priour ne poet leuer nul dener auxi come il dist, par quoi le dit Nichol prie pur dieu et pur lalme le dit Roi le piere qil poet estre aillours assigne, qar sil ne soit eide de cest dette il est touz iours mis a meschef'.

Endorsed: Soit mande par bref de Chauncellerie as Tresorer, Barons et Chaumberleins del escheqer qe vewe la taille qil ad, sil troessent qe autres sont assignez au dit Priour, issint qe le dit Nichol ne poet la estre serui, qe adonqes il soit aillours assigne ou il purra prestement estre serui, Receiuantz sa taille. Irrotulatur

post 1332.

Page 221

162

AP 5217

A nostre tresredote seignour le Roi et a son tresnoble conseil moustre Thomas Euesqe de Duresme qe com le dit Euesqe apresta a nostre seignur le Roi vostre aiel qe dieu assoille pur grosses et chargaunces busoignes du diz aiel qatre Milles Marcs en temps qe leuesqe Dexcestre et mousieur Richard lescrop' estoient tresorers au dit aiel, de quele summe le dit Euesqe de Duresme auoit dusze tailles de les ditz Tresorers, pur le paiement des queles il pursuyt longement mes il ne poet riens auoir, sur qoi Alice Perers qe fust demoraunt deuers le dit aiel com de sa meyne vigne au dit Euesqe de Duresme a soun Manoir a Charrynge en le Counte de Middelsex le Mois Doctobr' lan du reigne dudit aiel .xlix.^me ou il pria la dit Alice de lui eider qil serroit paie de les auantditz qatre Milles marcz et ele lui promist a ceo faire, sur qoi le dit Euesqe deliuera touz les ditz tailles a la dite Alice et par la ou ele estoit dettes a nostre dit seignur le Roi laiel de grande somme de deniers ele pursuyt en la receite du dit aiel et liuera illoeqes deux de ditz tailles computantz la summe de qatre .M. Marcz en noun de dit Euesqe sanz garrant ou auctorite de lui, la ou il nestoit en propre persoun ne par actourne, pur quel liuere des tailles ele auoit alowance de Mille marcz de soun dette propre quel ele deuoit au dit aiel ou en deniers receuz de sa tresorie, en deceite de la court nostre seignur le Roi et a grant damage du dit Euesqe et delaye del remenant de soun paiement. Plese a vostre treshaute seignourie de faire venir mousieur William de Windesore chiualer et la dite Alice ore sa femme deuant vous et defaire remedie au dit Euesqe de Duresme de la matiere auantdite.

No endorsement 1377 x 1381.

Page 223

Legal

163

AP 13709

A nostre seignour le Roi mustre Johan le fiz Johan de Maidenestan qe la ou il porta sun bref de mortdauncestre deuant sire William de Ormesby e sire Henr' de Guldeford', nad gueres Justice nostre seignour le Roi en la vesche de Durem, de la mort Johan son pere e apres feust la parole resumouns deuant sire William de Bereford' et sire Roger de Heygham Justice nostre seignour le Roi en mesme leueschee vers Antoun Eueske de Durem de les deus parties del Maner de Thorpthewles e vers Auelyn, qe fust la femme Robert de Thorp, de la tierce partie de mesme le Maner, a la quele Auelyn ledit Eueske garauntist en Court e respundist de lentier e dist qe le dit Johan fust bastard, et sur ceo fust maunde al Erceueske de Cauntirbirs qil certifia le Roi del estat le dit Johan et le dit Erceueske certefiast quil fust muliere e nient bastard, dunt sire Roger Brabanzon maunda le record' et le processe a sire Henr' de Guldeford' et a ses compaignons, Justices nostre seignour le Roi en le veschee de Duream, par commission hors de la Chauncelerie qil examinassent le record et feissent dreit a les parties, en la quele commission fust contenuz qe le viscont' de Northumbr' fust entendaunt a les ditz Justices a office de viscont' faire en le processe auantdite; e apres ceo nostre seignour le Roi defendist de buche qe le viscont de Northumbr' ne entrast'

Page 224

leueschee de Doream a nule manere de office faire, par quoi les ditz Justices ne auent poer de aler auant en le dit processe saunz autre commission qe le viscont' de Doream fust entendaunt a office de vescont' faire en le dit processe: dunt le dit Johan prie a nostre seignour le Roy qil voille graunter bref' a son Chaunceler de Doream qil face comission a les Justices nostre seignour le Roy en la dite Eueschee qil examinent les ditz recorde et processe et qil facent droit a les parties solonc le recorde et le processe a eux primes maundees, e qe le viscont de Doream a ceo soit entendant', solom la volente nostre seignour le Roy qe le dit Johan ne soit desherite, qe le dit Eueske e son consail vnt mene les soers le dit Johan de qi mort le bref est porte, qe vnt porte bref de mort dauncestre vers le dit Eueske de meme les tenemenz de la mort le dit Johan lour frere, pere cesti Johan, deuant les Justices en le veschee de Durem; dunt il prie a nostre seignour le Roy, desicom la Court est a certe qil est fiz le dit Johan e muliere, quil voille maunder a ses Justices en la dite Eueschee qe par la sute des Auntes le dit Johan Maliciusement e en sa desheritaunce compasse, qil ne soit delaie de son droit e qe les dites Justices enquergent de la conspiracie e la collusioun auantdites.

Endorsed: Mandetur Justiciariis quod ipsi procedant in Loquela iuxta formam prime commissionis sue eis inde directe.

1306.

164

AP 9633B

A nostre seyngnur le Rey e soun Conseyle Moustre Rauf le fiz

Page 225

William qe la ou Antoyn Eweske de Duremme Luy dona vn Mes' et deus carues de tere o Les aportenaunz en La vyle de Langeton, qe fut vne Eschete del chastel Bernand, le quel Mes est seysy en la mayne nostre Seyngur le Rey: Dount le dit Rauf' prye la grace nostre seyngur le Roy qe il pusse le auauntdit Mes o Les apurtenaunces tenir sauer si luy plest.

Endorsed: Ostendat cartam Episcopi Dunelmensis.

1306-7.

165

AP 7972

A nostre seigneur le Roi et a son consail moustre Thomas Surtays qe par la ou Robert de Middilton', qe mort est, tint le Maneir de West Wyk' du fie du chastiel Bernard, quest en la Mayn nostre seigneur le Roi par raison du nonage le filz et heir le Conte de Warwyk': Et mesme celui Robert tint autres terres en la vile de Middilton' souz tees de lauantdit Thomas par seruice de Cheualier, Les queux terres sont de aisne feffement qe nest le dit Manoir de Westwyk': Si a monsieur Henry le filz Hue, gardein dudit chastiel depar nostre seigneur le Roi, fait prendre Robert filz et heir le dit Robert qe est dedaunz age, enclamant auoir la guarde du dit corps le dit enfaunt pur la cause dessusdite en desheriteson du dit Thomas: Par quoi il prie a nostre seigneur le Roi qe il li plaise faire enquerre

Page 226

de la priorite du feffement des dites terres et commander qe droit li en soit fait, de sicomme il est contenuz en la grant chartre des fraunchises, qe le Roi en tiel cas nul autre auantage naura qe nauroit le Conte sil fuest en vie.

1318 x 1329.

166

AP 7191

A nostre seignur le Roi e a son conseil moustre Emme qe fust la

Page 227

femme Alayn de Tesdale qe come monsz Johan de Bailol iadis seignur du Chastel Bernard en Leuesche de Duresme dona par sa chartre au dit Alayn e a ses heirs dis liuere de rente en la ville de Lange Neuton' qest apendant au dit Chastel, de la quele rente le dit Alayn fust seisi en son demeyn come de fee par le doun auantdit, le quel Chastel oue le honour est ore en la mayn nostre dit seignur le Roi par le nounage le fuiz e heir le Counte de Warrewyk' vers qui ele ne poet auoir son bref de dowair, dount ele prie remedi.

1326 x 1329.

167

AP 7333

A nostre seignur le Roi et a son conseil mustre Mayheu le Fiuz William fiuz Robert de Wolferton' qe come il et ses compaignons

Page 228

eussent nadgeres charge vne neef de Selande a Lenne de leynes et autres biens a la value de .D. li' a passer a seryce en Selande pur marchaunder de les ditz biens, la vynt Johan Arthur de Hertelpol et plusours autres de meismes la ville de Hertelpol et la dite Nef a Croumere en Norff' assaillerent et totes les gentz qe leynz furent sauue vn soul homme enchacerent et la dite nef oue touz les biens auantditz tanqe a Hertelpol menerunt et illuqes encore les detienent, dont les ditz Mayheu et ses compaignons sont souent puis venuz au dit Johan et les autres gentz de la dite ville qe vnt les ditz biens en la manere recettes et prie restitucion de lour biens auantditz, et il nule manere de restitucion ne de droit vers eux ne poent auoir pur la franchise del Euesche de Dureme: par quoi il prie pur lamur de dieu grace qe remedie et lei lour soit fait.

No endorsement 1326.

168

AP 10872

A nostre seignur le Roi et son conseil moustre Elizabeth' de Umframuille Countesse de Anegos qe com nadgairs nostre dit

Page 229

seignur le Roi ly [granta] par sa lettre patente .l. li' par an a resceiure des issues des villes de Langeneuton' et Neusem sur These, qe sount al [honour] du Chastel Bernard', a sa volentz en eide de sa sustenance et ia soit ceo qe la dite Elizabeth' ad sui par brefs et autre manere as Conestables du dit Chastel por le dit argent auoir selonc le grant auantdit, ia dumeins ele ne poet nul dener auoir ces quatre aunz en grant arerissement de son estate, par quei ele prie a nostre seignur le Roi e son conseil pur dieu qil voillent auoir pite […] qe ele ne resceut nul profit de ses terres en Engleterre ne en escoce ces […] auns, mes contriours ad vesqui a […] , et comander qele soit paie de ceo qe arere lui est et ele rendra a nostre seignur le Roi la profit […] [q]e le ad du grant auandit.

Bauuill' different hand

Endorsed: Coram Rege Por ceo qe les […] es grauntes par les Roi […] pare sewe deuers nostre seignur le Roi qe ore est.

1327.

Page 230

169

AP 588

A nostre seignur le Roi et a son consail Moustrent les gentz de la franchise de Duresme qe come nostre seignur le Roi, les temporalte de la dite euesche pur la mort lowys nadgairs euesqe de Duresme en la mein nostre dit seignur le Roi esteauns, fist somoundre son eyr a Duresme par bref de sa Chancellerie [direct a] gardein de la dite franchise et de la somouns de Cink' simeins et fist somoundre par mesme le bref les gentz del counte de Norham et [del counte de Sadbergh de]stre a Duresme a iour del eyr assis, par la ou nul eyr fu sumounis en le counte de Northumbr' dedenz quel counte [la franchise est, la quele chose] a ceo qe semble a les dites gentz fu feat encountre la ley de la tere et encountre la franchise auauntdit, qar la s[omouns del eyr par ley deit] comprendre le temps de sis simeins, et la somouns par ley deit estre feat par viscount; estre ceo les gentz des countes de [Norham et] de Sadbergh ne soleint en nul temps a nul eyr issir les ditz countes. Estre ceo le Roi ne leuesqe le see pleine unkes en nul temps auaunt illokes eir […] si leur ad eprimes ne fu comence en le counte de Northumbr', pur queles mechef et disheritanz de la eglise eschuer les ditz gentz fesount Raunceoun de Mile Marz a nostre seignur le Roi, qar le counsail qe fu pres du Roi adonk' a les resounz auantdit ne a les […] meschiefs qe les dites gentz auoient soefert par la guere

Page 231

nauoient regard. Par quei les dites gentz prieunt a nostre seignur le Roi qe luy pleise auoir [regard a les] resounz auauntdites, et as meschefs qils ount soefertz par la guere et a les grantz raunceouns qils ount paier les gentz descoce [qe amountent] a pluis qe vint Mile liures, et ala franchise de quel ses progenitours ount este mult tendre, et qe luy pleise pur les […] nt pur eschuer la disheritanz de la eglise grantes plus […] qe pur nul autre resoun grantere qils puissent estre aydes par le […] de Northumbr' deinz quel counte la dite franchise est, de totes Manere des dettes et des vitailes et de […] et de ceo ses lettres desouz son grant seal granter solunc ceo qil ad feat as autres gentz [e qe lui] pleise granter par ses lettres a leuesqe qore est qe mes eyr ne soit illoke tenuz si el ny soit primes [comence en le counte] de Northumbr', ne auterement qe les progenitours nostre dit seignur le Roi et les predecessours leuesqe lount vse de totes iours.

Endorsed: Coram Rege et magno consilio

Eient respit tanqe a la feste de seint Michel prochein auenir qe le Roi endemettres purra faire ce qil par son bon conseil verra qe soit a faire.

1333-34.

Page 232

170

AP 3509

A nostre seignur le Roi et a son conseil moustre Richard de Sayton' qe come nostre seignur le Roi lui granta brief al Euesqe de Duresme qil lui deust fere droit et remedie des tenementz donez a son pier et sa Miere en fee taille, les queux tenementz Conan de Ask' lui deforcea, et le dit Euesqe granta au dit Richard vne brief de forme de doun des tenementz auanditz deuant ces Justices, par vertu de quel brief auandit come il fust tenuz par reson par la est le dit tenaunt venuz en la chauncelrie nostre seignur le Roi et ad fait sa sugestion qe tieles pleez ne doient estre pledez mes deuant les Justices erranz en mesme la franchise, par la ou le dit brief est ordeine par estatutz de Westminster seconde, le quel estatut fut fait puis le drein Eir tenuz en celes parties: par reson de quel brief les Justice le dit Euesqe ont sursiz daler auant en le dit plee en

Page 233

desheritance le dit Richard' et en countre la lei de la terre: par quei le dit Richard prie a nostre seignur le Roi et a son conseil qe lour pleise auoir regarde a ceo qe des tenementz donez en fee taille homme auoit remedie a la commone lei par bref de droit et par brief de Mordauncestre, les queux briefs ount este pledables denz la dit franchise de tote temps et les queux briefs […] collettes par estatut; qe lur pleise comander par son brief au dit Euesqe daler auant en le dit plee, qar outrement est desherite par lestatut qe fust fait pur les gentz enheriter et noun pas disheriter.

Endorsed: Coram Rege et magno consilio

La peticion de la commune est respondu en ce cas, qe ont prie qe le Roi voille de sa grace granter al Euesqe qil peusse pleder tieux brefs, issint supposent il qe tieux brefs ne poessent estre pledez en leuesche aore.

?1334.

Page 234

171

AP 3693

A nostre seignur le Roy et a son conseil pri Auneys que feust la femme Alain de Slikburn que come son baron et lui feurrent iount feffez en vne terre en la ville de Corneford' en la franchise del Eueschie de Duresme et son baron en pleine vie aliena mesme la terre em fee, en quele franchise Leuesque ne doit granter bref de cui in vita, bref de entre, ne bref de forme de doun, par quei la dite Auneys est desherite: que lui plise de sa grace commander au dit Euesque qil face auer droit a la dite Auneys par que ele puisse receuerir la dite terre, de puis le bref le Roy ne Court pas en la dit Franchise.

Endorsed: soit maunde a leuesque brefe qil luy face dreit solom les vsages de celes parties

?1334.

172

AP 10278

Au counseille nostre seignur le Roi moustre Joun de Crossegate Chapeleyn qe come deinz la fraunchise de Leuesche de Duresme du temps dount il ny aed memore taunqe en cea nul bref' leuesqe ne ses predecessours original de fraunc tenement ne soleit istre de la Chauncelrie leuesqe ne ses predecessours, ne deinz la dite fraunchise deuaunt les Justices Leuesqe ne ses predecesseurs estre plede, fors seulement bref de droit, bref de dower et assises de mort dauncestre et de nouele disseisine, et de totes autres brefs originales leuesqe et ses predecessours tut temps ount este saunz power et de

Page 235

ceaux power salue a nostre seignur le Roi en temps de vacacion et en Eyre, La aed William le fitz Johan Hunter tret en plee le dit Joun par bref Leuesqe de ael de les deux parties dun Mies, vn Molyn et vne Carue de terre oue les apurtenaunces en Aldyngrigge deinz la fraunchise auauntdite deuaunt les Justices Leuesqe de Dureme qore est, encountre la Coroune et la dignete nostre seignur le Roi et les vsages auaunt nomez, dount il pri remedie et le supersedeas a Leuesqe et a ses Justices.

Endorsed: Soit sur ceste peticion fait brief tiel come ad este fait auant ses heures en semblable cas.

post 1334.

173

AP 15515

[A nostre seignur le Roi] et a son bon conseil prie Marmeduke Basset qe come Wauter de Wessyngton' dona le Manoir de Offerton' oue les appurtenaunces [qe sont deinz la fran]chise de Duresme a Marmeduke Basset, son ael qi eir il est, et les heirs qil engendra du corps Isabel la fiele le dit Wauter […] Marmeduke deuya de ceo seisi, apres son mort entra William Basset come fitz et heir, le quel William aliena le [dit Manoir et] […] [fa]ire diuerses descordes par la forme de doun auantdit au dit Marmeduke, qi ore se pleint come a fuiz et heir […] [le dit] Marmeduke est couent […] le Euesqe de Duresme et lui ad prie qil lui grant ad vne bref' de forme

Page 236

du doun, la […] desheritaunce le dit Marmeduke dont il prie remedie.

Endorsed: Soit mande al euesqe par bref de la chauncellerie comparnaunt la suggestion contenue en cele peticion, qil fait droit a Marmeduke.

c. 1330 x 1340.

Page 237

174

AP 6408

A nostre seignur le Roi et a son counseil moustre Rauf de Neuille qe com Thomas le fitz Robert de Rokeby, Willeam Scop' de Cotheliston et Johan de Lythum demoraunz en le Counte de Euerwyk' vyndrount taunt' au park le dit Rauf a Raby deyns la fraunchise de Duresme et le dit park abruserunt et ses bestes sauuages leyns trouez chaserunt et pristrent, de quele trespas il les enpleda en la court le dit Euesqe deuaunt ses Justices a Duresme qe a ceo la furent deputez, et taunt sui qils sont utlaiges illoeqs a sa sute, et autre recouerir ne poet il auoir illeoqs par reison qe les ditz meffesours nont terres ne tenementz deinz le dit Eueschee, sour quoi il prie remedie different hand..

Endorsed: Soit mande al Euesqe de Duresme par bref du grant seal qil mande le record' et proces tochantz ceste bosoigne en Chancellerie et quant le record' vendra en Chancellerie, soit bref mande de prendre les corps de ceux qe sont vtlagez par le dit record' as viscontes des Countez ou ils sont demorantz.

1337.

Page 238

175

AP 2165

A nostre seignur le Roi e a son conseil moustront les gentz de la franchise de Duresme e de Norhamshire qe come Leuesqe de Duresme qe pur le temps sera ad e auer doit denz ces franchises de Duresme e de Norham franchise reale e ces briefs icoront, e droit par ces briefs est tenu a [fair a] toux yceux de mesme la franchise qe pleindre se vodrent, e en son Eire doit pleder chescun manere de brief, e toux ces predecessours tote temps ent fait; e en aunciene temps les Eires vers ceux parties soleint estre tenuz si souerment qe hors de Eire en cele franchise nule homme mester auoit ne ne voleit pleder par briefs dentre ne deschet nautre briefs communes des terres et tenementz dedeinz la dite franchise pur les grand delaie qil auoient hors deire e pur le hastiue remedie qils auoient en Eire; mes les Eires vers ceux parties ne sont pas este tenuz de grant temps, dont plusours gentz sont desherites pur toux iours e plusours en point destre desherites forsqe remedie en soit ordeine; e par la ou les gentz de les dites franchises venont a la Chauncelerie ledit Euesqe e priont briefs dentre e dascun autre briefs qe sont ordeinz par estatut' puis le dreyn Eire tenuz en celes franchise, le dit Euesqe ne les veot pas granter les ditz briefs pur ceo qe les briefs nont pas este pledez en la dit franchise hors de Eire, par quoi les ditz gentz prient a nostre seignur le Roi e a son conseil puis qil est tenuz a fair droit a toux iceux deinz son realme auxi bien deinz franchise come de hors e son brief ne […] pas […] qil diegne en comandement au dit Euesqe de faire droit deinz sa franchise al people par qequner brief qe lour besoigne auoient […] se, issint qe droit ne faile pas illoeqes e pluys qalours deinz le roialme.

Page 239

Endorsed: Coram Rege et magno consilio

Ceste requeste touche change de ley et ne purreit estre fait si noun a la requeste Leuesqe de Doresme e la comunalte del Euesche e par assent du Roi e des prelatz, Countes e Barons e autres grantz de la terre e ce en parlement si riens deust estre fait; par que riens ne poet estre fait a ore.

post 1345.

176

AP 1935

A nostre seignur le Roi et a son conseil moustre William de Claxton' Cheualer qe come il ad sui par grant temps vn brief de fourme doun vers vn Johan de Drileton' en la Court leuesqe de Duresme, en quel brief il ad este deslaie enuiron quatre ans ou pluis par diuerses fauces deslaies et coniectementz ymaginez par le dit Johan, et ore par processe contenue le plee est mys a issue a trier le droit le dit William par enqueste, la ad le dit Johan, par fauce suggestion allegeant qil estoit en alant oue le Duc de Clarence en sa veiage, sui vn protection nostre seignur le Roi par cause de deslaier le dit William de son droit recouerir a grant damage et desheritison

Page 240

de lui, et si est le dit Johan remys et demurant deinz le Roialme Dengleterre et ne mie en la compaignie le dit Duc' ne vnqes estoit seruant de pees ne de guere a lui ne a nulle autre seignurage deuant celle protection a lui grante ne vnqores est, a ceo qe le dit William entende: Par qoi le dit William prie as ditz son seignur le Roi et a son conseil qe lour pleise repeller la dite protection et ordeiner par bone auisement ore en ceste conseil qe tieux protections ne soient grantez desore en auant en deslaie et desheritison de lui et en sa suite.

Endorsed: sue brief' de deceite pur ses damages recouerir sil voille, et sil voille defaire la protection le Roi sue en la Chancellerie de certifier le Roi sil soit demurant en Engleterre et ne mie a aler outre meer, quelle certificacion eue soet la protection repeller.

1364 x 1368.

Page 241

Prerogative

177

AP 8950

A nostre seignor le Roy Moustre Richard Priour de dureame e sen pleynt qe par la ou plusors desbat firent entre Antoyn Eueske de dureme dun part e lauantdist Priour e soen Couent dautre, e puys de ceo pleinement par acord dun part e dautre se asseinarent en forme de pees en la presence nostre seignor le Rey qe de la pees se

Page 242

entremist la soweinertye dount issint par nostre seignor le Re fust entre eaus assentuz e par eaus acorde qe totes les greuances deuant lauauntdist ordonement alauantdist priour fetes par launantdist Eueske serroient repelees e qe lestat le priour e des soens en totes choses fust sauue e entiere e nient enblemy par reson de nul desbat auantdist, sur ceo lauantdist Eueske nuls des greuances auantdistes, qe plusors sont e deuerses sicom piert en vne roule qe de ceo fait est prest a nostre seignor le Rey a sa voluntez a moustrer, ne aad repelee mes de Jour en Jour autres greuances aad multipliez, les queus aussint sont en Roule prest a nostre seignor le Rey a moustrer, e sour ceo par le commandement nostre seignor le Rey breef' est porteez deuant ses cheefs Justices soen leu tenantz, le queu breef' aad este pendaunt deuant eaus ia demy an, mes par fauses retours du vescomt de Northombrelond lauantdist seute est delaeez: par quoy lauantdist Priour prye a nostre seignor le Roy de sa grace si ly plest qe il voile les auantdistes greuances faites veer, aussi bien aprees lordainment come deuant nomement cumme il sunt ausi feces encontre sa ordenance e en despit de nostre seignur le Rey, comme [lelection de Henry de Lu]ceby priour inserted without indication of position e qe dreiture ly soit faite deuant le Roy meismes si ly plest en soen parlement: Care si nostre seignor le Rey ne mette la mayn de ly eider il ne poet lauantdist seute escheuir, pur ceo qe endroit de breef' qe venent al Eueske les queus il dust en la court le Roys retourner il ne les voet pur le mandement le Rey retourner, e endroit des breefs qe venent au vescomte de Northumbrelond', lauantdist vescomte ne se deigne nen ose en forme de lay a nul breef' respondre ne lealment les[?] les retorner, si com bien piert par les responses qe il aad donez. E prye a nostre seignor le Rey de sa pees e de sa protection pur ly e pur ses gentz tant qe cestes outrages faites a ly e a soens par nostre seignor le Rey soient terminetz.

Endorsed: fiat protectio Ricardo etc, non nominando se priorem, duratura per biennium. Et quo ad Transgressionem, habeat diem coram Rege.

March 1301.

Page 243

178

AP 9095

A nostre seignur le Roi mustre le Priour de Dureme qe des damages qe la furent agardez et iugeez deuant sire William de Ormesby et sire Henry de Gildeford tant come la franchise de Duresme fu en la meyn le Roi, les ministres leueqe ne volent leuer ne nule execucion faire, dount le dit Priour prie remedie.

Idem mustre meisme le Priour qe ses bestes et autre biens de la meison de Dureme esloignez par Daun Henry de Lusceby qe se fist priour par intrusion, sont detenuz en Chastel de Norham par les gardeyns de meisme le lieu, et ha le Priour suy au […] visconte par gage et plegge solum la Ley, et est respoundu qe le baillif le Roi ne poet entrer saunz especial garant du Roi, dount le dit Priour prie remede qe la deliuerance de ses biens li soit faite solum la Ley.

No endorsement 1303-4.

Page 244

179

AP E770

A nostre seignur le Rey e a son conseil Moustre la Communaute del Euesche de Durem entre Tyne e Teise qi par la ou eus se pleynterent a [le] […] darreyn parlement a la Rose des greuaunces e de deserit aunces a eus fetes par les Ministres le Eueske de Durem, des queus le Eueske [souent] fuist arisone qe il les redresscast e il poynt ne le vout fere, parunt en defaute de ly Nostre seignur le Rey graunta a la requeste de meime la communaute [vn br]ef al Eueske E ly Maunda qe il feist redresser les greuaunces e les deseritaunces a eus fetes: Issynt qe il ne huyst mester de metter [la main, e le] dist Eueske pur ceo bref' a ly liuere ren ne fist, ne des articles des greuaunces a eus feces e a ly liuerez pleynement respoundis[t] qe […] re fereit: Eynz, puys ceo Maundement a eus pluis a greuaunce ad fet qe deuaunt: Dount eus prient a nostre seignur le Rey qe en defaute del dist Eueske les greuaunces e deseritaunces a eus fetes en la fraunchyse auauntdiste si ly pleyse voyl redresser par le ordeynement de ly e de son Conseyl.

Endorsed: Rex non potest respondere Communitati de re non certa, set si aliquis de re certa con[queri] voluerit, Rex faciet Justiciam.

1307.

Page 246

181

AP E456

A nostre seignur le Roi prie Leuesqe de Duresme qe come diuerses oppressiouns e greuaunces soient faites a lui en countre lestat e la fraunchise de sa esglise de seint Cudbert de Duresme, dount il liura peticions en le dearreyn parlement tenu a Nichole, e feust dilluqes aiourne destre respoundu a Westmoustier' a la quindezeyn de Pasche, qil voil comaunder a soun conseil qe les dites peticions soient oyes e qe dreit lui soit fait.

No endorsement 1316.

Page 247

182

AP 3845

A nostre seignur le Roi et a son conseil moustre son lige Robert de Welle qe come nostre dit seignur le Roi de sa fraunche seignurie et grace eust donez au dit Robert toutes les terres od les appurtenances, fiez et auowesons queux Mahaud sa femme tynt en dowaire, entre queux fiez les auantditz Robert et Mahaud furent seisi du seruise Richard le fuiz Marmeduke du Manoir de Stranton en Hertenesse par assignement de dowaire fait en la Court […] leuesqe de Doresme de la tierce partie du Manoir de Hert, Leuesqe de Doresme qe ore est se est abatuz en dit Manoir, enclamant auer la garde par reson de sa prerogatiue en preiudice nostre seignur le Roi a qi la reuersion de la dite tierce partie apent apres la mort le dit Robert. Et tout soit ce qe nostre seignur le Roi eit mande par bref de Chauncellerie au dit Euesqe qil faist a lauantdit Robert dreiture et reson et autrefoiz et la tierce foiz, ou qil signifiast la cause, et la quarte foiz, ou qil feust pardeuant le Roi et son conseil as vtaues de seint Hiller' derrein passer ou qe le Roi adonqes feust a respoundre sur la busoigne auantdite, as queux mandementz il nad volu respoundre ne venir au iour qe li fu assignez, prie le dit Robert qe pleise nostre seignur le Roi comander atachement sur le dit Euesqe ou qe les ditz Euesqe et Robert soient appellez pardeuant son conseil et qe illoeqes le droit le Roi puisse estre triez et recom'

Endorsed: Habeat breue de attachiamento versus Episcopum quod sit coram Rege secundum processum priorum breuium.

c. 1318.

Page 248

183

AP 2168

A nostre seignur le Roi e a son consail prient les executors Richard nadguers Euesqe de Duresme qe cum autrefoize en le parlement de Euerwik il prierent a nostre seingnur le Roy par peticioun illoqe liure qil le feist dreit de la garde des maners de chastel Bernard, Gaynesford, Quernington, Langneuton' oue les appurtenaunces en Leueschee de Duresme les queus Johan de Baillol e ses auncestres teindrount des predecessors le dit Euesqe Richard par seruice de chivaler, e les queus Maners apres deuyndrent en la seysine le Count de Warrewyk' qi drein Morust, apres qi mort Le dit Eueske Richard fist seysir les dites Maners en noun de garde par le nounage le fiz e le heir le dit Count, des queus nostre seignur le Roy li hosta, par quei il suist par peticioun en le parlement de Nicholle de Remedie auer, La quele fuit enuoie de parlement tauntke en chauncelerie ou le dit Euesqe suwist tauntke il morust, dount les dites executors prierent qe dreit lour fust fait si qil poaynt les dettes le dit Mort aquiter, qe morust ensuaunt son dreit. Dount il prient qil seient responduz a la dite peticioun e qe dreit les soit fait.

Endorsed: Quia Comes tenuit tenementa illa de domino Rege et non de Episcopo et dominus Rex est in possessione custodie predicte, consideratum est quod accio non co[ncedatur] executoribus. Irrotulatur

c. 1319.

Page 249

184

AP 2158

A nostre seignur le Roi et a son counseil mustre Lowys Eueske de Duresme qe come Wauter de Selby tient le Maner de Fellyng oue les apurtenaunces dedenz leuesche de Duresme, ou le dit Eueske ad le Regal et fraunchise et prerogatiue reales par quei il doit auer dedenz le dit Euesche auxi bien forfetoure de guerre come dautres eschetes et ses predecessours ount eu, sicom il pert par fet le Roi le quel nostre seignur le Roi qore est ad conferme, et le dit Wauter sest mys a la foi Robert de Brus en escoce et la demoert come enemy, par quei le dit Eueske seisit le dit Maner de Fellyng' en sa Maine com son dreit et le droit de sa Eglise de seint Cutbert de Duresme par la forfetoure le dit Wauter, et en sa Maine le tient taunqe nostre seignur le Roi le dona par sa chartre a Rauf de Epplynden' et par son visconte de Northumbr' le dit Eueske osta: dount il pri qe remedi et droit lui soit fait.

Endorsed: Soient veues les chartres et ap[pell'] les parties et le Roy certefiez qen est trouez.

Irrotulatur Coram Rege–Herl[aston]

1319 x 1323.

Page 250

185

AP 393

A nostre seignur le Roi prie Rauf' de Epplingdeun', qe come il tient le Manoir de Felling' qe fust a Wauter de Selby, qi est ahertz a vos enemis de Scoce, de doun le dit nostre seignur le Roi par reison de la forfaiture le dit Wauter et le dit Monoir soit tenuz du Priour de Duresme par certeins seruices, et le dit Priour destreint le dit Rauf' pur ascunes seruices qe arere lui sont, a ceo qil dit, auxi bien du temps qe le dit Manoir estoit en la mayn le dit nostre seignur le Roi pur la dite forfaiture come du temps le dit Wauter, qil pleise a nostre seignur le Roi ordiner qe conuenable remedi soit fait au dit Rauf' de la dite destresce.

Endorsed: videtur consilio quod tenens non debet onerari de tempore Regis. Et ideo prosequatur Prior versus dominum Regem pro tempore suo si sibi viderit expedire. Et super hoc habeat tenens breue quod pro tempore Regis non distringatur. Irrotulatur

1319-23.

Page 251

186

AP 4096

A nostre seignur le Roi prie le soen chapelyn Le Euesqe de Durem qe com autre foiz il ly graunta ses coignes pur Monee faire a Durem, e outre .vj. peces qe ly furunt Liuerez pur la dite Monee faire ly graunta il treis peces de sa grace especial que sunt apellez trusseux a la volunte le dist nostre seignur le Roi, si com piert par son bref, les queus ly sont ore detenuz par les Gardeyns de la Monee a La Tour saunz comaundement nostre dist seignur, qe si ly plest voile comaunder qe les treis trusseus auaunditz lui seient liuerez arere, tauntqe par nostre seignur le Roi mesmes seit autre chose comaunde.

Endorsed: Le Roi lad grante tanqe de la Pasqe qe vendra en vn an prochein suiant.

1320.

Page 252

187

AP 4025

A nostre seignur le Roi prie le soen chapelein si li plest Labbe de nostre dame de Euerwyk' qe com vn de ses Moignes oet grante a sire William Ridel, gardein de son chastel Chastel Bernard', ascunes disme por .l. li' issint qil trouast suffisant seurte de la paye, le dit sire William ceo ne voleit et prist les dites dismes a force et armes por la sustenaunce du dit Chastel. Et por ceo sire qe le dit Abbe harreit moult dentagler vos Ministres, prie le dit Abbe a nostre seignur le Roi si li plest, qil li voille de ceo faire remedie. Et tot seit qe le dit trespas fust fait dentz la fraunchise de Duresme,

Page 253

iadumeyns por ceo qil touche le Ministre nostre seignur le Roi, il prie de li remedie si li plest.

Endorsed: Mandetur Willelmo Ridel quod si ita sit, tunc satisfaciat Abbati de debito, Ita quod dominus Rex inde iterato non audiat querelam, adiungendo quod dominus Rex alias mandauit quod decime non caperentur per huiusmodi sustentacionem.

1319-23.

188

AP 5256

A nostre seignur le Roy et a son consail moustre Loys Euesqe de Duresme qe la ou sire Johan de Eure morut a Aukland en Leuesche de Duresme, ou le dit Euesqe est ordenor du lu, et a luy apent com a Ordinaire de sequestrer touz les biens et chateux trouez dedenz sa diocese de gentz qe moerent iloeke taunt qe lur testament soit

Page 254

proue, la vint Richard de Emeldon a qui nostre seignur le Roy auoit faet commission de seisir terres et tenementz, biens et chateux des enemis et rebels nostre seignur le Roy celes parties et a seisir les biens le dit sire Johan iloeqes trouez, le quel sire Johan fu mort iloeke par gentz desconutz saunz estre iloeke atteint: par quai il prie a nostre seignur le Roy qil vueille auoir regard al estat et la fraunchise de seinte Eglise et maunde al dit Richard qil oste sa main et luy rende les biens auauntditz, si qil porra des ditz biens faer ceo qe a Ordinaire apent.

Traces of red seal on face of petition Endorsed: First endorsement obliterated

Por ceo qe Johan de Eure morust denz la franchise leuesqe de Dureme, seit maunde a Lesuesqe qil enquerge coment Johan de Eure morust, et sil fust tue, denquere par qi et coment et en quele manere, et certifie le Roi en Chauncellerie et seit fait droit.

Irrotulatur

1322.

Page 255

190

AP 5384

A nostre seignur le Roi et a soun counseil mustre Lowis Euesqe de Durem' qe come en icoe parlement forfeiture de guere luy seit aiuge come du droit de sa Eglise et autrefoiz fuste aiuge a soun

Page 256

predecessour, par quei briefs sount comaundes as gardeyns des terres forfaites de deinz sa franchise real qil oustait la meyn de par celes Chastel Bernard', le Manoir de Gaynesford et autres terres qe feurent a Count de Warewyk', Hert et Herternesse qe feurent a sire Roger de Clifford', autrefoitz feurent forfaites par la forfaitures sire Johan de Bailliolo et Roberd de Bruys sount deinz mesme la fraunchise, nostre seignur le Roy par resoun de la dit forfaiture vsaunt sa prerogatiue de deyntz la dite fraunchise, la quele prerogatiue est et estre doit al Euesqe de deinz la dite fraunchise come est au Roi de hors, ad seisy les dites terres en sa meyn qe point ne sount tenuz de luy, par quei le dit Euesqe prie audit nostre seignur le Roi qil voil comaunder bref as gardeyns de terres auantdites qil oustont la meyn de celes terres come des autres et suffrir le dit Euesqe auoir et ioyer sa fraunchise, ou le bref le Roi ne doit curer de droit ne nostre seignur le Roi illoques terre seiser.

Endorsed: Porce qe agarde est par le Roi qore est et son conseil en plein parlement qe leuesqe eit sa franchise reale come autrefer fust grante en temps le Roi Henri besael nostre dit seignur le Roi, est acorde qe le Roi ouste la mein de quant qil ad en sa mein par reson de iurisdiccion real, et aussint ses ministres ministrantz en office real.

Irrotulatur

1327.

Page 257

191

AP 15784A

A nostre seignur le Roi et son counsaille moustre Richard' de Emeldon' qe la ou sire Edward' piere nostre seignur le Roi qore est qui dieux garde dona et graunta par sa chartre au dit Richard' le Manoir de Sillesworth' ou les appurtenaunz, issint qe si le dit sire Edward ou ses heires volaient par asqunes causes reprendre le dit manoir en lour meyn del houre qe le manoir entier serra venu en la mayn le dit Richard ou de ses heires, lui ferroient assigner et liuerere trente Liure de terre en lieu couenable, sicom piert par la Chartre dount transescript est cosu a ceste peticoun, et come le manoir entier seit deuenu en la mayn le dit Richard' apres la mort Ide qe fust la femme John le fitz Marmaduke et iea soit ordine en parlement qe totes les terres qe furront seisis en la mayn le roi com forfetes pur la querele le Counte de Lancastre soient restitutz a ceux qe les deuoient, et ceo manoir si fust seisi en la mayn le Roi com tiele forfeture a ceo qil entent: prie le dit Richard' qil ne soit oste dudit manoir encountre la forme de la chartre auantdite ouqe trente Liure de terre lui soient liueres et assignes en lieu couenable solom la tenore de la Chartre auantdite.

Endorsed: Coram Rege et magno consilio

Il nest pas del entencion du counseil qe les terres sire Robert li seient renduz come a cesti qe fut de la querele et le counseil ne li tient my de la querele.

c. 1327-29.

Page 258

192

AP 15785A

A nostre seignur le Roi et a son consail prie Richard de Emeldon qe come sire Edward' piere nostre seignur le Roi granta par sa Chartre la quele nostre seignur dit le Roi ad ia conferme par sa chartre au dit Richard le Manoir de Silkesworth oue les apurtenances en le Euesche de Duresme en partie de allouance de son longe seruice et pertz il ad resceu par la guerre Descoce et a auoir et a tenir au dit Richard' et as ses heirs a touz iours issint qe le dit Richard ne ses heirs ne deuient estre ostetz du dit Manoir auant qe purueu luy feust Trente liures de terre en couenable liu, sicom est contenu en les dites chartres, et ia Sire Robert de Holand' mette debat' en le dit Manoir, qe est en le Euesche de Duresme, par resun dune fin qe se leua en la Court le Euesqe de Duresme, dedenz qe Franchise real le dit Manoir est, entre sire Thomas iaditz Counte de Lancastre et le dit sire Robert, par quele fin le dit Counte conusoit le dit Manoir estre le droit le dit Robert come ceo qil auoit de son doun, et pur cele reconusance le dit Robert granta et rendit le dit Manoir au dit Counte a tenir a terme de sa vie si qe apres le desees le auantdit Counte le dit Manoir returnereit ale auantdit sire Robert et as ses heirs, issint qe le dit Richard' pur ceo debat ne fait mye son profist en le Manoir come deueroit faire: Par quei voilletz si il vous plest

Page 259

ordeyner pur lestat le dit Richard qil et ses heirs poent tenir mesme le Manoir paisiblement.

Endorsed: Por ceo qe tesmoigne est par la peticion qe Richard est seisi du Manoir [du] doun du Roi piere nostre seignur le Roi, et par agard du parlement est acorde qe li dit Richard, ne nul autre qe est seisi des tenementz qe feurent a dit Robert, ne serront mie oforz saunz responce a la commune lei, et adonqes si Richard soit de ceo emplede, il purra estre eide par la chartre le Roi et le Roi se auisera issint qil ne serra mie perdant.

Irrotulatur

c. 1329.

Page 260

193

AP 2121

A nostre seignur le Roi et a son consail mustre Loys, Eueske de Doresme, qe cum il auoit seisi les teres et tenemenz qe furent a Wauter de Selby deinz sa franchise de Doresme cum son droit et le droit de sa eglise par la forfeture le dit Wauter pur ceo qe le dit Wauter aerda a les ennemis descoz, par la par resoun de vn couenant feat entre Robert dunframuile counte Danegos, Rauf de Greystoke et Johan de Eure de vne parte et le dit Wauter dautre parte sur le rendre du chastel de Mitford et qe le dit Wauter ocupa par forz de guere, le quel couenant a ceo qe le dit Wauter ad supose fut qe les ditz Robert, Rauf, et Johan dussent feare le dit Wauter auoir la peas le Roi E[dward] le pier nostre dit seignur le Roi et totes ses teres et tenemenz qe furunt pris en la meine le dit Roi E[dward] le pier pur taunt qil aerda a les ennemis descotz: par la est bref venutz au dit eueske qil liure au dit Wauter totes ses teres et tenemenz les quez il auoit seisiz en sa meine deinz sa franchise auandit par la forfeture le dit Wauter: le quel bref, cum est avis au dit Eueske, est issu en contre ley entaunt qe le couenant feat entre les ditz Robert, Rauf et Johan et Wauter qe furunt estranges audit eueske ne ly doit par ley lier ne ly [t]oller son dreit ne le dreit de sa eglise des ditz teres et tenementz, les ques le dit eueske auoit seisi cum le droit de sa eglise long temps einz ceo qe le dit Wauter ocupa le dit chastel sur le rendre de quel le dit couenant se tailla cum le dit Wauter ad supose: par quoi le dit Eueske pri a nostre seignur le Roi qe mes tiel bref mse en preiudise de ly encontre ley et resoun, le transescrit de quel est cosu a cest.

Endorsed: se ei par voie de respons sil eit droit quant il vendra deuant le Roi ou ailloc' par proces.

^x [x] The transcript is now missing261 1329-31.

Page 261

194

AP 5381

A nostre seignur le Roy et a son conseil mostre Loys Euesqe de Duresme qe come en le primer parlement nostre seignur le Roy qore est tenu a Westm' par sa peticion illoeqes mostree agarde feust qil eust forfaiture de guerre et franchise et droiz reals de deinz les Ewes de Tyne et de Teyse et aillours ou il a franchise reale de deinz sa Eueschee et ses predecessours lount eu come le droit de leglise de seint Cuthbert de Duresme de temps dunt memoyre ne

Page 262

court, et y a son Chaunceler et son bref y court, si qe nostre seignur le Roy par ses Ministres ne de deinz sa dite franchise ne doit terre seisir ne conissance illoeqes auoir de terre ne de tenement, de querele ne de contract, par reyson de iurisdiccion reale si ceo ne soit defaute du dit Euesqe, et en mesme le parlement feust agarde qe pur ceo qe agarde feust illoeqes par le Roy qore est et son conseil qe le dit Euesqe eust sa franchise reale come autrefoitz feust grante au temps le Roy Herry besael nostre seignur le Roy qore est, feust adonqes acorde qe le Roy ostast la mayn de quant qil aueit par reyson de iurisdiccion reale et aussinqes ses Ministres ministranz en office reale, et sur cest endossement feust ordeine bref et mande south' cire a Roger de Mortemer, gardein de Chastel Bernardi et des autres terres et tenementz qe feurent a Guy de Beauchaump' iadis Counte de Warewyk' en leueschee de Duresme ou a son lieu tenant, le transescript de queu bref est attache a ceste peticioun, pur queu bref le gardeyn qe adunqes feust ne fist rien. Par quey il prie au tiel bref au gardein qore est qil oste la mayn, sicome deuant feust agarde.

Endorsed: Pur ceo qe autrefoitz feust accorde en parlement a Westm' lan primer qe leuesqe eust iurisdiccion reale deinz sa franchise auantdite et qe le Roi ostast sa meyn de quanqe il auoit en sa Mayn par reson de iurisdiccion real et auxi ses Ministres Ministrantz en office real et sur ce auoir bref a visconte et autres Ministres le Roi adonqes, eit ore autiel bref as Ministres le Roi qe ore sont.

c. 1332.

Page 263

195

AP 2155

A nostre seignur le Roi et a son conseil moustre Leuesqe de Duresme qe come nostre dit seignur le Roi a son parlement tenuz a Westm' alendemeyn de la Natiuite nostre dame drein passe pur profist du roialme ordeina les estaples destre en son roialme en certeinz lieux et sur ceo ordeina certeinz peinz, forfaits et raunsons vers ceux qe […] rent encontre lordinance auandit, et par la out le dit Euesqe ad et auoir doit la primer conisaunz de chescun maner de contrate, couenant, Trespas fait deinz sa franchise reale et forfaiturs et amercimenz, la ad nostre seignur le Roi reserue deuers lui deuant ces Justices la conisance de tiels forfaiturs, et de ceo ad mande le dit Estatut a le dit Euesqe de crier et fermement garder deinz sa franchise reale, la quele chose est enblemisement de sa franchise: par qoi le dit Euesqe prie a nostre seignur le Roi et a son conseil qe lui plest celes pointz del Estatutz desbarer, issint qil peusse auoir deuant ces Justices la conisanz de trespas de ceux qe vindront encontre lestatut auandit auxi come le Roi doit auoir dehors, si come lui et ces predecessours ont eu de tote temps dedeinz la dit franchise reale en teux ceux cases semblables.

Endorsed: Coram Rege et magno consilio

Le Roi se auisera des choses contenues en ceste peticion.

Page 264

1332-33.

196

AP 2166

Endorsed: Pur ce qil suppose par sa peticion qe monsieur Robert de

Page 265

Clifford' est tenant du Manoir, sue deuers lui par bref a la comune lei.

?1334.

197

AP 394

A nostre seignur le Roy prie son bachelor lige Waltier de Selby, qe come il ad porte diuerse brefs auant ces heures al euesqe de Duresme et a Leuwys nadgaires Euesqe de Duresme son predecessour a deliuerer a lui ses terres deinz sa fraunchise de Duresme solonc' le purport des bref' dont le transescrit est cosu a ceste peticioune, pur queux bref' le dit Euesqe riens nad fait vncore pur ceo qe Thomas Surteys tient mesme les terres du doun Lowyz iadys Euesqe de Duresme predecessour le Euesqe qore est: qe lui pleise dauoir regard aceo qe le dit Waltier est en le seruice nostre dit seignur le Roy en Escoce, et mander au dit Euesqe qil face prendre les dites terres en sa main, et qe il les deliure au dit Wautier issint qe il ne soit plus delae contre reson.

Endorsed: soit vnqore bref mande al Euesqe qil face liuerer les terres selonc lautre mandement ou qil certifie la cause pur qoi il ne le doit faire et outre soit fait proces.

Page 266

1333-36.

198

AP 3660

A nostre seignur le Roy et son conseil pri le son leige bacheler Waltier que come certeins couenances se firent par endenture entre Robert de vmfranuyll nadgairs Counte de Anegos, Rauf de Craistok' adunqe baron de Craistok' et Monsieur Johan de Eure dune part et le dit Waltier dautre part sur le rendit du Chastel de Mitford, cest assauer que le dit Counte, baron, et Johan feroient auer au dit Waltier la pees sire Edward' nadgairs Roy Dengleterre pier le dit nostre seignur le Roy et touz ses terres et tenementz santz deseriteson, queux furont pris en la main le dit pier par reson que

Page 267

fust dit qil estoit ahers a le enemys le dit pier, les quels couenances le dit nostre seignur le Roy ad grante auant ces heures qils soient tenues en touz pointz, et sur ceo ad mande par diuers brefs au viscont de Northumbreland' qil feist deliuerer au dit Waltier touz ses terres et tenementz deins sa baillie, et a Loys nadgairs Euesque de Duresme qil feist deliuerer touz les terres et tenementz le dit Waltier a mesme cele Waltier que furent deinz sa franchise de Durresme, pur ce que meisme celi Waltier vncque ne fust atteint de felonie pur qoi il deueroit forfaire: le quel viscont par vertu du dit mandement deliuera au dit Waltier touz ses terres et tenementz deinz le dit Countee, mes le dit Euesque rien ne voleit faire pur les ditz mandementz et ad done par sa chartre touz les terres et tenementz le dit Waltier deinz la dite franchise auxi come sa eschete, par qoi les couenances auandites ne sont mie tenues deinz la dite franchise: que leur pleise auer regarde al grant trauaille que le dit Waltier ad eu en la seruice nostre dit seignur le Roy et grante al meisme celi Waltier puisse auer ces terres et tenementz deins la dite franchise solonc' les couenances auandites, issint qil ne soit mie deserite.

Endorsed: Sue deuers Leuesque qil lui face droit, et sil ne face adonque sue en Chauncellerie de auoir bref a le Euesque qil lui face droit, et outre sue proces auxi come auant ces houres ad estee vsee.

1336.

Page 271

203

AP 2151

A nostre seignur le Roi et son conseil moustre leuesqe de Duresme qe come lui et ses predecessours de tout temps si bien en temps nostre seignur le Roi qore est come en temps de touz ses progenitours ont tenuz touz lour terres et tenementz deinz lours fraunchises de Norham'shire, Bedlyngton'shire et Halieland en

Page 272

Contee de Northumbr' et de Crayke en le Contee de Euerwyk' quites de tout manere de taxe et de talliage, de nefnismes et quindezismes, come parcelle de lour Roial fraunchise de Duresme entre Tyne et Tese ou […] Count de Pal[at] […] nul bref ne court illoeqes forsqe brief le dit Euesqe, la le viscont de Northumbr' par commandement et garaunt hors de Lescheker [entrent] […] come Ministre nostre seignur le Roi destrent les tenantz le dit Euesqe deinz les franchises susdites de paier la nefnisme des garbes, des tysons et des aigneux la ou tiele nefnisme ne disme ne nul autre manere de taxe ne feust vnqes paie en les lieux susdits: Dount il prie en oeure de Charite en saluacion del droit de sa eglise de seint Cutbert de Dinelme qe lui et ses tenauntz puissent estre deschargez de tieles taxes et talliages qeconqes, qe ne furont vnqes paiez auant ces heures, issint qe sa dite eglise ne soit desherite.

Endorsed: Quant a les terres de Northumbr' qe sont de la Roial franchise de Duresme, soient serchez les remembrances de la Tresorie touchant ceste bosoigne, et enquis sur busoigne la verite ou faus et sur ce le Roi et son cunsoil enfourme, soit autre fait ce qe droit voet.

Quant a les terres de Crayke qe sont deinz les teres du Countee de Eurewyk', paient sicome les autres du Counte si Leuesqe ne puisse moustrere qe les soient enfranches et donent de droit.

c. 1345.

Page 273

204

AP 8627

Pleise a nostre seignur le Roi et son conseil entendre qe come William fiz William de Prendregest [enherite] depar Isabelle sa mere en la ville de Cornhale on Norhamshire deinz la franchise de Duresme […] [on] les Countees de Berewyk et Rokesburgh' a lour foi feust demorant tanqe il estoit del age de trente [ans et plus et] totes les terres auandites deussent apartenir a nostre dit seignur le Roi come sa forfeiture de guerre, queles terres […] dit seignur le Roi et de sa Corone, par quoi pleise au nostre dit seignur le Roi et son conseil pur le droit nostre dit seignur le Roi [sauuer, qe] le grant seal soit fait as certeins gentz et loiaux denquere des choses susdites et lenqueste retourne qe entre […] a faire en sauuacioun du droit nostre seignur le Roi auandit. Responcio patet in dorso

Endorsed: Soient certeins gens dignes de foy et nient suspecciounous assignes denquere sur les pointz contenuz en cestes peticions et lenqueste retourne en Chancellarie outre soit fait droit sibien au Roi come la partie.

1348-51.

Page 274

205

AP 8626

A nostre seignur le Roy pri soun leige hom William de Prendregest qe come William de Prendregast pier mesme ceste William prist a femme vne Isabele de Cornhall, enherite de certeynes terres e tenementz en Cornhall' e deins les franchises de Doresme en Norhamschire, la quel Isabele morust a la foy nostre seignur le Roy, apres le mort le dit William tenant par la curtosy dengleterre senherdy a les enemys descoce, par cause de quel forfaiture Leuesque Lowys graunte par sa chartre meismes les terres avn William de Denum, Supposeunt par sa chartre qe meisme cesti William de Prendregast le fitz au[oit] forfait ensemblement od soun pier ou il fust del agee de septe aunz e vnqes ne forfist, e ou apres la mort William de Prendregast le pier le dit William le fitz porta vn assise de mort de auncestre de la mort la dite Isabele sa mere en la courte leuesqe de Doresme qe ore est a Norham deuer Eadmund' fitz le dit William a Denome e recouery meismes le tenementz del heritage sa mere par veredit dassise e vnqor est tenaunt, sur qoy par feynt sugestioun fait a nostre seignur le Roy bref est issu de seiser meismes lez tenementz en la mayne le Roy par la forfaiture le dit William le fitz: Par qoy pleise a nostre seignur le Roy comaunder Comissioun a qi qe ly plerra pur trier si le dit

Page 275

William le fitz forfist ou noun, issint qe le dit William le fitz ne soit pas oste de sa terre par faus sugestion.

Endorsed: Veignent certeins gentz.

1350-51.

206

AP 4963

A nostre seignour le Roi prie Margarete de Cornale qe ad demore entre ses amis Descoce durant la guer[e comme en]faunt deinz age, qil la voille si li plest graunter bref al Eueske de Dureme et a ses Baillifs de Norham qe eux la facent seisine des tenementz en Cornale od les aprestenaunces dount Johan de Cornhale son piere morut seisi et ele est son prochein heir.

W. de Cotes sequitur istam petitionem

Endorsed: Coram Cancellario Fiat

?post 1348.

Page 276

APPENDIX

Subsequent to the editing of Ancient Petition 10882 in Northumberland Petitions (no 21) new information came to hand. This confirmed the logic of the dating that the contract for [the erection of Staward pele] would suggest [royal] ownership at the date of the agreement, but proved that Edward II did not acquire the site until 22 April 1326, when the pele and half the village of Staward was granted him by Sir Hugh de Louthre. Seisin was given on 24 April, and the same day the contract for repairs was made with Thomas de Fetherstanhalgh after tender by Thomas on 19 April. The terms of the contract were as follows:

Ceste endenture faite a kenilworth le .xxiij. iour Dauerill Lan del Regne nostre seignur le Roi .xix.^me parentre mesme nostre seignur et Thomas de Fetherstanhalgh tesmoigne qe mesme celui Thomas ad empris afaire et reparailler le Peel de Staworth en la forme qe sensuyt: Cest a sauer qil fra faire oyt Rodes de Mur de Pere et de Chauce en certein lieu, et qe mesme le Mur serra de oyt peedz de lee et de vint et qatre peedz de haut od le batailler, et fra auxint de nouel vne porte de fust, bone et couenable en dit peel, od treis estages dont le souerein estage serra bataillez, et il fra le remenant de mesme le Peel de fust de vint et qatre peedz de haut od le batailler. Et qe tote ceste oueraigne serra faite entre cy et la goule Daugst, par vieue et tesmoignance sire Antoigne de Lucy ou de celui qil assignera pur mesmes les oueraignes surueer, et qe nostre seignur le Roi lui trouera merrym. Et pur mesme les coustages faire il prendra de nostre seignur le Roi Cent liures es lieux ou le Tresorier et les Barons del Escheqier lui assigneront a prendre, et ce de temps en temps, solonc ce qe les oueraignes auantdites serront faites par vieue et tesmoignance auantdites: et qil fra garder le dit Peel tantque mesmes les oueraiges soient faites. Et a cestes choses bien et lealment faire le dit Thomas se oblige par ceste endenture. En tesmoignance de queu chose le dit nostre seignur le Roi a Lune parte de mesme ceste Endenture ad mis son priue seal, et le dit

Page 277

Thomas son seal a lautre partie. Don' as lieu, iour et an auantditz.

The documentation was enrolled on the Memoranda Roll of the Exchequer on 29 April 1326 (PRO, E159/102 mm 56, 117). From the petition, now datable to June/July 1326, it appears that like many another speculative builder Fetherstanhalgh had underestimated his costs and was facing ruin par sa fole empris (North'd Pet, p. 25; cf. pp. 14-15). Antony de Lucy had earlier commanded the garrison at Staward in 1316 ibid. 25.

Page 9999

End