Page fol-3r

[C]es sunt les aprises Salamon li sages
Qu’il enseyna a ses amys

Seynors e barons, ore escutez;
Si jo mesprent, si moy amendez.
De tote rens ke fere devez
Primerement vus purpensez
A quel chef vus porez trere:
S’il est bon e s’il est a fere,
S’il est mal si le lessez.
E sor tote rien vus gardez
De jueresce, ce vus pri.
Quant home est juere sachez de fi
S’il ad nule male vice en sun cors
Meyntenant le lerra hors.
E ço ne quident mie lé fous plurus.
Seez bon cristien a tuz jurs
E amez Deu sor tote riens
E a vus en vendra tote biens.

Page fol-3v

E dotet Deu e seynte eglise
E si vus amez li son servise
Le meuz vus avendra tuz jurs.
A tute genz facez onurs
E a femmes nomément,
Kar ço est luy affetement
Du mund dunt home prent plus a gré
E puis que est plus aloé
Kar de femmes venent les pruesces,
Les onurs e les hautesces,
Les biens, les joies a un mot.
Dunt m’est avis il fet ke sot
Ke de eles se feist hair,
Kar ja nel verrez bein chevir.
Amez sen e beauté,
Folie eschuez e peché,
E si ne parlez mie trop,
Ke li janglur est tenu pur sot!

Page fol-4r

E quant vus vodrez ren parler
E vostre resun demustrer,
Gardez qu’il seit vive resun
Sanz mesdire e sanz tensun,
Issi en seirez plus dotez
Ke si vus tuz jors janglissez.
Aquayntez vus a totes gent
E parlez debonerement,
Servez les petiz e les grans
E apernez les neint sachanz.
Allez par tut entre la gent,
Si orrez des plusurs affayteme[n]t
Kar jammés, ço vus affi,
Ne serret de un court ben norri.
Seez de bone cunteynement
E si vus porrez meynement,
Ne trop haut ne trop bas.
Ke l’em ne face de tey gas

Page fol-4v

Pernez garde a totes riens.
Lessez les mals e fetes les bens.
E si nul home te volt mesdire
Ne saillez pas pur ço en ire,
Mes les luy dire sun pleyser,
Kar meuz nel poez honer.
E quant il avera tut cunté,
Il sera pur fol clamé,
E tu pur sage seras tenuz,
E plus amez e plus cremuz.
Li home ky s’en va tensant,
Il tue la gent en parlant;
Mes seluy qui se covere en le quer
De luy si fet home a garder.
E ja ne verrez sages santys
Qe fol k’il ne seit medlys
Amez les armes e les chevaus,
E si vus les avez bons e beaus

Page fol-5r

Ne les donez pas vilement
Cum s’il ke valsissent nient,
Mes si tere devez doner,
Pensez de la emplayer
E si voil ky vus amez par amours,
Kar vus en serrez le plus prus
E plus amerez les nettetez
E les ordures eschuerés.
E plus amerés totes curtesies
E lerez totes vilenies.
Mes de une chose vus gardez:
Que en femme ne vus trop affiez
Por sun valur ne por sun pris
Sanz le cunseil de vos amys.
E gardez ben en vostre vie
Qe vus avancez de vostre amye,
Kar tut porrez perdre sanz fayle
E lez oez e la maille

Page fol-5v

E totes les gentifs femmes de mund
A tuz jours mes vus harrond
E pur sule icele vilanye,
Mes gardez ne la blamez mye.
Si l’em vus done rien ne l’ubliez,
Mes del guerdoner bien pensez,
E por Deu gardez vus ent bien
Ke n’i promettet nule rien
A nully si nel voylez doner,
Kar ço fet luy fol a conforter.
E pur Deu ne vus acustumez
De escharnier home ke vus veez
Tut seit il povere u bosoygnus
N’il ne seit si leaus cum vus
Ne si prus ne si vaylant
Ne si courteys ne si sachant;
Ja por ço ne luy escharnez,
Kar par escharner, ben sachez,

Page fol-6r

Ne serrez alosee ne enhaucez:
Tut tens volt Deu haïr
Ki trop ayment escharnir,
E si serrat luy escharnissor
Escharniez a chef de tur.
E si vus eez cunseil a dire
Nel cuntez pas a home plein de ire,
Mes a celuy vus cunseylez
Ke por bon e leal conussez,
Kar plus k’il conust vostre poer
A dunc vus porra plus tot grever.
E le cunseil de autre si oy avez
Pur ren ke seyt nel descoverez.
Veez que tu ne seez losenjor
Avers amy ne avers seygnor,
E si vus savez lor penser,
Ne pensez pas tut pur eus payer
Par losenger ne par mentir,

Page fol-6v

Que ceste reule ne pot failler,
Ky mentor e losenjor creyt
Sey meymes a bosoyne deceyt,
E ky la losengerye cunte
Sey meymes met tant a honte.
Mes a meuz ke vus saverez
Le plus seyn cunseil lor donez
E s’il seynt dunc corucé,
Aprés le prendrunt mult a gré.
Vos piez e vos mayns en parlant
Ne ne movez taunt ne quant
Fors de la lange sulement.
Parlés encor brevement.
Ore vus doynt Deus omnipotent
De cestes aprises amendement.

End